We have 88 guests and no members online

بورهان شێخ ڕەئوف

دوای ئه‌وه‌ی كتێبی كورد لۆجیام خوێنده‌وه‌ 421 لاپه‌ڕه‌ چاپی یه‌كه‌م 2014 له‌ نووسین وه‌رگێڕانی نووسه‌رجه‌لال زه‌نگابادی به‌ زمانی عه‌ره‌بی كه‌ هه‌وڵێكی باشه‌ بۆ ئاشناكردنی خوێنه‌رانی عه‌ره‌ب به‌ كوردلۆجیا، به‌ شێوه‌یه‌كی گشتی كتێبه‌كه‌ پێك هاتووه‌ له‌سه‌ره‌تایه‌ك له‌ كوردلۆجیاو چۆنیه‌تی سه‌رهه‌ڵدانو گه‌شه‌كردن و ڕۆڵ و ئاسۆكانی به‌رده‌می و كورته‌یه‌ك له‌ كوردلۆجی ئه‌ڵمانی و ڕوسی و سۆڤیه‌تی و ئیتالی و پۆله‌ندی و توركی و كازاخستانی و له‌ گه‌ڵ چه‌ند نمونه‌یه‌ك له‌كاری كوردلۆجیه‌كان و هه‌روه‌ها چه‌ند چاوپێكه‌وتن و ووتووێژێك له‌ گه‌ڵ كوردلۆجیه‌كاندا و ئه‌لبومێكی وێنه‌و نه‌خشه‌ و به‌رگی كتێبه‌كان و وێنه‌ی گشتی.

به‌ڵام له‌ گه‌ڵ ڕێزو خۆشه‌ویستیم بۆ هه‌موو ئه‌و به‌ڕێزانه‌ی كه‌ناویان له‌و ئینسكلۆپیدیاكورته‌ ی كوردلۆجیادا هاتووه‌ كه‌هه‌موویان خزمه‌تی گه‌وره‌یان به‌ مێژوو كه‌لتوری كورد كردووه‌ له‌ ووتارێكی واكورتدا باس ناكرێت، به‌ڵام ئه‌وه‌ی سه‌رنجی زیاتر ڕاكێشام و گه‌وره‌ترین خزمه‌تی به‌ كوردو كێشه‌ ڕه‌واكه‌ی كردووه‌ هه‌وڵ و كۆشش و گیانفیداییه‌ سه‌رسه‌خت و كۆڵنه‌ده‌ریه‌كانی گه‌وره‌ بیرمه‌ندو زانای كۆمه‌ڵناسی تورك دكتۆر ئیسماعیل بێشكچی یه‌، هه‌ر له‌وكاته‌ی كه‌ بۆ یه‌كه‌م جار كوردی دی و كوردی ناسی له‌ ساڵی 1962-1964 له‌كاتی به‌ جێهێنانی خزمه‌تی سه‌ربازی له‌ هه‌ردوو ولایه‌تی به‌دلیس و هه‌كاری له‌ باكوری كوردستان كه‌ له‌ڕاگه‌یاندنه‌كانی ده‌وڵه‌تی توركیادا به‌ باشوری ڕۆژهه‌ڵاتی ئه‌نازۆڵ ناوده‌برێت كاتێك گه‌یشته‌ ئه‌وێنده‌ری واته‌ باشوری ڕۆژهه‌ڵاتی ئه‌نازۆڵ بینی گه‌لێك هه‌یه‌ زمان و مێژوو داب و نه‌ریتیان جودایه‌ له‌ تورك هه‌تا ئه‌و ناوه‌شی كه‌ پی ی ده‌ڵێن توركی كێوی ناوی خۆیان نیه‌ ئه‌وان كوردن،

به‌ڵی ناسینی كورد له‌لایه‌ن بێشكچیه‌وه‌ وه‌كو دۆزینه‌وه‌ی جیهانێكی وون بوو كه‌ هه‌موو حكومه‌ته‌ یه‌ك له‌دوای یه‌كه‌كانی توركیا هه‌ر له‌سه‌رده‌می ده‌وڵه‌تی عوسمانیه‌وه‌ و دواتریش به‌ تایبه‌تی له‌ سه‌رده‌می كۆماری دا هه‌موو هه‌وڵ و تواناكانیان خستبووه‌ كار بۆ توانه‌وه‌ی كوردو نه‌هێشتنی هیچ سیمایه‌كی نه‌ته‌وایه‌تیان و له‌ناوبردنی هه‌رشتێك كه‌ په‌یوه‌ندی به‌ مێژوو كه‌لتورو زمانی كوردیه‌وه‌ هه‌بێت، به‌ڵی بێشكچی له‌ ئاوا ژینگه‌و كه‌شێكدا وه‌ده‌ركه‌وت كه‌ بیرو بۆچوونی شۆڤینی فاشیستی باڵی به‌سه‌ر ته‌واوی داموده‌زگاكانی ده‌وڵه‌تدا كێشابوو، ئه‌میش به‌ته‌نیا به‌ گژ ئایدیولوجیای فه‌رمی ده‌وڵه‌تدا چووه‌و و ژیانی خۆی ته‌رخانكرد بۆ ئابڕوبردن و ڕیسواكردنی هه‌موو ئه‌و كرده‌وه‌ ناهه‌قیانه‌ی دژ به‌ كوردو هه‌موو كه‌مه‌ نه‌ته‌وه‌ و ئاینه‌كانی تر له‌ توركیادا ده‌كرا.

به‌ڵی له‌ بارودۆخێكدا كه‌ ووشه‌ی كوردو كوردستان قه‌ده‌غه‌بوو چ به‌ نووسین وچ به‌ ووتن له‌وه‌ته‌ی كۆماری توركیای شۆڤێنی دامه‌زرابوو سه‌رپێچیكار (هه‌ڵبه‌ته‌ له‌ دیدی حكومه‌تی توركیاوه‌) تووشی لێپێچینه‌وه‌ی یاسایی و غه‌رامه‌و زیندانی ده‌بوو، بێشكچی له‌ ئاوا دۆخێكدا وه‌كو ڕۆشنبیرێكی به‌ هه‌ڵوێست و په‌روه‌رده‌كراو وه‌كو لێكۆڵیارێكی پاك و بێگه‌رد به‌ته‌نها به‌ره‌نگاری بیری شۆڤێنی توركی بووه‌وه‌ و لایه‌نگری له‌ بوونی گه‌لی كوردو هه‌سه‌له‌ ڕه‌واكه‌ی ده‌كرد به‌ ئیراده‌و عه‌زمێكی پۆڵایینه‌وه‌ كه‌ كاربه‌ده‌ستانی تورك نه‌یان توانی په‌شیمانی بكه‌نه‌وه‌ سه‌ره‌ڕای ڕاوه‌دوونان ولێپێچینه‌وه‌و برسی كردن و ده‌ربه‌ده‌ری وزیندانیكردنی ده‌جار زیاتر به‌ شێوه‌یه‌ك كه‌ 17 ساڵی ته‌مه‌نی له‌ زینداندا برده‌سه‌ر تا بووه‌ یه‌كێك له‌ سمبووله‌ هه‌ردیاره‌كانی زیندان و ڕای ئازاد له‌ توركیاو جیهانیشدا. به‌ڵی بێشكچی سه‌لماندی له‌ چه‌ند ده‌یه‌ی ڕابردوودا چ دڵسۆزێكی زانست وڕاستیه‌ وئاماده‌یی بێسنوورو له‌ ڕاده‌به‌ده‌ری هه‌یه‌ بۆ ئه‌وه‌ی قوربانی بدات له‌ پێناویدا هه‌ر ئه‌و بوو ووتی ( (چ شتێك جوانتره‌ له‌وه‌ی له‌ پێناوی زانست و ڕاستیدا تێبكۆشیت و قوربانی بده‌یت له‌ پێناوی سه‌روه‌ریاندا) ) تاوه‌كو جارێكیان له‌ وه‌ڵامی ڕۆژنامه‌ نووسێكدا ووتی ( (توركیا زیندانێكی گه‌وره‌یه‌:جیاوازی چیه‌ له‌یه‌كی له‌ ژووری زیندانه‌كاندا بیت یان له‌ ده‌ره‌وه‌ی) ) هه‌تاوه‌كو كاربه‌ده‌ستانی تورك ناچاربوون مل كه‌چی ئیراده‌و عه‌زمی پۆلایینی بێشكچی ببن و ئازادی بكه‌ن كه‌هاته‌ ده‌ره‌وه‌ له‌ وه‌ڵامی ڕۆژنامه‌ نووساندا ووتی به‌رنامه‌و پڕۆگرامم هه‌رئه‌وه‌یه‌ به‌رگری و داكۆكی و نووسین له‌سه‌ر كوردو كێشه‌ ڕه‌واكه‌ی ده‌كه‌م، پارێزه‌ره‌كه‌ی ویستی قایلی بكات كه‌ ئه‌و لێدوانه‌ نه‌دات له‌به‌رده‌م دادگادا كه‌ هه‌ر ئه‌و كاته‌ ده‌رچووبوو له‌ زیندان پی ی ووت ئه‌زیزم هیچ هه‌ڵه‌یه‌كم كردووه‌؟؟ ووتی من تابمێنم داكۆكی له‌ ڕاستی ده‌كه‌م و هیچ شتێك له‌وه‌ جوانتر نیه‌ و كارده‌كه‌م له‌ پێناو به‌دی هاتنیا.

خاڵێكی تری لێكچوون له‌ نێوان ماندێلا و بێشكچی دا هه‌یه‌ ئه‌گه‌ر نیلسۆن ماندێلا خه‌ڵاتی ئه‌تاتوركی ره‌تكرده‌وه‌ له‌به‌رئه‌وه‌ی له‌ توركیادا مافه‌كانی گه‌لی كورد زه‌وتكراوه‌، ئه‌وا بێشكچیش خه‌ڵاتی دامه‌زراووه‌ی وه‌قفی ڕاده‌ربڕینی ئازادی ئه‌مریكی ره‌تكرده‌وه‌ كه‌ به‌هاكه‌ی 10 هه‌زار دۆلاری ئه‌مریكی بوو له‌ كاتێكدا له‌ زیندانی به‌یره‌م پاشای ئه‌سته‌مبوڵ بوو بۆ جاری دووه‌م خه‌ڵاته‌كه‌یان بۆ نارده‌وه‌ قایل نه‌بوو وه‌ری بگرێت به‌ نامه‌یه‌كی درێژ وه‌ڵامی دانه‌وه‌ كه‌ هه‌وڵده‌ده‌م چه‌ند په‌ره‌گرافێكی پوخت و جوان وپرواتای لێراده‌ بنوسم كه‌نامه‌كه‌ی بۆ به‌ڕێز گارا لاماراش نوسیوه‌ وادیاره‌ سه‌رۆكی وه‌قفه‌كه‌یه‌ ده‌ڵێت: كێشه‌ی كورد مه‌سه‌لی ئازادی نوسه‌رێك یان كتێبێك نیه‌ مه‌سه‌له‌ی نه‌ته‌وه‌یه‌كه‌ كه‌ ژماره‌یان زیاتر له‌ 30 ملیۆن كه‌سه‌ له‌ ڕۆژهه‌ڵاتی ناوه‌ڕستدا مه‌سه‌له‌ی گه‌لێكی گه‌وره‌یه‌، مه‌سه‌له‌ی گه‌لێكه‌ كه‌ به‌شبه‌ش كراوه‌و هه‌موومافه‌ دیموكراتیه‌كانی لێزه‌وتكراوه‌ بۆیه‌ به‌م حاڵه‌وه‌ كێشه‌ی كورد كێشه‌ی هه‌موو مرۆڤایه‌تیه‌ به‌ته‌نها كێشه‌ی كورد نیه‌، كورد ئێسته‌ به‌ چه‌كی قه‌ده‌غه‌كراوی كیمیاوی قڕ ده‌كرێن، كوردناچارده‌كرێن به‌ زۆر پیسایی (گوو) بخۆن، مرۆڤ له‌ هیچ كوی ی ئه‌م جیهانه‌دا به‌م شێوه‌ دڕندانه‌و وه‌حشیانه‌ ڕه‌فتاری له‌ گه‌ڵدا نه‌كراوه‌ نه‌ له‌ توركیا نه‌له‌ تركستان نه‌ عه‌ره‌بستان ونه‌ له‌ ئه‌فریقیای باشور ونه‌له‌ تشیلی بۆیه‌ پێویسته‌ مرۆڤ ڕووبه‌ڕووی ئاوا سته‌مێك ببێته‌وه‌، كورد هه‌میشه‌ به‌ر شاڵاوو سزای واده‌كه‌ون كه‌ شه‌رمه‌زارییه‌ بۆ مرۆڤایه‌تی، بۆیه‌ ئه‌گه‌ر ئه‌مریكا پشتیوانی ئه‌و حكومه‌تو ڕژێمانه‌ ده‌كات كه‌ ڕه‌فتاری وا له‌ گه‌ل خه‌ڵكیدا ده‌كه‌ن پێویسته‌ گه‌لی ئه‌مریكا هه‌ست به‌ شه‌رمه‌زاری بكات.

من ویستم به‌كورتی بواره‌كانی هاوكاری نێوان هه‌ردوو حكومه‌تی توركیاو ئه‌مریكا ت بۆ باس بكه‌م له‌ پێناو هێشتنه‌وه‌ی دۆخی ئێستای كوردستان وه‌كو خۆی، هه‌رچه‌نده‌ من باش ده‌زانم ئێوه‌ حكومه‌تی ئه‌مریكا نین به‌ڵكو ئێوه‌ ڕێكخراوێكی مرۆڤدۆستی كاران له‌هه‌مان كاتیشدا چاودێری پێشێلكاریه‌كانی مافی میله‌تان ده‌كه‌ن له‌ هه‌موو جیهاندا، هه‌روه‌ها ڕاده‌ی یارمه‌تیه‌كانتان ده‌زانم بۆ ئه‌و نووسه‌رانه‌ی كه‌ له‌ژێر هه‌ڕه‌شه‌ی تیرۆرو تۆقاندندان به‌ هۆی بیروڕاكانیانه‌وه‌ به‌هه‌ر هۆیه‌كه‌وه‌ هه‌بێت، هه‌روه‌ها ده‌زانم دامه‌زراوه‌كه‌تان چه‌ند ڕاسگۆو كاریگه‌ره‌ له‌و بوارانه‌دا بۆیه‌ ده‌خوازم ببینم ئه‌و كاریگه‌ری و ڕاستگۆییه‌ به‌كاربهێنن بۆ ڕه‌خنه‌ گرتن له‌ سیاسه‌تی ئه‌مریكا ی یارمه‌تیده‌ر ی كۆلۆنیالیستی و كۆنه‌په‌رستی و ڕه‌گه‌زپه‌رستی.

به‌ڕێز گارا لاماراش

له‌به‌ر هه‌موو ئه‌و هۆیانه‌ی كه‌له‌سه‌ره‌وه‌ به‌كورتی باسمكردن زۆر هه‌ست به‌ سه‌ربه‌رزی وشانازی ده‌كه‌م به‌و پشتیوانی و هه‌ست و سۆزه‌تان به‌رامبه‌رم، به‌ڵام به‌هۆی پشتگیری حكومه‌ته‌كه‌تان له‌ حكومه‌تی كۆلۆنیالیست و ڕه‌گه‌زپه‌رستی توركیا كه‌ زوڵم وزۆر له‌ كورد ده‌كات ناتوانم خه‌ڵاته‌ ماڵیه‌ كه‌تان وه‌ربگرم.

وه‌ ده‌توانن ئه‌م نامه‌یه‌و ئه‌و نامه‌یه‌ش كه‌ بۆ منتان ناردووه‌ بڵاوبكه‌نه‌وه‌ و به‌رده‌وام بین له‌ ووتوێژو چاوپێكه‌وتنه‌كانماندا.

ڕێزو سه‌ڵاوم ده‌نێرم بۆ ئێوه‌و براده‌رانتان له‌ The fund for free Expression وه‌ هیوای سه‌ركه‌وتنتان بۆ ده‌خوازم.

 ئیسماعیل بێشكچی

 21/5 / 1991

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

ئه‌گه‌رچی هێشتا زووه‌ هیچ حوكمێك به‌سه‌ر د. حه‌یده‌ر عه‌بادی سه‌رۆك وه‌زیرانی عێراقدا بده‌ین چونكه‌ هێشتا چه‌ند مانگێكی كه‌م به‌ سه‌ر پێكهێنانی كابینه‌كه‌یدا ڕابردووه‌ و حكومه‌ته‌كه‌ی به‌ره‌و ڕووی چه‌ندین ته‌گه‌ره‌و كۆسپی گه‌وره‌بووه‌ته‌وه‌ له‌وانه‌ شاڵاو و شه‌ڕی دڕندانه‌ی داعش بۆ سه‌ر ناوچه‌كانی كوردستان و ناوه‌ڕاستی عێراق و شاڵاوی بانگه‌شه‌وه‌ هاندانی لایه‌نگرانی مالیكی سه‌رۆك وه‌زیرانی پێشوو دژی و په‌تای كوشنده‌ی گه‌نده‌ڵی.

هه‌رچه‌نده‌ من له‌ سه‌روبه‌ندی پێكهێنانی كابینه‌كه‌ی عه‌بادی دا له‌ چه‌ندین به‌رنامه‌و مێزگردیشدا ئاماژه‌م پێداوه‌ كه‌ عه‌بادی جیاوازه‌ له‌ مالیكی له‌ زۆر ڕوه‌وه‌ هه‌رچه‌نده‌ له‌ یه‌ك قوتابخانه‌و یه‌ك حیزب و یه‌ك ئاینزان به‌ڵام ژینگه‌ی په‌روه‌رده‌و خوێندنیان جیاوازی زۆری هه‌یه‌ بۆیه‌ ڕه‌فتاره‌كانیشیان جودا ده‌بن.

من نامه‌وێت لێره‌دا هه‌ڵسه‌نگاندن بۆ هه‌موو بواره‌كانی كاركردنی عه‌بادی بكه‌م له‌م ماوه‌ كورته‌ی فه‌رمانڕه‌وییدا، به‌ڵكو ته‌نها ئاماژه‌یه‌كی كورت به‌ ڕێكه‌وتنی نێوان هه‌رێم و به‌غداد و دۆسییه‌ی گه‌نده‌ڵی ده‌كه‌م، كه‌ تێبینی ڕێكه‌وتنه‌كه‌ی نێوان حكومه‌تی هه‌رێمی كوردستان و حكومه‌تی ناوه‌ندی عێراقم كرد بینیم عه‌بادی دوور له‌ شێوازه‌كه‌ی مالیكی كه‌ هه‌موو ده‌سته‌ڵاته‌كانی بۆخۆی قۆرخكردبوو ڕێكه‌وتنه‌كه‌ی برده‌ ئه‌نجومه‌نی وه‌زیران و ووتی من هه‌رچه‌نده‌ ده‌سته‌ڵاتم هه‌یه‌ واژۆی بكه‌م به‌ڵام ده‌سته‌ڵاته‌كه‌ ده‌ده‌م به‌ ئه‌نجومه‌نی وه‌زیران با هه‌موو وه‌زیره‌كان گفتوگۆی ته‌واوی له‌سه‌ربكه‌ن و تێبینیه‌كانیان بڵێن و ده‌یخه‌ینه‌ ده‌نگدانه‌وه‌ ئه‌گه‌ر ده‌نگی پێویستی هێنا جێبه‌جی ده‌كرێت هه‌رواش كراو به‌ زۆرینه‌ی ده‌نگ په‌سه‌ند كرا.

به‌ڵام ئه‌وه‌ی كه‌ زیاتر گرنگه‌و له‌ شه‌ڕی داعش قورستره‌ كێشه‌ی گه‌نده‌ڵییه‌ كه‌ هه‌موو جومگه‌ گرنگه‌كانی ووڵاتی گرتۆته‌وه‌ كه‌ به‌ شێوه‌یه‌ك عێراق له‌ ریزبه‌ندی پێشه‌وه‌یه‌ له‌ لیستی گه‌نده‌ڵی له‌سه‌رئاستی جیهان و هه‌ڕه‌شه‌ی مایه‌ پوچ بوونی ئابووری ووڵاتی لێده‌كرێت به‌ تایبه‌تی له‌ گه‌ڵ دابه‌وزینی نرخی نه‌وت له‌ بازاڕه‌كانی جیهاندا.

بۆیه‌ حه‌یده‌ر عه‌بادی به‌ ئاشكرا هاوار ده‌كات به‌ ده‌نگی به‌رز به‌ دۆسته‌كانی پێش ڕكابه‌ره‌كانی ده‌ڵێت ( (من ئه‌گه‌ر سه‌ریشم دابنێم واز له‌ به‌ گژاچوونه‌وه‌ی گه‌نده‌ڵی ناهێنم) ) چونكه‌ دروشمێكی وا پیرۆز له‌ كاتێكدا به‌رزده‌كرێته‌وه‌ كه‌ ووڵات له‌ 10 حوزه‌یرانی ئه‌مساڵه‌و 2014 ڕووبه‌ڕووی هێرشێكی دڕندانه‌ی داعش بووه‌ته‌وه‌ كه‌ نزیكه‌ی سی یه‌كی خاكی عێراق داگیر كراوه‌ ئه‌مه‌ش به‌ گیرفانی به‌تاڵ و ئه‌و سوپایه‌وه‌ ناكرێت كه‌ مالیكی له‌سه‌ر بنه‌مای مه‌حسوبیه‌ت و مه‌نسوبیه‌ت و تائیفه‌گه‌ر ی دایمه‌زراندبوو، بۆیه‌ عه‌بادی هیچ چاره‌یه‌كی تری له‌به‌رده‌ستدا نیه‌ جگه‌ له‌ به‌ گژاچوونه‌وه‌ی گه‌نده‌ڵی و به‌ فیڕۆدانی ماڵی گشتی، هه‌روه‌كو هه‌موو ئاگادارین له‌ ڕێگه‌ی میدیاكانه‌وه‌ له‌ چه‌ند مانگی ڕابردوودا زۆر به‌رپرس و كارمه‌ندی پایه‌ به‌رزی ده‌وڵه‌ت كاركه‌نار كران كه‌ ده‌ستیان له‌و گه‌نده‌ڵی و گرێبه‌سته‌ خه‌یاڵی و گوماناویانه‌دا هه‌بووه‌ كه‌ به‌ شێوه‌یه‌كی ڕێكخراوو فراوان ئه‌نجامدرا بوون.

تیبنیه‌كی تر ئه‌وه‌یه‌ ئه‌و ڕاپۆرته‌ئه‌مریكییه‌ كه‌ به‌م دواییه‌ بڵاو كراوه‌ته‌وه‌ ناوی 17 به‌رپرسی باڵای عێراقی تێدایه‌ له‌ هه‌موو پێكهاته‌كان كه‌ سامانه‌كانیان چه‌ندین ملیار دۆلار تێده‌په‌ڕێنێت كه‌ ئه‌و لیسته‌ش تا ئیستا عه‌بادی تێدا نیه‌ ئه‌مه‌ش پێگه‌ی به‌ هێز ده‌كات و سه‌ره‌ڕای ئه‌وه‌ی زانیارییه‌كانی ئه‌نجومه‌نی نوێنه‌ران له‌ دوو خولی ڕابردوودا باس له‌وه‌ ده‌كه‌ن كه‌ عه‌بادی ده‌نگێكی به‌رز بووه‌ دژ به‌ گه‌نده‌ڵی، هه‌روه‌ها ئاماژه‌كانی ئه‌و ڕاپۆرته‌ ئه‌مریكیه‌ ئه‌وه‌شمان پێده‌ڵێن كه‌ ئه‌گه‌ر هه‌موو ئه‌و سه‌ره‌ گه‌ورانه‌ی ووڵات خاوه‌نی ئه‌و ملیاره‌ها دۆلارانه‌ بن ئه‌وا ئه‌ركه‌كه‌ی عه‌بادی بۆ به‌گژاچوونه‌وه‌ی گه‌نده‌ڵی وا ئاسان نابێت!!!!

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

 

 

 

ڕاوێژو ئامۆژگارییه‌كانی عه‌بدولباری عه‌توان بۆ داعش ... بورهان شێخ ره‌ئوف

وابزانم پێویست ناكات به‌ درێژی عه‌بدولباری عه‌توان به‌ خوێنه‌رانی كورد بناسێنم چونكه‌ زۆربه‌ی زۆری نووسه‌رو چاودێران و هه‌تاوه‌كو خوێنه‌رانی كوردیش هه‌ڵوێست وڕق و كینه‌و دوژمنایه‌تیه‌كانی ئه‌و نووسه‌رو ڕۆژنامه‌ نووسه‌ عه‌ره‌به‌ فه‌له‌ستینیه‌ به‌رامبه‌ر به‌ كورد ده‌زانن، له‌ دوو ده‌یه‌ی ڕابردوودا چی له‌ ده‌ست هاتبێت بۆ دژایه‌تی كوردو كێشه‌ ڕه‌واكه‌ی بی سڵه‌مینه‌وه‌ و دوودڵی كردوویه‌تی و ووتویه‌تی كه‌ له‌ شاری له‌نده‌نی پایته‌ختی به‌ریتانیای عوزما داده‌نیشێت، پشتیوانی خۆی له‌ پێشتر زۆر به‌ ئاشكرا بۆ ڕێكخراوی ئه‌لقاعیده‌و و شه‌خسی ئه‌میره‌كه‌ی ئوسامه‌ بن لادن ده‌ربڕیووه‌ و كاتی خۆی له‌ شاخه‌كانی تۆرا بۆرا له‌ ئه‌فغانستان چووه‌ لای و چاوپێكه‌وتنێكیشی له‌گه‌ڵدا سازدا، ئه‌مێستاش به‌ شێخ ئوسامه‌ بن لادن ناوی ده‌بات.

له‌ كاتی ئێستاشدا له‌ ناو جه‌رگه‌ی ئه‌وروپاوه‌ ڕاوێژ و ئامۆژگاری و خۆشه‌ویستی خۆی بۆ ده‌وڵه‌تی ئیسلامی له‌ عێراق وشام (داعش) ده‌نێرێت و هۆشدارییان ده‌داتی كه‌ له‌ تازه‌ترین ووتاری كه‌ له‌ ویبسایتی قوره‌یش دا بڵاوی كردۆته‌وه‌ پێیان ده‌ڵێت ووریابن ترسناكترین شت بۆ پووكانه‌وه‌ی ده‌وڵه‌ته‌كه‌تان ئه‌و هه‌وڵه‌ هه‌واڵگریانه‌یه‌ كه‌ ده‌زگاكانی هه‌واڵگری و دژه‌ تیرۆری عێراق ده‌یانه‌وێت دزه‌ بكه‌نه‌ ناو ڕیزه‌كانتانه‌وه‌و له‌و ڕێگه‌یه‌وه‌ گورزی كوشنده‌تان لێبده‌ن و زاڵ بن به‌ سه‌رتاندا و درز بخه‌نه‌ ناو ڕیزه‌كانتانه‌وه‌، هه‌روه‌ها ترسی خۆی ناشارێته‌وه‌ كه‌ ئه‌م جۆره‌ دزه‌كردن و خۆ خزاندنه‌ ناو ڕیزه‌كانی ده‌وڵه‌ته‌كه‌تانه‌وه‌ زیانی گه‌وره‌تان پێده‌گه‌یه‌نێت، له‌ هه‌مان كاتدا له‌ وه‌سفی ڕێكخراوه‌كه‌یاندا ده‌ڵێت ڕێكخراوێكی ئاوه‌ها كه‌ به‌ ته‌مه‌نێكی زۆر كورت هێزه‌كانی چه‌ندجار له‌ قه‌باره‌ی خۆی زیاد یان كردووه‌و ئه‌و ناوچانه‌ش كه‌ ده‌ستیان به‌ سه‌ردا گرتووه‌ چه‌ندین جار فراوانتر بووه‌ له‌ كاتێكی پێوانه‌ییدا بۆیه‌ هه‌موو ئه‌مانه‌ واده‌كات كه‌ ببنه‌ ئامانجی زۆر ده‌زگای هه‌واڵگری جیهانی و ناوچه‌یی له‌ كاتێكدا ده‌وڵه‌تی ئیسلامی له‌ چه‌ند به‌ره‌یه‌كی جیاوه‌ له‌ شه‌ڕدایه‌ كه‌ ئه‌مه‌ش تواناكانی كه‌مده‌كاته‌وه‌ بۆ چڕكردنه‌وه‌ی توانای خۆپارستنی خۆی به‌ گشتی.

هه‌روه‌ها له‌ شوێنێكی تری وتاره‌كه‌یدا ده‌ڵێت نازانین قه‌باره‌ی ئه‌و زیاننانه‌ی به‌ر ده‌وڵه‌تی ئیسلامی كه‌وتووه‌ چه‌نده‌ له‌لایه‌ن ده‌زگا ئه‌منی و هه‌واڵگرییه‌كانی عێراقه‌وه‌، به‌ڵام ئه‌بو حه‌فسه‌ی ئه‌لموهاجری كه‌ گه‌وره‌ به‌رپرسێكی داعشه‌ و ده‌ستی به‌ خوێنی هه‌زاران كه‌س له‌ عێراق و شام سووره‌ به‌ به‌ڕێز ناو ده‌بات و ده‌ڵێت ووتویه‌تی كه‌ ئیتر هیچ كه‌سێكی عێراقی له‌ ڕیزه‌كانماندا وه‌رناگرین جگه‌ له‌ خه‌ڵكی بیانی بۆ جیهاد نه‌وه‌كو خه‌ڵكی نێراویان تێدابێت بۆ خۆ خزاندنه‌ ناو ریزه‌كانمان له‌لایه‌ن ده‌زگا هه‌واڵگریه‌كانی عێراقه‌وه‌. بۆیه‌ له‌وانه‌یه‌ گورزی گه‌وره‌یان وه‌به‌ر كه‌وتبێت.

له‌هه‌مان كاتدا عه‌بولباری عه‌توان كورته‌یه‌كی مێژوویی له‌سه‌ر كاری هه‌واڵگری وناردنی خه‌ڵكی بۆ ناو ڕیزه‌كانی ڕێكخراوه‌كانی قاعیده‌ و ڕێكخراوه‌ فه‌له‌ستینیه‌كان باس ده‌كات و هۆشداریان ده‌داتی له‌ مه‌ترسی ئه‌و جۆره‌ كارانه‌، به‌ڵی ئه‌مه‌ نووسه‌رو ڕۆژنامه‌ نووس عه‌بدولباری عه‌توانه‌ كه‌ له‌ چه‌ند ڕۆژی ڕابردوودا جارێكی تر ڕق و بێزاری خۆی ده‌ربڕی له‌ ئاست به‌ هاناوه‌ چوونی ئه‌مریكاو هاوپه‌یمانه‌كانی و كۆمه‌لِگه‌ی نێوده‌وڵه‌تی بۆ خه‌ڵكی كۆبانی. هه‌روه‌كو ئه‌وه‌ی به‌ڵێنی بیلفۆری دا و جێبه‌جی ی كرد كورد بووبێت!!!؟

له‌هه‌مان كاتدا پیاوێكی تری ئایینی ئیسلامی تونسی عه‌ره‌ب به‌ناوی شێخ حوسین عوبێدی ئیره‌یی به‌ كور د ده‌بات كه‌ چۆن توانیان یارمه‌تی بگه‌یه‌ننه‌ كۆبانی ده‌ڵێت ئێمه‌ی عه‌ره‌ب به‌ 23 ووڵاته‌وه‌ نه‌مان توانی ئه‌وه‌نده‌ یارمه‌تی بگه‌یه‌نینه‌ غه‌زه‌. هه‌روه‌ها ره‌جه‌ب ته‌یب ئه‌ردۆگانی سه‌رۆكی توركیاش له‌ میانی سه‌ردانه‌كه‌ ئه‌م دواییه‌ی بۆ فه‌ره‌نسا بێزاری و خۆی به‌رامبه‌ر كۆمه‌ك وهاوكارییه‌كانی كۆمه‌ڵگای نێو ده‌وڵه‌تی بۆ كۆبانی نه‌ناردنی بۆ شوێنه‌كانی تری سوریا ده‌ربڕی.

بۆیه‌ لێره‌وه‌ داوا له‌ ڕه‌وه‌ندی كوردی له‌ ئه‌وروپاو ئه‌مریكا ده‌كه‌م هه‌روه‌ها هه‌موو ڕێكخراوو هێزه‌ دیموكراتخوازه‌كان ده‌كه‌م له‌ ڕێگه‌ی داواكاری گشتیه‌وه‌ سكاڵای یاسایی له‌سه‌ر ناوبراو تۆمار بكه‌ن هه‌وڵی ئه‌وه‌ بده‌ن لێپێچینه‌وه‌ی له‌ گه‌ڵدا بكرێت.

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

 

 

 

له‌ چوارچێوه‌ی ئه‌و هه‌وڵانه‌ی كه‌ له‌ ئارادایه‌ بۆ پێكهێنانی هاوپه‌یمانیه‌تیه‌كی به‌ هێز و فراوانتر له‌ ئه‌مه‌ی ئێستا هه‌یه‌ كۆنگره‌ی برۆكسل به‌سترا له‌ 3 دیسه‌مبه‌ری ئه‌مساڵ بۆ به‌ گژاچوونه‌وه‌ی تیرۆرو ڕه‌فتاره‌كانی داعش به‌ به‌شداری 60 ده‌وڵه‌ت و له‌ سه‌ر ئاستێكی بڵند، له‌ چه‌ند مانگی ڕابردوودا داعش له‌ عێراق و سوریا و ڕۆژئاواو باشووری كوردستان به‌ شێوه‌یه‌كی زۆر دڕندانه‌ به‌ربووه‌ته‌ گیانی خه‌ڵكی سڤیل و بێدیفاع هه‌ر له‌ كه‌مه‌ نه‌ته‌وه‌كاوه‌كان و ئتنیكه‌ جیاوازه‌كانی ئێزیدی و مه‌سیحی و شه‌به‌ك و شیعه‌و هه‌موو بۆچوون ئاینزا جیاوازه‌كانی خۆیان كه‌ بۆ سه‌رجه‌م مرۆڤایه‌تی جێگه‌ی شه‌رمه‌زاریه‌ كه‌له‌م سه‌ره‌تای سه‌ده‌ی بیست و یه‌كه‌دا هێزێك سه‌ر هه‌ڵبدات وه‌كو قه‌واره‌یه‌كی نامۆ به‌م جیهانه‌ په‌لاماری هه‌موو شته‌ جوانه‌كان بدات له‌ هونه‌رو فه‌لسه‌فه‌و شوێنه‌وارو ئایین و ژن و ئازادی و جیاوازییه‌كان كه‌ جوانیان به‌ ژیان به‌خشیووه‌. . . . تد

سه‌ره‌ڕای هه‌مووئه‌وانه‌ خه‌لیفه‌ی ده‌وڵه‌ته‌كه‌یان ئه‌بوبه‌كر به‌غدادی له‌ دوایین تۆماری ده‌نگی كه‌ بڵاوی كرده‌وه‌ له‌ چه‌ندرۆژی پێشوودا تا داگیر كردنی ڕۆمای پایته‌ختی ئیتالیا له‌ ئه‌وروپاو عه‌ره‌بستانی سعودی و یه‌مه‌ن و میسرو مه‌غریبی عه‌ره‌بی ڕاناوه‌ستن و موژده‌ی به‌ لایه‌نگرانی ده‌دا كه‌ یاسای خه‌لافه‌تی ده‌وڵه‌ته‌كه‌یان به‌سه‌ر هه‌موو ئه‌و ووڵاتانه‌دا بسه‌پێنن، بۆ یه‌ ئیتر مه‌ترسی له‌مه‌ گه‌وره‌ترو هه‌ڕه‌شه‌ له‌مه‌ ئاشكراتر به‌دی ناكرێت بۆ سه‌ر ئاشتی و ئاسایش و پێكه‌وه‌ ژیان له‌ جیهاندا، بۆیه‌ ئیتر هیچ بوارێك نه‌ماوه‌ته‌وه‌ بۆ ناوه‌نده‌كانی بڕیارو زلهێزه‌كانی دونیا بۆ به‌گژاچوونه‌وه‌ی ئه‌م په‌تا كوشنده‌یه‌ جگه‌ له‌ هاوپه‌یمانیتیه‌كی به‌هێزو مه‌زن وچالاك بۆ گژاچوونه‌وه‌ی ئه‌م ڕێكخراوه‌ ڕه‌شپه‌رست و تیرۆرسته‌ كه‌ ئه‌مڕۆ زیاتر له‌ 90 هه‌زار كیلۆمه‌تری چوارگۆشه‌ زه‌وی له‌ عێراق وشام له‌ بنده‌ستدایه‌ هه‌روه‌ها زیاتر له‌ 30 هه‌زار چه‌كداری هه‌یه‌ جگه‌ له‌ توانای دارایی زۆرو زه‌به‌ن كه‌ به‌هۆی بوونی چه‌ندین كێڵگه‌ی نه‌وت و غاز له‌ عێراق و سوریا له‌ ژێر ده‌سه‌ڵاتیدا كه‌ به‌ هۆیانه‌وه‌ توانای درێژه‌دانی ماشێنی جه‌نگی بۆ فه‌راهه‌م كردوون. هه‌رچه‌نده‌ كۆمه‌ڵگای نێوده‌وڵه‌تی هه‌ر له‌سه‌ره‌تای سه‌رهه‌ڵدانی قه‌یرانه‌كه‌وه‌ به‌ خۆ كه‌وتون وله‌له‌ئاست و قه‌واره‌یه‌كی بچوكه‌وه‌ بۆ گه‌وره‌تر سه‌رتا كۆنگره‌ی جه‌ده‌ له‌ عه‌ره‌بستانی سعودیه‌ به‌سترا به‌ به‌شداری ووڵاتانی كه‌نداو ئه‌مریكا وتوركیا هه‌رچه‌نده‌ توركیا واژۆی له‌سه‌ر به‌یانی كۆتایی كۆنگره‌كه‌ نه‌كرد و دواتر كۆنگره‌ی پاریس به‌سترا به‌ قه‌واره‌یه‌كی فراوانتر به‌ به‌شداری چل ده‌وڵه‌ت و وائه‌مێستاش كۆنگره‌ی برۆكسل به‌ به‌شداری 60 ده‌وڵه‌ت ده‌به‌سترێت به‌ ئامانجی به‌گژا چوونه‌وه‌ی تیرۆری داعش و ووشك كردنی هه‌موو سه‌رچاوه‌كانی كۆمه‌ك و دارییان له‌ هه‌موو جیهان و گه‌مارۆدانی ئه‌و په‌تا وشێرپه‌نجه‌ سامناكه‌ كه‌ ئیستا نزیكه‌ی 5 ملیۆن كه‌س ئاواره‌ی ده‌ستی ئه‌وانه‌ له‌ عێراق وشام نه‌بوونی كاره‌باو گرانبوونی هه‌موو جۆره‌كانی سووته‌مه‌نی و قه‌یرانه‌كانی نیشته‌جێبوون بێبه‌شكردنی مناڵان له‌ خوێندن و سه‌دان و ده‌یان گیرو گرفتی تریان بۆ خه‌ڵكی ئه‌م ووڵاتانه‌ دروستكردووه‌ و له‌ هه‌وڵی ئه‌وه‌دان ئه‌م دیارییه‌ بۆ ووڵاتانی دیكه‌ش به‌رن. بۆیه‌ نه‌ك هه‌ر په‌یمانی ناتۆو به‌ڵكو ناوه‌ندێكی گرنگی وه‌كو زانكۆی ئه‌زهه‌ر له‌ قاهیره‌ی پایته‌ختی میسر له‌ دوو رۆژی 3 و4 دیسمبه‌ردا كۆنگره‌یه‌كی گرێداوه‌ به‌ به‌شداری ئێران وسعودیه‌ و ووڵاتانی ترله‌ پێناو به‌گژاچونه‌وه‌ی توندوتیژی و ڕه‌فتاره‌كانی داعش بۆیه‌ له‌به‌ر مه‌ترسی ئه‌م دیارده‌ سامناكه‌ كه‌ هه‌ڕه‌شه‌ له‌ ئاشتی و ئاسایش و پێكه‌وه‌ ژیانی گه‌لان و ئتنیكه‌ جیاوازه‌كان ده‌كات ئه‌ركی كۆمه‌ڵگای نێودوڵه‌تیه‌ هاوپه‌یمانیه‌تیه‌كی گه‌لێك گه‌وره‌ تر له‌مه‌ی ئێستا پێك بهێنێت و به‌ به‌شداریپێكردنی هێزی سه‌ربازی زه‌مینی و هه‌وایی بۆ زاڵبوون به‌سه‌ریاندا و گه‌ڕانه‌وه‌یان بۆ ناو كونه‌كانیان، ئه‌ركی سه‌رشانی هه‌مووتاكێكیشه‌ له‌ هه‌ر كوی بێت ببێته‌ چاودێرو ڕی له‌ گه‌شه‌كردن و جووڵه‌ی ئاوا ڕه‌وتێك بگرێت.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

 

 

 

جه‌نگ بریتیه‌ له‌ پرۆسیسی ناكۆكی و ململانی ی له‌ نێوان دوولایه‌ن یان زیاتر به‌ ئامانجی له‌ ناوبردن و تێكدانی لایه‌نی به‌رامبه‌ر جه‌نگ چه‌ند جۆرێكی هه‌یه‌ له‌وانه‌ جه‌نگی سه‌ربازی كه‌ به‌ شه‌ڕی ده‌سته‌ویه‌خه‌و به‌رامبه‌ر كه‌ هه‌موو جۆره‌كانی چه‌ك چ ئاسمانی و چ زه‌مینی. . . تد تیادابه‌كار ده‌هێنرێت یان جه‌نگی هزر و سیاسه‌ته‌ كه‌ ئه‌ویش به‌ نانه‌وه‌ی ئاژاوه‌و فێڵ و ته‌ڵه‌كه‌بازی له‌نێوان كۆمه‌ڵانی خه‌ڵكی ووڵاتێكدا یان هۆزو تیره‌یه‌كدا به‌ مه‌به‌ستی لاواز كردن و په‌رت و بڵاوه‌ پێكردنیان بۆ ئه‌وه‌ی هه‌ركات ویستیان ده‌ست بگرن به‌ سه‌ریاندا، هه‌روه‌ها جه‌نگ چه‌ندین هۆكارو پاڵنه‌ری هه‌یه‌ له‌وانه‌ یان له‌ پێناوی سامان و داهاتدا یه‌ یان له‌ پێناوی گه‌یشتن به‌ ده‌سه‌ڵات و حوكمڕانیدا، یان جه‌نگ له‌ پێناوی ئاشتی وئارامی و وه‌رگرتنه‌وه‌ی مافی زه‌وتكراو ویان پارێزگاری له‌ خاك و وڵات و به‌ها پیرۆزه‌كانی هه‌رگه‌لێك ئه‌گه‌ر به‌ر هه‌ر شاڵاوێك بكه‌ون، یان جه‌نگ له‌ كاتێكدا ڕووده‌دات كه‌ هیچ بوارێك نه‌مێنێته‌وه‌ بۆ چاره‌سه‌ری كێشه‌و ململانێكان له‌ ڕێگه‌ی دایا لۆگ و دان وسانه‌وه‌ یان ناكۆكی ئایدیۆلۆجی وئایینی و ئاینزاكان یان جه‌نگی ڕزگاری نیشتمانی و سه‌ربه‌خۆیی گه‌لانی بنده‌ست و ئازادیخوا بۆ وه‌رگرتنه‌وه‌ی ماف وخاكی داگیركراو یان ڕووخاندنی ڕژێمه‌ دكتاتۆرو ملهوڕه‌كان.

جه‌نگ چه‌ندین جۆرو شێوازی هه‌یه‌ له‌ پۆلین كردندا سه‌ركیترینیان جه‌نگی پیس و جه‌نگی عادیلانه‌یه‌، مه‌به‌ست له‌ جه‌نگی پیس ئه‌وجه‌نگه‌ دڕندانه‌یه‌ كه‌ ته‌ڕو وشك به‌ یه‌كه‌وه‌ ده‌سوتێنێت و كۆمه‌ڵكوژی به‌رامبه‌ر خه‌ڵكی سڤیل و بی دیفاع ئه‌نجام ده‌دات وه‌كو له‌ جه‌نگی كۆریادا له‌ ساڵی 1950 و شه‌ڕی فه‌ره‌نسا دژی جه‌زائیر 1954- 1961 و شه‌ڕی خێڵه‌كانی هۆتو توتسی له‌ ڕوندا 1993 و هه‌روه‌ها به‌كارهێنانی ژه‌هری كیمیاوی دژی كورده‌كانی عێراق له‌ پرۆسه‌كانی ئه‌نفالدا ساڵی 1988، به‌ڵام شه‌ڕی عادیلانه‌ هه‌رچه‌نده‌ فه‌یله‌سوف و بیرمه‌نده‌كان له‌ دیاریكردنی مانای ئه‌م زاراوه‌دا جیاوازن له‌به‌رئه‌وه‌ی هه‌ندێك له‌ سه‌ركرده‌ سه‌ربازی و سیاسیه‌كان زۆرجار به‌ كاری ده‌هێنن بۆ جێبه‌جێكردنی مه‌رامه‌كانیان هه‌رچه‌نده‌ به‌ زۆرێك له‌ پێوه‌ره‌كان جه‌نگه‌كه‌ عادیلانه‌ش نه‌بێت، به‌ڵام گه‌وره‌ بیرمه‌ندێكی وه‌كو (كانت) سه‌ره‌كۆنه‌ی جه‌نگ ده‌كات و وای نابینێت جه‌نگی عادیلانه‌ هه‌بێت به‌ڵكو كتێبێكی دانا به‌ ناوی (پرۆژه‌ی ئاشتی هه‌میشه‌یی) كه‌ دواتر بووه‌ سه‌رچاوه‌ی داڕشتنی به‌نده‌كانی كۆمه‌ڵه‌ی گه‌لان له‌ گه‌ڵ ئه‌وه‌شدا وتی ئاشتی هه‌میشه‌یی مه‌حاڵه‌ به‌ڵكو ده‌توانین ئه‌و ئامانجه‌ به‌ ده‌ست بهێنین به‌ شێوه‌یه‌كی نزیك لی ی.

به‌ هه‌رحاڵ شوێنه‌واری جه‌نگ له‌ هه‌ركوی بێت كوشتن و بڕین و سه‌رگه‌ردانی و ماڵوێرانیه‌ زیان به‌ ژینگه‌و ژێرخانی وڵات ده‌گه‌یه‌نێت، برسێتی و نه‌خۆشی و دواكه‌وتن له‌ كاروانی زانیاری و زانست و ته‌كنۆلۆجیا و هه‌روه‌ها كاریگه‌ری ده‌روونی خراپی له‌ سه‌ر هه‌مووتاكه‌كانی كۆمه‌ڵگه‌ به‌ جێده‌هێڵێت و به‌ فیڕۆدانی داهاتی گشتی وڵاته‌ له‌ ڕووی ئابووری و مرۆیی و سامانه‌ سروشتیه‌كانیشه‌وه‌.

بۆ به‌رگرتن له‌ ڕوودانی جه‌نگ وئه‌ڵته‌رناتیف بۆی په‌نا بردنه‌ بۆ ئاشتی و دووركه‌وتنه‌وه‌ له‌ توندو تیژی و بی لایه‌نی و دبلۆماسیه‌ت و دان وسان وڕێكه‌وتن و سازان و سزا]دانی نێوده‌وڵه‌تی و هه‌ستكردن به‌ مه‌ترسیه‌كانی تێوه‌گلانه‌ له‌شه‌ڕ و تێچوونی ڕاده‌یه‌كی زۆره‌ له‌ سامان و داهاتی وڵات.

ئه‌وه‌ی سه‌ره‌وه‌ پێناسه‌یه‌كی كورتی جه‌نگ و پوخته‌یه‌كی هۆكارو ئامانج و جۆر و شێوازو شوێنه‌وار وئاكامه‌كانی جه‌نگه‌ به‌ شێوه‌یه‌كه‌ گشتی، له‌ سۆنگه‌ی هه‌موو ئه‌وانه‌وه‌ چۆن جه‌نگی ڕێكخراوی تیرۆرستی داعش دژ به‌ گه‌لی كوردستان له‌ باشوورو رۆژئاوا ی كوردستان پۆلین بكه‌ین؟؟

له‌ كاتێكدا كورد له‌ نێوماڵی خۆیدایه‌ له‌سه‌رخاكی خۆیه‌تی هه‌ر له‌ جه‌له‌ولا و كه‌ركوك تا زوممارو شه‌نگال تا كۆبانی ی قاره‌مان و سومبولی خۆڕاگری و نه‌به‌زین، ئه‌وه‌ كوڕو براو خوشك ومناڵه‌كانمانن چ پێشمه‌رگه‌ و چ گه‌ریلا و چ شه‌ڕه‌ڤان له‌ به‌رده‌ركی ماڵه‌كانی خۆمان شه‌هید ده‌بن و گیانیان به‌ سه‌خاوه‌ته‌وه‌ فیدای خاكی نیشتمان ده‌كه‌ن. كه‌سیان پایان نه‌خستۆته‌ نێو ماڵی كه‌سێكی تره‌وه‌.

له‌ كۆتاییدا ده‌پرسم ئایا جه‌نگ له‌مه‌ عادیلانه‌ترو پیرۆزتر هه‌یه‌؟؟ وه‌ڵامه‌كه‌ی جێدێڵم بۆ خوێنه‌رانی خۆشه‌ویست وڕای گشتی و هه‌موو ڕێكخراوه‌كانی كۆمه‌ڵگه‌ی مه‌ده‌نی؟؟؟

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

Go to top