We have 122 guests and no members online

زانا دڵشاد دزەیی

 

 

 

له‌گه‌ڵ ده‌ستپێكردنی شه‌ڕی پێشمه‌رگه‌ و داعش چه‌ندان گۆرانی و سروود له‌سه‌ر پێشمه‌رگه‌ و كوردستان به‌رهه‌مهات، كه‌ له‌ 40 به‌رهه‌م تێپه‌ڕی كردووه‌، به‌ڵام ئایا ئه‌م سروودانه‌ هێزی مانه‌وه‌یان هه‌یه‌ و توانیوویانه‌ حه‌ماسه‌ت به‌ پێشمه‌رگه‌ بده‌ن یان ته‌نیا نمایشه‌؟ له‌به‌رامبه‌ردا رێكخراوێكی هونه‌ری له‌هه‌ولێر رایده‌گه‌یه‌نێت "به‌هه‌ماهه‌نگی له‌گه‌ڵ وه‌زاره‌تی رۆشنبیری پڕۆژه‌یه‌ك ئاماده‌ ده‌كه‌ین بۆ راگرتنی ژماره‌یه‌كی زۆر له‌م سروودانه‌ له‌كه‌ناڵه‌كان".

له‌م چوار مانگی رابردوودا زۆرترین سروود و گۆرانی سیاسی به‌رهه‌مهات كه‌ ریكۆردی شكاند، به‌ڵام زۆربه‌ی ئه‌م سروودانه‌ كه‌وتنه‌ به‌ر ره‌خنه‌ی شاره‌زایانی بواری موزیك و گۆرانی، كه‌ "به‌زۆری و بۆری" و "به‌رهه‌می نمایشكاری" له‌ قه‌ڵه‌میان ده‌ده‌ن، له‌لایه‌كی دیكه‌شه‌وه‌ رێكخراوی (میرها) بۆ پرسه‌ هونه‌رییه‌كان له‌هه‌وڵی ئه‌وه‌دایه‌ به‌ یاسایه‌ك هه‌ندێك له‌م سروودانه‌ له‌كه‌ناڵه‌كان رابگرن و رێگریش بكه‌ن له‌بڵاوبوونه‌وه‌ی سروود و گۆرانییه‌ك كه‌ ئاستی نزم بێت.

محه‌مه‌د سابیر عه‌لی، سه‌رۆكی رێكخراوی میرها بۆ پرسه‌ هونه‌رییه‌كان به‌ (سڤیل) ـی راگه‌یاند، ئه‌وان له‌گه‌ڵ وه‌زیری رۆشنبیری و لیژنه‌ی پێشمه‌رگه‌ له‌په‌رله‌مانی كوردستان قسه‌یان كردووه‌، دانیشتێكی په‌رله‌ماندا یاسایه‌ك ده‌ربكه‌ن كه‌ كلیپكردن و گۆرانی بۆ پێشمه‌رگه‌ نه‌بێته‌ كارێكی نمایشی و فه‌نته‌لۆس، چونكه‌ محه‌مه‌د سابیر ده‌ڵێت "زۆر له‌م گۆرانی و سروودانه‌ كراون له‌ئاستی پێشمه‌رگه‌ و ئه‌م رووداوانه‌دا نین و خزمه‌تی خۆی هونه‌رمه‌ند كراوه‌ نه‌ك كوردستان و پێشمه‌رگه‌، خۆده‌رخستن بووه‌ به‌پێشمه‌رگه‌، له‌گه‌ڵ ئه‌وه‌شدا به‌رهه‌می باشیش هه‌بووه‌، به‌ڵام به‌په‌نجه‌ی یه‌ك ده‌ست ده‌ژمێردرێن، ئێمه‌ هه‌وڵده‌ده‌ین به‌هه‌ماهه‌نگی وه‌زاره‌تی رۆشنبیری و به‌ڕێز ئاری هه‌رسین به‌رپرسی لیژنه‌ی پێشمه‌رگه‌ له‌په‌رله‌مانی كوردستان لێژنه‌یه‌ك دروست بكه‌ین و ئه‌م كلیپانه‌ رابگرین و له‌داهاتووشدا هه‌ر هونه‌رمه‌ندێك گۆرانی بۆ پێشمه‌رگه‌ دروست بكات ده‌بی به‌چاودێری ئه‌م لێژنه‌یه‌ بێت".

هه‌روه‌ها سه‌رۆكی رێكخراوی میرها گوتیشی "راپرسییه‌كمان كردووه‌ كه‌ 3000 هه‌زار كه‌س به‌شداری كردووه‌، له‌ هه‌رسی پارێزگای هه‌ولێر و سلێمانی و دهۆك ئه‌نجام دراوه‌، كه‌ %93ی ئه‌وانه‌ی به‌شداریان كردووه‌ داوای پێداچوونه‌وه‌ و رێگرتنی ئه‌م كلیپانه‌ ده‌كه‌ن، كه‌ هه‌موو ئه‌وانه‌ به‌ به‌ڵگه‌ ده‌خه‌ینه‌ به‌رده‌ستی لایه‌نی په‌یوه‌ندیدار و %85 وه‌زاره‌تی رۆشنبیری تاوانبار ده‌كه‌ن و %10 هونه‌رمه‌نده‌كان تاوانبار ده‌كه‌ن به‌نه‌بوونی رۆشنبیری". ئاماژه‌ی بۆ ئه‌وه‌شدا ئه‌م لێژنه‌یه‌ی كه‌ دروست ده‌بێت له‌ كه‌سانی مۆسیقی و كلیپساز و شاره‌زا له‌بواری نمایشكاری پێكدێت و ئه‌وان به‌هه‌موو كاره‌كان هه‌ڵده‌ستن و بڕیارده‌ده‌ن ئه‌م به‌رهه‌مه‌ شایانی بڵاوبوونه‌وه‌یه‌ یان نا، ئه‌گه‌ر كلیپه‌كه‌ باش بوو ئه‌وكات لێژنه‌كه‌ خۆی كلیپه‌كه‌ به‌سه‌ر كه‌ناڵه‌كان دابه‌ش ده‌كات".

له‌وباره‌یه‌وه‌ ئاوازدانه‌ر هه‌ڵكه‌وت زاهیر كه‌ چه‌ندین سروود و گۆرانی سیاسی دروست كردووه‌ به‌ (سڤیل) ـی راگه‌یاند "بێگومان زۆری و بۆری هه‌یه‌، به‌ڵام من ده‌ستخۆشی له‌م زۆری و بۆریه‌ش ده‌كه‌م، چونكه‌ هه‌ر هونه‌رمه‌ندێك كار بكات بۆ نیشتیمان ئه‌گه‌ر كاره‌كه‌ی خراپیش بێت به‌ڵام له‌دڵسۆزی و ئینتمای خۆیه‌وه‌ ده‌یكات و ده‌یه‌وێت كارێكی جوان بكات، ئه‌گه‌ر گۆرانیبێژێك به‌ یه‌ك كۆپله‌ بكات و موزیكژه‌نێك به‌ یه‌ك نۆته‌ كارێك بكات من ده‌ستخۆشی لی ده‌كه‌م". هه‌ڵكه‌وت زاهیر پێشی وایه‌ هه‌ر هونه‌رمه‌ندێك كار ده‌كات كاره‌كه‌ی خۆی به‌لاوه‌ جوانه‌، دواجار گوێگر بڕیار ده‌دات كامه‌ كار قبوڵ ده‌كات، "به‌ڵام به‌ بڕوای تایبه‌تی خۆم به‌گشتی رۆڵی هونه‌ر رۆڵێكی زۆر جوان و كاریگه‌ری هه‌بووه‌ له‌م بارودۆخه‌ی كوردستاندا".

هه‌ڵكه‌وت زاهیر باس له‌م سردووی رابن رابن ده‌كات كه‌ له‌ئاوازی خۆی و تێكستی ئه‌بو به‌كر كاروانی و به‌ده‌نگی میره‌ گوتراوه‌ و ده‌ڵێت "هونه‌رمه‌ند كاتێك گۆرانییه‌ك ده‌كات ده‌بی روئیا هه‌بی، من له‌م كلیپه‌دا كارێكمان كرد كه‌ هه‌م حاله‌تی ژیانی ئاسایی نیشان بده‌ین كه‌ خه‌ڵك خه‌ریكی ژیانه‌ و هه‌میش حاڵه‌تی كوڕه‌ پێشمه‌رگه‌كانمان له‌شه‌ڕ كه‌ پارێزگاری له‌م ژیانه‌ی ناو شار ده‌كه‌ن، ئه‌مه‌ ته‌كنكێكی زۆر تازه‌ بوو له‌كلیپی كوردی، من ده‌ستخۆشی له‌ كاك شۆڕشڤان ده‌رهێنه‌ری كلیپه‌كه‌ ده‌كه‌م".

موزیكژه‌ن چه‌تۆ نه‌ورۆز كه‌ دوو به‌رهه‌می سروودی بۆ كوردستان و پێشمه‌رگه‌ به‌شێوه‌ی ئۆكسترا و كۆرال دروست كرد به‌ (سڤیل) ـی گوت "هونه‌رمه‌ندان توانیان شانبه‌شانی پێشمه‌رگه‌كان خه‌بات بكه‌ن و دڵسۆزی خۆیان بۆ نیشتیمان و پێشمه‌رگه‌ دوپات بكه‌نه‌وه‌، به‌م بۆنه‌یه‌وه‌ سروودی باش به‌رهه‌مهات، كه‌ هه‌ندێك له‌م سروودانه‌ به‌ڕاستی شایانی ئه‌وه‌ن ببێته‌ مارشی نیشتیمانی، به‌بڕوای من هونه‌ر له‌م ماوه‌یه‌دا كه‌ كوردستان له‌ شه‌ڕدایه‌ رۆڵێكی زۆر جوانی نیشان داوه‌". له‌گه‌ڵ ئه‌وه‌شدا چه‌تۆ نه‌ورۆز گله‌یی له‌وه‌زاره‌تی رۆشنبیری ده‌كات كه‌ رێگه‌ی داوه‌ هه‌ر كه‌س له‌لای خۆیه‌وه‌ به‌بی سانسۆر سروود بكات و ده‌ڵێت "من چه‌ندین جار داوام كردووه‌ ئه‌وه‌ ئیشی وه‌زاره‌تی رۆشنبیرییه‌ یاسایه‌ك ده‌ربكات سروود و كلیپ با چاودێری بكری و هه‌موو شتێك بڵاونه‌كه‌نه‌وه‌، چۆن ده‌بێت به‌رهه‌مێكی باش و خراپ پێكه‌وه‌ بڵاوبكرێته‌وه‌".

وشیار ئه‌حمه‌د ئه‌سوه‌د، كه‌ رۆژنامه‌نووسێكی بواری هونه‌رییه‌ و هاوكات هونه‌رمه‌ندێكی مۆسیقییه‌، رۆڵی هونه‌ر به‌ "كرچوكاڵ" ده‌بینی و وه‌كو ئه‌وه‌ ئاماژه‌ی بۆ ده‌كات "هونه‌ر ئیشی كرد، به‌ڵام ئیشه‌كان جدی نه‌بوون به‌هێنده‌ی گه‌وره‌یی شه‌ڕه‌كه‌، بۆ نموونه‌ ئه‌م سروودانه‌ی كران زۆربه‌ی كرچوكاڵ بوون، به‌داخه‌وه‌ هه‌ندێك سروود نه‌بێت دانه‌ دانه‌ كاری باشمان بینی، هه‌روه‌ها نه‌مانبینی شانۆیه‌كی جدی له‌سه‌ر ئه‌م باردوخه‌ نمایش بكری، خۆ شانۆ ده‌توانی رۆڵی زۆر گه‌وره‌ و كاریگه‌ر بگێرێت، مێژوو شاهێدی ئه‌مه‌ ده‌دات، بۆ هه‌ر ته‌نیا سروود و گۆرانی". ئه‌و رۆژنامه‌نووسه‌ ده‌شڵێت "به‌بڕوای من ئه‌وه‌ ئیشی سه‌ندیكای هونه‌رمه‌ندانی كوردستان بوو رۆڵ ئه‌وه‌ بگێرێت له‌دروستكردنی و زه‌مینه‌خۆشكردنی بۆئه‌وه‌ی هونه‌رمه‌نده‌ گه‌وره‌كان بێنن و كۆبكاته‌وه‌ كۆنسێرتی بۆ ئه‌نجام بده‌ن بۆ پشتگیری پێشمه‌رگه‌، ته‌نیا سروود و گۆرانی به‌س نییه‌، ئێستا ئه‌گه‌ر ده‌ست پێ بكه‌ن دره‌نگ نییه‌".

سه‌رچاوه‌: سڤیل

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

 

 

 

 

كۆتایی ئه‌م هه‌فته‌یه‌ یه‌ك ساڵ به‌سه‌ر كۆچی دوایی هونه‌رمه‌ند جه‌لال سه‌عید تێپه‌ڕ ده‌بێت، هونه‌رمه‌ندێك هه‌موو ته‌مه‌نێك خۆشیان ده‌وێت، به‌ڵام له‌گه‌ڵ نزیكبوونه‌وه‌ی له‌رۆژی یادكردنه‌وه‌یدا بنه‌ماڵه‌كه‌ی گله‌یی خۆیان له‌م راپۆرته‌ی (سڤیل) ئاشكرا ده‌كه‌ن، كه‌ له‌چاوه‌ڕوانی ئه‌واندا نه‌بووه‌.

جه‌لال سه‌عید ساڵی 1953 له‌ شاری مه‌هاباد رۆژهه‌ڵاتی كوردستان له‌دایكبووه‌ و له‌شاری ره‌واندوزیش ته‌مه‌نی منداڵی به‌ڕێكردووه‌، هه‌روه‌ها له‌سه‌ره‌تای ساڵانی حه‌فتایه‌كاندا ده‌ستی به‌كاری هونه‌ری كردووه‌ و له‌گروپی (كرێكارانی كوردستان)، كه‌ هه‌ریه‌ك له‌هونه‌رمه‌ندان قادر زیره‌ك و نیزام شوكر و عاره‌ب عوسمان و حه‌مه‌جه‌زا له‌هه‌مان گروپدا بوون، تاوه‌كو كۆتایی ته‌مه‌نیشی هه‌ر به‌رده‌وام بوو له‌گۆرانیگوتن له‌تیپی هونه‌ره‌ میللییه‌كان، كه‌ له‌رۆژی 9/12/2013 به‌هۆی نه‌خۆشی شێرپه‌نجه‌ی پرۆستارت كۆچی دوایی كرد و 10 منداڵی له‌دوای خۆی جێشت، سی كوڕ و حه‌وت كچ، ته‌نیا (شه‌ماڵ) كه‌ كوڕی گه‌وره‌ی ئه‌وه‌ كاری هونه‌ری ده‌كات.

هونه‌رمه‌ند شه‌ماڵ كوڕه‌ گه‌وره‌كه‌ی هونه‌رمه‌ند جه‌لال سه‌عیده‌، كارێكی كرد ناوی جه‌لال سه‌عید له‌نێو بنه‌ماڵه‌كه‌یاندا نه‌سڕێته‌وه‌، شه‌ماڵ ئه‌و كاره‌ی بۆ (سڤیل) باس ده‌كات و ده‌ڵێت "له‌دوای كۆچی دوایی باوكم خوا گه‌وره‌ كوڕێكی پێ به‌خشیم كه‌ ئێستا ته‌مه‌نی چه‌ند مانگێكه‌، ناوم ناوه‌ (جه‌لال) بۆئه‌وه‌ی ئه‌و ناوه‌ هه‌میشه‌ له‌نێو ماڵمان بمێنێته‌وه‌، ته‌مه‌نی بگاته‌ چوار پێنج ساڵ من فێری گۆرانیگوتنی ده‌كه‌م و رێگه‌ی باوك و باپیری بگرێته‌وه‌، به‌ڵام له‌كاری هونه‌ری به‌ ناوی (جه‌لال سه‌عید) ناوی دێنین نه‌ك (جه‌لال شه‌ماڵ)، ئینشاڵڵا به‌م ئاواته‌ ده‌گه‌م".

هه‌روه‌ها شه‌ماڵ باسی سی ئاواته‌كه‌ی باوكی ده‌كات، كه‌ ساڵی پار دوو ئاواتی باسكرد و ئاواتی سێیه‌می باس نه‌كرد، ئێستا هه‌ر سی ئاواتی بۆ (سڤیل) باس ده‌كات و ده‌ڵێت "ئاواتی یه‌كه‌می ئه‌وه‌ بوو من ژن بێنم و هاوسه‌ره‌كه‌م ببینی، ساڵانێكه‌ هه‌وڵی له‌گه‌ڵ ده‌دام، به‌ڵام من رازی نه‌ده‌بووم، دواجار كه‌ به‌هۆی نه‌خۆشیه‌وه‌ سه‌ردانی وڵاتی توركیامان كرد له‌وی پێیگوتم شه‌ماڵ گیان كه‌ رۆشتینه‌وه‌ بۆ هه‌ولێر ده‌بی ژن بێنی، سوپاس بۆ خوا هه‌فته‌یه‌ك پێشئه‌وه‌ی باوكم كۆچی دوایی بكات من ژیانی هاوسه‌ریم پێكهێنا، ده‌یگوت تازه‌ من هیچ ئاواتێكم نه‌ماوه‌، هه‌روه‌ها ئاواتی دووه‌می ئه‌وه‌ بوو ئه‌گه‌ر چاك بێته‌وه‌ بچێته‌ عه‌مره‌ بۆ ماڵی خوا، به‌داخه‌وه‌ ئه‌و ئاواته‌ی نه‌هاته‌دی، به‌ڵام ئاواتی سێیه‌م حه‌زم نه‌ده‌كرد باسی بكه‌م چونكه‌ پێم وابوو ئه‌گه‌ر باسی بكه‌م له‌وانه‌یه‌ كه‌سانێك به‌هه‌ڵه‌ تێبگه‌ن وابزانن باوكم حه‌زی له‌ ده‌وڵه‌مه‌ندی بووه‌، به‌ڵام بۆ ئێوه‌ی باس ده‌كه‌م ئه‌ویش ئه‌وه‌بوو مه‌زره‌عه‌ی هه‌بی خه‌ریكی به‌خێوكردنی مریشك و په‌له‌وه‌ر بێت، زۆر حه‌زی له‌ تێكه‌ڵبوون بوو له‌گه‌ڵ په‌له‌وه‌ر، به‌ڵام به‌داخه‌وه‌ ماڵی ئێمه‌ هی ئه‌وه‌ نه‌بوو په‌له‌وه‌ر به‌خێو بكات". ئه‌مه‌ سی ئاواته‌كه‌ی هونه‌رمه‌ند جه‌لال سه‌عید بوو.

"ئه‌گه‌ر مردم تاوه‌كو دوو رۆژ نه‌منێژن، بۆئه‌وه‌ی هه‌موو خه‌ڵك بزانێت". ئه‌وه‌ تاكه‌ وه‌سیه‌تی هونه‌رمه‌ند جه‌لال سه‌عیده‌ كه‌ له‌هه‌مان رۆژی كۆچی دواییدا به‌خێزانه‌كه‌ی گوتووه‌ (شلێر خان) . ئه‌و ده‌ڵێت "به‌ڵام ئێمه‌ رۆژێك هێشتمانه‌وه‌ و مه‌راسیمێكی شایسته‌ و رێكوپێكمان بۆ ئه‌نجامدا و به‌ناو هه‌ولێر گێڕامان وابزانم هه‌موو هه‌ولێر به‌وه‌فاتی ئه‌ویانزانی".

پێنج ساڵه‌ بوو ناوبراو تووشی نه‌خۆشی شێرپه‌نجه‌ی پرۆستارت ببوو، به‌بی ئه‌وه‌ی پێی بزانێت، نه‌شته‌رگه‌ریه‌ك له‌ هه‌ولێر و دووجاریش له‌سه‌ر ئه‌ركی سه‌رۆكی هه‌رێم ره‌وانه‌ی وڵاتی توركیا كرا، له‌وی شه‌ش ده‌رزیان بۆ دانا، شه‌ماڵ ده‌ڵێت "جاری دووه‌م كه‌ رۆشته‌وه‌ بۆ توركیا دكتۆر پێی گوت ده‌بی دوو مانگ بمێنیته‌وه‌، باوكیشم گوتی ویژدانم قبوڵ ناكات دوو مانگ له‌ هۆتێڵ بمێنمه‌وه‌ مه‌سروفاتێكی زۆرم لی بكری و من ده‌چمه‌وه‌. لێره‌ ده‌رزییه‌كمان لێدا زۆر باش بوو، به‌ڵام ده‌رزی دووه‌م هه‌ردوو گورچیله‌ی وه‌ستاند".

بڕیاره‌ له‌ رۆژی 9/12/ هونه‌رمه‌ندانی هه‌ولێر سه‌ردانی گۆره‌كه‌ی بكه‌ن و له‌وی یادی كۆچی یه‌ك ساڵه‌ی بكه‌نه‌وه‌، شه‌ماڵ ده‌ڵێت "ئه‌وه‌ وه‌كو وه‌فایه‌ك بۆ باوكم كه‌ خۆشه‌ویستی هه‌موو هونه‌رمه‌ندان بوو سه‌ردانی گۆره‌كه‌ی ده‌كه‌ن و به‌ڕێوه‌به‌رایه‌تی رۆشنبیری و هونه‌ر به‌م كاره‌ هه‌ڵده‌ستن، ئێمه‌ وه‌كو بنه‌ماڵه‌ی هونه‌رمه‌ند جه‌لال سه‌عید سوپاسیان ده‌كه‌ین، هه‌رچه‌نده‌ ئه‌وان گوتیان له‌به‌ر ئه‌م باردۆخه‌كه‌ی كوردستان مه‌راسیمێكی گه‌وره‌ی بۆ ئه‌نجام بده‌ن".

ئه‌و گله‌یی ته‌نیا له‌ راگه‌یاندنه‌كانی هه‌ولێر و سوپاسی راگه‌یاندنه‌كانی سلێمانی ده‌كات و ده‌ڵێت "چه‌ندین گۆرانی باوكم هه‌یه‌ ته‌واوی نه‌كردبوو من ده‌مه‌وێت تۆماریان بكه‌م هیچ كه‌س و لایه‌نێك نییه‌ پاره‌ت بۆ سه‌رف بكات تاوه‌كو تۆماریان بكه‌م، گۆرانی زۆر خۆشن، هه‌روه‌ها گۆرانییه‌ك هه‌یه‌ من و باوكم پێكه‌وه‌ تۆمارمان كردووه‌، له‌سه‌ر خۆیه‌تی، ئه‌و ده‌ڵی ده‌ڕۆم جێتدێڵم، منیش ده‌لێم چۆن دڵت دێت جێم بێڵی، ئه‌م گۆرانییه‌ كلیپ نه‌كراوه‌، ئه‌گه‌ر ده‌زگاكانی راگه‌یاندن هونه‌ر دۆستن و جه‌لال سه‌عیدیان خۆشده‌وێت بۆ كه‌س په‌یوه‌ندیم پێوه‌ ناكه‌ن بڵێت شه‌ماڵ ئێمه‌ له‌یادی كۆچی سه‌عید ده‌مانه‌وێت گۆرانییه‌كی بۆ كلیپ بكه‌ین و بڵاوی بكه‌ینه‌وه‌، یان به‌رنامه‌یه‌كی تایبه‌تی بۆ بكه‌ن چه‌ند گۆرانییه‌كی ئه‌و بڵێینه‌وه‌، بۆ كه‌س نییه‌؟ به‌ڵام سوپاسی كه‌ناڵه‌كانی سلێمانی ده‌كه‌ین ئه‌وان هه‌میشه‌ باسی جه‌لال سه‌عیدیان كردووه‌ خه‌ڵكی سلێمانی رێز و خۆشه‌ویستییه‌كی زۆر زۆریان بۆ باوكم هه‌یه‌، ئه‌وه‌تا كه‌ناڵی nrt2 له‌سلێمانیه‌وه‌ هاتوون بۆ هه‌ولێر رۆژی 10ی مانگ به‌رنامه‌یه‌كی تایبه‌تی بۆ ده‌كه‌ن راسته‌وخۆ، وا پرۆڤه‌ ده‌كه‌ین گه‌شتێك ده‌كه‌ین به‌نێو گۆرانییه‌كانی باوكم، سوپاس بۆ nrt2 و هونه‌رمه‌ند لوقمان سه‌لیم، كه‌ پێشكه‌شكاری به‌رنامه‌كه‌یه‌".

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

سۆنیا بێتووشی، كچه‌ دیزاینه‌ر و نمایشكارێكی كورده‌ و دانیشتووی تارانه‌، ئه‌و ته‌مه‌نی ته‌نیا 23 ساڵه‌، به‌ڵام به‌رهه‌م و دیزاینه‌كانی له‌سه‌ر ئاستی وڵاتانی ئه‌وروپا نمایش و ده‌فرۆشرێت، سۆنیا له‌م چاوپێكه‌وتنه‌ی له‌گه‌ڵ (سڤیل) ئه‌وه‌ راده‌گه‌یه‌نێت كاره‌كانی ئه‌و له‌كوردستان هیچ بایه‌خێكی پێنادرێت.

سڤیل: ئه‌م جلوبه‌رگانه‌ تۆ نمایشیان ده‌كه‌یت، هه‌مووی له‌ ده‌ستكرد و دیزانی خۆته‌؟

سۆنیا بێتوشی: به‌ڵی هه‌موو ئه‌م جلوبه‌رگه‌ی كه‌ له‌ وێب سایت و په‌یجی خۆم له‌ فه‌یسبووك وێنه‌كه‌یان بڵاوده‌كه‌مه‌وه‌ بۆخۆم دیزیانم كردووه‌ و جاری واهه‌بوو چه‌نده‌ها رۆژ به‌یه‌ك دیزاینه‌وه‌ سه‌رقاڵبوومه‌ و به‌رده‌وام گۆڕانكاریم تێدا كردووه‌ تا به‌سه‌رنجامی به‌دڵی خۆم بووه‌، بابه‌تێك كه‌ پێم خۆشه‌ لێره‌ ئاماژه‌ی پێ بكه‌م ئه‌وه‌یه‌ تائێستا مه‌جبوور بوومه‌ بۆخۆم ببم به‌ مودێلی كۆلێكشنه‌كانم له‌به‌رئه‌وه‌ی كه‌ به‌ربه‌ستی تایبه‌ت هه‌یه‌ بۆ ئه‌نجامی ئه‌م جۆره‌ كارانه‌ و ئه‌سته‌مه‌ ئافره‌تێك بتوانێت و بوێرێت كه‌ ببێت به‌ مودێلی دیزاینه‌كانم بۆ نه‌مایش كردنیان، چه‌ند جاریش داوام لێكراوه‌ وه‌ك مودێل خۆم بۆ برنده‌ به‌ناوبانگه‌كان چالاكیم هه‌بێت، به‌ڵام ئامانجی من ئه‌وه‌یه‌ وه‌ك دیزاینیه‌ریه‌كی به‌ناوبانگی كورد له‌سه‌ر ئاستی جیهان خۆم بناسێنم نه‌وه‌ك مودیه‌لیه‌ك بۆ نمایشكردنی جلوبه‌رگ، تائێستاش چه‌ندجار كاره‌كانم له‌گۆڤاره‌ به‌ناوبانگه‌كانی جیهان وه‌ك (، magazine flawless Vogue italia، fad magazine) بڵاوكرانه‌وه‌، به‌ڵام به‌داخه‌وه‌ له‌به‌رئه‌وه‌ی كه‌ به‌شێوه‌ی پرۆفیشناڵ كۆمپانیای به‌رهه‌مهێنانی جلوبه‌رگمان له‌كوردستان نییه‌ و ته‌نیا جلوبه‌رگ هاوه‌رده‌ ده‌كرێت هه‌ر بۆیه‌ش هه‌ست ده‌كه‌م هونه‌ری من گرینگی پێنادرێت وه‌ك وڵاتانی دیكه‌ی جیهان، هه‌ر ئێستا ده‌بینین وڵاتی توركیا سه‌دان هه‌زار كه‌س له‌كه‌رتی تایبه‌ت و بۆ به‌رهه‌مهێنانی جلوبه‌رگ كار ده‌كه‌ن و راده‌ی داهاتی ئه‌م كاره‌ له‌وڵاتی توركیا زۆر زیاتره‌ له‌داهاتی نه‌وتی چه‌ند وڵات و خه‌ریكه‌ توركیا وه‌ك وڵاتێكی به‌هێز له‌به‌رهه‌مهێنانی جلوبه‌رگ و قوماش له‌جیهان ناوی ده‌رده‌كه‌وێت.

سڤیل: كاری دیزاین چۆن فێربووی و كێ‌ مامۆستات بووه‌؟

سۆنیا بێتوشی: من به‌منداڵی زۆرم له‌بووكی باربی هه‌بوو، هه‌موو خولیای دیزانی جلوبه‌رگ له‌بووكه‌كانم ده‌ستی پێكرد، كاتێك مندناڵ بووم جڵی بووكه‌كانم ده‌گۆڕی و جلی یه‌كترم له‌به‌ر ئه‌وی تریان ده‌كرد، به‌ڵام وای لێهات خۆم به‌ په‌ڕۆ و قوماشی زیادی ناوماڵ ئه‌م شتانه‌ی ده‌ستم ده‌كه‌وت جلوبه‌رگم به‌دڵی خۆم به‌بووكه‌كانم دروست ده‌كرد هه‌ر ئه‌م خۆشه‌ویستییه‌ی بووكه‌كانم بووه‌ هۆی دروستبوونی خۆشه‌ویستی بۆ ئه‌م هونه‌ر و پێشه‌ی لای من، ئێستا وێب سایتێكی تایبه‌تی خۆم هه‌یه‌ كه‌ ئێستا له‌ده‌ستی گۆڕانكاری دایه‌ له‌رێگه‌ی ئه‌م وێب سایته‌وه‌ ئه‌ند ژوورناڵ نێوده‌وڵه‌تی كاره‌كانم بڵاوده‌كرده‌وه‌ تا ئه‌وكاته‌ی كه‌ زانكۆی فه‌یدی له‌نده‌ن منی Scholarships كرد تا بتوانم له‌به‌شی فاشیۆنی ئه‌م زانكۆیه‌ خولی تایبه‌ت به‌فاشیۆن ده‌خوێنم، پێشتریش له‌ئێران به‌كالیۆرسم له‌ سۆفتوێری كۆمپیته‌ر ته‌واوكردووه‌ و شاره‌زاییه‌كی باشم هه‌یه‌ له‌ نووسین و قسه‌كردنی زمانی ئینگلیزی و چه‌ند زمانی دیكه‌.

سڤیل: له‌نمایشه‌كاره‌ به‌ناوبانگه‌كان موعجیب به‌ كێی؟

سۆنیا بێتوشی: له‌ناو نمایشكاره‌ به‌ناوبانگه‌كاندا (باربارا په‌لڤین) و (میرانداكێر) زۆر ستایلیان به‌دڵمه‌ و زیاتر ستریتستیال واتا نمایشی شه‌قامیان زۆرم پێجوانه‌.

سڤیل: ئه‌م جلوبه‌رگانه‌ی كه‌ تۆ دیزاینیان ده‌كه‌ی و نمایشیان ده‌كه‌یت زۆربه‌یان نیمچه‌رووتن، له‌كاتێكدا تۆ له‌وڵاتی ئێران نیشته‌جێی، ئایا تۆ له‌زیندانی كردن و حوكمی ئێران ناترسی؟

سۆنیا بێتوشی: كاری من په‌یوه‌ندی به‌ به‌رهه‌مهێنان و هونه‌ره‌وه‌ هه‌یه‌ و پێم وانییه‌ وه‌ك مه‌ترسی ئه‌ژمار بكرێت بۆ سه‌ر هیچ حكومه‌تێك و به‌رهه‌مه‌كانم و دیزانه‌كانم زیاتر بۆ ده‌ره‌وه‌ی وڵاتی ئێرانه‌ و ئامانجیشم وڵاتی ئێران نییه‌، تائێستا له‌لایه‌ن حكومه‌تی ئێرانه‌وه‌ كێشه‌یان بۆ دروست نه‌كردووم و هیوادارم ئیزن بده‌ن به‌رده‌وام بم و بتوانم رۆژێك له‌رۆژان خۆم ببم به‌كۆمپانیایه‌كی به‌رهه‌مهێنانی جلوبه‌رگ و هه‌نارده‌ی وڵاتانی ئه‌وروپایی بكه‌م و جگه‌ له‌داهات بۆ خۆم بتوانم سه‌دان گه‌نج دامه‌زرێنم و سوودمه‌ند بن له‌ بزنس و هونه‌ره‌كه‌م، ئه‌مه‌ به‌گشتی ئامانجی منه‌ و پێم وانییه‌ حكومه‌تی ئێران كێشه‌ی هه‌بێت له‌گه‌ڵ ئه‌و ئامانجه‌ی من.

سڤیل: كاره‌ دیزاینه‌كانی خۆت ده‌فرۆشی یان ته‌نیا بۆ خۆت دروستیان ده‌كه‌یت؟

سۆنیا بێتوشی: كاره‌كانی من وه‌ك تابلۆیه‌كی نه‌قاشی وان، ئه‌گه‌ر تابلۆیه‌ك كۆپی بكه‌ی نرخێكی به‌رچاوی نابێت، جلوبه‌رگیش به‌مشێوه‌یه‌ ده‌بێت ماوه‌یه‌كی زۆر بیربكه‌مه‌وه‌ و پاشان بیروكه‌ و پلانم دانێم سه‌ر كاغه‌ز و ده‌بێت هه‌وڵ بده‌م كارێكی جیاواز له‌كاره‌كانی پێشووی خۆم و كه‌سانی تر بكه‌م، بۆیه‌ ئه‌م دیزاینانه‌ وه‌ك جلی ئاسایی نابینم كه‌ دانێم بۆ فرۆشتن، به‌رهه‌م و دیزاینه‌كانم به‌برندی وڵاته‌ ئه‌وروپاییه‌كان ده‌فرۆشم و فرۆشتنی ئه‌م دیزاینانه‌م بۆ كاتێك داناوه‌ كه‌ پیر بووم و خانه‌نشینی خۆم به‌فه‌رمی رابگه‌یه‌نم و چیتر دیزاین نه‌كه‌م و به‌داهاته‌كه‌شی هه‌وڵده‌ده‌م كاری خێرخوازی بكه‌م و كه‌سانی خاوه‌ن پێداویستی به‌هره‌مه‌ند بكه‌م له‌به‌رهه‌می ژیانم.

سڤیل: ئێستا تۆ له‌گه‌ڵ كام كۆمپانیا كار ده‌كه‌یت؟

سۆنیا بێتوشی: ئێستا من له‌گه‌ڵ گه‌وره‌ترین كۆمپانیا به‌رهه‌مهێنه‌ره‌كانی جلوبه‌رگ وه‌ك بێهپوش ڤیۆلێت و كۆمپانیای خانه‌ی مۆد كه‌ یه‌كێك له‌گه‌وره‌ترین كۆمپانیاكانی به‌هه‌مهێنه‌ری جلوبه‌رگن له‌ئێران كار ده‌كه‌م، له‌گه‌ڵ به‌رند و كۆمپانی نێوده‌وڵه‌تیش كه‌ له‌سه‌ر ئاستی جیهان به‌ناوبانگه‌ كار ده‌كه‌م كه‌ وه‌ك نه‌هێنی تایبه‌ت به‌كاری خۆم ناتوانم و حه‌زناكه‌م ئێستا ناویان بێنم.

سڤیل: گرانترین جل كه‌ تۆ دروستت كردبێت كامه‌یه‌ و نرخه‌كه‌ی چه‌نده‌؟

سۆنیا بێتوشی: گرانترین جلم بۆ زستانی ئه‌مساڵ دیزاین كردووه‌ كه‌ له‌ پێستی رێلاوی سازم كردووه‌ و نرخه‌كه‌ی 1000 دۆلاره‌.

سڤیل: كه‌واته‌ تۆ له‌ دیزاینه‌ره‌ ده‌وڵه‌مه‌نده‌كانی یان هه‌ژاره‌كان؟

سۆنیا بێتوشی: من له‌و دیزاینه‌رانه‌م كه‌ پاره‌ له‌دیزاینه‌كانی خۆم وه‌رده‌گرم و خۆشحاڵم كه‌ منیش ده‌وڵه‌مه‌ندم.

سڤیل: له‌كوردستان پاره‌ی باشتر هه‌یه‌ و بازاڕ گه‌وره‌تره‌، ئافره‌تانی كوردستان ئاره‌زوویان زۆر زیاتره‌ بۆ جلوبه‌رگی ماركه‌، بۆچی كاره‌كه‌ت ناهێنی بۆ كوردستان كه‌ ده‌توانی زیاتر سه‌ركه‌وتنی گه‌وره‌ به‌ده‌ستبێنی؟

سۆنیا بێتوشی: له‌كوردستان كۆمپانیایه‌كی گه‌وره‌ی وه‌به‌رهێنانی جلوبه‌رگ بوونی نییه‌، كه‌ بتوانی دیزانیه‌كانی من بكڕێت، خۆشبه‌ختانه‌ سه‌رمایه‌ زۆره‌، به‌ڵام به‌داخه‌وه‌ وه‌به‌رهێنان بوونی نییه‌ و وه‌به‌رهێنانی كه‌رتی تایبه‌ت ته‌نیا له‌كڕینی زه‌وی و خانوو و هاورده‌كردنی كالا كۆبۆته‌وه‌.

سڤیل: زیاتر كچانی كام وڵات جلوبه‌رگه‌كانی تۆ ده‌كڕن؟

سۆنیا بێتووشی: زۆر له‌كچانی كورد له‌ وێب سایته‌كه‌ی من جله‌كانم ده‌كڕن و ئێمه‌ش بۆیان ده‌نێرینه‌وه‌ كوردستان، هه‌روه‌ها كچانی كورد له‌ ئه‌وروپا زۆر له‌ جلوبه‌رگه‌كانی من ده‌كڕن، جگه‌ له‌وانه‌ش كچانی ئێران و وڵاته‌ ئه‌وروپییه‌كان جله‌كانم ده‌كڕن.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

به‌رێز حاجی كه‌ سه‌ره‌تای كاركردنی له‌بواری درامای منداڵان و دواتر دراما و فیلم ده‌ست پێكرد، ده‌ركه‌وتن و ناوداری له‌ فیلمی به‌ناز له‌ده‌رهێنانی ره‌فیق نوری په‌یدا كرد، سه‌ره‌ڕای ئه‌وه‌ی له‌بواری ئه‌كته‌ریدا به‌توانا و به‌سه‌لیقه‌ بوو، به‌ڵام كاركردنی له‌بواری میدیای ته‌له‌فزیۆن ئه‌م خانمه‌ ئه‌كته‌ره‌ی له‌بواری هونه‌ری فیلم و دراما دوورخسته‌وه‌ و بووه‌ قوربانی كاری راگه‌یاندن.

وه‌كو به‌رێز خۆی ده‌ڵێت "زۆر حه‌زی له‌بواری فیلم و دراما و ئه‌كته‌ری بووه‌، له‌هه‌مانكاتدا ئاواتی ئه‌وه‌ بوو ببێته‌ بێژه‌ری هه‌واڵه‌كان له‌ ته‌له‌فزیۆن، به‌ڵام كاری راگه‌یاندن و ته‌له‌فزیۆن پتر سه‌رقاڵی كرد و مه‌جالی ئه‌كته‌ری لێ سه‌رنده‌وه‌". هه‌روه‌ها گوتیشی "ئه‌وكاته‌شی كه‌ له‌فیلمی به‌ناز به‌شداری كرد كاربه‌ده‌ستانی ته‌له‌فزیۆن پێیان ناخۆش بوو وه‌كو كچه‌ بێژه‌رێك له‌بواری فیلم ده‌ركه‌وێت".

 

شێنی عه‌زیز ئاكۆ، یه‌كه‌م شاجوانی كوردستان كه‌ پێش چوار مانگ پرۆپاگه‌نده‌ی ئه‌وه‌ی ده‌كرد له‌پێشبڕكێی شاجوانی جیهان وه‌رگیراوه‌ و له‌چاوپێكه‌وتنه‌ رۆژنامه‌وانییه‌كان ئه‌مه‌ی بۆ خۆی و بۆ حكومه‌تی هه‌رێمی كوردستان به‌ ده‌سكه‌وت له‌ قه‌ڵه‌م ده‌دا. به‌هۆی ئه‌مه‌شه‌وه‌ هه‌م راگه‌یاندنه‌كان هه‌م هه‌ندێك لایه‌نی حكومه‌تیشی به‌خۆیه‌وه‌ سه‌رقاڵ كردبوو، له‌وباره‌یه‌شه‌وه‌ له‌لایه‌ن حكومه‌تی كوردستانه‌وه‌ چه‌ندین ئاماده‌كاری بۆ كرا و پشتگیری مادیش كرا، به‌ڵام نه‌ ناوی شێنی نه‌ ناوی كوردستان له‌نێو ئه‌و پێشبڕكێیه‌دا نه‌بوو.

رۆژی 14/11/2014 پێشبڕكێی هه‌ڵبژاردنی شاجوانی جیهان بۆ ساڵی 2014 له‌ له‌نده‌ن به‌ڕێوه‌چوو، كه‌ 124 شاجوان له‌ 124 وڵاتی دنیا به‌شداریان تێدا كرد و كچێكی به‌لجیكی ته‌مه‌ن 22 ساڵ، به‌ناوی (ئه‌نیسا بلۆندین) وه‌كو شاجوانی جیهان دیاری كرا، كه‌ درێژی باڵاكه‌ی 178 سم بوو و له‌لایه‌ن شاجوانی جیهان بۆ ساڵی 2013 (میگان یونگ) ته‌مه‌ن 23 ساڵ، تاجی شاجوانی له‌سه‌ر دانرا.

شێنی ئاكۆ، شاجوانی كوردستان بۆ ساڵی 2012 پێش چوار مانگ ئاهه‌نگێكی له‌هۆتێل رۆتانا ئه‌نجامدا به‌بۆنه‌ی وه‌رگیرانی له‌ پێشبڕكێی ئه‌مساڵی شاجوانی جیهان، كه‌ وه‌كو خۆی رایگه‌یاند، ئه‌و له‌لایه‌ن لێژنه‌ی دادوه‌ری ئه‌م فیستیڤاڵه‌ قبوڵكراوه‌ كه‌ به‌ناوی كوردستانه‌وه‌ به‌شداری له‌م فیستیڤاڵه‌دا بكات، به‌ڵام دوای كۆتایی هاتنی فیستیڤاڵه‌كه‌ وێپ سایتی فیستیڤاڵی شاجوانی جیهان ناوی كچه‌ به‌شداربووه‌كان و وڵاتانی به‌شداربوو بڵاوكرده‌وه‌ و ناوی شێنی و ناوی كوردستان و ته‌نانه‌ت عێراق له‌م پێشبڕكێیه‌دا نه‌بوو.

یه‌كێك له‌ ئاماده‌كارییه‌كانی شێنی كه‌ له‌كوردستان ئه‌نجامیدا به‌ پاڵپشتی حكومه‌ت بڕیتی بوو له‌دروستكردنی فیلمێكی دیكۆمێنتاری له‌سه‌ر ژیان خۆی و دیمه‌نی كوردستان، كه‌ ئه‌مه‌ش بۆ فیستیڤاڵی شاجوانی جیهان ئاماده‌ی كردبوو، به‌ قسه‌ی خۆی هه‌ر شاجوانێك ده‌بێت فیلمێكی ئه‌م جۆره‌ بكات.

هه‌روه‌ها به‌درێژایی له‌م ماوه‌یه‌دا شێنی شریتی شاجوانی جیهانی (miss world) به‌كارهێنا بۆ هه‌موو شوێنه‌كان به‌م شریتی (شاجوانی جیهان) به‌شداری ده‌كرد و ته‌نانه‌ت له‌سه‌ر وێنه‌كانی لۆگۆی حكومه‌تی هه‌رێمی كوردستانی به‌كارهێناوه‌.

له‌چاوپێَكه‌وتنێكی پێشووی له‌گه‌ڵ (سڤیل) شێنی ئاكۆ كه‌ ته‌نیا له‌به‌ر به‌شداریكردنی له‌پێشبڕكێی شاجوانی جیهان ئه‌م چاوپێكه‌وتنه‌ ئه‌نجامدرا و گوتی "گه‌یشتنمان بۆ به‌شداریكردن له‌شاجوانی جیهان یه‌كێك بوو له‌خه‌ونه‌كانم ‌و هه‌ر له‌گه‌ڵ بوونم به‌شاجوانی كوردستان هه‌وڵم بۆ داوه‌، بۆیه‌ دوای هه‌وڵدان ‌و ماندوبوونێكی زۆر، توانیمان وه‌ك (شاجوانی كوردستان 2012-2013) به‌شداری بكه‌ین له‌شاجوانی جیهان 2014، هه‌رچه‌نده‌ له‌سه‌ره‌تادا ده‌بوایه‌ وه‌ك (شاجوانی عێراق) به‌شداری بكه‌ین، به‌ڵام دوای قسه‌كردنێكی زۆر له‌گه‌ڵیان، وه‌ك (كوردستان) قبوڵكراین". هه‌روه‌ها گوتیشی "به‌شداریكردنمان به‌ناوی كوردستان هه‌نگاوی یه‌كه‌می سه‌ركه‌وتنه‌ ‌و ئه‌گه‌ریش بتوانین نازناوه‌كه‌ به‌ده‌ست بهێنین دووه‌مین سه‌ركه‌وتن تۆمار ده‌كه‌ین، كه‌ ئه‌مساڵ له‌مانگی (11 یاخود 12) ـی له‌وڵاتی به‌ریتانیا به‌ڕێوه‌ده‌چێت‌و ئێمه‌ش مانگێك پێش ئه‌وكاته‌ ده‌ڕۆین بۆ شاری له‌نده‌ن".

به‌ڵام به‌پێی زانیارییه‌كانی (سڤیل) له‌رۆژی به‌ڕێوه‌چوونی دیاریكردنی شاجوانی جیهان، شێنی له‌هه‌ولێر بووه‌ نه‌ك له‌نده‌ن، كه‌ سه‌رقاڵی شووقه‌كڕین بووه‌ له‌شووقه‌كانی (پارك ڤیو) به‌بڕی 36 ده‌فته‌ر دۆلاری ئه‌مریكی.

له‌وباره‌یه‌وه‌ (سڤیل) چه‌ند جارێك هه‌وڵیدا قسه‌ی شێنی ئاكۆ وه‌ربگرێت و له‌راپۆرتێكی ئه‌م جۆره‌ش ئاگادار كرایه‌وه‌، به‌ڵام ناوبراو هیچ وه‌ڵامێكی نه‌بوو.

سیروان تۆفیق به‌ڕێوه‌به‌ری ده‌سته‌ی گشتی گه‌شتوگوزاری حكومه‌تی كوردستان به‌ (سڤیل) ـی راگه‌یاند "به‌هیچ شێوه‌یه‌ك ئێمه‌ وه‌كو ده‌سته‌ی گشتی گه‌شتوگوزار هاوكاری مادی (شێنێ) ـمان نه‌كردووه‌ له‌سه‌ر ئه‌وه‌ی كه‌ گوایه‌ ده‌چێته‌ شاجوانی جیهان، ئه‌و هات بۆلای ئێمه‌ داوای پشتگیری كرد، ئێمه‌ش ته‌نیا نووسراوێكمان بۆكرد كه‌ ئه‌وه‌ شاجوانی 2012ی كوردستانه‌، بۆیه‌ ئێمه‌ وه‌كو ده‌سته‌ی گشتی گه‌شتوگوزار ته‌نانه‌ت ئاماده‌ی ئه‌و ئاهه‌نگه‌ش نه‌بووین كه‌ شێنی ئه‌نجامدا له‌هۆتێل رۆتانا". هه‌روه‌ها سیروان تۆفیق ئه‌وه‌شی راگه‌یاند "هه‌ر شاجوانێك له‌ماوه‌ی شاجوانییه‌كه‌یدا گرێبه‌ستێكی له‌گه‌ڵ ئێمه‌ ده‌بێت كه‌ ده‌بی چی بكات و چی نه‌كات، حه‌قی چییه‌ و ئه‌ركی چییه‌، به‌ڵام كه‌ ماوه‌ی شاجوانی ته‌واوبوو ئیتر ئێمه‌ به‌رپرسیار نابین ئه‌و چی ده‌كات و چی ده‌ڵێت".

هه‌روه‌ها تاهیر عه‌بدوڵڵا جێگری پارێزگاری هه‌ولێر له‌ لێدوانێكیدا بۆ (سڤیل) گوتی "ئێمه‌ هاوكاری شێنێمان نه‌كردووه‌ و ئیشی ئێمه‌ نییه‌ هاوكاری كارێكی ئه‌مجۆره‌ بكه‌ین، هه‌روه‌ها به‌ڵگه‌ش له‌به‌رده‌ستدا نییه‌ كه‌ بیسه‌لمێنێت ئێمه‌ هاوكاری ئه‌ومان كردبێت".

له‌وباره‌یه‌وه‌ مافپه‌روه‌ر حوسامه‌دین سه‌رداری له‌لێدوانێكیدا بۆ (سڤیل) ئه‌م كاره‌ی شێنی به‌ سه‌رپێچی وه‌سف ده‌كات و ده‌ڵێت "ئه‌گه‌ر شێنی لۆگۆ حكومه‌تی كوردستانی به‌كارهێناوه‌ به‌بی مۆڵه‌ت ئه‌وه‌ سه‌رپێچییه‌، یان ئه‌گه‌ر مۆڵه‌تی وه‌رگتبی له‌ حكومه‌ت به‌ڵام زانیاری هه‌ڵه‌ی داوه‌ته‌وه‌ حكومه‌ت راستكۆ نه‌بووبێت ئه‌وه‌ش جۆره‌ تاوانێكی دیكه‌یه‌، به‌ڵام هیچیان سزای زایندانی له‌گه‌ڵدا نییه‌، هه‌روه‌ها ئه‌گه‌ر لۆگۆی شاجوانی جیهانی به‌كارهێنابی به‌ درۆ ئه‌وكاته‌ ئه‌وانیش ده‌توانن داوا یاسایی تۆمار بكه‌ن، به‌ڵام ئه‌گه‌ر داواكاری له‌سه‌ر نه‌نووسی كه‌س ناتوانی له‌سه‌ر ئه‌و كاره‌ لێپرسینه‌وه‌ی له‌گه‌ڵ بكات". ئه‌و مافپه‌روه‌ره‌ گوتیشی "پێویسته‌ وه‌زاره‌تی گه‌شتوگوزار و نوێنه‌ری حكومه‌ت له‌وڵاته‌كان به‌م كارانه‌ ئاگادار بن و له‌دروستی و نادروستی كارێكی ئاوا حكومه‌تی لی ئاگادار بكه‌نه‌وه‌".

 

Go to top