We have 39 guests and no members online

زریان خەتاب

بارودۆخی ئێستای یه‌كێتی له‌ بارودۆخێكی ئاسایی ناچێت و رۆژ به‌ رۆژ قه‌یرانه‌كانی ناو خۆیی ئه‌و حزبه‌ به‌ره‌و زیاتر و ئاڵۆز بوونی گه‌وره‌تر ده‌چن، ئه‌وه‌ی ئێستا له‌ ناو یه‌كێتی رووده‌دات مه‌رگی ئه‌و حزبه‌ نیه‌و په‌ككه‌وتنێكی سیاسییه‌، كه‌ له‌ ده‌رنجامی شكستێكی سیاسی نێو پرۆسه‌یه‌كی دیموكراسی و دووركه‌وتنه‌وه‌ له‌ جه‌ماوه‌ر هاتۆته‌ ئاراوه‌، وه‌ك له‌ پلینیۆمی ئه‌و حزبه‌ش به‌ شكست ناونرا، بۆیه‌ له‌ ئانی په‌ككه‌وتن و نه‌خۆشی هه‌ر كه‌س و لایه‌نێكیش ده‌رفه‌تی باشبوونه‌وه‌، یا به‌شاتر بوونیش له‌ ئاردایه‌، ئه‌وه‌ش ئومێدێكی گونجاوه‌ بۆ باوه‌ڕبوون به‌هه‌ڵسانه‌وه‌ و گه‌ڕانه‌وه‌ بۆ ئه‌دا و ده‌نگی جاران، ئه‌وه‌ی ئێستا له‌نێو ئه‌و حیزبه‌ ده‌گوزه‌رێت بریتیه‌ له‌چه‌ندین رای جیاواز له‌ئاستی جه‌ماوه‌ری و سه‌ركردایه‌تی و سیاسی، چه‌ندین راو سیناریۆ هه‌ن، بۆ به‌ره‌و باشتركردنی ئه‌و ره‌وشه‌ی ئێستا یه‌كێتی تێی ئاڵاوه‌، له‌ هه‌موویان گرنگتر جێگرتنه‌وه‌ی مام جه‌لاله‌ كه‌ له‌ ئێستادا غیابێكی گه‌وره‌ی نێو خۆیی و ده‌ره‌كی له‌ سه‌ر ئاستی كوردستان و عێراق به‌گشتی و یه‌كێتییه‌كه‌ی به‌تایبه‌ت دروست كردووه‌.  

 له‌و نێوه‌نده‌ بۆ جێگره‌وه‌ی مام جه‌لال و گرتنه‌ ده‌ستی حوكمرانی یه‌كێتی و له‌وێشه‌وه‌ بۆ حوكمرانی شه‌راكه‌تی حكومه‌تی كوردستان رای جیاواز هه‌ن و چه‌ند هێزێك له‌گره‌وه‌ی ئه‌و بردنه‌وه‌یه‌دان، له‌هه‌موو هێزه‌كان دیارتر سێ هێزی سه‌ره‌كی نێو یه‌كێتین كه‌ پێكهاتوون له‌ كوتله‌ یان خه‌تی هێرۆخان، كاك كۆسره‌ت، دكتۆر به‌هه‌م، هه‌ر یه‌ك له‌و هێز و ئاراستانه‌ خاوه‌ن خه‌سڵه‌ت و تایبه‌تمه‌ندی و ئایدیاو مێژووی سیاسی و حوكمرانی خۆیانن، له‌ ژێر سێبه‌ر و ناوێكی گشتی كه‌ یه‌كێتییه‌، بێشك دواجار له‌و ململانێ سیاسییه‌دا یه‌ك یان دوان له‌و هێزانه‌ سه‌ركه‌وتنی باڵا به‌ده‌ست دێنن ئه‌ویش له‌به‌ر ئه‌وه‌ی به‌ره‌ده‌وام له‌و هێزانه‌ دوو هێزیان ده‌چنه‌ نێو یه‌ك چوراچێوه‌ی جێبه‌جێكاری و هێزی سێیه‌م ده‌بێ وه‌ك هێزی لاوه‌كی بمێنێته‌وه‌، له‌ ده‌رفه‌تێكیتری سیاسیدا هه‌وڵی جێگره‌وه‌ی یه‌كێك له‌و هێزانه‌ بدات، یان هه‌ر وه‌ك خۆی بمێنێته‌وه‌، ده‌شكرێت له‌چوارچێوه‌ی په‌یڕه‌وه‌ی سێبه‌ری ئه‌و حزبه‌ بچێته‌ده‌ر و ماڵ ئاوای له‌ سیاسه‌ت یانیش ده‌ستپێكردنی حزبێكی نوێ بكات به‌ به‌رگی خۆیی و په‌یڕه‌وانی، ئه‌ویش پێشتر به‌روونی دیاربووه‌ به‌وه‌ی به‌رده‌وام له‌ناو یه‌كێتیدا ته‌كه‌تول و باڵ باڵێن بوونی هه‌بووه‌، له‌ ده‌ره‌نجامیشیدا هه‌رگیز كۆی هێزه‌كان نه‌گه‌شتونه‌ته‌ سه‌ر یه‌ك رای گشتی و هاوشێوه‌، به‌و هۆیه‌شه‌وه‌ یه‌كێتی زیانی زۆری به‌ركه‌وتووه‌، له‌نێو ئه‌و هاوكێشانه‌دا ئه‌وه‌ی به‌دیده‌كرێت خه‌تی هێروخان به‌ خه‌تی میرات گری مام جه‌لال ناوده‌برێت و خێزانه‌كه‌ی و كوڕه‌كانی تاڵه‌بانی و به‌شێكی به‌رچاو له‌ كه‌سایه‌تییه‌ سیاسی و سه‌ربازیه‌كانی ناو یه‌كێتی له‌و باڵه‌ كۆبونه‌ته‌وه‌، به‌ڵام نیگه‌رانی ئه‌و باڵه‌ له‌وه‌دایه‌ له‌ ئانی به‌هێزبوونیدا به‌ده‌سه‌ڵاتێكی بنه‌ماڵه‌یی ناوده‌برێت، ئه‌وه‌ش له‌گه‌ڵ مێژوو و دروشم و ئه‌مڕۆی مۆدێرنه‌ت و هۆشیاری تاكی یه‌كێتی كه‌متر یه‌كده‌گرێته‌وه‌، به‌روه‌كه‌ی تریشیدا ئابورییه‌كی زۆر و هێزی سه‌ربازی و كه‌سایه‌تی سیاسی له‌ سێبه‌ری ئه‌و لایه‌نه‌ له‌ چالاكیدان، كه‌ دیارترینیان مه‌لا به‌ختیاره‌، هێزی دووه‌م كه‌ به‌هێز یان باڵی كاك كۆسره‌ت ناسراوه‌، خاوه‌ن ئابورییه‌كی زۆر و جه‌ماوه‌ر و هێزی گه‌وره‌ی سه‌ربازییه‌، له‌ناو یه‌كێتی و شاری هه‌ولێر به‌تایبه‌ت، تایبه‌تمه‌ندییه‌تی ئه‌و هێز و كه‌سایه‌تییه‌، له‌وه‌دایه‌ كه‌ به‌رده‌وام له‌ ده‌ستپێكی ئاڵۆزی و قه‌یرانه‌كاندا زۆربه‌ی كات وه‌ك هێزی سه‌ره‌كی خۆی نمایشناكات، دووره‌ وه‌ستان ده‌بێت و ده‌چێته‌ نێو گه‌مه‌ی یه‌ك لای كه‌ره‌وه‌ی هاوكێشه‌كان، وه‌ك پیشتر له‌ نێوان یه‌كێتی و گۆڕان چه‌ند جارێك له‌نێو ئه‌و هاوكێشانه‌دا گه‌مه‌ی له‌ و شێوه‌یه‌ بینراوه‌، واتا ده‌كرێ بڵێن باڵی كاك كۆسره‌ت ره‌سوڵ سیاسه‌تێكی ستراتیژی و دووربینی ئه‌و تۆی نیه‌ بۆ خوێندنه‌وه‌ی بارودۆخی سیاسی ناوچه‌كه‌ و یه‌كێتییه‌كه‌ی، زیاتر دوور ده‌بێت و دواجار به‌خوێندنه‌وه‌ی لایه‌نه‌كان و هه‌ڵسه‌نگاندنی به‌رژه‌وه‌ندییه‌كان بڕیاری خۆی ده‌دات و زۆربه‌ی كات هێزی گه‌وره‌ی یه‌ك لای كه‌ره‌بووه‌، ئه‌مه‌ سه‌ره‌ڕای ئه‌وه‌ی خاوه‌ن باڵ و كوتله‌ی خۆی بووه‌، به‌ڵام له‌ حزور تاڵه‌بانی و خه‌تی گشتی جیاكاری ئاشكرا و راسته‌وخۆی ئه‌نجام نه‌داوه‌، ئه‌وه‌ش وایكردووه‌ له‌هه‌موو سیناریۆكاندا ره‌چاوی تایبه‌تمه‌ندییه‌تی ئه‌و باڵه‌ بكرێت و فه‌رامۆش نه‌كرێت.  هێزێكی تری نێو ئه‌و باڵانه‌ و هێزی سێیه‌م دكتۆر به‌رهه‌مه‌، كه‌ له‌ئێستادا له‌دوای دووركه‌وتنه‌وه‌ی تاڵه‌بانی به‌هۆی ناله‌باری ته‌ندروستی به‌شێوه‌یه‌كی ئاشكرا خه‌ریكی خۆنمایشكرنی سیاسه‌تی خۆیه‌تی، چونكه‌ تابوونی مام جه‌لال وه‌ك خه‌تی گشتی و كه‌سی نزیكی مام جه‌لال جموجۆڵه‌ سیاسییه‌كانی خۆی نیشانداوه‌، به‌ڵام ئێستا ئه‌و باڵه‌ی به‌باڵه‌كه‌ی هێرۆخان ناسراوه‌، باڵی میرات گری تاڵه‌بانی ته‌واو هاوڕاو بۆچون نییه‌ له‌گه‌ڵ دكتۆر به‌رهه‌م، ئه‌وه‌ش وه‌ك په‌یامێكه‌ بۆئه‌وه‌ی بڵێت تا هه‌بوونی ده‌نگ و سیاسه‌تی تاڵه‌بانی و گۆچانه‌كه‌ی خوێندكاری قوتابخانه‌ی تاڵه‌بانیه‌!! به‌ڵام دوای ئه‌و ناچێته‌ ژێرباری هیچ ناو و كه‌سایه‌تییه‌كی سیاسی ئه‌و باڵه‌، ئه‌ویش به‌رنامه‌و قسه‌ی ده‌بێت و خۆی به‌ میراتگری یه‌كێتییه‌كه‌ی ده‌زانێت، بۆیه‌ ئێستا به‌سه‌رده‌می ده‌ركه‌وتنی هێزی ئه‌و ناوده‌برێت، كه‌ هێزی سه‌ره‌كی ئه‌و باڵه‌ جیا له‌ دوو هێزه‌كه‌ی تر زیاتر میدیایی و سیاسییه‌ ئه‌و باڵه‌ تا راده‌یه‌كی زۆر خاڵیه‌ له‌ هێزی سه‌ربازی ئه‌وتۆ و ئابوریه‌نیش تا ئێستا شتێكی وه‌ها له‌به‌رچاونیه‌ كه‌ شیاو به‌ پته‌وی هێزێكی مادی ئه‌وتۆبێت كه‌ بچێته‌ ئاستی دوو هێزه‌كه‌ی تری به‌رامبه‌ری، ئه‌وه‌ی ئه‌و پیاوه‌ جیاده‌كاته‌وه‌ سیاسه‌ته‌ ستراتیژیه‌كانییه‌تی به‌ڕووی ئه‌و باوردۆخانه‌ی روده‌ده‌ن و بوونه‌ته‌ بابه‌تی رۆژ، ئه‌وه‌ جگه‌له‌وه‌ی له‌سه‌ر ئاستی ده‌ره‌كی و عێراق و كوردستانیش له‌چه‌ند قۆناغێكی لێپرسراویه‌تی پۆستی جیادا توانیویه‌تی ئه‌ركی سیاسییانه‌ی خۆی به‌جێبگه‌یه‌نێت و ببێته‌ جێگای ئاماژه‌ی ده‌وروبه‌ر و وه‌ك سیاسییه‌كی به‌هێز ده‌ربكه‌وێت، بۆیه‌ بۆ بارودۆخی ئه‌مڕۆی یه‌كێتی دكتۆر به‌رهه‌م زۆرترین بۆچون و چاوی پێشنیاركراوی له‌سه‌ره‌ وه‌ك شیاوترین كه‌سایه‌تی جێگره‌وه‌ی سكرتێری یه‌كێتی، ئه‌مڕۆی مۆدێرنه‌ت و یه‌كێتی بوون، بریتییه‌ له‌هه‌بوونی ئه‌قلیه‌ت و به‌رنامه‌و بیرۆكه‌ی ستراتیژیه‌تی سیاسی و خۆ گونجێن له‌گه‌ڵ كه‌یسه‌ سیاسییه‌كانی رۆژ و گرینگیدان به‌ تواناكانی گه‌نج كه‌ له‌ڕابردوشدا له‌كابینه‌ی شه‌شی حوكمڕانی دكتۆردا گه‌نجان زۆرترین ده‌رفه‌تی چونه‌پێش و گه‌شه‌كردنیان بۆ هاته‌پێش و زۆرترینی پرۆژه‌كانی ئه‌و كابینه‌یه‌ له‌ خزمه‌ت گه‌نجانی وڵاتدابوو.  بۆیه‌ ئه‌مڕۆ یه‌كێتییه‌كه‌مان له‌به‌رده‌م ئه‌و سیناریۆ جیاوازانه‌ دایه‌ كه‌ ئاراسته‌كانی رۆشتنی یه‌كێتی به‌و رێڕه‌وانه‌دا له‌ئه‌ستۆی سه‌ركرده‌كانی ئه‌مڕۆی یه‌كێتیدایه‌، جه‌ماوه‌ری یه‌كێـتیش چاوه‌ڕێی ده‌ستاوده‌ستی ئه‌و هێز و ده‌سه‌ڵاتانه‌ی نێوان سه‌ركرده‌كانیه‌تی بۆ ده‌ستی ئه‌و كه‌سه‌ی كه‌ شیاوترینه‌ تا له‌و ئاست و پۆسته‌دابێت، بۆ یه‌كێتییه‌كی گه‌نج و پێشه‌نگ و سیاسه‌ت دروست، به‌خوێندنه‌وه‌ی پشتگیری ده‌ره‌كی و عێراق و خودی ئه‌مریكاش كه‌ رۆڵێكی باڵای هه‌یه‌ له‌ بابه‌ته‌ سیاسیی و حوكمرانییه‌كانی عێراق و كوردستان، دكتۆر به‌هه‌م كه‌سێكی شیاو ده‌بێت بۆ ئه‌وه‌ی له‌ناو حزبه‌كه‌ی بچێته‌ پێش و جڵه‌وی ده‌سه‌ڵاتی باڵا بگرێته‌ ده‌ست، به‌ڵام هه‌موو ئه‌و هه‌وڵانه‌ به‌تاڵ ده‌بنه‌وه‌ ئه‌گه‌ر ناوخۆی حزبه‌كه‌ی له‌ ده‌سه‌ڵاتی مه‌كته‌بی سیاسی و سه‌ركردایه‌تی پشتگیری نه‌كه‌ن و هه‌مهانگی نه‌بن، بۆیه‌ ترسه‌كه‌ له‌وه‌دایه‌ دواجار مه‌كته‌بی سیاسی و سه‌ركردایه‌تی له‌ بڕیاردانیان بۆ ئه‌و بابه‌ته‌ نه‌توانن خوێندنه‌وه‌یه‌كی دروست بكه‌ن و یه‌كێتیه‌كه‌مان زیاتر به‌ره‌و پشێوی ببه‌ن، لێره‌دا و له‌و نوسینه‌مدا من دووپاتی ئه‌وه‌ده‌كه‌مه‌وه‌ كه‌ یه‌كڕیزی نێو هێز و كه‌سایه‌تییه‌كانی ناو یه‌كێتی گره‌وی رزگاربوونه‌ له‌هه‌موو ئه‌و قه‌یران و كێشانه‌ی به‌رۆكی یه‌كێتییان گرتووه‌، وه‌لێ دواجار هه‌ر ناو و كه‌سێك ده‌بێته‌ سكرتێر و جێگره‌وه‌، ژماره‌یه‌كی تریش زیاتر دێنه‌ پێش و هه‌ندێكیشیان له‌ ئاستیان دێته‌ خواره‌وه‌، له‌ كۆنگره‌ی چواری یه‌كێتی كه‌ وابریاره‌ له‌كۆتایی مانگی یه‌كی ئه‌مساڵ ببه‌سترێت كۆی ئه‌و رووداوانه‌ دێنه‌ پێش و پێویسته‌ ئاقڵانه‌ و بوێرانه‌، لێكدانه‌وه‌ و خوێندنه‌وه‌ و هه‌ڵبژاردنیان بۆبكرێت، ئه‌وه‌ش سروشتێكی ئاسایی سیاسه‌تكردنه‌، له‌هه‌موو دونیاو سه‌رده‌می دیموكراسیدا.  له‌هه‌موو ئه‌و ئه‌گه‌رانه‌شدا یه‌كێتی سیاسه‌ت و جه‌ماوه‌ره‌كه‌ی له‌ گه‌شانه‌وه‌ داده‌بێت ئه‌گه‌ر له‌نێو ئه‌و بژاردانه‌دا دكتۆر به‌رهه‌م بێنێته‌ پێش و ببێته‌ كه‌سی یه‌كه‌می ناو یه‌كێتی، به‌و مانایه‌ی له‌سه‌ر ئاستی جه‌ماوه‌ریی و پێویستی سیاسه‌تكردن و ناسراوبوونی ئه‌و كه‌سایه‌تییه‌ و قبوڵكردنی له‌لایه‌ن هێزه‌ سیاسییه‌كانی تری هه‌رێم كه‌سێكی شیاوه‌، به‌ڵام به‌مه‌رجێك رێز له‌ به‌رهه‌مه‌كی بگیرێت و هه‌ماهه‌نگی و پاڵپشتی دڵسۆزانه‌ی بۆ بكرێت، هه‌روه‌ك خودی دكتۆر به‌رهه‌میش پێویسته‌ روونتر خۆی نمایشبكات و ئه‌جێندا و به‌رنامه‌ی كاری سیاسی خۆی له‌ چه‌ند كه‌سێك و گروپێكی ده‌وروپشتیه‌وه‌ فراوانتر بكات بۆ رای گشتی و ئه‌ندام و جه‌ماوه‌ری حزبه‌كه‌ی، بۆئه‌وه‌ی له‌ رێگه‌ی ئه‌و به‌رنامه‌و كارنامه‌یه‌وه‌ زیاتر جێگیری سیاسییانه‌ی خۆی بسه‌لمێنێت، به‌تایبه‌ت له‌ئان و ساتێكی وه‌هادا كه‌ ده‌رفه‌تێكی زێرینه‌ بۆ هاتنه‌ پێشی زیاتری دكتۆر به‌رهه‌م، بۆئه‌وه‌ی له‌مه‌یدانی سیاسه‌تی ئه‌مڕۆی كوردستان و ناوچه‌كه‌دا كه‌سایه‌تییه‌كی تری وه‌ك مام جه‌لال ئاسا یان په‌یڕه‌وه‌ی رێبازی تاڵه‌بانی له‌بردنه‌وه‌ی گروه‌ی سیاسه‌تدا بێته‌ ئاراوه‌ و سارێژی برینی حزبه‌كه‌ی و گه‌شانه‌وه‌ی یه‌كێتییه‌كه‌مان له‌سه‌ر ده‌ست و زه‌مه‌نی ئه‌ودابێت.  

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.  

 

Go to top