We have 90 guests and no members online

سورە مەرگەیی

له‌ كاتی په‌لاماری داعش بۆ سه‌ر كوردستان و داگیركردنی شنگال به‌ ئاشكرا هه‌ست به‌وه‌ ده‌كرا پیلانێك له‌سه‌ر پرسی كورد و ماف و ئازادیه‌ نه‌ته‌وه‌ییه‌كانی هه‌یه‌، بۆ سه‌ركه‌وتنی ئه‌و پیلانه‌ش پارتی دیموكراتی كوردستان به‌ گشتی و به‌ تایبه‌تی سه‌رۆك بارزانی به‌ ئامانج گیران، به‌ڵام هه‌رگیز بیر له‌وه‌ نه‌ده‌كرایه‌وه‌ حزبی كوردی به‌و شێوه‌یه‌ ببێته‌ پێشقه‌تاری ئه‌و پیلانگێڕیه‌.

كاتێ شنگال كه‌وته‌ ده‌ست داعش ره‌وتی دژه‌ كوردایه‌تی هه‌ندێ حزبی كوردی و میدیای به‌ناو سه‌ربه‌خۆی دژه‌ پارتی كه‌وتنه‌ موزایه‌ده‌ی سیاسی، به‌ به‌رنامه‌ و به‌ شێوه‌یه‌كی ئاراسته‌كراو ده‌هۆڵی چه‌واشه‌كاریان ده‌كوتا و تۆمه‌تی ناڕه‌وایان بۆ پارتی هه‌ڵده‌به‌ست، ئه‌وه‌ له‌ كاتێكدابوو داعش له‌ ماوه‌ی چه‌ند رۆژێكی دیاریكراودا سێ پارێزگای عێراقی داگیركردن، به‌وه‌شه‌وه‌ نه‌وه‌ستا هه‌ره‌شه‌ی داگیركردنی به‌غدای پایته‌ختیشی ده‌كرد، سوپایه‌كی ته‌یار و پۆشته‌ به‌ چه‌كی نوێ و ته‌كنۆلۆژیای سه‌رده‌می لێكهه‌ڵوه‌شاند.

به‌ داگیركردنی شنگال دوو غه‌در له‌ كورد و شنگال و شنگالیه‌كان كرا، یه‌كه‌میان: داعش له‌ كوشتنی نێرینه‌ و به‌ غه‌نیمه‌ت بردنی مێینه‌ی ئێزیدیه‌كان درێغی نه‌كرد، ئه‌وه‌ عه‌ره‌به‌ و هه‌ڵگری ڤایرۆسی كۆنه‌خوازییه‌ و له‌وه‌ باشتری لێ چاوه‌ڕان ناكرێ، غه‌دری دووه‌میان: داگیركردنی شنگال و كوشتاری ئێزیدییه‌كان وه‌ك كاره‌ساتێكی نه‌ته‌وه‌یی موزایه‌ده‌ی سیاسی پێوه‌ ده‌كرا، ئازاد كردنیشی دوو سوودی گه‌وره‌ی بۆ كورد و شنگال و شنگالیه‌كان هه‌یه‌، یه‌كه‌میان: تۆڵه‌ كردنه‌وه‌ له‌ داعش و ئازاد كردنی به‌شێك له‌ خاكی كوردستان: دووه‌میشیان: ده‌ركه‌وتن و ئاشكرا بوونی ئه‌و به‌ره‌ پیلانگێڕیه‌ی كه‌ تا ئازاد كردنی شنگال به‌ شاراوه‌یی دژی كورد و ماف و ئازادیه‌ نه‌ته‌وه‌ییه‌كانی له‌ پیلانگێڕیدا بوون.

جه‌له‌ولا و سه‌عدیه‌ له‌ داعشی سوننه‌ سه‌نرانه‌وه‌ و درانه‌ ده‌ست داعشی شیعه‌، ده‌نگ له‌ به‌رد هاتبێ له‌و به‌ره‌ پیلانگێڕیه‌ نه‌هات، ئێستا داعشه‌كه‌ی شیعه‌ له‌و دوو شاره‌دا حاكمی ره‌هایه‌و تاڵان و بڕۆی ماڵه‌ كورده‌كان ده‌كات، رێگری له‌ گه‌ڕانه‌وه‌ی كورد ده‌كه‌ن بۆ سه‌ر زێدی خۆیان و چاو له‌ پێشمه‌رگه‌ش سوور ده‌كه‌نه‌وه‌، ئه‌وانه‌ی ئێستا قسه‌ له‌سه‌ر ئازاد كردنی شنگال و دواڕۆژی ده‌كه‌ن ده‌یانه‌وێ شنگالیش به‌ ده‌ردی سه‌عدیه‌ و جه‌له‌ولا به‌رن، سه‌لاحه‌دین ده‌میرتاش كه‌ تا ئێستاش به‌ كوردییه‌كی سه‌قه‌ت و پڕ هه‌ڵه‌ و په‌ڵه‌ی رێزمانی قسه‌ ده‌كات ده‌ڵێ: شنگال شارێكی عێراقیه‌و پێویسته‌ نه‌گه‌ڕێته‌وه‌ سه‌ر كوردستان و ئیداره‌یه‌كی خۆ به‌ڕێوه‌بردنی تایبه‌تیان هه‌بێ، ئه‌م فه‌رمایشته‌ نامه‌عقووله‌ی ده‌میرتاش له‌و هه‌نگاوه‌ نانه‌ته‌وه‌ییانه‌یه‌ كه‌ هه‌ر چوار وڵاتی داگیركاری كوردستان فه‌رشی سووری بۆ راده‌خه‌ن، به‌ دوای ئه‌ودا باڵی عه‌له‌وی ناو (په‌كه‌كه‌) له‌ قه‌ندیله‌وه‌ وه‌ك لایه‌نێكی ناو پیلانگێڕیه‌كه‌ ده‌نگی نانه‌ته‌وه‌یی هه‌ڵبڕی.

ئێستا كاتی ئه‌وه‌ هاتووه‌ كورد گوته‌نی به‌ڕه‌ له‌سه‌ر هه‌تیوان هه‌ڵده‌مه‌وه‌ و به‌ راشكاوی به‌ره‌ پیلانگێڕیه‌كه‌و ئامانجه‌كه‌یان بخه‌مه‌ روو، به‌ره‌كه‌ پێكهاتووه‌ له‌ رژێمی ئاخوندگه‌ری ئێران، رژێمی به‌شار ئه‌سه‌د، میلیشیای به‌در و خوراسان و ئه‌وانیتر، جه‌میل بایه‌ك و سه‌لاحه‌دین ده‌میرتاش و باڵی ده‌ستڕۆیشتووی ناو یه‌كێتی نیشتیمانی كوردستان، ئامانجیشیان به‌گژداچوونه‌وه‌ی سه‌ربه‌خۆیی كوردستان و ئه‌و هه‌ڵوێسته‌یه‌ كه‌ باس له‌ دامه‌زراندنی ده‌وڵه‌تی كوردی ده‌كات، بۆ ئه‌وانه‌ش كه‌ نایانه‌وێ بڕوا بكه‌ن ئه‌و به‌ڵگانه‌یان ده‌خه‌مه‌ پێش چاو.

له‌ كه‌س شاراوه‌ نییه‌ كه‌ ئێران و سوریا و میلیشیاكانی شیعه‌ی عێراق دژی دامه‌زراندنی ده‌وڵه‌تی كوردین، چونكه‌ به‌ دامه‌زراندنی ده‌وڵه‌تی كوردی پێگه‌ی سیاسی و سه‌ربازی و ئابووریان لاواز ده‌بێ، به‌وه‌ش شه‌ڕه‌ مه‌زهه‌بیه‌كه‌ ده‌دۆڕێنن و له‌ به‌رامبه‌ر سوننه‌ تێكده‌شكێن، باڵه‌ عه‌له‌ویه‌كه‌ی ناو په‌كه‌كه‌ و ده‌میرتاشیش وه‌ك كلكی ئه‌و باڵه‌ بڕوایان به‌ ده‌وڵه‌تی كوردی نییه‌ و خۆیان به‌ دامه‌زراندنی كۆمه‌ڵگه‌ی دیموكراتیكه‌وه‌ سه‌رقاڵ كردووه‌، باڵه‌ ده‌ستڕۆیشتووه‌كه‌ی ناو یه‌كێتیش بۆ ئه‌وه‌ چۆته‌ ناو پیلانگێڕیه‌كه‌ تا په‌نایه‌ك بۆ به‌گژداچوونه‌وه‌ و ترساندنی نه‌یاره‌ ناوخۆییه‌كانی درووست بكات و له‌ ململانێكاندا به‌ سه‌ریاندا زاڵبێ، هه‌ر ئه‌وه‌ش وایكردووه‌ ئه‌و باڵه‌ ده‌ستڕۆیشتووه‌ له‌ لایه‌ن هه‌ڵسووڕێنه‌ری به‌ره‌ی پیلانگێڕیه‌كه‌ به‌ هێڵی سوور ناو ببرێ.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

دوای حه‌وت مانگ له‌ چاوه‌ڕوانی و مشتومڕی سیاسی و گه‌وجاندن و خافڵاندن و خڵه‌تاندنی خه‌ڵك، گۆڕان و یه‌كێتی گه‌ڕانه‌وه‌ سه‌ر سیسته‌مه‌ كۆن و سواوه‌كه‌ی دوو ساڵ بۆ تۆ و دووه‌كه‌ی تر بۆ من.

دوای موزایه‌ده‌ و منه‌تێكی زۆر به‌سه‌ر خه‌ڵكی سلێمانی و به‌ دێوه‌زمه‌كردنی یه‌كتری، یه‌كێتی و گۆڕان رێككه‌وتن كێكی ده‌سه‌ڵات و به‌رژه‌وه‌ندیه‌ سیاسیه‌كانیان بكه‌ن به‌ دوو كه‌رتی وه‌ك یه‌كه‌وه‌.

دوای ناوزڕاندن و هه‌ڵدانه‌وه‌ی كۆنه‌ فایل و جنێوباران كردن و ته‌نانه‌ت په‌لاماردانی كه‌سایه‌تی یه‌كتریش، به‌ ئاماژه‌یه‌كی حزبی دۆسیه‌ی دادگا داخرا و مه‌له‌فی گه‌نده‌ڵی پێچرایه‌وه‌، هه‌ڤاڵ و ئاسۆ وه‌ك دوو هه‌ڤاڵ رووه‌و یه‌ك ئاسۆ وه‌رگه‌ڕان.

یه‌كێتی ده‌یگوت: له‌به‌ر هه‌یبه‌تی سلێمانی ناهێڵین كۆنه‌ به‌عسییه‌ك ببێته‌ پارێزگار، گۆڕانیش ده‌یگوت: وه‌رزی گه‌نده‌ڵی به‌سه‌ر چووه‌ و پاكتاوی گه‌نده‌ڵكاران ده‌كه‌ین، به‌ڵام له‌سه‌ر ئه‌وه‌ رێككه‌وتن دوو ساڵی یه‌كه‌م یه‌كێتی پارێزگار و دوو ساڵی دووه‌م گۆڕان پارێزگار بێ، به‌و رێككه‌وتنه‌ش نه‌ هه‌یبه‌تی سلێمانی پارێزرا و نه‌ پاكتاوی گه‌نده‌ڵكارانیش كرا، ئێستا پرسیاری گرنگ بۆ یه‌كێتی ئه‌وه‌یه‌: بۆچی یه‌كێتی له‌ دوو ساڵی یه‌كه‌مدا ئه‌وه‌نده‌ پێداگری له‌سه‌ر پاراستنی هه‌یبه‌تی سلێمانی ده‌كرد و له‌ دوو ساڵی دووه‌مدا ئاماده‌یه‌ هه‌یبه‌ت و شكۆی سلێمانی به‌ شكاندن بدات؟ ئه‌و پرسیاره‌ش له‌ گۆڕان ده‌كرێ: بۆچی ته‌مه‌نی وه‌رزی گه‌نده‌ڵیان بۆ دوو ساڵی تر درێژ كرده‌وه‌ و هه‌ڵمه‌تی پاكتاوی گه‌نده‌ڵكارانیشیان بۆ دوو ساڵی تر دواخست؟ وه‌ڵامی ئه‌و دوو پرسیاره‌ بۆ خه‌ڵكی كوردستان جێدێڵم و ده‌گه‌ڕێمه‌وه‌ سه‌ر پێداگری یه‌كێتی له‌سه‌ر وه‌رگرتنی پۆستی پارێزگار له‌ دوو ساڵی یه‌كه‌مدا.

داوای نه‌گۆڕ و پێداگری یه‌كێتی له‌سه‌ر وه‌رگرتنی پۆستی پارێزگار له‌ دوو ساڵی یه‌كه‌مدا و به‌ستنه‌وه‌ی به‌ پاراستنی هه‌یبه‌تی سلێمانی پرسیاری ئه‌وه‌ درووست ده‌كات: ئایا له‌ دوو ساڵی دوومدا پۆستی پارێزگار راده‌ستی هه‌ڤاڵ ئه‌بوبه‌كر ده‌كرێ؟ ئه‌گه‌ر ئه‌و پێداگریه‌ی یه‌كێتی به‌ راستی بۆ پاراستنی هه‌یبه‌تی سلێمانی بێ! ئه‌وا نابێ له‌ دوو ساڵی دووه‌میشدا پۆستی پارێزگار راده‌ست بكا و هه‌یبه‌تی سلێمانی به‌ شكاندن بدات.

خۆ ئه‌گه‌ر یه‌كێتی گوته‌نی هه‌یبه‌تی سلێمانی به‌وه‌ بشكێ كه‌ كۆنه‌ به‌عسییه‌ك ببێته‌ پارێزگاری، ئه‌ی بۆچی هه‌یبه‌تی به‌وه‌ ناشكێ كه‌ هه‌مان كۆنه‌ به‌عسی ببێته‌ سه‌رۆكی ئه‌نجوومه‌نه‌كه‌ی؟َ! ئه‌وه‌ش ئه‌وه‌مان پێده‌ڵێ كه‌ پۆستی پارێزگار تا هه‌ڵبژاردنێكی تر لای یه‌كێتی نیشتیمانی ده‌مێنێته‌وه‌، چونكه‌ ئه‌وه‌ی كه‌مێك له‌ سیاسه‌تی یه‌كێتی نیشتیمانی كوردستان شاره‌زابێ، ئه‌وه‌ی له‌ گه‌مه‌ و لۆفه‌ و ده‌ورانی سیاسی یه‌كێتی نیشتیمانی به‌ ئاگابێ، له‌وه‌ ده‌گات كه‌ ئه‌وه‌ی یه‌كێتی بۆ وه‌رگرتنه‌وه‌ی پۆستی پارێزگار كردی پاراستنی هه‌یبه‌تی سلێمانی كردبووه‌ بیانوو، ئه‌گه‌رنا ده‌ركه‌وت ئه‌وه‌نده‌ی له‌ خه‌می پاراستنی هه‌یبه‌تی ده‌سه‌ڵات و به‌رژه‌وه‌ندی حزبی خۆی بوو، ئه‌وه‌نده‌ مه‌به‌ستی پاراستنی هه‌یبه‌تی سلێمانی نه‌بوو، بۆیه‌ ده‌بێ سلێمانی و سلێمانییه‌كان، گۆڕان و گۆڕانخوازه‌كان، هه‌ڤاڵ و هه‌ڤاڵه‌كانی ئه‌و راستییه‌ باش بزانن كه‌ هه‌ڤاڵ نه‌ك دوای دوو ساڵی تر، به‌ڵكو دوای چوار دوو ساڵی تریش نابێته‌ پارێزگار، چونكه‌ شینی یه‌كێتی بۆ وه‌رگرتنه‌وه‌ی پۆستی پارێزگار ته‌نها بۆ دوو ساڵی یه‌كه‌م نییه‌ و دوای ته‌واو بوونی نۆره‌ی خۆی، سیاسه‌تی كات كوژی ده‌گرێته‌ به‌ر و كێشه‌ و بیانووی تر درووست ده‌كات، ئه‌گه‌ر وا نییه‌ جیاوازی له‌ نێوان دوو ساڵی یه‌كه‌م و دوو ساڵی دووه‌م چییه‌؟ بۆچی له‌ دوو ساڵی یه‌كه‌مدا هه‌یبه‌تی سلێمانی ده‌شكێ و له‌ دوو ساڵی دووه‌مدا ناشكێ؟ ئه‌گه‌ر مه‌به‌ستیش پاراستنی شكۆ و هه‌یبه‌تی سلێمانی بێ، وه‌ك پێشتر ئاماژه‌م بۆ كرد بۆ هه‌یبه‌ت شكاندنی سلێمانی جیاوازی له‌ نێوان پۆستی پارێزگار و پۆستی سه‌رۆكی ئه‌نجوومه‌نی پارێزگا چییه‌؟

 

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

یه‌كێك له‌ خه‌سڵه‌ت و تایبه‌تمه‌ندیه‌ جوانه‌كانی سه‌ركرده‌ و كه‌سانی سیاسی ئه‌وه‌یه‌ ددان به‌ هه‌ڵه‌كانیدا بنێ و نه‌گه‌ڕێته‌وه‌ سه‌ریان، مام جه‌لال سكرتێری گشتی یه‌كێتی نیشتیمانی كوردستان و سه‌رۆك كۆماری پێشووی عێراق، یه‌كێكه‌ له‌و سه‌ركرده‌ و سیاسیه‌ ناودارانه‌ی ئه‌و خه‌سڵه‌ت و تایبه‌تمه‌ندیه‌ی تێدابوو، كاتێك له‌به‌رده‌م میدیكان راشكاوانه‌ باسی له‌ هه‌ڵه‌ی خۆی كرد و په‌شیمان بوونه‌وه‌شی ده‌ربڕی، جگه‌ له‌وه‌ش له‌ زیاره‌تی سه‌ر گۆڕی بارزانی نه‌مر له‌ ده‌فته‌ری یاداشته‌كاندا نووسیویه‌تی (تاكه‌ شتێك لێی په‌شیمان بم ئه‌وه‌یه‌ كه‌ له‌ مه‌لا مسته‌فا جیا بوومه‌وه‌) ئه‌وه‌ش ئه‌و راستییه‌ ده‌رده‌خات كه‌ ئه‌وه‌ی به‌ناوی بیره‌وه‌ری و نووسینه‌وه‌ی مێژوو له‌سه‌ر بارزانی نه‌مر نووسراوه‌ و گوتراوه‌، ده‌ربڕینی رق و كینه‌ی سیاسی و مه‌به‌ستدارن و هیچ نرخ و به‌هایه‌كیان نییه‌، چونكه‌ به‌و په‌شیمان بوونه‌وه‌یه‌ په‌رده‌ی له‌سه‌ر ئه‌و پیلانه‌گێڕیه‌ لادا كه‌ هه‌ندێ كه‌س به‌ ده‌ست له‌ پشتدانی موخابه‌رات و رشتنی كۆنه‌ قین، له‌ هه‌وڵی چه‌واشه‌كردنی ئه‌و مێژووه‌ نه‌ته‌وه‌ییه‌ دابوون كه‌ بارزانی نه‌مر ئاراسته‌ی خه‌باتی رزگاری نیشتیمانی پێگۆڕی.

جیاوازی هه‌ڵه‌ی سه‌ركرده‌ و سیاسییه‌كان له‌ كه‌سانی ئاسایی له‌وه‌دایه‌: كۆمه‌ڵگا باجی هه‌ڵه‌كانیان ده‌دا و زۆر جاران ماڵوێرانی و كاره‌ساتیشی لێده‌كه‌وێته‌وه‌، من نامه‌وێ باسی لێكه‌وته‌كانی هه‌ڵه‌كه‌ی جه‌نابی مام جه‌لال بكه‌م، چونكه‌ به‌ په‌شیمان بوونه‌وه‌ی هیچی بۆ ئێمه‌ومانان نه‌هێشتۆته‌وه‌ تا لێی بدوێین، ئه‌وه‌ی مه‌به‌ستمه‌ بیخه‌مه‌ڕوو به‌و په‌شیمان بوونه‌وه‌یه‌ ئازایه‌تی و گه‌وره‌یی نواندووه‌و ئامۆژگاریه‌كی نه‌ته‌وه‌ییشی بۆ شوێنكه‌وتوانی جێهێشتووه‌، چونكه‌ ئه‌و په‌شیمان بوونه‌وه‌یه‌ سه‌ره‌تایه‌كه‌ بۆ ده‌رخستنی راستییه‌كان و له‌قاودانی ئه‌و چه‌واشه‌كاریانه‌ی كه‌سانێك له‌ رێگای گه‌وجاندنی خه‌ڵكه‌وه‌ ویستیان پێگه‌ی سیاسی خۆیانی پێ به‌هێز بكه‌ن، خاڵێكی گرنگی تری ده‌ركه‌وتنی راستییه‌كان و له‌قاودانی چه‌واشه‌كاریه‌كان له‌وه‌دابوو روانینێكی هاوبه‌شی بۆ پرسه‌ نه‌ته‌وه‌یی و نیشتیمانیه‌كان درووست كرد.

جیابوونه‌وه‌ی تاڵه‌بانی له‌ بارزانی نه‌مر هه‌ڵه‌یه‌ك بوو له‌ سه‌رده‌می خۆیدا یه‌كێتی نه‌ته‌وه‌یی كه‌رت كرد و یه‌كهه‌ڵوێستی و خه‌باتی هاوبه‌شی خسته‌ ژێر گوشاری داموده‌زگا موخابه‌راتیه‌كانی دوژمنان، به‌وه‌ش زیانی زۆری به‌ بزووتنه‌وه‌ی رزگاریخوازی كورد گه‌یاند، جا ئه‌گه‌ر هه‌ڵه‌كه‌ی جێگای ره‌خنه‌ و سه‌رزه‌نشتی مێژوو بێ، ئه‌وا په‌شیمان بوونه‌وه‌كه‌ی له‌ ئێستادا جێگای ستاییش و ده‌ست خۆشییه‌، چونكه‌ له‌كاتێكی زۆر هه‌ستیاردا هاوكارێكی باش بوو بۆ رێكخستنی ناوماڵی كورد و پێداگریه‌كانی سه‌رۆك بارزانی له‌سه‌ر پاراستنی ده‌ستكه‌وته‌كان و به‌ده‌ستهێنانی ماف و ئازادیه‌ نه‌ته‌وه‌ییه‌كانی تر.

جیابوونه‌وه‌ی تاڵه‌بانی له‌ بارزانی نه‌مر و په‌شیمان بوونه‌وه‌ی ده‌كرێ دڵسۆزان و شوێنكه‌وتوانی وه‌ك ئامۆژگارییه‌كی سیاسی و نه‌ته‌وه‌یی وه‌ریبگرن و پابه‌ند بن پێیه‌وه‌، چونكه‌ چوونه‌ ژێر ئه‌و به‌رپرسیارێتییه‌ مێژووییه‌ بۆ شوێنكه‌وتوانی ئامۆژگارییه‌كی به‌هاداره‌و پێویسته‌ به‌ هه‌ندی وه‌ربگرن، به‌ تایبه‌تیش له‌ ئێستادا كه‌ كورد له‌ هه‌موو كاتێك زیاتر پێویستی به‌ رێبازی بارزانی نه‌مر هه‌یه‌، ئه‌و رێبازه‌ی كه‌ تاڵه‌بانی دوای چه‌ندین ده‌یه‌ له‌ جیابوونه‌وه‌ی په‌شیمانی راگه‌یاند و خۆزگه‌ی ئه‌وه‌ی خواست لێی جیا نه‌بوایه‌وه‌، ئه‌وه‌ش ئه‌ركێكی نه‌ته‌وه‌یی ده‌خاته‌ سه‌ر كه‌سه‌ نزیك و ده‌ست رۆیشتووه‌كانی بنه‌ماڵه‌كه‌ی و له‌ هه‌موو كه‌س زیاتر پێویسته‌ كه‌ڵك له‌ ئامۆژگاریه‌كه‌ی وه‌ربگرن، به‌وه‌ش ده‌توانن خزمه‌تێكی باشتری پرسه‌ نه‌ته‌وه‌یی و نیشتیمانیه‌كان بكه‌ن و یه‌كێتیش له‌ ئه‌گه‌ری دووباره‌ كه‌رت بوونه‌وه‌ بپارێزن.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

مرۆڤه‌كان چ به‌ تاك و چ به‌ كۆ، یان وه‌كو حزب و له‌ شێوه‌ی ده‌سته‌ و گرووپی سیاسیدا هه‌ڵگری هه‌ر فكره‌ و ئایدیا و بیروبۆچوونێك بن، خۆیان وه‌ك فریشته‌ و پارێزه‌ری ئازادی ده‌رده‌خه‌ن، دیكتاتۆر و شۆڤێنییه‌كان، دیموكراتخواز و رادیكاڵه‌كان، چه‌پ و راست و ماركسییه‌كان، ئیسلامی سیاسی به‌ میانڕه‌و و توندڕه‌و و تیرۆریستیه‌وه‌، له‌ وتار و بانگه‌شه‌ی به‌دیهێنانی ئازادیدا ده‌چنه‌وه‌ پاڵ یه‌ك، جا ئه‌گه‌ر هه‌موو ئه‌وانه‌ ئازادیخواز و داكۆكیكار و پارێزه‌ری ئازادی بن، ده‌بێ كێ بن ئه‌وانه‌ی ئازادی زه‌وت ده‌كه‌ن؟ له‌كاتێكدا زۆرینه‌ی مرۆڤه‌كان له‌ دونیادا بێ نوای ئازادین و شه‌ڕی به‌ده‌ست هێنانی ده‌كه‌ن.

دیكتاتۆره‌كان بازنه‌یه‌ك به‌ ده‌وری پاراستنی ده‌سه‌ڵاتی خۆیاندا ده‌كێشن و ناویان ناوه‌ ئازادی و ده‌رچوون له‌و بازنه‌یه‌ به‌ ده‌رچوون له‌ خولگه‌ی ئازادی ناو ده‌به‌ن، شۆڤێنیه‌كان جیاوازیه‌كان قڕده‌كه‌ن و گۆرانیش بۆ ئازادی ده‌ڵێن، چه‌پ و ماركسیه‌كان سه‌روه‌ری و دابین كردنی ئازادی كۆمه‌ڵگا له‌ زاڵكردنی چینێكی دیاریكراودا ده‌بینن و خۆشیان به‌ نوێنه‌ری ئازادیخوازان ناو ده‌به‌ن، باڵ و ده‌سته‌ و گرووپه‌ جیاوازه‌كانی ئیسلامی سیاسیش درێژی و كورتی ریش و سمێڵ و پۆشاك و خواردن و خواردنه‌وه‌ش بۆ كۆمه‌ڵگا دیاری ده‌كه‌ن و پێشیان وایه‌ ئازادی نه‌مامێكه‌ و له‌ باخچه‌ی ته‌لبه‌ندكراوی ئه‌واندا نه‌بێ ناڕسكێ.

گه‌وره‌ترین مه‌ترسی بۆ سه‌ر ئازادی و فراوان بوونی پانتاییه‌كه‌ی گونجاندنی بنه‌ماكانی ئازادییه‌ له‌گه‌ڵ فكره‌ و بیروبۆچوونێكی دیاریكراو، چونكه‌ هه‌ر كاتێك ئه‌وه‌ روویدا ئازادیه‌كان له‌ ده‌ره‌وه‌ی خواستی جیاوازیه‌كان له‌ قالب ده‌درێن و تاقمێكی دیاریكراویش ئازادیه‌كان له‌ چوارچێوه‌ی پاراستنی به‌رژه‌وه‌ندیه‌كانیدا قۆرخ ده‌كات، به‌وه‌ش ره‌وتی دژكاری سه‌رهه‌ڵده‌داو ماف و ئازادی سیاسی و دینی و مه‌زهه‌بی و جیاوازی نه‌ته‌وه‌یی ده‌كه‌ونه‌ ژێر هه‌ره‌شه‌ و گوشاری هێز و باڵاده‌ستی، هه‌ر وه‌ك ده‌سته‌ و گرووپه‌كانی ئیسلامی سیاسی و دیكتاتۆر و شۆڤێنیه‌كان كاری بۆ ده‌كه‌ن و پێشتریش چه‌پ و ماركسییه‌كان وایان ده‌كرد، بۆیه‌ ده‌بێ بزانین كه‌ دوژمنانی ئازادی به‌رده‌وام ئازادی ده‌كه‌نه‌ ئامرازێك بۆ زه‌وتكردنی ئازادی، واتا له‌ سه‌نگه‌ری ئازادیه‌وه‌ په‌لاماری ئازادی ده‌ده‌ن و دوای گه‌یشتنه‌ ده‌سه‌ڵاتیش چه‌ندین هێڵی سوور له‌به‌رده‌م ئازادی ده‌كێشن، لێره‌دا ئه‌و پرسیاره‌ دێته‌ پێشێ: كێن ئه‌وانه‌ی ئازادی ناكه‌نه‌ كۆت و به‌ندی ئازادی؟

كاتێ تێگه‌یشتن له‌ چه‌مك و مانای ئازادی كه‌وته‌ ژێر كاریگه‌ری پاراستنی به‌رژه‌وه‌ندی و هه‌یمه‌نه‌ی ئه‌م لایه‌ن و ئه‌و لایه‌ن، ئازادی ده‌بێته‌ به‌شێك له‌ مه‌رامی چاوچنۆكی و تاكڕه‌وی سیاسی، ئه‌وكاته‌ش جگه‌ له‌ سته‌مكاری و زه‌وت كردنی ئازادیه‌كان شتێك نامێنێ پێی بگوترێ ئازادی، هه‌ر بۆیه‌ش ئه‌و لایه‌نانه‌ی به‌و شێوه‌یه‌ له‌ چه‌مك و ماناكانی ئازادی گه‌یشتوون، ئامانجێكی ناڕوونیان هه‌یه‌ و زیاتر پشت به‌ تاكتیكی رۆژ ده‌به‌ستن، ئازادیه‌كان له‌ هه‌ناوی به‌رژه‌وه‌ندی خۆیاندا ده‌گوشن و ئازادیخوازانیش به‌ یاخی و دژه‌ یاسا ناوده‌به‌ن، بۆ سه‌پاندنی ئه‌و رایه‌ش هه‌موو رێگاكان تاقی ده‌كه‌نه‌وه‌و به‌رده‌وام له‌ هه‌ڵوێست گۆڕكێدان، به‌ڵام ئه‌وانه‌ی ئازادیخوازن و شه‌ڕی به‌ده‌ستهێنانی ئازادی ده‌كه‌ن، پێچه‌وانه‌ی زه‌وتكارانی ئازادی ئامانجیان روونه‌و خاوه‌ن هه‌ڵوێستی نه‌گۆڕن، هێز و بوون و به‌رژه‌وه‌ندی خۆیان له‌ دابینكردنی ئازادیدا ده‌بینن، واتا فه‌لسه‌فه‌ی سیاسی خۆیان له‌ ناوه‌رۆكی چه‌مكی ئازادی وه‌رده‌گرن.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

زۆر جاران له‌ كه‌سانی به‌ ته‌مه‌ن و دنیادیده‌ گوێ بیستی ئه‌وه‌ ده‌بووم: كه‌ سیاسه‌ت درۆ و فێڵ و ته‌ڵه‌كه‌بازییه‌، من ئه‌وكات ئه‌وانه‌م پێ نه‌زان و نه‌خوێنده‌وار و هه‌ندێ جار تۆمه‌تی خراپیشم ده‌دانه‌ پاڵ، چونكه‌ پێموابوو سیاسه‌ت پرۆژه‌ و كارنامه‌یه‌كی نه‌خشه‌ بۆ كێشراوه‌ بۆ به‌ ئاگاهێنانه‌وه‌ی خه‌ڵك له‌ ئه‌گه‌ری روودانی مه‌ترسییه‌كان و یه‌كخستنی تواناكانه‌ بۆ رووبه‌ڕوو بوونه‌وه‌ی ئه‌و مه‌ترسیانه‌ و ئاماده‌كارییه‌ بۆ به‌ گژدا چوونه‌وه‌ی زوڵم و سته‌م، به‌ڵام كاتێ رێككه‌وتنی بزووتنه‌وه‌ی گۆڕان و یه‌كێتی نیشتیمانیم دی و هه‌ڤاڵ ئه‌بوبه‌كر و ئاسۆ فه‌ره‌یدون وه‌ك دووانه‌ هه‌ڤاڵی ناو یه‌ك منداڵدانی سیاسی له‌ ئاسۆی بنیاتنانی ژینگه‌یه‌كی هابه‌شیان ده‌ڕوانی، ئه‌وجار تێگه‌یشتم كه‌ قسه‌ی پیره‌پیاو و دنیادیده‌كان راستی تێدایه‌و ئه‌گه‌ر بڕیاره‌ سیاسیه‌كان له‌ ده‌ستی كه‌سانی هه‌ل په‌رستدا قۆرخ كران و بوون به‌ ئامرازی به‌دیهێنانی به‌رژه‌وه‌ندی تایبه‌تی، سیاسه‌تیش ده‌بێته‌ درۆ و فێڵ و ته‌ڵه‌كه‌بازی.

هه‌موومان له‌ بیرمانه‌ له‌ بانگه‌شه‌ی هه‌ڵبژاردنی ئه‌نجوومه‌نی پارێزگاكان له‌ 30ی نیسان، هه‌ڤاڵ ئه‌بوبه‌كر و ئاسۆ فه‌ره‌یدون دوور له‌ هه‌موو پێوه‌رێكی نه‌ته‌وه‌یی و ره‌وشت و ئاكاری هاوشاری بوون به‌سه‌ر یه‌كتریدا ده‌ڕشانه‌وه‌، هێڵه‌ سووره‌كانیان ده‌به‌زاندن و هه‌ڤاڵێنیان بێ به‌ها ده‌كرد و ئاسۆی یه‌كتریان ته‌ڵخ ده‌كرد، له‌ شكاندنی كه‌سایه‌تی یه‌كتری نه‌ده‌پرینگانه‌وه‌ و به‌ كۆنه‌ فایلی یه‌كتریشدا ده‌چوونه‌وه‌.

هه‌ڤاڵ ئه‌بوبه‌كر وه‌ك فریادره‌سی سلێمانییه‌كان خۆی ده‌رده‌خست و ده‌یگوت: من بۆیه‌ هاتووم به‌ر به‌ ئاسۆی دز و گه‌نده‌ڵه‌كان بگرم و ده‌سه‌ڵاتی تاك حزبی و سیسته‌می ففتی به‌ ففتی بكه‌م به‌ مێژوو، ئه‌گه‌ر ببمه‌ پارێزگار دز و گه‌نده‌ڵه‌كان له‌ پۆسته‌كانیان دوور ده‌خه‌مه‌وه‌ و خه‌ڵك و شه‌قام ده‌كه‌مه‌وه‌ خاوه‌نی بڕیار.

له‌ به‌رامبه‌ردا ئاسۆ فه‌ره‌یدوون پڕ به‌ ده‌م هاواری ده‌كرد و ده‌گوت: هۆ خه‌ڵكینه‌ هه‌ڤاڵ ئه‌بوبه‌كر به‌عسی بووه‌، ئه‌وه‌تا، ئه‌وه‌تا، ببینن شێعری بۆ سه‌ددامی گه‌وره‌ دیكتاتۆر نووسیوه‌، به‌ دوای ئه‌ودا مه‌لا به‌ختیار ده‌یگوت: له‌به‌ر هه‌یبه‌تی سلێمانی ناهێڵین كۆنه‌ به‌عسیه‌ك ببێته‌ پارێزگار، كاتێكیش رێككه‌وتن و هه‌ر یه‌كه‌و ربه‌ی ده‌ستكه‌وتی حزبی له‌ خه‌رمانی به‌رژه‌وه‌ندی خه‌ڵكی سلێمانی پێوا، هه‌ڤاڵ ئه‌بوبه‌كر منه‌تیشی به‌سه‌ر خه‌ڵكی سلێمانیدا ده‌كرد و وایده‌رده‌خست كه‌ وه‌ك سلێمانییه‌كان ده‌یانویست وایان كردووه‌، به‌ گه‌سك ته‌مومژی به‌رده‌م ئاسۆی ئاسۆ فه‌ره‌یدونی ده‌ماڵی و خۆی گوته‌نی له‌گه‌ڵ دز و گه‌نده‌ڵه‌كان چووه‌ سه‌ر سفره‌ی به‌رژه‌وه‌ندیه‌كان و بۆ دووباره‌ خۆڵ كردنه‌ چاوی خه‌ڵك ده‌یگوت: ئه‌وه‌ی كردوومانه‌ مۆدێلێكی نوێیه‌ و ففتی ففتیمان تێپه‌ڕاند، ئه‌وه‌ی ئێمه‌ رێككه‌وتنی حزبی نییه‌ و رێككه‌وتنی ئیدارییه‌.

دیاره‌ خاڵی سه‌ره‌كی ففتی ففتی پارتی و یه‌كێتی دوو ساڵ به‌ دوو ساڵ بوو، ئه‌گه‌ر له‌ ماوه‌ی دوو ساڵی یه‌كه‌مدا سه‌رۆكی حكومه‌ت درابێ به‌ پارتی، ئه‌وا سه‌رۆكی په‌رله‌مان دراوه‌ به‌ یه‌كێتی، ئه‌و رێككه‌وتنه‌ی هه‌ڤاڵ ئه‌بوبه‌كر به‌ مۆدێلێكی نوێی ناوده‌با، هه‌مان دوو ساڵ به‌ دوو ساڵه‌ و بگره‌ خراپتریش، چونكه‌ دابه‌شكاریه‌كه‌ خورد كراوه‌ته‌وه‌ بۆ شه‌قام و كۆڵانه‌كانیش، ئه‌گه‌ر پارێزگار بۆ یه‌كێتی بێ سه‌رۆكی ئه‌نجوومه‌نی پارێزگا بۆ گۆڕانه‌، دوای دوو ساڵه‌كه‌ چۆن پارتی و یه‌كێتی پۆسته‌كانیان ئاڵوگۆِڕ ده‌كرد، گۆڕان و یه‌كێتیش ئاڵوگۆڕیان ده‌كه‌نه‌وه‌، له‌وه‌ش ففتی به‌ ففتی تر پۆستی پارێزگار و سه‌رۆكی ئه‌نجوومه‌نی پارێزگای هه‌ڵه‌بجه‌ش بوونه‌ پاشكۆی ئاڵوگۆڕی پۆسته‌كانی پارێزگای سلێمانی، ئه‌وه‌ش مۆدێلێكی كۆنه‌ و تێناگه‌م داهێنان و نوێ و نوێگه‌ریه‌كه‌ی له‌ كوێدایه‌! خۆ پارتی و یه‌كێتی مۆدێلی ففتی ففتیان تێپه‌ڕاندووه‌، كه‌چی تازه‌ به‌ تازه‌ هه‌ڤاڵ ئه‌بوبه‌كر دوای چه‌ندین ساڵ ره‌خنه‌باران كردنی بۆی ده‌گه‌ڕێته‌وه‌ و به‌ مۆدێلێكی نوێش ناوی ده‌با، دواتر ده‌ڵێ: رێككه‌وتنی ئێمه‌ حزبی نییه‌ و ئیداریه‌، ئه‌ی ئه‌و هه‌موو ئه‌ندام مه‌كته‌ب سیاسی و گه‌وره‌ هه‌ڵسووڕاوه‌ زۆر هه‌ڵسووڕاوانه‌ چی بوون له‌ كۆبوونه‌وه‌كه‌دا؟!

ئاسۆ فه‌ره‌یدونیش وه‌ك له‌ رێككه‌وتنه‌كه‌ی نێوانیاندا هاتبوو فایلی به‌عسی بوونی هه‌ڤاڵ ئه‌بوبه‌كری پێچایه‌وه‌، دوای پێدا چوونه‌وه‌ شێعره‌كه‌شی له‌نگی نه‌ما و وه‌زن و قافیه‌ی ته‌واو ده‌رچوو، هه‌یبه‌تی سلێمانیش به‌سترایه‌وه‌ به‌ هه‌یبه‌تی دوو ساڵ پۆستی پارێزگار، ئای له‌و داهێنانه‌ مۆدێل باو و (گۆڕان) ه‌ سه‌یره‌! كراسی كۆن و فڕێدراو ئووتو ده‌كه‌ن و به‌ نوێ پێمان ده‌فرۆشنه‌وه‌.

ماوه‌ته‌وه‌ بڵێم: ئه‌گه‌ر سیاسه‌ت وه‌ك ئه‌وه‌بێ كه‌ ئه‌و دوو دوكتۆر و مامۆستای زانكۆیه‌ له‌ بانگه‌شه‌ی هه‌ڵبژاردنی 30ی نیسان پێكیان كرد و پێكتریان گوت، ئه‌وا لێدوان و پێكهه‌ڵاگوتنی دوای دابه‌شكردنی پۆسته‌كان، وه‌ك پیره‌پیاو و دنیادیده‌كان ده‌ڵێن: سیاسه‌ت لای ئه‌وان درۆ و فێڵ و ته‌ڵه‌كه‌بازییه‌، خۆ ئه‌گه‌ر سیاسه‌تیش دوور له‌ جنێوباران كردن و به‌ گفتوگۆ و لێكگه‌یشتن بێ، وه‌ك ئه‌وه‌ی له‌ لێدوانی دوای دابه‌شكاریه‌كه‌ لێیان ده‌بیسترا، ئه‌وا شه‌ڕه‌ جنێوه‌كه‌ی سه‌رده‌می بانگه‌شه‌ی هه‌ڵبژاردنیان كه‌ تا نزمترین ئاست دابه‌زی كاره‌سات و مه‌هزه‌له‌یه‌.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

Go to top