We have 38 guests and no members online

پشکۆ نەجمەدین

ئەگەر هێزە کوردییەکان پاشی ڕاپەڕینی 1991، ئاخاوتەیەکی سیاسیی نەتەوەییی یەکگرتوویان هەبایە، دەشیا شوین و پێگە و چارەنووسی ئیتنیکیی کەرکووک وەک ئێستا نەبایە و ئەگەر ئەم کێشە نەتەوەیی_جوگرافییە یەکلایش نەکراباوە، دڵنیام نێزیکی چارەسەر و بەلاداخستن دەبوو.

لە مێژووی بزووتنەوەی هاوچەرخی کورددا، هەمیشە ئاخاوەتەی حیزب و بەرژەوەندییەکانی دەستەڵاتی حیزب، بەرژەوەندییە نەتەوەییەکانی لە بنهەنگڵ ناوە و حیزبی کوردی هەرگیز بیری لە دەستەڵات وەک دەستەڵاتی نەتەوە نەکردووەتەوە بگرە کاری بۆ دەسەڵاتێک کردووە ئەگەر هەموویشی نەبێت پشکی گەورەی بەر خۆی بکەوێت.
پشکەکانی دەستەڵاتی بەڕێوەبردن لە کەرکووکدا "ئەگەر نەتەوەکانی ناکوردی لێ وەدەرنێی و تا ئەو جێگایەی پێوەندی بە کوردوە هەبێت"نموونەیەکی گچکەی دەسەڵاتی بەڕێوەبردنی بیست ساڵانی هەرێمی کوردستانە و وێڕای دابەشکردنی لەنێوان و پارتی و یەکێتیدا، مەکۆیەکی فراوانی ململانێی سیاسەت و دەستەڵاتی ئەم دوو حیزبەیە و ئەمەش جگە لە کاردانەوە سیاسییە نەرێنییەکانی لە چوارچێوە و نێوەندی سیاسیی دەوڵەتی ئێراقدا، کارکردێکی نەرێنیی بەرچاوی لە کایەکانی بەڕێوەبردن، ئاوادەنکردنەوە و خزمەتگوزاریدا بۆ خەڵکی کەرکووک لێ کەوتووەتەوە 
و مەودایەکی فراوانی بێمتمانەییشی لەنێوانی نەتەوە و کەمینەنەتەوەییەکان و دەستەڵاتی هەرێمی کوردستاندا خولقاندووە.
لە پاشی ڕووخاندنی سەدامەوە و ئێستاشی لەگەڵ بێ، هێزە سیاسییەکانی کورد، بە دەستەڵاتدار و ئۆپۆزیسیۆنەوە، چ لە پرۆسەی بەڕێوەبردنی کەرکووکدا و چ لە پرۆسەی هەڵبژاردنە لۆکاڵی و سەرتاسەرییەکاندا، یەک ئاخاوتە و یەکگرتوو نەبوون و نەیانتوانیوە هێندەی سەنگی خۆیان و ڕێژەی کورد لەو ناوچەیەدا، دەنگ وەدەست بهێنن و پێگەی کورد پتەو بکەن.
چارەنووسی کەرکووک لە هاوکێشە سیاسییە ئاڵۆز و تێکچرژاوەکانی هەرێم، ئێراق و ناوچەکەدا لە گێژاودایە و لێڵ و ناڕوونە.
دەرچوون لەم گێژاوە و گەیاندنی کەرکووک بە کەنارێکی ئارام و کوردخواز، هەژان و وەرچەرخانیکی لە تێڕوانین و ئەقڵی سیاسیی کوردیدا گەرەکە.پرۆسەی خۆئامادەکردن بۆ هەڵبژاردنی خولی داهاتووی پەرلەمانی ئێراق لە کەرکووکدا، پێی وتین کە تاپۆی ئەم گۆڕان و وەرچەرخانە لە بینین و بیرکردنەوەی حزبە کوردییەکاندا جارێ نائامادەیە.یەکلیستی لە هەڵبژاردندا، ئەگەر خەسڵەتێکی خراپی پرۆسەی دیموکراتی بووبێت لە هەرێمی کوردستاندا، ئەوا بۆ کەرکووک دەشێ مەسەلەیەکی گرنگ و چارەنووسساز بێت.حیزبە سیاسییەکانی کوردستان، بە هەر بیانوو و پاساوێک بێت، نەیانتوانی لە کەرکووکدا، بۆ هەڵبژاردنی پەرلەمان، یەکلیست و یەکگرتوو بن و ئەمەیش لە داهاتوودا ئەنجامێکی وەها نەخوازراومان دەداتێ کە پێگەی کورد تووشی لەرزین دەکات و حیزبە کوردییەکانیش لەئاست ئەم چارەنووسەدا و لەبەردەم مێژووی سیاسی و نەتەوەییی ئێمەدا بەرپرسیارن.
پشکۆنەجمەدین
24ی دێسامبەری 2013
گۆڤاری شار، ژمارە 17، 1ی یەنیوەریی 2014

 

 

 

دوو ساڵ و دوو مانگ پێش ئێست ا، من لە ملانێیەکی سەختدا لەگەڵ نەخۆشیی خوێنبەربوونی مێشک ، دوور ئێجگار دوور لە کوردستان ، بە گازوگیر هاتبووم.  زەنگی تەلەفوونەکەم لێی دا و بەسەر شەپۆلی شیعرەوە ، دەنگێک کە لە هیچ دەنگێکی تر نەدەچوو، پێی گوتم :

(( کاکە پشکۆ ، دڵمان لای تۆیە و دڵنیاین تۆ لە نەخۆشی بەهێزتری.  تۆ بە تەندروستییەکی باشەوە ، دێیتەوە لامان!)) ئەوە دەنگی کاک شێرکۆ بوو.  دەنگێک لە ئاسۆ ڕوونەکانی نیشتمانەوە ، چەند هەزار میل ، بەسەر باڵی هومێدەوە ، دەهات و لە ناهومێدییەکانی کێڵگەی ڕووحمدا ، تۆوی گەشبینییەکانی ژیانی تۆو دەکردن.  ئەوە دواجار بوو ، ئەو دەنگە ژیاندۆستە سیحراوییە بژنەوم!

پێش سێ مانگان ، هاتمەوە کوردستان و (شێرکۆ) نەبوو.  ئەو بۆ یەکلاکردنەوەی ئەفسانەی مەرگ و ژیان ، بۆ سوێد سەفەری کردبوو! ئێمە جێگۆڕکێمان کردبوو.  لە سوێد ، نەمتوانی یانژی نەمویست لە دوا ساتەکانی ژیانیدا بیبینم.  من نەمدەویست وێنە ڕەنگینەکانی ڕووخساری ئەو، ڕووخسارێک کە سیمای جوانییەکانی شیعر بوو لە هزرمدا، شوێن بۆ وێنەی تاڵییەکانی مردن چۆڵ بکەن.

بە تەلەفوون، لە لەرەی دەنگی تەماویی ( نەسرین خان) ی هاوسەریدا ، تەپەی پێی مردنم دەبیست.  مردن پەلەی بوو.  مردن لە شاعیری ئێمە خێراتر بوو.  ئەو زۆر زوو گەیشت!

ئێستا ، لەسەر مێزی نووسینەکەم ، ” شێرکۆ ” ی گەورە ، بە هەموو بەرهەمەکانییەوە ئامادەیە و بەیانیان ، بەیانیباشی لێ دەکەم!

چ ئەستەمە ، تۆ لە پایینی چیایەک لە دەقی شیعریدا ، دۆش دامابیت و دەڕۆست هەڵکۆڵینی ئێستاتیکا و هەڵگەڕان بە بەرزاییی باڵای شیعردا نەیەیت!

کۆبەرهەمی شیعری شێرکۆ ، لە زیاتر لە پەنجا ساڵدا ، خولقاندن و داهێنانی پڕ بەهرە و سازاندنی جوگرافیایەکی شیعریی ڕۆژهەڵاتگرە ، پانتایییەکە ، بە سەدان پەنجەرە و ڕۆژنەی پڕ تیشکەوە ، بۆ شیعر و ئەدەبیاتی کوردی کە ڕەنگاڵەی تاڵەکانیان ، لە ئەدەب و شیعری جیهان دەئاڵێن.

ئەدەبی کوردی ، لە درێژاییی مێژووی پڕ هاتی خۆیدا ، لە پرۆسەی گەشەکردن و تیشکدانەوەیدا ، چەندین ناوی گەورە و شاعیری داهێنەری خولقاندووە ، بەڵام بێ هیچ دوودڵییەک، دەشێ بێژین ، هیچ شاعیرێک هێندەی شێرکۆ ، پڕ بەرهەم و شاباڵی خەیاڵی قووڵ و بەرزەفڕ نەبووە.

بەرهەمی شیعریی شێرکۆ ، هێند داهێنەرانەیە ، بەشی سەد ساڵی دیکەی کۆڵینەوە و تۆێژینەوەی ئەدەب و مێژووی خولقاندنی ئەدەبی داهێنراو دەکات.

شیعری ” بێکەس ” ، لووتکەی ئەدەبی بەرگری و ئینسانیی کوردە و مەکۆیەکی کەموێنەیە بۆ تەوزیفکردنی کەلەپوور و مێژووی کورد ، لە هونەری داهێنانی شیعریدا.  هیچ شاعیرێکی ئێمە ، هێندەی شێرکۆ ، دەستەڵاتی بە سەر خولقاندنی ئەم هونەرەدا نەشکاوە.

شێرکۆ ڕۆیشت.  شیعر ناڕوات.  ” نیرۆدا ” گوتەنی( شیعر نەمرە.  شیعر ڕووحی حەوت پشیلەی هەیە!)

داستانە شیعرییەکانی شێرکۆ ، ( لە زمانی ” پابلۆنیرۆدا ” وە کە ” ڕۆفائیل ئەلبێرتی ” دەدوێنێت ، ئەو داستانانەی کە ” ئەلبێرتی ” ، لە سەربازگە و جەرگەی جەنگەکانی پارتیزانانی ئەسپانیادا دەیخوێندنەوە ) ، لە ڕووحی نەتەوەییی ئێمەدا ، هەمان سیحریان خولقاند!

شێرکۆ ، سەرپاکی کێش و ڕیتمی شیعری کوردیی ، لە ستاییل و دەنگی تایبەتی خۆیدا ئەزموونکردن.  مرواریی درەوشاوەی شیعری کوردی ، لە پەیمانەی بلوورینی ئەزموونی شیعریی شیرکۆ دەڕژێ !

لە چلەی کۆچی گەورەترین شاعیری ئێمەدا ، چلچرایەک لەسەر تەختی ئیمۆراتۆریای شیعری کوردی، بۆ ئەبەد دەگڕیێ !

19. 09. 2013

سوێد

 

 

 

 

Go to top