We have 76 guests and no members online

حەمە غەفور

 

 

 

بەپێی هەواڵەکان تا ئێستا ١١ کەس بە تۆمەتی بازرگانی کردنی نەوت لەگەڵ ڕێکخراوی تیرۆریستی داعش دەستگیر کراون. لیژنە‌و بەدواداچوونی یاسایی‌و پارلەمانی لەو بارەوە پێکهاتوون. ڕاگەیاندنەکان هەواڵی جیاجیا لەبارەیەوە بڵاوئەکەنەوە. بێگومان ئەم دۆسێیە چارەنووسی کۆمەڵگای پێنج ملیۆنی کوردستانی پێوە بەندە، بۆیە دەبێت چاوی ڕەخنەمان لەسەری فۆکوس بکات! بەتایبەتی کە هەر لەم سەرەتایەوە خێرا پرسی ئیعدام کردنی تۆمەتباران گەورە کراوەو خەریکە وەکو مژدەیەک ئەکرێتە بارتەقای تاوانێکی گەورەی لەو چەشنە! لای خۆمەوە من لێرەدا بۆچوونەکانم لەمبارەوە ئەخەمەڕوو. بەهیوای ئەوەی کۆمەک بکات چاوی گەورەی کۆمەڵایەتیمان لەسەر ئەم دۆسێ گەورەو گرنگانە هەڵنەگرین، تا پرۆسەی دەرخستنی ڕاستی‌و حەقیقەت ئاراستەی دروستی خۆی وەربگرێت! لە پەرواێزدا لینکی هەواڵی پەیوەست لە ساییتە کوردییەکاندا دائەنێم.

 

ئیعدام کردنی تاوانباران، نە جێبەجێکردنی دادپەروەرییە، نە بەرگری کردنە لە حەقیقەت! نە گێڕانەوەی مافە بۆ خاوەنەکانی! بەڵکو بە عالەمی ئاشکرا، هەوڵێکە بۆ گۆڕبەگۆڕکردنی ڕاستییەکان! کاتێک سەددام حسەین‌و ژمارەیەک لە سەرانی ڕژێمی بەعس ئیعدام کران، کام ڕاستی‌و حەقیقەتی ئەنفال‌و کیمیاباران‌و پەیوەندی ڕژێمی بەعس لەگەڵ ئەمریکاو دەوڵەتانی تری جیهان‌و ناوچەکە بەدەرکەوت، کە ڕۆڵیان گێڕابوو لە بەهێزکردن‌و تۆکمەکردنی ئەو ڕژێمە فاشییەدا! یاخود دوای ئیعدامکردنی ئەوان کوا کۆمەڵگای عێراق ئارامی‌و ئاساییشی سیاسی‌و کۆمەڵایەتی بەخۆیەوە بینیوە! ئیعدامکردنی سەدام‌و دارو دەستەکەی باشترین بەڵگەو نموونەی پاڵپشتی ئەم ووتارەیە لەبارەی گرتنە پێشی ڕێوشوێنێک بۆ شاردنەوەی ڕاستییەکان.

 

پارلەمان، حکومەت‌و دەزگای دادوەری کوردستان، ئەگەر ڕاست ئەکەن وە نیازیان نییە پەروەندەی گەورەو شەرماوەری پەیوەندی حزبەکان‌و بەرپرسانێکی نێو حزبەکان لەگەڵ داعش سەرنگووم بکەن، با پرۆسەیەکی شەفاف‌و ئاشکراو عادلانە دەستپێبکەن‌ لەو بارەوە. ڕێگابکەنەوە هاوڵاتیان‌و لایەنی شارەزاو کەسانێک کە بەڵگەو داتاو زانیارییان هەیەو لەبەر دەستدایە بیخەنەڕوو بۆ بەردەم یاساو ڕای گشتیش، هەتا ڕاستی‌و حەقیقەتی پشتی چۆنێتیی ئەم پەیوەندی‌و کلکگرێدانەی ئەو تۆمەتبارانە، وە کەسانێکی دیکەش کە ڕەنگە هێشتا دیاری نەکرابن‌، وە ڕۆڵی گەورەشیان بووبێت لە پەیوەندی سیاسی‌و بازرگانیش لەگەڵ داعش، ڕۆشن ببێتەوە.

 

بەشوێن پەیدابوونی داعش‌و تەسلیمبوونی موسڵ، دەنگۆی زیاد هەیە کە لایەنێک لە موزایەدەی سیاسیدا شەنگاڵی پێشکەش بە داعش کردووە! یاخود بەگوێرەی کامە یاساو کام ڕێوشوێنی ئیداری قاسم سولەیمانی سەرۆکی سوپای پاسدارانی ئێران، لە بەرەکانی جەنگ دژی داعش ئامادەئەبێت! سەرئەنجام بۆچی حکومەتی هەرێمی کوردستان نەیتوانی کۆمەکی سیاسی‌و سەربازی‌و لۆجیستیکی پێشکەشی کۆبانی بکات! لێرەدا تەنیا پەیوەندی بازرگانی کردن نییە بە نەوتێکەوە کە داعش دەستیبەسەریدا گرتووە، بەڵکو پەیوەندییەکی مەترسیدارتر هەیە لە هەرێمی کوردستانەوە لەگەڵ داعشدا! دەزگای قەزایی کوردستان چۆن ئەتوانێت لەم دۆسێیەدا ڕۆڵ ببینێت! ئایا دادوەری گشتی ئەتوانێت ڕاستی‌و حەقیقەتی ئەم دەنگۆو تۆمەتانە یەکاڵابکاتەوە!؟ ئایا بۆ دڵنایی بەخشین بە هاوڵاتیانی کوردستان، ئەم لایەنە لە بازرگانی کردن بە نەوت لەگەڵ داعش مەترسیدارتر نییە!؟ دەرخستنی ڕاستی‌و بەرگریکردن لێی ئەرکی هەموو کۆمەڵگایەو مافی هەر تاکێکی ووڵاتە بەدواداچوون بکات‌و ڕێوشوێنی پێویست بۆ دەرکێشانی لەژێر سیناریۆی جۆراو جۆردا بگرێتە بەر. دادوەری گشتی‌و دەزگای قەزاییش پێویستە پەیوەست بن بەم ئەرکە مێژوویی‌و کۆمەڵایەتییەوە.

 

لایەنی پەیوەندیداری ڕەسمیی‌و حکومی ئەگەر ئامانجیان سەرخستنی سەروەری یاسایە، ڕێگاکەی ئیعدامکردنی تاوانباران نییە. بەتایبەتی کە هێشتا هیچ پرۆسەیەکی ڕۆشنی لێپێچینەوە بە شێوەی ڕەسمی لەئارادا نییە. بەڵکو دەستپێکردنی پرۆسێسێکە بە ووردی‌و پڕۆفشناڵیزمێکی تەواوەوە، بۆ بەدواداچون‌و دیاریکردنی حەقیقەتی مەسەلەکە. چونکە بەرگری لە ڕاستی‌و ئاشکراکردنی حەقیقەت خۆی جەنگێکی یاسایی گرنگە، وە هیچی کەمتر نییە لە بەرەنگاربوونەوەی مەترسییەکانی داعش بۆ سەر کوردستان.

بۆ ئەوەی یاسا ڕێچکەی عادلانەی خۆی بگرێت‌، هەتا بۆ کۆمەڵگاکەمان‌و جیهانیش بەدیارکەوێت ئەم پەروەندەیە چۆنەو کام زەرەرو زیانی بە ئەمنییەت‌و ئاساییش‌و سەلامەتی باری سیاسی‌و کۆمەڵایەتی‌و ئابووری کۆمەڵگای کوردستان گەیاندووەو ئەگەیەنێت، دادوەری گشتی پێویستە لە ئاستی ئەم ڕۆڵەدا خۆی بنوێنێت، وە بتوانێت نیشانی بدات کە بەکاری خۆی ئەتوانێت هەستێت! نەک هەر لەم سەرەتاوە ئیحای ئیعدامکردنی تاوانباران لە ڕاگەیاندنەکانەوە بخرێتە پێش چاوی کۆمەڵگا. ئەم ئاماژەدانە بۆ ئیعدامکردنی تاوانباران، پێش ئەوەی هیچ شتێک لەبارەی ڕاستییەکەوە بڵێت، هەڵهاتنە لە ڕاستییەکە! ڕاکردنیش لە حەقیقەتی پەروەندەیەک لە فەرهەنگی کوردیدا واتاکەی بۆ هەموو لایەک ڕۆشنە! یان هاوبەشی تاوانە، یاخود بەرژەوەندیی لەگەڵ تاوانباراندا هەیە.

 

بەر لەوەی بە ئیعدام کردن موخاتەبەی کۆمەڵگا بکرێت، وا باشترە یاساو دادوەری ووڵات شاییستەگی‌و توانای خۆیمان نیشان بدات لە بەدەر خستنی ڕاستی‌و حەقیقەتی پەروەندەکاندا! چونکە خەڵکی کوردستان تاقیکردنەوەی زۆری هەیە لەبارەی بێتوانایی دادو دادوەری گشتی. چەندین پەروەندەی تاوان کەڵەکە بووە لە نێو دەزگای قەزایی کوردستاندا، لە چەشنی، کوشتنی کۆمۆنیستەکان لە سلێمانی، تیرۆری شاپورو قابیل لە هەولێر، ڕفاندن‌و تیرۆری سەردەست عوسمان، کاوە گەرمیانی‌و دەیان پرسی گرنگی تر، کە ئەم دەزگای دادوەرییەی کوردستان تا ئێستاش نەیتوانیوە بەلایاندا بخات! نابێت ڕێگابدرێت چارەنووسی ئەم دۆسێیەش بەدەردی ئەوانی تر بچێت. چونکە ئەم دۆسێیە بەرپرسیارێتییەکی گەورەیەو بەلاداخستنی لە بەرژەوەندی کۆمەڵگاو ئاساییش‌و ئارامی‌ ووڵاتە، هەم بنیاتنانی متمانەیە لای هاوڵاتیان، هەم دڵنیایی‌و بڕوایەکی زیاتر بە سەرەوەری یاسا درووست ئەکات! هەر هەوڵێک یان ڕێگا خۆش کردنێک بۆ ئیعدام کردنی تۆمەتبارانێک دوای ئەوەی تۆمەتەکانیان بەسەردا ساغ ئەبێتەوە، بەهیچ جۆرێک یەکسان نییە بە هەوڵدان بۆ دەرکەوتنی حەقیقەتی پەرەوەندەکە! بەڵکو شوێنبزرکردنی ئەسڵ‌و سەرچەشمەو بنەماکانی دۆسێکەیە. ئەمەش بەواتای ژێرپێنانی ئەو پڕەنسیپە یونیڤێرساڵانەیە کە جیهانی شارستانی وەکو پێودانگی دەرخستنی ڕاستییەکان پێیانەوە پابەندە!

٢١ئۆکتۆبەر١٤

" ١١كەس بەتۆمەتی بازرگانیكردنی نەوت لەگەڵ داعش دەستگیركراون‌و رەنگە لەسێداردە بدرێن"

به‌تۆمه‌تی‌ مامه‌ڵه‌كردنی‌ بازرگانی‌ نه‌وت له‌گه‌ڵ داعش 5 كه‌س ده‌ستگیرده‌كرێن

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

 

 

 

سەرکەوتنی کۆبانی ئێستا ئیتر تەنیا ئارەزوویەک نییە بخوازرێت، بگرە نزیکبۆتەوە لە یەقین. بەرگری‌و ڕاوەستاوییەک کۆبانی نیشانیدا، جیهانی سەرسام کردووە. ئەم ڕاوەستاوییە ئێستا نوێنەرایەتی جیهانێک ئەکات کە نایانەوێ ئەم جارەشیان وەکو ڕابردوو، کڵاو بکرێتە سەریان‌و ڕەوانەی ماڵەوە بکرێنەوە. کۆبانی بڕیاری داوە مەیدانی کۆتایی داعش ئەبێت! هەرکەس ئەم ڕاوەستاوییە نەبینێت، تەنگژەی ئایدیۆلۆژی هەیە. 


سەرکەوتنی کۆبانی، سەرکەوتنی ئیرادەی جەماوەرێکی چەکدارە بەرانبەر بە هێزێکی دڕندەی وەکو داعش، کە هەم جێبەجێکارو هەم پەردەپۆشێکیشە بۆ سیناریۆ سیاسییە دژە مرۆییەکانی زلهێزەکانی جیهان لە ناوچەکەدا! بیهێننە بەرچاوتان، کۆبانی بکەوێتە دەستی چەتە خوێنخۆرەکانی داعش، جیهانی شارستانی‌و مرۆڤایەتی بەرەوڕووی چ نسکۆیەکی سیاسی‌و کۆمەڵایەتی ئەبێتەوە! کەوتنی کۆبانی، هەر سەرکەوتنی داعش مانا ناکاتەوە، بەڵکو سەرکەوتنی سیناریۆ چنراوەکانی ئەمریکاو ڕۆژئاواش بەرجەستە ئەکات، کە یەکێک لە واتاکانی بریتییە لە شەرعییەتدانەوەو باڵادەستتربوونی هێزە بۆرژواییە لۆکاڵییەکان بۆ درێژەدان بە ستەمگەرییەکانی خۆیان لەدژی ملیۆن ملیۆن ئینسانی ئەم ناوچەیەو جیهانیش! 

سەرکەوتنی کۆبانی وەرچەرخانێکی سیاسی‌و کۆمەڵایەتی گرنگ دەبێت لە مێژووی سەد ساڵی ڕابردووی خۆرهەڵاتی ناوەڕاست‌داو پێشهاتێکی گرنگترو کاریگەرتریش ئەبێت لە تێکشکانی ئەمریکا لە ڤێتنام! 

سەرکەوتنی کۆبانی بە واتای شکستی ئەو مەنهەج‌و ستراتیژە ئیمپریالیانەیە دێت کە ئەمریکا ڕابەرایەتی ئەکات‌، نەهجێک کە ئامانجی ئەوەیە لەم جیهانە پان‌و پۆڕەدا هیچ کەس‌و هێزو حزبێک بەبێ پرسی ئەمریکا پەنجە نەکات بەئاودا! 

ئەزموونی کۆبانی، مەدرەسەی پەروەردەبوون‌و گەڵاڵەبوونی هێزی بەڕاستی جەماوەریی چەکدارە بە ژنان‌و پیاوانەوە لە هاوشانی یەک‌و لە یەک سەنگەردا بۆ بەرپەرچدانەوەی قێزەونترین جۆری تیرۆریزمی ئیسلامی! کۆبانی وەڵامی جیهانی ئەمڕۆیە بە داعش! کە خۆی وەڵامێکیشە بۆ ئەمریکاو تەواوی هاوپەیمانەکانی! 

بۆیە دەبێت شەپۆلی ناڕەزایەتییەکان هەرچی زیاتر فراوان بکرێتەوەو پشتیوانی‌و هاودڵی‌و هاوسۆزی بەکردەوە ئەنجامبدرێت. گوشاری زیاتر درووست بکرێت‌و داوابکرێت لەو دەوڵەتانەی تا پێش داستانی قارەمانانەی خەڵکی شەرافەتمەندی کۆبانی، لە بەندو بەستی ئاشکراو ژێربەژێریشدا داعشیان پەروەردە کردو قەڵەویان کردو گۆڕییان بۆ هێزێک کە هەوسارەکەی ئێستا لە دەستی خۆشیان دەرچووە. ئێستا جیهان بینەری سەرکەوتنی سیناریۆیەکن لە کۆبانی، کە هیچ ئەمریکایەک نەک ڕۆڵی تیایدا نییە، بەڵکو دژایەتیشی ئەکات! ئێستا خەڵکی ناوچەکەو جیهانیش بە ووردی دڵیان لەگەڵ کۆبانی لێئەدات، وە چاودێری کۆڵانەکانی کۆبانی ئەکەن کە خەریکە لمۆزی داعش لە خاک‌و لە خوێنی خۆی هەڵئەژەنرێت! بژی خەبات‌و بەرگری دلێرانەی یەکینەکانی پاراستنی کۆبانی، بژی هێزی چەکداری ژنان‌و پیاوانی کۆبانی!
١٢ئۆکتۆبەر١٤

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

یەکگرتوو و کۆمەڵ دژی بەرنامەی بەرنامە خۆیان کردۆتە کوێخای خەڵکی کوردستان‌و بەناوی پیرۆزیی‌و شتی واوە بەنیازن گوشاری کۆمەڵایەتی بۆ ئەو ستافە کۆمیدییە درووست بکەن!


بەڵام ئیسلامییەکانی کوردستان بەم کارانەیان سەلماندوویانە، هێندەی شتە کۆن‌و بەسەرچووەکانیان بەلاوە گرنگە، دەرسەدێکی هەرە بچووکیش بێت، ئێستاو بەهاو فەرهەنگ‌و نۆرمی مرۆڤی ئەمڕۆو ئاستی ووشیاری‌و هیواو ئارەزووەکانی ئینسانیان بەلاوە بایەخ‌و گرنگیی نییە! 


ڕابردوو هەرچییەک بووبێت، ناتوانێت لەبەردەم شارستانییەت‌و پێشکەوتن‌و خولیاو ڕوانگەی نەوەی نوێدا وەکو سەردەمی کۆن خۆی ڕاگرێ‌و ئەبێتە جێگای گاڵتەو بەرهەمی جۆراو جۆری کۆمیدیی لێ درووستئەکرێت! ئەوەش ئاساییەو ڕێگادراوە لە ڕووی یاساو لەڕووی نەریتی کۆمەڵایەتیشەوە.


کۆمیدیا شێوازو سەکتەرێکی هەرە گرنگی تەفریح‌و تەرفیهی کۆمەڵگاو پەروەردەو فێرکردنە. لەژێر هیچ بیانوویەکدا، هیچ هێزو لایەنێک ناتوانێت سنوور بۆ ئەم بوارە هەستیارەی ژیاریی ئێمە دابنێت‌و دەرگای شادی‌و کەیف‌و خۆشی کڵۆم بکات!
ئیسلام‌و کەلەپووری ئیسلامی پڕە لە دیاردەی ناشیرین‌و شایەنی کۆمیدیاو گاڵتەپێکردنە! وە هەر دیاردەیەکی دیکەی مرۆڤایەتیش بە هەمان شێوە. ئیسلامییەکان ئەگەر گەرەکیانە لەنێو چوارچێوەی نۆرمی کۆمەڵگای هاوچەرخدا درێژە بە ژیانی سیاسییان بدەن، پێویستە دەم لەم جۆرە فتواو دەردەسەرییانە نەژەنن بەنێوی پیرۆزیی شتی ئیسلامەوە! یەکگرتوو و کۆمەڵی ئیسلامی با زەحمەتبکێشن‌و بچن لە موسڵ‌و لەژێر سایەی خەلافەتی داعشدا عەرزی داعش بکەن، کە ئێوە "داعش" تەعبیر لە ئیسلام ناکەن! ئەوسا ئەزانن کۆمیدیا چەند گرنگە!


بەرنامەی بەرنامەو ستافەکەی کارێکی گەلێک ئاسایی‌و باشیان ئەنجامداوەو هاوڵاتیان پێشوازیی گەرمیان لەو بەرنامەیەیان کردووە! هاوڵاتیان خۆیان ووشیارن‌و ئیسلامییەکان بۆیان نییە ببنە کوێخای خەڵکی‌و بەناوی ئەوانەوە گوشار بهێنن بۆ ئەو ستافە! خەڵک خۆی ئەزانێت چی باشەو چی خراپە! مادام ئیسلامییەکان نیگەرانن بە بەرنامەکەی بەرنامەی بەرنامە، واتای ئەوەیە کارەکەیان سەرکەوتووەو جێگای خۆی گرتووە! دەستیان خۆش بێت‌و من لای خۆمەوە ئەوپەڕی پشتیوانییان لێئەکەم.

٤ئۆکتۆبەر١٤

یەکگرتوو+کۆمەڵ: "ڕێگەپێدراو نیە دروشم و ڕەمزی ئیسلامی كە ئایەتی قورئان و فەرموودەی لەسەر بێت ئیهانەو گەمەی پێ بكرێت"

رونكردنەوەیەك لە فراكسیۆنی یەكگرتوو و كۆمەڵ سەبارەت بە بەرنامە گاڵتە ئامێزەكەی كەناڵی ئاسمانی كوردسات

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

پارادۆکسی سیاسەتی ئەمریکا سەبارەت بە کۆبانی لەوێدایە، ئەو خۆڕاگری‌و بەرخۆدانە جەماوەرییەی کۆبانی دژو ناکۆکە لەگەڵ ستراتیژو ئامانجێک کە ئەمریکا لە خۆرهەڵاتی ناوەڕاست هەیەتی. ستراتیژی کۆن‌و نوێی ئەمریکا ئەوە بووە کە هیچ کەسێک لە جیهاندا بەبێ پرسی ئەو پەنجە بە ئاودا نەکات! لە عێراق بۆی نەچووە سەر. لە سووریاش لەسەر بنەمای هەمان سیاسەت‌و ستراتیژی ئەمریکا، کێڵگەیەک لە دۆزەخ بەرهەمهاتووە کە داعشی تێدا پەروەردە بوو.

نەخشەکەی ئەمریکا وابوو، داعش بەخێرایی سنووری خەلافەتەکەی بە خوێنڕشتن گەورەترو فراوانتر ئەکات. خەڵک ئیرادەی خۆڕاگری‌و بەرگرییان تێدا ئەکوژرێت‌و هەڵدێن. مەیدان چۆڵ ئەبێت بۆ تەراتێنی ئەمریکا کۆمەڵێک لۆمپنی سیاسی بکاتە نوێنەرو ڕابەری خەڵکی هەڵاتوو، تا ڕێوشوێنیان نیشانبدەن چۆن چۆنیی ژیانیان دەستپێبکەنەوە!

بەڵام زیاد لە دوو ساڵە کۆبانی قارەمانانە بەرگرییەکی شۆڕشگێڕانەو بەرخۆدانێکی مێژوویی ئەنجامداوەو ئەدات بەدژی داعش‌و داعشییەکان‌و هاوپەیمانە ژێربەژێرەکانیشیان! دروست ئا لێرەدایە لووتی هەژموونی خوازی‌و بڵندپەروازییەکەی ئەمریکا شکاوە. خەڵکی سەربەرزی کۆبانی بە سادەترین چەک‌و تفاقی سەربازییەوە بەرەوڕووی دڕندەترین هێزی هەوسارپچڕاوی ئیسلامی لە مێژووی ناوچەکە بۆتەوە! بەڵام ئەمریکا خەریکە تۆڵەی خۆی لە خەڵکی کۆبانی ئەکاتەوە. چۆن؟

دەرئەنجام، ئامانجی ئەمریکا بەهرەبەردارییە لە هێزو دیاردەیەکی نەگریس‌و نامۆی وەکو داعش، هەتا سەرنجی ڕای گشتی ناوچەکەو جیهانیش بۆ هەژموونی‌و باڵادەستیی خۆی ڕاکێشێت لەبارەی چارەسەری کێشەو گرێکوێرە لۆکاڵی‌و هەرێمییەکانیش! دروست وەکو چۆن کۆمپانیای ڕووداو تێیدەڕوانێ‌و بانگەشە بۆ تواناییە سیاسی‌و سەربازییەکانی ئەمریکا ئەکات دژی داعش، بەڵام ئازایەتیی ئەوەی تێدا نییە بە ڕاشکاوی باسی بەرخۆدان‌و خەباتی دلێرانەی خەڵکی شکۆمەندی کۆبانی بکات! ئەمریکا خوازیارە وێنایەک لە ویژدان‌و ووشیاری گشتیدا ئەندازیاری بکات، کە هیچ کارو ڕێکارێک، بەتایبەتی سیاسی‌و سەربازی لە جیهان‌و خۆرهەڵاتی ناوەڕاستدا، بەبێ ڕابەرایەتی ئەمریکا مەحکوم بە شکستە! دەزگای ڕووداو تەپڵ بۆ ئەم ئامانجەی ئەمریکا لێئەدات.

ئامانجی هەرە سەرەکی ئەمریکا لە شێوەی بەشداری نادیاری خۆی لە جەنگی کۆبانیدا، شکستپێهێنانی ئەزموونی هاتنەمیدانی هێزی چەکدارو ڕێکخراوی جەماوەری خەڵکی کۆبانییە بە ژنان‌و پیاوانەوە! ئەم هەتنەمەیدانەی خەڵکی کۆبانی، لە دەرەوەی سیاسەت‌و ستراتیژی ئەمریکادایەو ناکۆک دێتەوە لەگەڵ ستراتیژی هەژموونخوازی ئەو دەوڵەتەدا. تەرجومەی پوختی ئەم ستراتیژەی ئەمریکا سەبارەت بەرەی جەنگی بەرەنگاربوونەوەی ژنان‌و پیاوانی کۆبانی بە دژی داعش‌، ئەوەیە، ئەمریکا ڕاستەوخۆ خۆی ناتوانێت هێرشی سەربازی‌و ئاسمانی بکاتە سەر کۆبانی. تورکیاش بە هەمان شێوە! بۆیە بە ئەنجامدانی هێرشی ئاسمانی سنووردارو ناڕۆشن‌و پەت‌وبڵاوی خۆی، کە پڕە لە تەمومژو ئەمماو ئەگەر، بۆ سەر گوایا بنکەو بارەگای داعش لە سووریا، ئەمریکا تاکتیکی موماتەڵەو کاتکوشتنی گرتۆتەپێش، سابەڵکو توانای خۆڕاگری‌و بەرگری سەربەرزانەی خەڵکی کۆبانی نزم‌و نزمتر بێتەوەو داعش بتوانێت دەست بگرێت بەسەر کۆبانیدا! ئەگەر ئەم خەونەی ئەمریکا بێتەدی، ئەوسا ڕەنگە بە جۆرێکی دیکە، کلک‌و گوێی داعش بقرتێنن‌و مڵۆزمێکی دیکەی لێ دیزایین بکەن بۆ ئامانجێکی دواتر! بەڵام خەونی سەرەکی ئەمریکاو تورکیاش، بە کەوتنی ئەزموونی کۆبانیی دێتەدی. ئەوسا دەستئەکەنەوە بە پرۆسێسێکی دیکەی بەرقەرارکردنی دیموکراسییە ستۆکەکەیان لە ناوچە کوردنشینەکانی سووریاش، بە هەمان شێوەی لە عێراق بیمیومانە.

بەڵام دوای زیاتر لە دوو ساڵ بەرگری بێوێنەی خەڵکی شەرافەتمەندی کۆبانی بەرانبەر بە داعش، ئیتر تاڕادەیەکی باش خەڵکی جیهان لەو ڕاستییە گەییشتوون، ئەگەر باس باسی سیاسەت‌و ڕێگاچارەیە، یان دژوەستناوەیە بەرانبەر تیرۆر، کۆبانی نەک هەر تەنیا سەنگەری لووتشکاندنی داعش‌و داعشییەکانیشە، بەڵکو بێوێنەترین ئەزموونی بەرپەرچدانەوەی تیرۆریان لەم دوو ساڵەدا نماییش کردووە. ئەگەریش باسەکە لەسەر ئازادی‌و دیموکراسییە، دیسانەوە کۆبانی جوانترین نموونەی دیموکراسی جەماوەرییان پێشکەش بە مرۆڤایەتی کردووە. تەجروبەی کۆبانی نەک لەبەردەم سندوقە پڕ گزی‌و فزی‌و تەزویرەکانی بەردەم هەڵبژاردنی پارلەمانی پرۆئەمریکاییدا شکڵی نەگرتووە، بەڵکو ڕاستەوخۆ هاوڵاتیانی سێ شاری گەورەی باکوری سووریا کانتۆنی فەرمانڕەوایی دیموکراسیانەیان هەڵبژاردووەو قارەمانانەش بە دڵ‌و ویژدان‌و خوێنی خۆیان بەرگریی لێ ئەکەن.

ئەو پرسیارەی لێرەدا بەرەوڕووی ئەمریکا ئەبێتەوە، ئەوەیە، بۆچی ئەم ئەزموونە پڕسەروەرییەی کۆبانی‌و قامیشلۆو جەزیرە ڕاشکاوانە بەڕەسمی ناناسن‌و لە هێرش‌و پەلاماری تیرۆریستی داعش نایپارێزن!؟ کەواتە ئەمریکا نییەتی پاک نییە لەگەڵ خەڵکی کۆبانی‌و تەواوی خەڵکی کوردستان لە ناوچەکەش، هەروەها بەرانبەر دانیشتووانی کۆمەڵگاکانی خۆرهەڵاتی ناوەڕاست ڕاستگۆ نییەو بەشوێن بەرژەوەندییە سیاسییەکانی خۆیدا وێڵە. بۆیە تەواوی خەڵکی شەرافەتمەندو ئازادیخوازی ناوچەکەو جیهان، وە لە پێشیانەوە خەڵکی کوردستان، وەکو چاوی خۆیان، وەکو ماڵ‌و حاڵی خۆیان پێویستە لەسەریان ئەزموونی کۆبانی بپارێزن. چونکە دانیشتن بەدیار لوتفی ئەمریکاوە، ژەهرە ژەهر! ئەم چاوەڕوان مانەوەیە سیاسەتی کوشندەی بزووتنەوەی کوردایەتییەو بەدرێژایی مێژووی خۆی ئەزموونی گەلێک ناشیرینی پێشکەش کردووین. با چیتر ڕێگاندەین لە کۆبانی ئەم خەونە قێزەونەی ئەمریکاو دوژمنانی ئازادی‌و ئیرادەی پۆڵایینی جەماوەری سەربگرێت. کۆبانی ئەبێت سەرکەوێت. کۆبانی چەقی ئیرادەیە، ئیرادەی جەماوەرێکی ڕاپەڕیو لەپێناو سەرفرازیدا. کۆبانی ئەمڕۆ نوێنەری ئیرادەی خەڵکی شەرافەتمەندی جیهانە لەپێناو ژیانێکی شکۆمەندانەدا.

٢ئۆکتۆبەر١٤

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

ئەم ساتانەی ئێمەی تیا ئەژین، لەناو جەرگەی خۆرهەڵاتی ناوەڕاست، کە ئەمریکاو ڕۆژئاوا بە چاڵە ڕەشەکە ناوی ئەبەن، شارێک بە ناوی (کۆبانی) هەر ئێستا خەریکە داستانێکی بەرگری لە شکۆمەندیی مرۆڤی ئەم سەردەمە لەپێناو ژیان‌و بۆ مێژوو تۆمارئەکات! ئەم شارەو دانیشتووانە بەشەرەف‌و خۆڕاگرو قارەمانەکەی، هەر ئێستا ئەکتەری واقعی نمایشکردنی مەلحەمەیەکی بێوێنەن لە دژی تاریکستانی ئیسلامی داعشییەکان، کە بە پاڵپشتی نێودەوڵەتی خەریکە هەتاوی ئازادی کە لە شاری کۆبانییەوە هەڵاتووە، خامۆش بکەن! ئەم هەتاوەی لە کۆبانییەوە ئەم چاڵە ڕەشەی خۆرهەڵاتی ناوینی ڕووناککردۆتەوە، نابێت خامۆش بکرێت! ئەتوانین بە درەوشاوەیی بڵندی کەین تا بگاتە هەموو جیهان! ئێمە بە پشتیوانیمان لە کۆبانی، ئەتوانین پرشنگەکانی ئەو هەتاوە بکەینە پەرچەمی ژیان‌و هەموو ناوچەکەو جیهانیش ڕۆشنبکاتەوە! ڕۆژێکەو ئەمڕۆ هەر ئینسانێک دڵی بۆ ژیان، بۆ ئاسودەیی‌و ئاییندەیەکی گەشاوە لێئەدات، پێویستە لەسەری ڕێگابگرێت لە کوژانەوەی ئەو ڕووناکییەی لە کۆبانییەوە بەرپاکراوە! پێویستە هەموومان ئاگری شۆڕشێکی کۆمەڵایەتی لەناخماندا داگیرسێنین بۆ پشتیوان کردنی کۆبانی. دوژمنانی کۆبانی هەر داعش‌و داعشییەکان نین بەتەنیا! ئەو دەوڵەتانەشن کە خەریکن بەناوی بچووککردنەوەی داعشەوە ئەزموونی کۆبانیی زیندەبەچاڵئەکەن! ئێمە ئەتوانین بەر بەچارەنووسێک بگرین کە دوژمنانی ئازادی بۆ کۆبانییان داڕشتووە! کۆبانی ئەتوانێت سەرکەوێت! بەپشتیوانی ئێمە ئەتوانێت داستانی جوامێرانەی ئازادی شارێک مسۆگەر بکات! سەکەوتنی کۆبانی سەرکەوتنی مرۆڤایەتییە! هەتاوی ئازادی لە کۆبانییە، بۆیە کۆبانی پێویستی بە چەک و تەقەمەنی هەیە!

لێرەوە دەرئەکەوێت، ئامانجی هێرشە ئاسمانییەکانی ئەمریکا لە دەوروبەری کۆبانی، داپۆشینی ئەو گەمارۆ هەمەلایەنەیە کە هاوپەیمانییەتییەکەی ئەمریکا لەسەر کۆبانی دایناوە! دەنا شارێکی یەک ملیۆن کەسی بە دانیشتووانەکەیەوە، بە سەنگەرو هێزی چەکداری جەماوەری‌و حزبەکانییەوە، بە ئازادیخوازانی سەرانسەری جیهانەوە، بانگەواز ئەکەن، داعش لە سێ تەرەفەوە هێرشەکانی بۆ سەر کۆبانی توندکردۆتەوەو لە باکوریشەوە ژەندرمەی تورکی بەپاڵپشتی زرێپۆشێکی زۆرەوە ئیستیفزازی کۆبانی ئەکات، بەڵام ئەبینین ئەو دەوڵەت‌و زلهێزانەی کارێکیان پێئەکرێت بۆ کۆبانی، خەریکن بە شتی دیکەوە خۆیان سەرقاڵ ئەکەن! ئەم خۆخافڵکردنەی ئەوان فێڵێکەو خەریکە لە کۆبانی‌و لە ئینسانییەتی ئەکەن. نماییشێکە بۆ ئەوەی داعش زەفەر بە کۆبانی بەرێت‌و ڕووناکیی ئازادی لەو شارەدا بکاتە تاریکستان! بۆیە تەنیا کاری ڕاستەقینە گەیاندنی چەک‌و تەقەمەنییە بە هێزی چەکدارو بەرگریکاری شاری کۆبانی! هەر هەڵوێستێکی دیکەی پێچەوانەی ئەمە لەلایەن ئەو هێزو دەوڵەت‌و دەسەڵات‌و خاوەنبڕیارانە تا دەگاتە حزبە دەسەڵادارەکانی کوردستانی عێراق، کە توانای گەیاندنی چەکیان هەیە بە کۆبانی، ئەچێتە خانەی پشتگیری‌و هاوکاری کردنی هێزە تاریکپەرست‌و خوێنڕێژەکانی داعشەوە! ئەوەش گەورەترین خیانەتە لە دانیشتوانی شارێک کە نوێنەرایەتی مرۆڤایەتیش ئەکات لە ئێستادا!

٣٠ئەیلوول١٤

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

Go to top