We have 128 guests and no members online

بێستون هەورامی

له‌گه‌ڵ بڵاوبونه‌وه‌ی هه‌واڵی گه‌ڕانه‌وه‌ی تاڵه‌بانی بۆ هه‌رێم زۆربه‌ی میدیا جیهانی و ناوخۆیه‌كان مانشێت و به‌رنامه‌ ڕاسته‌وخۆكانیان بۆ باسوخواسی خه‌بات و تێكۆشانی تاڵه‌بانی له‌مێژوی بزوتنه‌وه‌ی ڕزگاریخوازی نه‌ته‌وه‌ی كورددا ته‌رخانكرد، ئه‌وه‌ی زیاتر له‌خه‌ڵكانێكی ئاسایی دڵخۆش بوو به‌گه‌ڕانه‌وه‌ی مام شرۆڤه‌كارو چاودێرانی سیاسی بون، چونكه‌ پێیانوایه‌ تاڵه‌بانی ئه‌گه‌ر له‌لایه‌ك دوچاری تێكچونی باری ته‌ندروستی هاتبی ئه‌وا له‌لایه‌كی دیكه‌وه‌ پزیشكێكی سیاسی دانسقه‌یه‌ بۆ چاره‌سه‌ركردنی ئه‌و نه‌خۆشیه‌ كوشندانه‌ی كه‌ له‌ئه‌مڕۆدا جه‌سته‌ی ئه‌م وڵاته‌یان له‌ هه‌موو ڕویه‌كه‌وه‌ لاوازكردووه‌، بۆیه‌ به‌ڕای من ئه‌و وتی وتیه‌ی به‌شێوه‌یه‌كی دوژمنكارانه‌ له‌هه‌ندێك میدیاوه‌ له‌ باره‌ی ته‌ندروستی تاڵه‌بانیه‌وه‌ ئه‌گوازرێنه‌وه‌ بۆ كۆمه‌ڵانی خه‌ڵك پێویسته‌ ڕابگیردرێ و به‌وشێوه‌یه‌ پیشانی دوژمنانی گه‌له‌كه‌مان نه‌دری كه‌ئیدی مام ناتوانی هه‌مان پزیشكی سیاسی دوو ولایه‌تی سه‌رۆك كۆماری ڕابردوبی، چونكه‌ ئه‌م ئاماژه‌یه‌ وێڕای ئه‌وه‌ی دوره‌ له‌زه‌روریه‌تی ئه‌م قۆناغه‌ی ئه‌مڕۆی دۆزی گه‌لی كورده‌وه‌، له‌هه‌مانكاتدا ئاماژه‌یه‌كی ڕونه‌ بۆ شپرزه‌یی نێوماڵی نه‌ته‌وه‌یمان بۆیه‌ له‌هه‌رڕویه‌كه‌وه‌ مام به‌راورد بكه‌ین به‌و سه‌ركردانه‌ی هه‌ردوو مه‌زهه‌ب له‌به‌غدا هیچكات له‌ڕوی پارسه‌نگی سیاسی و مه‌زهه‌بی و دیموكراسی و ماف و ئازادی ڕه‌گه‌زی و گشتی و په‌یامی ئاشتی خوازی هتد. . نه‌یانتوانیوه‌ هێنده‌ی مام كاریگه‌ری و خه‌مخۆریان هه‌بی بۆ گه‌لانی ئێراق، بۆیه‌ له‌و باوه‌ڕه‌دام ئه‌م دۆخه‌ی ئه‌مڕۆ ئێراقی تێكه‌وتووه‌ پێویستی به‌و پزیشكه‌ سیاسیه‌ به‌ئه‌زمونه‌ هه‌یه‌ تاوه‌كو له‌ ڕێگه‌ی گرته‌ی تیشكه‌وه‌ كۆی برینه‌ شاراوه‌كان بۆ سه‌رجه‌م پێكهاته‌كانی ئه‌م وڵاته‌ بخاته‌ڕو دواتر له‌هۆڵه‌كانی دانو ستان نه‌شته‌رگه‌ریان بۆ بكات، جابۆیه‌ پێویسته‌ میدیای كوردی له‌م بارودۆخه‌ی ئه‌مڕۆدا ڕۆڵێكی كارا له‌ پیشان دانی وێنه‌ جوان و پێویستیه‌ نه‌ته‌وه‌ییه‌كاندا بگێڕی، چونكه‌ به‌ده‌سكه‌وتنی ده‌رفه‌تی بڕیاردان له‌مافی چاره‌ی خۆنوسین واتای بێبه‌شبونیانه‌ له‌و مێژووه‌ پڕسه‌روه‌ری و ده‌سكه‌وته‌و هه‌روه‌ها دڵخۆش بون به‌هه‌ر جۆره‌ لاوازیێكی مام دڵخۆشبونه‌ به‌لاوازی به‌شێك له‌خه‌باتی بزوتنه‌وه‌ی ڕزگاریخوازی نه‌ته‌وه‌كه‌مان، سه‌رچاوه‌گرتنی ئه‌م ئاماژه‌یه‌ بۆ ئه‌و خه‌بات و قوربانیدانه‌ی جه‌نابیان و یه‌كێتی ئه‌گه‌ڕێته‌وه‌ كه‌ده‌یان ساڵه‌ له‌پێناو ماف و ئازادیه‌كانی گه‌لی كورددا خۆیانی بۆ ده‌كه‌نه‌ قوربانی و هه‌روه‌ها تاڵه‌بانی له‌ماوه‌ی دوو ولایه‌تی سه‌رۆك كۆماریدا هێنده‌ ئامرازێكی گرانبه‌های سیاسه‌ت بووه‌ باوه‌ڕناكه‌م ناوه‌نده‌ بڕیار به‌ده‌سته‌ كیشوه‌ری و نێوده‌وڵه‌تیه‌كان ده‌ستبه‌رداری ڕاوێژه‌كانی له‌باره‌ی كۆی پرسه‌كانی ناوخۆی ئێراق و ناوچه‌كه‌وه‌ه‌ببن و هه‌رله‌م سۆنگه‌یه‌وه‌یه‌ كادرو ئه‌ندامانی یه‌كێتی متمانه‌ی ته‌واویان به‌م پزیشكه‌ سیاسیه‌ (مام) هه‌یه‌و له‌داهاتویه‌كی نزیكدا ده‌نگه‌ جیاوازه‌كانی ناوخۆی یه‌كێتی به‌ نه‌شته‌ر گه‌ریێك یه‌كده‌خاته‌وه‌و به‌ر له‌خستنه‌ڕوی هه‌رئه‌گه‌رو پێشهاتێك له‌باره‌ی چاره‌سه‌ركردنی كۆی پرسه‌كانی ناوخۆی ئێراقه‌وه‌ با چاوه‌ڕێی چاك بونه‌وه‌ی پزیشكه‌ سیاسیه‌كه‌ (تاڵه‌بانی) بكه‌ین.

 

ڕوداو و پێشهاته‌كانی ڕۆژهه‌ڵاتی ناوین زۆرجار ئه‌وه‌نده‌ به‌خێرایی ڕوده‌ده‌ن مرۆڤ ناتوانی شرۆڤه‌یه‌كی متمانه‌داریان بۆ بكات، له‌هێرشه‌كانی ئه‌م دوو مانگه‌ی چه‌كدارانی داعش بۆسه‌ر سوپاكه‌ی مالیكی گه‌لێك ڕوداو و لێدوانی هه‌مه‌جۆری له‌ئێراق و ناوچه‌كه‌و جیهاندا هێنایه‌بون له‌م نێوه‌نده‌دا هێزی پێشمه‌رگه‌ له‌95%ی ناوچه‌كانی سنوری ماده‌ی 140ی كۆنترۆڵ كردو بارزانی لای خۆیه‌وه‌ پرسی سه‌ربه‌خۆیی له‌میدیاكانه‌وه‌ وروژاندو هه‌روه‌ها چه‌كدارانی داعشیش ده‌وڵه‌تی ئیسلامی خۆیان له‌ئێراق ڕاگه‌یاندو شاری موسڵیان كرده‌ یه‌كه‌م ولایه‌تی ئه‌م ده‌وڵه‌ته‌و له‌ئاست نێوده‌وڵه‌تیشدا هه‌ردوو وه‌زیرانی ده‌ره‌وه‌ی ئه‌مه‌ریكاو به‌ریتانیا سه‌ردانی ناوچه‌كه‌و به‌غداو هه‌ولێریان كردو وه‌زیرانی هه‌ردوو وڵات له‌م سه‌ردانه‌یاندا نه‌ك هه‌ر هه‌گبه‌كه‌یان بۆ هه‌ولێر به‌تاڵبوو به‌ڵكو ئه‌و خه‌ونه‌ی كه‌بۆ ڕاپرسی و ڕاگه‌یاندنی ده‌وڵه‌تی سه‌ربه‌خۆی كوردی هه‌بوو له‌باریان بردو هه‌رله‌م باره‌وه‌ مالیكی گه‌فی زڕاندنی خه‌ونی سه‌ربه‌خۆیی كوردو گه‌ڕانه‌وه‌ی ده‌سه‌ڵاتی بۆ ئه‌و ناوچانه‌ی سوپاكه‌ی له‌ده‌ستیداون ئاراسته‌ی هه‌ولێرو داعشی كردن!؟ سه‌رئه‌نجام لێدوانه‌ دبلۆماسیه‌ لوتكه‌ییه‌كان و گه‌فی مالیكی وڵاتانی ناوچه‌كه‌و شپرزه‌یی و دوبه‌ره‌كی نێوماڵی هه‌رێم وهتد. . وایكرد په‌رله‌مانتارانی كورد بۆ شه‌رعیه‌تدانی سیاسی و یاسایی به‌ولایه‌تی سێیه‌می مالیكی ڕویان له‌به‌غدا كردو تاهه‌نوكه‌ش هیچ جۆره‌ پێشمه‌رجێكی پرۆتۆكۆڵی ئه‌وتۆ له‌نێوان به‌غداو هه‌ولێردا به‌دی ناكری و تاوه‌كو پاساوێك بی بۆ ئه‌م ئاماژه‌یه‌!! له‌25/7دا بانكی مۆن به‌سه‌ردانێكی فه‌رمی گه‌یشته‌ به‌غداو دوای كۆبونه‌وه‌ی له‌گه‌ڵ مالیكی له‌باره‌ی ڕوداوه‌كانی ئه‌م دواییه‌ی ناوخۆی ئێراق و ناوچه‌كه‌ سه‌ردانی هه‌ولێری كردو له‌گه‌ڵ مسعود بارزانی كۆبویه‌وه‌، به‌شێك له‌شرۆڤه‌كاران وایان ده‌بینی ته‌وه‌ری سه‌ره‌كی بانكی و بارزانی ئاماده‌كاری گشتپرسی و سه‌ربه‌خۆیی كوردبی، به‌ڵام به‌پێی پرسیارو لێدوانه‌كانی هه‌ردولا له‌ كۆنگره‌ ڕۆژنامه‌وانیه‌كه‌یاندا بانكی مۆن هیچ ئاماژه‌یه‌كی ئه‌وتۆی به‌و خواسته‌ی بارزانی نه‌داوه‌و به‌م پێیه‌ش نه‌ته‌وه‌ یه‌كگرتووه‌كان له‌م قۆناغه‌دا له‌گه‌ڵ خواستی سه‌ربه‌خۆیی هه‌رێمدا نیه‌!؟، ئه‌وه‌ی له‌نێوان وه‌ڵامدانه‌وه‌ی پرسیاری گه‌لی كوردو به‌غدادا ئه‌مینێته‌وه‌و (به‌ڵی و نه‌خێر) ئاراسته‌ی كاملا ئه‌كات بێگومان (بارزانی) یه‌، له‌م باره‌وه‌ هه‌ندێك چاودێر پێیانوایه‌ ورژاندنی پرسی سه‌ربه‌خۆیی ناوبه‌ناو له‌لایه‌ن (بارزانی) یه‌وه‌ ته‌نها له‌پێناو به‌ماف زانینی نه‌وه‌ی داهاتوی كوردو سوكه‌ گوشارێكه‌ بۆسه‌ر به‌رپرسانی به‌غداو هیچی تر، به‌ڕای من ئه‌م ئاماژه‌یه‌ له‌ناو فه‌لسه‌فه‌ی سیاسه‌تدا هیچ په‌ناگایه‌كی ئه‌وتۆی نیه‌ تاوه‌كو جێگای بێته‌وه‌، بۆیه‌ له‌م نێوه‌نده‌دا تاكه‌ وه‌ڵامێكی مامناوه‌ند بارزانی بتوانی بۆ گه‌لی كورد بیداته‌وه‌ پاش شكستهێنانی داعش له‌ئێراقدا نه‌گه‌ڕانه‌وه‌ی هێزی پێشمه‌رگه‌یه‌ بۆ هێڵی شین، ئه‌م ئاماژه‌یه‌ش كاتێك دروست ئه‌بی هه‌ولێر و به‌غدا به‌م هۆیه‌وه‌ دوچاری شه‌ڕ نه‌بنه‌وه‌و له‌و باوه‌ڕه‌دام هیچكات به‌غدا ڕێگه‌ به‌مانه‌وه‌ی هێزی پێشمه‌رگه‌ له‌ناوچه‌كانی گرته‌وه‌ی ماده‌ی140دا نادا بۆیه‌ وایده‌بینم وه‌ك كایه‌كانی ڕابردو به‌رپرسانی هه‌رێم به‌بیانوی مانه‌وه‌ی ده‌سسه‌ڵاتیان به‌م شێوه‌یه‌ی ئه‌مڕۆو به‌بیانوی له‌بارنه‌چونی ئه‌زمونی هه‌رێم جارێكی دیكه‌ مرونه‌تێكی تر ئه‌نوێن و پاشه‌كشه‌ به‌پێشمه‌رگه‌ ئه‌كه‌ن!! ئه‌وه‌ی له‌م ئاماژه‌یه‌و مانشێتی بابه‌ته‌كه‌مانه‌وه‌ له‌ڕوی جه‌ماوه‌ری و پارسه‌نگی سیاسیه‌وه‌ زیانمه‌ند ئه‌بی بێگومان (مسعود بارزانی) یه‌.

باوه‌ڕناكه‌م به‌درێژایی مێژوی بزوتنه‌وه‌ی ڕزگاریخوازی كورد له‌چوار پارچه‌كه‌ی كوردستاندا ئامانج له‌و ڕاپه‌ڕین و شۆڕشانه‌ی ڕاگه‌ێنراون یه‌كخستنه‌وه‌ی نیشتمانه‌ دابه‌شكراوه‌كه‌یان له‌مه‌غزای سیاسی و ستراتیژیه‌تیاندا نه‌بوبی، به‌ڵام زۆرجار كورت ته‌مه‌نی شۆڕش و نه‌بونی ده‌رفه‌ت وایكردووه‌ ئامانجه‌كان نه‌یه‌نه‌دی، له‌كوانوی ئه‌م مێژوی شۆڕشگێڕیه‌ی گه‌لی كورددا بارزانیه‌كان زۆرترین پشكی به‌گژداچونه‌وه‌ی دوژمنانی گه‌لی كوردیان به‌ركه‌وتووه‌و له‌م پێناوه‌دا زۆرترین قوربانیانداوه‌، هه‌رچه‌نده‌ له‌هه‌موو قۆناغه‌كانی خه‌باتیاندا كۆی ئامانجه‌كانیان به‌هۆی پیلانگێڕی دوژمن و نه‌یاره‌كانی گه‌له‌كه‌مانه‌وه‌ وه‌ده‌ست نه‌كه‌وتووه‌، به‌ڵام مێژوو گه‌واهیده‌ری ئه‌و ڕاستیه‌یه‌و كه‌سێك كه‌ له‌ده‌رگای چه‌ند حیزبێكی دابی له‌هه‌موشیاندا به‌شكست خواردوو لێی ده‌رچوبی ئه‌وا بێگومان به‌هۆی نه‌بونی ئه‌قڵیه‌تی سیاسی و یاخود توڕه‌یی و داخله‌دڵیه‌وه‌ له‌به‌رانبه‌ر سه‌ركردایه‌تی ئه‌و پارته‌ ناتوانی ڕاستیه‌كان وه‌ك خۆیان ببینی و پێناسیان بكات، واقیعی ئه‌مڕۆی هه‌رێم له‌كۆی ئه‌و ڕاپه‌ڕین و شۆڕشانه‌دا به‌پێی درێژی ته‌مه‌ن و هێزی جه‌ماوه‌ری و سیاسی و دبلۆماسی هتد. تاهه‌نوكه‌ مابێته‌وه‌ بێگومان پارتی دیموكراتی كوردستانه‌و ناشكری ئه‌م پارته‌ له‌مێژوی 68 ساڵ ته‌مه‌نیدا هیچ جۆره‌ هه‌ڵه‌ و كه‌وتن و هه‌ستانه‌وه‌ی به‌خۆیه‌وه‌ نه‌بینیبی، چونكه‌ واقیعی سیاسه‌ت و سروشتی مرۆڤ ڕێگه‌ نادات، به‌ڵام پێداگیری و به‌گژداچونه‌وه‌ی هه‌ندێك بڕگه‌و بابه‌ت له‌وێستگه‌ جیاجیاكانی پێش و پاشی ڕاپه‌ڕینی گه‌له‌كه‌مان و پرۆسه‌ی ئازادی گه‌لانی ئێراقه‌وه‌ له‌لایه‌ن پارتیه‌وه‌ وایكردووه‌ له‌ئه‌مڕۆدا ببنه‌ ده‌سكه‌وت و نه‌یارو دوژمنانی گه‌له‌كه‌مان و پارتی به‌چاویلكه‌ی نابینای و به‌زمانێك لاڵ و گوێیه‌كی سه‌نگینه‌وه‌ لێیان بڕوانن و ده‌ریئه‌بڕن و ئه‌یانبیستن، له‌م نێوه‌نده‌شدا ناكری وای ده‌رببڕین وڵاتانی به‌ركه‌وته‌ی نه‌ته‌وه‌ی كوردو زلهێزه‌ هاتووه‌كانی ناوچه‌كه‌ كاریگه‌ری و ڕۆڵیان له‌سه‌ر ده‌سكه‌وت و ئامانجه‌كان نابی، به‌ڵكو به‌پێچه‌وانه‌وه‌ له‌ئه‌مڕۆدا كاریگه‌ریه‌كانیان هێنده‌ به‌هێزن له‌سه‌رمان بووه‌ته‌ هۆكاری لێكترازانی نێوماڵی گه‌له‌كه‌مان، خۆئه‌گه‌ر سیاسه‌تمه‌دارێك بییه‌وی ئه‌م ڕاستیه‌ بۆ مه‌به‌ست و ئامانجێكی دیاریكراو ئاوه‌ژو بكات ئه‌وا نه‌ك هه‌ر پێموایه‌ ئاسنی سارد ئه‌كوتی و به‌ڵكو ڕوی شاراوه‌ی نه‌بونی ئه‌قڵیه‌تی سیاسیانه‌ی خۆی بۆ كۆمه‌ڵانی خه‌ڵك ئاشكرا ئه‌كا، بۆیه‌ ئه‌نجامه‌كانی پرۆسه‌ی هه‌ڵبژاردنه‌كانی 21/9و هه‌ڵپه‌كردنی لایه‌نه‌كانی به‌ره‌ی ئۆپۆزسیۆن بۆ ناو كابینه‌ی هه‌شته‌م و سه‌ردانی نوێنه‌ری هه‌ردوو وڵاتی وه‌ك توركیاو ئێران و دابه‌ش بونی ده‌نگی هه‌ندێك ورده‌ حیزب له‌ دهۆك و هه‌ولێرو سلێمانی له‌هه‌ر شارێكیاندا بۆ لایه‌نێكی دیاریكراو دژ به‌یه‌ك و هتد. . واقیعی توانای ئه‌مڕۆژیانه‌و خه‌رمانبه‌ره‌كه‌ت و پاراستنی ده‌سكه‌ته‌كانن له‌لایه‌ن پارتیه‌وه‌، خۆ ئه‌گه‌ر وه‌ڵام بۆچی ڕوكردنی زۆرینه‌ی ڕمه‌كان بێ له‌پارتی و به‌م میعیاره‌ نازانستیه‌ پێوانه‌ی خراپی و باشی بكری ئه‌وا وه‌ڵام ته‌نها ئه‌وه‌یه‌: ئه‌وه‌ی بانی به‌رینبی زۆرترین به‌فری لێده‌باری. بۆیه‌ لام سه‌یره‌ كه‌سانێك له‌ڕابردودا كادرو ئه‌ندامی سه‌ركردایه‌تی حیزبێك و جێگر سكرتێرێك هتد. بوبن كه‌زۆرترین لاپه‌ڕه‌ی ڕه‌شی به‌كرێگیراویان له‌مێژودا تۆماركردبی و ئه‌مڕۆش لێیدابڕابن بیانه‌وه‌ی نه‌وه‌ی نوێی ئه‌م هه‌رێمه‌ به‌نوسینی بابه‌تێكی نازانستیانه‌و نالۆژیكیانه‌و چه‌واشه‌بكه‌ن، ئه‌وا ئه‌م نه‌وه‌یه‌ له‌سه‌ر سندوقه‌كانی ده‌نگدان باشترین وه‌ڵامیان نوسیوه‌ته‌وه‌. لێره‌دا ئه‌گه‌ر وه‌ڵامێكی خوێنه‌ری بابه‌ته‌كه‌م له‌بیرچونه‌وه‌م كرده‌ی (31ئاب) و هه‌روه‌ها هێنانی سوپای توركیابی له‌دژی یه‌كێتی و په‌كه‌كه‌ ئه‌وا ئه‌م په‌رچه‌ كرداره‌ له‌به‌رانبه‌ر هێنانی هێزی سوپای پاسداران بۆ سه‌ر حیزبی دیموكراتی ئێران له‌شارۆچكه‌ی كۆیه‌ له‌26/6/1996و هاوپه‌یمانی ئێران په‌كه‌كه‌و یه‌كێتی نیشتمانی له‌دژی پارتی و له‌باربردون نوێنه‌ كردنه‌وه‌ی واده‌ی یاسایی په‌رله‌مانی كوردستان بووه‌و ناكری ئه‌م په‌نده‌ش له‌بیر بكه‌ین كه‌: دوژمنی دوژمنه‌كه‌ی دۆسته‌مه‌ له‌مه‌ش گرنگتر مێژوو ئه‌مڕۆ گه‌واهی ئه‌وه‌ئه‌ده‌ن كی شۆڕشێكی كرده‌ قوربانی كوردستانی بونی كه‌ركوك كی پۆسته‌كانی به‌ڕێژه‌ی 32%به‌سه‌ر پێكهاته‌كانی شاری كه‌ركوكدا دابه‌شكردو كوردی هاوشانی پێكهاته‌كانی تری كرد كی ئه‌مڕۆ له‌ڕۆژئاوادا گرێدراوی له‌گه‌ڵ ڕژێمی ئه‌سه‌دو هاوكاریه‌كانیش له‌كی وه‌رده‌گری، بۆیه‌ له‌م قۆناغه‌دا من پێموایه‌ نه‌ئه‌وجۆره‌ بابه‌ته‌ نه‌شیاوانه‌ی كه‌سانێكی شكست خواردوو له‌سیاسه‌ت و نه‌ئه‌م وڵامئامێزه‌ی منیش خزمه‌ت به‌كه‌سمان ناكه‌ن به‌ڵكو ئه‌بی به‌دیدێكی به‌رپرسیارانه‌وه‌ هه‌ڵسوكه‌وت له‌گه‌ڵ ڕه‌وشی هه‌رێم و ڕۆژئاواو باكوری كوردستان بكه‌ین و له‌پێناو چه‌ند پۆستێكدا هه‌وڵنه‌ده‌ین جیاوازیه‌ ئایدیای و فیكریه‌كانمان له‌دژی یه‌كدی به‌ئاراسته‌ی بڕین تیژبكه‌ینه‌وه‌و سه‌رئه‌نجام دیسان گه‌له‌كه‌مان باجده‌ری ڕاسته‌قینه‌ی هه‌ڵه‌كانی كۆی لایه‌نه‌ سیاسیه‌كانمان بی، ئه‌گه‌ر كه‌سێك پێیوایه‌ ئه‌م ئه‌زمونه‌ دیموكراسیه‌ی هه‌رێمی كوردستان كه‌به‌رهه‌می كۆی شه‌هیدانی لایه‌نه‌كانه‌ به‌باڵاده‌ست بونی لایه‌نێك و به‌پله‌ دویی و سێیی لایه‌نێكی دیكه‌ كه‌ ئه‌نجامی سندوقه‌كانی هه‌ڵبژاردن كردبێتیانه‌ ئه‌مری واقیع وڵات بووه‌ته‌: خومی پوره‌ ئایشی. ئه‌مه‌ ڕایه‌كی نامه‌تیقه‌و دوره‌ له‌و دیموكراسیه‌وه‌ ده‌یان ساڵه‌ هه‌مومان به‌ئاواتی هاتنه‌دیه‌وه‌ین و پێچه‌وانه‌كه‌ش پێمان ئه‌ڵی كی ده‌سكه‌وته‌كان له‌ناو ئه‌بات.

 

 

سه‌ره‌تا باوه‌ڕناكه‌ مانشێتی بابه‌ته‌كه‌م شیكردنه‌وه‌ی بووی، به‌و پێیه‌ی له‌ده‌م باپیرانمانه‌وه‌ گه‌لێكجار وشه‌ی (به‌ردئاش) مان به‌رگوێكه‌وتووه‌و ئه‌وه‌ش به‌ (به‌ردئاش) دا ئه‌كری چی به‌سه‌ردی، به‌ڵام به‌رینی دونیای سیاسه‌ت كۆی كه‌له‌به‌ره‌كانی ژیانی هه‌موو مرۆڤایه‌تی داگیركردوه‌و له‌م باره‌وه‌ش هه‌ریه‌ك به‌ ئاراسته‌ی به‌رژه‌وه‌ندیه‌كانی خۆی پێناس بۆ سیاسه‌ت ئه‌كات، له‌كاتێكدا سیاسه‌ت بریتیه‌ له‌خزمه‌ت كردنی به‌رژه‌وه‌ندی گشتی، كاتێك به‌م شێوه‌یه‌ پێناس ناكری له‌كۆمه‌ڵگه‌دا ئه‌وا ئه‌و بێسه‌ربه‌ریه‌ی وه‌ك ئه‌مڕۆ ناو هه‌رێم دروست ئه‌بی و هه‌ركه‌س له‌ئاوازێك ئه‌ژه‌نی له‌دوای ده‌ركه‌وتنی ئه‌نجامی هه‌ڵبژاردنه‌كانی21/9ته‌مه‌نای ئه‌وه‌مان ئه‌كرد زیاتر لایه‌نه‌كان له‌چوارچێوه‌ی پرانسیپه‌كانی دیموكراسی و به‌رژه‌وه‌ندی گشتیدا كۆبكاته‌وه‌و هه‌ر لایه‌نێك به‌و به‌شه‌ كێكه‌ی له‌ده‌سه‌ڵات پێی ده‌بڕدری ڕازیبی و به‌جۆرێك له‌جۆره‌كان ئه‌و بی ئیراده‌ییه‌ی خۆیان به‌وئاسته‌ پیشاننه‌ده‌ن كه‌به‌بی ده‌ستێوه‌ردانی ده‌ره‌كی دروست بونی به‌ره‌یی وڵاتانی هه‌رێمی توانای ڕاگه‌یاندنی كابینه‌ی نوێیان نیه‌، به‌ڵام به‌داخه‌وه‌ ئه‌توانم بڵێم به‌رژه‌وه‌ندی حیزبی و هه‌ڵپه‌كردنی كۆی لایه‌نه‌براوه‌ گه‌وره‌و بچوكه‌كان بۆ ناو كابینه‌ی نوی و وه‌لانانی بیری ئۆپۆزسیۆن بون وه‌ك پایه‌یه‌كی پرۆسه‌ی دیموكراسی و سازش نه‌كردن بۆ یه‌كدی بووه‌ هۆی ئه‌وه‌ی زیاتر له‌شه‌ش مانگ به‌سه‌ر به‌رواری ده‌ركه‌وتنی ئه‌نجامی هه‌ڵبژاردنه‌كاندا تێپه‌ڕی و كابینه‌ی نوی ڕانه‌گه‌ێنری، بۆیه‌ پێموایه‌ تائێره‌ كۆی لایه‌نه‌ براوه‌ یه‌كه‌م و دووه‌م هتد. . وه‌ك یه‌ك به‌ر پرسیارن له‌ڕانه‌گه‌یاندنی كابینه‌ی هه‌شته‌م، به‌ڵام دوای ئه‌وه‌ی ئه‌م واقیعه‌ هاته‌ئاراوه‌ له‌ماوه‌ی ئه‌م شه‌ش مانگه‌ بی حكومه‌تیه‌دا كۆی سه‌ره‌ڕمی لایه‌نه‌كانی به‌ره‌ی ئۆپۆزسیۆن و هه‌ندێكجاریش هاوپه‌یمانه‌ ستراتیژه‌كه‌ی پارتی له‌میدیاكانه‌وه‌ به‌رده‌وام ڕویان له‌پارتی بووه‌، هه‌رچه‌نده‌ نابی لێره‌دا وای نیشان بده‌ین پارتی چ له‌به‌رانبه‌ر لایه‌نه‌كان و چ له‌ناوخۆی خۆیدا بی كه‌موكورت بووه‌ یاخود نه‌یزانیوه‌ به‌ئاراسته‌ی به‌رژه‌وه‌ندیه‌كانی خۆی سیاسه‌ت بكات، به‌ڵكو به‌پێچه‌وانه‌وه‌ به‌پێی ئه‌و گوشاره‌ ده‌ره‌كی و ناوخۆیانه‌ی هه‌رێم و ئێراق و هه‌روها به‌پێی شه‌رعیه‌تی ئه‌نجامی هه‌ڵبژاردنه‌كانی 21/9 پارتی گه‌مه‌كارێكی به‌هێزی ناو گۆڕه‌پانه‌كه‌ بووه‌و واش چاوه‌ڕوان ئه‌كری له‌چوار ساڵی داهاتودا گوشاره‌كان له‌سه‌ری زیاترببن، بۆیه‌ له‌م سه‌ره‌تای ڕێگه‌یه‌دا ڕائیدان له‌سه‌ر سه‌ركه‌وتن و شكستی چوار ساڵی داهاتوی پارتی و نه‌یاره‌كانی ئه‌سته‌مه‌، به‌ڵام ئه‌وه‌شمان له‌ یادنه‌چی چوارساڵ كاركردنی میدیای ئۆپۆزسیۆن و خۆپیشاندانه‌ مه‌ده‌نی و نامه‌ده‌نیه‌كان له‌دژی پارتی و هه‌روه‌ها كۆمه‌ڵانی خه‌ڵك له‌21/9دا چ هێزێكیان به‌خشیه‌ پارتی و لایه‌نه‌كانی دیكه‌شیان به‌ كوێگه‌یاند، به‌هه‌رحاڵ. . بۆیه‌ به‌بڕوای من ئه‌م كۆمێته‌ پێمان ئه‌ڵی سوینی تیغه‌كان به‌م شێوه‌یه‌ له‌ یه‌كدی هیچ جۆره‌ خزمه‌تێك به‌ به‌رژه‌وه‌ندی گشتیمان ناكاو هه‌روه‌ها ئه‌وه‌ی وه‌ك شاكارێكی نوێی سیاسی له‌م نێوه‌نده‌دا هاته‌ئاراوه‌و واقعی به‌ره‌یی لایه‌نه‌كان بۆ وڵاتانی به‌ركه‌وته‌ی نه‌ته‌وه‌ی كورد پێمان ئه‌ڵی ئه‌وه‌یه‌ هه‌ندێك ورده‌ لایه‌ن و به‌ناو چاودێری بی لایه‌ن له‌سنوری سی پارێزگاكه‌ی هه‌رێم و ناوچه‌ دابڕ ێنراوه‌كانی ده‌ره‌وه‌ی هه‌رێم ده‌نگه‌كانیان به‌سه‌ر یه‌كێتی و گۆڕاندا له‌دژی پارتی دابه‌ش بكه‌ن و دواتریش له‌میدیاكانه‌وه‌ چاودیره‌كانیان جارێك گۆڕان به‌گرێدراوی پارتی و هه‌روه‌ها بۆ به‌ره‌نگار بونه‌وه‌ی ڕۆژئاوای كوردستان ناوزه‌ند بكه‌ن؟! به‌ڵام ئاماژه‌ی دووه‌میان له‌دوای17/4دا هات كاتێك گۆڕان و پارتی گه‌یشتنه‌ سیغه‌یه‌ك بۆ پێكهێنانی كابینه‌ی نوی هه‌روه‌ها له‌گه‌ڵ ده‌رگای كراوه‌ بۆ به‌ شداریكردنی لایه‌نه‌كانی دیكه‌ش، لێره‌دا ئه‌وه‌ی مایه‌ی سه‌رسوڕمانه‌ دوای هه‌ندێك نزیك بونه‌وه‌ی لایه‌نه‌كان له‌ڕاگه‌یاندنی كابینه‌یه‌كی نوێی بنكه‌فراوان تادی لایه‌نه‌ به‌شداربووه‌كانی ئه‌م كابینه‌یه‌ هێرشه‌ میدیاییه‌كانیان بۆسه‌ر پارتی چڕترئه‌كه‌نه‌وه‌و خۆیان له‌و كه‌موكورتیانه‌ی به‌شدار بونیان له‌ حكومه‌ت له‌ڕابردودا به‌دورئه‌گرن، به‌ڵام میدیاكانی پارتی هیچ په‌رچه‌كردارێكی ئه‌وتۆیان وه‌ك وه‌ڵام دانه‌وه‌یه‌ك بۆ نه‌یاره‌كانیان وه‌گه‌ڕنه‌خستووه‌ بگره‌ زیاتركار له‌سه‌ر سیاسه‌تی ته‌حه‌فوزكارانه‌ی گرتووه‌ ته‌به‌ر، هه‌رچه‌نده‌ پێی ده‌چی هه‌موو كه‌سێك به‌م چاوه‌وه‌ لێی نه‌ڕوانی، به‌ڵام له‌سه‌ر ئه‌رزی واقیع دیاره‌و پێویست به‌میكیاج كردن ناكات، بۆیه‌ كردنی پارتی به‌م به‌ردئاشی ڕاگه‌یاندو ڕه‌خنه‌ به‌رژه‌وه‌ ندخوازانه‌ی هه‌ندێك لایه‌ن و به‌ناو چاودێری سیاسی بی لایه‌ن به‌بیانوی لێدانی خه‌نده‌ق به‌ڕوی ڕۆژئاواو هه‌روه‌ها به‌ده‌وری شاری هه‌ولێر و كه‌ركوك كه‌زیاتر لێی پلانێكی ئه‌منیه‌ له‌وه‌ی هه‌ر پڕوپا گه‌نده‌یه‌كی دیكه‌ی بدرێته‌پاڵ، هیچ كاریگه‌ریێكی ئه‌وتۆی له‌سه‌ر جه‌ماوه‌ری پارتی نابی و هه‌موو لایه‌كیش ده‌زانی ڕه‌خنه‌ به‌رژه‌وه‌ندخوازه‌كان زیاتر له‌سه‌ر ئه‌ساسی به‌ره‌یی بونی هه‌ندێك لایه‌نه‌ له‌گه‌ڵ وڵاتانی به‌ركه‌وته‌ی نه‌ته‌وه‌ی كوردو نه‌ك مه‌به‌ست لێی خستنه‌ڕوی ڕاستی و خواستی به‌رژه‌وه‌ندی گشتی بی.

 

زۆر وڵات و شار هه‌ن له‌سه‌ر گۆی ئه‌م زه‌مینه‌دا به‌جیاواز له‌ناوی خۆیان ناو ناوبانگی دیكه‌یان هه‌یه‌و گه‌لێكجاریش ئه‌م ناو ناوبانگیه‌ بۆ سه‌ر مرۆڤه‌كانیش به‌دی ئه‌كری، شاری سلێمانی به‌ده‌ر له‌ شاره‌كانی ئه‌مڕۆی هه‌رێم و ئێراق به‌بی توانج بۆ سه‌ر هیچ شارێكی دیكه‌، به‌درێژایی مێژوو ڕۆڵێكی به‌رچاوی له‌سه‌ر هه‌موو كایه‌كانی ژیاندا له‌م هه‌ریمه‌دا هه‌بووه‌، هه‌ر له‌ڕاپه‌ڕین و شۆڕش و ئه‌ده‌ب و هونه‌ر و داهێنانی سه‌دان وشه‌ی تازه‌و كۆڕبه‌ندی ئه‌ده‌بی و هه‌روه‌ها له‌سه‌ده‌كانی بون به‌پاته‌ختی میرنشینه‌كه‌ی ئیبراهیم پاشای بابانیشدا له‌ڕوی سیاسی و ئابوریه‌وه‌ هێزێكی به‌رچاوی به‌خشیه‌ كۆمه‌ڵانی خه‌ڵك، له‌ڕوی ئاینیه‌وه‌ خاوه‌نی چه‌ندیدن خانه‌قاو مزگه‌وت و مامۆستای ئاینی خۆی بووه‌و له‌ڕوی وشیاری سیاسیشه‌وه‌ زۆر وریایانه‌ په‌ی به‌و پیلانگێڕیانه‌ی دوژمنانی نه‌ته‌وه‌كه‌مان له‌به‌رانبه‌ر ڕاپه‌ڕین و شۆڕشه‌كانی گه‌له‌كه‌مان بردووه‌، به‌ڵام ئه‌م شاره‌ هه‌ر له‌سه‌ره‌تای ڕاپه‌ڕینی به‌هاری1991دا به‌هۆی هه‌ڵمه‌تی بوێرانه‌ی و به‌ختكردنی سه‌دان ڕۆڵه‌ی له‌پێناو سه‌ركه‌وتنی ڕاپه‌ڕیندا نازنانی شاری (هه‌ڵمه‌ت و قوربانی) پێبه‌خشراو، تاوه‌كو ئه‌مڕۆش كه‌یادی 23 ساڵه‌ی ڕاپه‌ڕین ئه‌كرێته‌وه‌ له‌میدیاكانه‌وه‌ به‌شاری هه‌ڵمه‌ت و قوربانی ناوی ئه‌بری، به‌ڵام خۆشبه‌ختانه‌ له‌گه‌ڵ كۆتایهاتنی سه‌رده‌می فه‌لسه‌فه‌ی شۆڕشگێڕی و بونیاندنانی دامه‌زراوه‌ی ئیداری و گه‌یشتنی شه‌پۆلی جیهانگیری بۆ ناوچه‌كه‌و ئێراق و هه‌رێمی كوردستان و په‌ره‌سه‌ندنی بازاڕی ئازادو جێگیربونی پایه‌كانی دیموكراسی رۆژ له‌دوای ڕۆژ و گه‌یشتنی كۆی ئه‌و هه‌موو ته‌كنه‌لۆجیایانه‌ی كه‌ له‌ئه‌مڕۆدا پێش چاومان ده‌كه‌ون له‌بازاڕه‌كانداو بونیادنانی ده‌یان زانكۆی حوكمی و ئه‌هلی و زۆربونی له‌چاپدانی كتێب و ده‌رچونی سه‌دان رۆژنامه‌ و گۆڤار و كردنه‌وه‌ی چه‌ندین كه‌ناڵی ته‌له‌فزیۆنی لۆكاڵی و ئاسمانی و ڕادیۆی جۆراوجۆر و هه‌روه‌ها ئه‌نجامدانی ده‌یان خۆپیشاندانی مه‌ده‌نیانه‌ی ڕۆشنبیر و چالاكوانانی مه‌ده‌نی ئه‌م شاره‌، وایكرد له‌ڤیتیڤاڵی گه‌لاوێژی 2013دا (نێچیره‌ڤان بارزانی) سه‌رۆكی حكومه‌تی هه‌رێم به‌شێوه‌یه‌كی فه‌رمی نازناوی (پایته‌ختی رۆشنبیری) ی به‌م شاره‌ ببه‌خشی و ئه‌م نازناوه‌ش بووه‌ تاجێكی دیكه‌ی شانازی بۆ شاری سلێمانی له‌ناو لاپه‌ڕه‌كانی مێژودا بۆ نه‌وه‌كانی داهاتوی ئه‌م شاره‌ ئه‌مێنێته‌وه‌، به‌ڵام ئه‌وه‌ی له‌4/3/2014داو له‌میدیاكانه‌وه‌ بووه‌ باسێكی گه‌رم و گوڕ ئه‌نجامدانی دیداری سلێمانی بوو له‌لایه‌ن (زانكۆی ئه‌مه‌ریكی) ه‌وه‌ له‌م شاره‌دا كه‌زۆرێك له‌ناوه‌نده‌ ئه‌كادیمیایه‌كان و سیاسه‌تمه‌داره‌كانی هه‌رێم و ئێراقی وڵاتانی ئه‌وروپی و ئه‌مه‌ریكی تیایدا ئاماده‌بون و به‌دڵێكی فراوان و شێوازێكی سه‌رده‌میانه‌وه‌ گفتوگۆیان له‌باره‌ی كۆی ئه‌و پرسانه‌وه‌ كرد، كه‌ له‌ئه‌مڕۆدا به‌رۆكی هه‌رێم و ئێراق و ناوچه‌كه‌یان گرتووه‌و زۆر پرسیاری جۆراوجۆریش ئاراسته‌ی میوانان كراو به‌تایبه‌ت له‌باره‌ی پرسه‌كانی نێوان هه‌رێم و به‌غدا، به‌هه‌رحاڵ. . لێره‌دا جێگای خۆیه‌تی ئه‌گه‌ر بڵێین شاری سلێمانی به‌میوانداری كردنی ئه‌م دیداره‌ به‌جیاواز له‌و نازناوانه‌ی دیكه‌ی شكۆیه‌كی سیاسیانه‌ی ئه‌مجاره‌یان بۆ خۆی ده‌سته‌به‌ركرد، به‌ڵام ئه‌وه‌ی مایه‌ی سه‌رسوڕمان بوو، كه‌ له‌هه‌موو كه‌س و لایه‌نێك زیاتر بۆ مه‌رامی سیاسی له‌ڕۆژانی ئاساییدا باسی له‌شكۆی سلێمانی و داكاواكاری داواكاریه‌كانی خۆپیشانده‌ران ئه‌زانی، بێگومانی خودی (نه‌وشیروان مسته‌فا) ی ڕێكخه‌ری بزوتنه‌وه‌ی گۆڕان و ئه‌ندامانی چڤاتیان بوو كه‌ئاماده‌ی ئه‌م دیداره‌ی شاری سلێمانی نه‌بوو، له‌كاتێكدا به‌ شێوه‌یه‌كی فه‌رمی بانگێشتی ئه‌و دیداره‌ كرابون، هه‌رچه‌ند له‌ڕونكردنه‌وه‌یه‌كی میدیاییاندا ئه‌وه‌یان ڕاگه‌یاند: كه‌دوو نوێنه‌ریان ئاماده‌ی دیداره‌كه‌ بون، به‌ڵام له‌ئاست نوێنه‌ری لایه‌نه‌كانی دیكه‌دا نه‌بون. بۆیه‌ لێره‌دا واده‌یه‌ بپرسین ئاماده‌نه‌بونی ڕێكخه‌ری بزوتنه‌وه‌ی گۆڕان چ له‌بۆنه‌كانی چوار ساڵی ڕابردو چ له‌ئه‌مڕۆدا بۆچی ئه‌گه‌ڕێته‌وه‌؟. خۆ ئه‌گه‌ر وه‌ڵام نه‌بونی كات بی ئه‌ی بۆ لایه‌نه‌كانی دیكه‌ له‌و سه‌رقاڵترن و له‌زۆربه‌ی بۆنه‌كاندا ئامادییان هه‌یه‌، له‌كاتێكدا به‌شداری كردن له‌بۆنه‌كاندا وێڕای ئه‌وه‌ی باشترین ده‌رفه‌ته‌ بۆ گه‌یاندنی په‌یام به‌جه‌ماوه‌ر له‌هه‌مانكاتدا خۆ خاكی نیشاندانشه‌، به‌ڕای من ئه‌وه‌ی له‌م ئاماده‌نه‌بونانه‌دا به‌دی ئه‌كه‌م ڕێزنه‌گرتنی به‌رانبه‌رو كۆمه‌ڵانی خه‌ڵكه‌و شاری سلێمانی و هیچی تر، چونكه‌ ناكری له‌كاتی خۆپیشاندانه‌كاندا كه‌وڵات بارێكی نائاسایی وه‌رده‌گرێت له‌بڕی بیركردنه‌وه‌ له‌ ڕێگه‌چاره‌یه‌كی ئاشتییانه‌ بۆ مه‌رامی سیاسی و له‌باربردنی ڕه‌وشی ئارامی وڵات ده‌رفه‌ت هه‌بی و له‌ ڕۆژی دیداری شاری سلێمانیداو ئاماده‌بوان به‌و ئاسته‌ به‌رزه‌و ئه‌كادیمیه‌ سیاسیانه‌دا ده‌رفه‌ت نه‌بی، بۆیه‌ وایده‌بینم خه‌ڵكانی نوخبه‌ی ڕۆشنبیری سیاسی سلێمانی ئه‌م جۆره‌ غروری و چه‌واشه‌كه‌ریانه‌ له‌ به‌رچاو ئه‌گرن و ئه‌م جۆره‌ ڕه‌قتارانه‌ی ڕێكخه‌ری بزوتنه‌وه‌ی گۆڕانیش بۆ ئه‌و په‌نده‌ كوردیه‌ كه‌ئه‌ڵی (تائیشم پێته‌ سه‌رم له‌ڕێته‌. . . ) ئه‌گێڕنه‌وه‌و له‌داهاتودا په‌رچه‌كرداریان ئه‌بێت.

 

 

Go to top