We have 36 guests and no members online

عەونی خۆشناو

 

 

 

سیاسه‌ت له‌ پێناوی چیدا؟. . .  م. عه‌ونی خۆشناو

  متمانه‌ له‌ نێوان هاووڵاتی و ده‌سه‌ڵاتی سیاسی، لایه‌نێکی گرنگی سه‌رمایه‌ی کۆمه‌ڵایه‌تییه‌، له‌ پاڵ به‌هاو مۆراڵ و په‌یوه‌ندیه‌ کۆمه‌ڵایه‌تییه‌کاندا، که‌ کاریگه‌ری له‌سه‌ر گرێدانی په‌یوه‌ندی نێوان تاک و کۆمه‌ڵگادا هه‌یه‌، متمانه‌ی هاووڵاتی به‌ ده‌سه‌ڵاتی سیاسی ئه‌وه‌یه‌، کاتێک به‌رپرسان و سیاسه‌تمه‌داران به‌ڵێن ده‌ده‌ن، که‌ پارێزگاری له‌ شکۆی نیشتمان ده‌که‌ن، پرنسیپ و مۆڕال و به‌ها کۆمه‌ڵایه‌تییه‌کان وه‌ک خۆی جێبه‌جێ ده‌که‌ن، دادپه‌روه‌ری و ئازادی و یه‌کسانی له‌ نێو تاکه‌کانی کۆمه‌ڵگا وه‌ک یه‌ک په‌یڕه‌و ده‌که‌ن، سامانی نیشتمانی ببێته‌ وێستگه‌یه‌کی گرنگ له‌ په‌ره‌پێدان و گه‌شه‌پێدانی وڵات، له‌ پێناوی ئاوه‌دانی و خۆشگوزه‌رانی هاونیشتمانیان، هه‌رچه‌نده‌ 22 ساڵه‌ سه‌مفۆنیای ئه‌و به‌ڵێنانه‌ هاش و هوشیانه‌، به‌ڵام له‌ پڕاکتیکدا ئه‌مانه‌ بوونیان نیه‌، چونکه‌ سه‌رمایه‌و داهاتی وڵات ته‌خشان و په‌خشان ده‌کرێت، بازرگانی له‌گه‌ل دوژمن و نه‌یاران ده‌کرێت، پاره‌ی دزراوی به‌رپرسان له‌ژێر زه‌مینه‌کان عه‌مبار ده‌کرێت، هاووڵاتی کوردستان برسی و هه‌راسان ده‌کرێت، قه‌یرانی به‌نزین و نه‌وت و غازو کاره‌با و بێ مووچه‌یی و پێداویسته‌کانی ژیان رۆژانه‌ باس ده‌کرێت!!

  کۆمه‌ڵانی خه‌ڵکی کوردستان کاتێک به‌شداریان له‌ شۆڕش و به‌رخودانکرد، تاکو به‌ داگیرکه‌ران بلێن نه‌خێر بۆ داگیرکاری و کاوڵکاری و به‌تالان بردنی سه‌رمایه‌ و سووتماککردنی کوردستان، به‌ڵێ بۆ رزگاری و سه‌ربه‌خۆیی و ئازادی و ئاوه‌دانی و ئاشتی و ته‌بایی و پێکه‌وه‌ ژیان، به‌ڵام به‌داخه‌وه‌ بۆ ئێوه‌ی پاڵه‌وانانی درامای شانۆی سیاسی دوێنێ و بارزگانانی ئه‌مرۆ، له‌یه‌که‌م تاقیکردنه‌وه‌ی حوکمڕانی کوردستان لاواز ده‌رچوون، له‌ جیاتی پاداشت و خزمه‌تکردنی خه‌ڵک، هه‌وڵی کۆکردنه‌وه‌ی سه‌روه‌ت و سامان و خۆ ده‌وڵه‌مه‌ندکردنتاندا، له‌ جیاتی خۆشگوزه‌رانی و ئاوه‌دانی!! گومرگه‌کانیان کۆنترۆڵکردو شه‌ڕی نه‌گریسی براکوژیان کرده‌ دیاری کۆمه‌لانی خه‌ڵکی کوردستان، به‌و هۆیه‌وه‌ چرای ئومێدی کوردایه‌تیان خامۆشکرد، سه‌دان کچ و دایک و خوشکیان ڕه‌شپۆشکرد، هه‌زاران ئاواره‌ و سه‌رگه‌ردانکرد، ده‌ستیان له‌گه‌ل داگیرکه‌ران تێکه‌ڵاوکرد، له‌ گۆشه‌نیگای چاوچنۆکی و خۆپه‌رستیان کوردستانتان هه‌ڕاج و هه‌رزانفرۆشکرد و داگیرکه‌رانیش سوودمه‌ند!!

هه‌موو تاکه‌کانی کۆمه‌ڵگا پێویستیان به‌ده‌سته‌به‌رکردنی بژێوی ژیانه‌، ئه‌گه‌ر تاکێک نه‌توانیت پێداویسته‌کانی ژیان ده‌سته‌به‌ر بکات، به‌ هۆی نه‌بوونی کار بیر له‌ کاره‌ نا یاساییه‌کان ده‌کاته‌وه‌، هه‌رچه‌ند باش ده‌زانێت، دزیکردن یه‌کێکه‌ له‌ دیارده‌ و خوڕه‌وشته‌ خراپ و ناشیرینه‌کانی کۆمه‌ڵگا، دزه‌ بچووکه‌کان له‌ پێناوی په‌یداکردنی بژێوی ژیانیان دزی له‌ تاک ده‌که‌ن و پۆلیسی تاوان به‌ ئاسانی و به‌زوویی ده‌ستگیریان ده‌کات، به‌ڵام به‌ قودره‌تی قادر دزه‌ گه‌وره‌کان، ئه‌وانه‌ی له‌ په‌نای سیاسه‌ت دزی له‌ گه‌ل و نیشتمان ده‌که‌ن، نه‌وه‌ک سزا نادرێن، به‌ڵکو رۆژانه‌ ده‌بێ به‌ چه‌پله‌ ڕێزان و فه‌رشی سوور پێشوازیان لێ بکرێ.

  ئه‌گه‌ر چی زه‌مه‌نی سیاسه‌تی ساخته‌کاری و به‌ کۆیله‌کردنی کۆمه‌ڵگا و فه‌رامنڕه‌وایی بنه‌ماڵه‌یی و دیکتاتۆری به‌سه‌رچووه‌، به‌ڵام له‌ ڕێگای پاشکۆبوون و هاوپه‌یمانی و دزینی سه‌روه‌ت و سامانی گشتی، ده‌یانه‌ویت کورسی فه‌رمانڕه‌وایه‌تی خۆیان توندتر و قایمتر بکه‌ن!! ده‌کرێت هه‌موو که‌س به‌ ناوی کوردایه‌تی له‌ خشته‌ ببرێت و هه‌ندێک بۆ ماوەیه‌ک فریو بدرێت، به‌ڵام ناکرێ هه‌موو خه‌ڵکی بۆ هه‌میشه‌ی فریو بدرێت!!

  ئایا سیاسه‌تکردن له‌ پێناوی کوردایه‌تی و خزمه‌تکردنی گه‌ل و نیشتمانه‌، یاخود بۆ مه‌به‌ستی کۆکردنه‌وه‌ی پاره‌و سه‌روه‌ت و سامانه‌؟! ئایا قه‌رزکردنی حکومه‌ت بۆ سپیکردنه‌وه‌ی پاره‌کانه‌، یاخود بۆ باشترکردنی بژێوی ژیانی هاووڵاتیانه‌؟؟ ئه‌و 5 سیاسه‌تمه‌داره‌ کورده کێن‌ که‌ خاوه‌نی ئه‌و 200 ملیار دۆلاره‌ دزراوه‌ی کوردستانن؟؟ کێن ئه‌و 10 سه‌رکرده‌ی که‌ خاوه‌نی زیاتر 100 ملیار دۆلارن؟؟ سه‌دانی تریش خاوه‌نی سه‌دان ملیۆن دۆلارن!! کام فه‌رمانده‌و کام بازرگان به‌ رۆژ پاڵه‌وان و به‌شه‌و شه‌ریکه‌ به‌شی داعشه‌کانه‌؟؟ ئه‌و هه‌موو سه‌روه‌ت و سامانه‌ بودجه‌ی 15 ساڵی کوردستانه‌؟ له‌ سایه‌ی ئه‌و سیاسییانه‌ کوردستان هه‌میشه‌ له‌ قه‌یرانه‌!!

 ئه‌و پرسیارانه‌و ده‌یان پرسیاری تر وه‌ڵامه‌کان لای کامیانه‌؟ داواکاری گشتی له‌ کوێی کێشه‌کانه‌؟

  ئێستا کاروانی خه‌بات له‌ وێستگه‌یه‌کی گرنگی کوردایه‌تی گوزه‌ر ده‌کات، پێشمه‌رگه‌ له‌ به‌رخودان و تێکۆشان و به‌رگریدان له‌ کوردو کوردستان، ئه‌رکی سه‌رشانی کۆمه‌ڵانی خه‌ڵکی کوردستانه‌، له‌ لایه‌ک له‌ خه‌می پێشمه‌رگه‌و کوردستان بن و له‌ لایه‌کی تریش هه‌وڵی سزادنی ئه‌و گه‌نده‌ل و مشه‌خۆرانه‌ بدرێت و پاره‌ی دزراوی گه‌ل بۆ گه‌ل بگه‌رێته‌وه‌، نه‌که‌ونه‌ ژێر ڕکێڤی هیچ ته‌وژمێک که‌ زیان به‌ پرۆسه‌ی دیموکراسی و کوردستان بگه‌یه‌نێت، ئه‌رکی ڕووناکبیرو نووسه‌رو ڕۆژنامه‌نووسانه‌ به‌دواداچوون بۆ ئه‌و بابه‌ته‌ بکه‌ن و ڕاستیه‌کان بۆ کوردستانییان ڕوونبکه‌نه‌وه‌، تاوانبارانیش به‌ سزای خۆیان بگه‌یێنن، چاوه‌ڕێێ هه‌وڵ و کۆششی دڵسۆزانی گه‌ل و نیشتمانین. . ئه‌مه‌ش لینکی زانیاریه‌کانه‌:

http://www. lvinpress. com/dreja. aspx?=hewal&jmare=12743&Jor=1

م. عه‌ونی خۆشناو

هۆڵه‌ندا / لاهای

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

 

 

 

 

 

 

یه‌کێتیی نیشتمانیی کوردستان هه‌میشه‌ پێشه‌نگ و داهێنه‌ر بووه‌ له‌ پرسه‌ نه‌ته‌وه‌یی و چاره‌نووسسازه‌کاندا، رۆلی مه‌زن و کارای له ‌سه‌رجه‌م کایه‌ سیاسی و که‌لتوری و کۆمه‌ڵایه‌تی و ڕێکخراوه‌کانی کۆمه‌ڵی کورده‌واری بینیوه‌‌، له‌ مێژووی یه‌کێتیدا چه‌ندان جار کۆسپ و ته‌نگه‌ژه‌و قه‌یرانه‌کان، نه‌بۆته‌ هۆکاریک بۆ پاشه‌کشه‌ی یه‌کێتی له‌ پرسه‌ نه‌ته‌وه‌یی و نیشتمانیه‌کان، بۆیه‌ هه‌موو جارێک له‌ لێواری لێکترازان و هه‌ڵوه‌شانه‌وه‌، به‌ره‌و ترۆپکی سه‌رکه‌وتن هه‌نگاوی هه‌ڵێناوه‌، ئه‌مه‌ش ته‌نها چه‌مک و ئایدیا و په‌یامی نه‌ته‌وه‌یی و نیشتمانی و کرداره‌ ئاراسته‌کراوه‌کانی یه‌کێتین، بۆته‌ نه‌خشه‌ڕێگای پردی په‌رینه‌وه‌ی به‌سه‌ر کۆسپ و ته‌گه‌ره‌کان، تێگه‌یشتنی بۆ فاکته‌ری ده‌ره‌کی و ناوخۆیی و ڕۆڵی کوردستانیان جیاواز بووه‌، له‌ تێگه‌یشتن و تێڕوانین و دنیابینی هێزو لایه‌نه‌ سیاسییه‌کانی دی، بڕوای وایه‌ که‌ کۆمه‌ک و هاوکاری و پشتیوانی بۆ هێزو لایه‌نه‌ سیاسییه‌کانی کوردستان و هاونیشتمانیان ئه‌رکی نه‌ته‌وه‌یی و نیشتمانییه‌، له‌و ڕوانگه‌یه‌وه‌‌ له‌ده‌ستپێکی خه‌بات و تێکۆشانی یه‌کێتیدا تاکو ئه‌مڕۆ ئه‌وه‌ی کرابێت،     له‌ سۆنگه‌ی به‌هاو ڕه‌هه‌نده‌ نه‌ته‌وایه‌تییه‌کانه‌وه‌ ده‌ستی کۆمه‌ک و هاوکاری مرۆیی و لۆجستی و بۆ به‌شه‌کانی کوردستانی درێژ کردووه‌، یه‌کێتی ئه‌وه‌ی ئه‌نجامی داوه‌، کاری یه‌که‌م و کۆتایی نیه‌، به‌ڵکو له‌ کوێ پێویستی کردبێت، له‌وی کوانووی خه‌باتی جۆشداوه‌، سه‌روه‌رییه‌کانی یه‌کێتی شاهیدی ئه‌و ڕاستییه‌ مێژوویه‌ن.

  له‌ سه‌ره‌تای قه‌یرانه‌کان و هه‌ڕه‌شه‌ی تیرۆریستانی داعش له‌ موسڵ و ده‌ڤه‌ره‌ کوردستانیه‌کان، یه‌کێتی دیدو تێڕوانینی جیاوازی هه‌بووه‌ بۆ په‌رپه‌رچدانه‌وه‌و پارێزگاریکردن له‌ کوردستانیان و کوردستان، هه‌ربۆیه‌ زۆر به‌ خێرا جووڵه‌ی به‌ هێزه‌کانی پێشمه‌رگه‌ کرد، ئه‌و ناوچانه‌ی پاراست که‌ له‌ژێر هه‌ڕه‌شه‌ی تیرۆریستان دابوو، پێش ئه‌و ڕووداوانه‌ سه‌رکرده‌ دیاره‌کانی یه‌کێتی ئاماژه‌یان داوه‌ به‌ مه‌ترسی سه‌له‌فیه‌کان و تیرۆریستانی داعش بۆ سه‌ر ئارامی و ئاسایشی کوردستان، له‌و دیدگایه‌وه‌ یه‌کێتی بوو به‌ پێشه‌نگی ئه‌و هێزانه‌ی به‌رگریکردن له‌ پێناوی خاک و گه‌ل و نیشتمان. .

  یه‌کێتی وه‌ک هێزێکی ڕه‌سه‌نی کوردایه‌تی له‌ وێستگه‌کانی خه‌باتیدا، هیچ کاتێک سنووره‌ ده‌ستکرده‌کانی نێوان پارچه‌کانی کوردستان، نه‌بۆته‌ ئاسته‌نگ و به‌ربه‌ست و ڕێگر له‌به‌رده‌م هه‌ڵوێسته‌ نه‌ته‌وه‌یی و نیشتمانیه‌کانی، ناوه‌که‌ی خۆی له‌ خۆیه‌تی، له‌ کوێ پێویست بێت، له‌وی بۆته‌‌ به‌شێک له‌و هێزانه‌ی که‌ پارێزگاری له‌ گه‌ل و نیشتمان ده‌که‌ن له‌و ڕه‌هه‌نده‌وه‌ هه‌ستی به‌و به‌رپرسیاره‌تیه‌وه‌ کردووه‌ له‌و دیدگایه‌وه‌ ده‌ڕوانیته‌ خۆرئاوای کوردستان، وه‌ک به‌شێکی دانه‌بڕاو له‌ جه‌سته‌ی نیشتمانی دایک ئه‌ژمارکردووه‌، بۆیه‌ هه‌ڵوێستی ڕوون و ئاشکرابووه‌، ئه‌وه‌نده‌ی کرابێت پشتیوان و هاوهه‌ڵوێست بووه‌ له‌گه‌ل خه‌بات و به‌رخودانی کوردستانیانی خۆرئاوا، له‌ڕووی مرۆیی و لۆجستی و سه‌ربازییه‌وه‌ هاوکاری خۆرئاوای کوردستانی کردووه‌، فراکسیۆنی سه‌وزی ڕاسپاردووه‌ له‌ په‌رله‌مانی کوردستان، له‌گه‌ل هاوتا په‌رله‌مانتاره‌کانی تر به‌فه‌رمی کانتۆنه‌کانی خۆرئاوا بناسرێن، بۆیه‌ ئه‌وه‌ی ئه‌نجامدراوه‌ کۆمه‌ک و هاوکاری یه‌کێتین بۆ خۆرئاوای کوردستان، چۆن ناکرێت شکستی هێزه‌کانی پارتی له‌به‌ره‌ی شه‌نگال به‌ شکستی کوردو هێزی پێشمه‌رگه‌ی کوردستان پێناسه‌ بکرێت، چونکه‌ کورد سه‌دان ساڵه‌ له‌ به‌رخودانی به‌رده‌وامدان و هێزی پێشمه‌رگه‌ بۆته‌ سیمبولی ئازایه‌تی و تێکۆشان، رۆژانه‌ هێزه‌کانی پێشمه‌رگه‌ له‌ هه‌موو به‌ره‌کانی جه‌نگ سه‌رکه‌وتنی بێ وێنه‌ تۆمار ده‌که‌ن، له‌ جیاتی جیهان شه‌ڕی گه‌شه‌پیدانی دیموکراسی و فراوانکردنی پانتایی ئازادی و ئاشتی و ته‌بایی و پێکه‌وه‌ژیانی گه‌لان ده‌که‌ن، له‌و پێناوه‌دا رۆڵه‌کانی نیشتمان ده‌ریایه‌ک خوێنیان پێشکه‌ش به‌ خاک کردووه‌، ناوی شه‌هیدان ئه‌ستێره‌ی دره‌وشاوه‌ی ئاسمانی بێگه‌ردی کوردایه‌تین و سیمبولی نیشتمانن.

 هه‌روه‌ها به‌ره‌ی دژه‌ تیڕۆر له‌ چل وڵات زیاتر پێکهاتووه‌، به‌ڵام ته‌نها ناوی ئه‌مریکا ناوێکی کاراو دیاری ئه‌و هاوپه‌یمانه‌یه‌، باسی گورزی ئاسمانی ئه‌مریکا ده‌کرێت دژ به‌ چه‌ته‌کانی داعش له‌به‌ره‌کانی جه‌نگ، که‌س ناڵێ گورزی ئاسمانی هاوپه‌یمانان، ناوی ئه‌و ووڵاتانه‌ زیاتر دێت که‌ به‌شداری کارای ئه‌و هاوپه‌یمانیه‌ته‌ن، وه‌ چۆن ڕێزدار مه‌سعود بارزانی سه‌رۆکی پارتی دیموکراتی کوردستان چه‌ند رۆژێکه‌ هه‌موو هێز و لایه‌نه‌ سیاسیه‌کانی خۆرئاوای له‌سه‌ر مێزی گفتوگۆ کۆکردنه‌وه‌و هه‌وڵی ناوبژیوانی نێوان هێزه‌کانی داوه‌، که‌ شایه‌نی باسکردن و ستایشه‌، تاکو هه‌مووان پێکه‌وه‌ به‌شداری ئه‌و به‌رخودانه‌ بێ وێنه‌یه‌ بکه‌ن، هه‌موو دڵسۆزانی گه‌ل و نیشتمان له‌ هه‌وڵی نه‌مانی سنووره‌ ده‌ستکرده‌کانن، که‌چی پارتی به‌ ناوی حکومه‌تی هه‌رێم به‌ لێدانی خه‌نده‌ق سنووره‌کانی تۆخکرده‌وه، به‌لام زۆربه‌ی هێزه‌کان ئیدانه‌ی ئه‌و کاره‌یانکرد‌، هه‌رچی چاک و خراپ هه‌یه‌ وه‌ک خۆی ئاماژه‌ی پێبدرێت، نه‌وه‌ک کاره‌کان گشتگیر بکرێن،  بۆیه‌ جارێکی تر ئه‌وه‌ ده‌ڵێینه‌وه‌ ئه‌و چه‌ک و کۆمه‌کانه‌ی گه‌یشتۆته‌ خۆر ئاوای کوردستان یه‌کێتی ناردوویه‌تی، ئه‌مه‌ش وه‌ک منه‌تکردن و موزایەده‌ نیه‌، به‌ڵکو هه‌ستێکی نیشتمانی و هه‌ستکردنه‌     به‌ به‌رپرسیاریه‌تی به‌رامبه‌ر گه‌ل و نیشتمان، ئه‌گه‌ر چه‌مکی موزایەده‌کردن بۆ هه‌ندێک پارت و لایه‌نی سیاسی ئامانجی خۆی بپێکی، ئه‌وه‌ بۆ یه‌کێتی پێچه‌وانه‌که‌ی ڕاسته‌، چونکه‌ یه‌کێتیه‌کان ده‌ڵێن کردار شه‌رته‌، نه‌وه‌ک به‌لێن و لێدوانی چه‌واشه‌کاری!!

بۆیه‌ من وه‌ک چاودێرێک ده‌ڵێم ڕاگه‌یاندنی یه‌کێتی له‌ جێی خۆیدابوو، له‌به‌ر ئه‌و هۆکارانه‌:. .

  1. تاکو کۆمه‌ڵانی خه‌ڵکی کوردستان چه‌واشه ‌نه‌کرێن و ڕاستیه‌کان بزانن، کێ خاوه‌نی کۆمه‌ک و هه‌ست به‌ به‌رپرسیاریه‌تی ده‌کات و کێ خاوه‌نی خه‌نده‌قه‌ له‌ پێناوی به‌رژه‌وه‌ندی ته‌سکی حزبایه‌تی!!
  2. تاکو سه‌رجه‌م پارت و لایه‌نه‌ سیاسییه‌کان، چاو له‌ یه‌کێتی بکه‌ن و پشتیوانی و کۆمه‌ک و هاوکاری بۆ کوردستانیانی خۆرئاوا بنێرن.
  3. له‌به‌ر ئه‌وه‌ی حکومه‌تی هه‌رێمی کوردستان په‌یوه‌ندییه‌کی تۆکمه و‌ به‌هێزی له‌گه‌ل تورکیا هه‌یه‌، تاکو ئه‌و کۆمه‌ک و هاوکاریانه‌ نه‌بێته‌ هۆکارێک بۆ تێکچوونی ئه‌و په‌یوه‌ندیه‌، چونکه‌ هه‌تا ئێستا گومانی ئه‌وه‌ هه‌یه‌، که‌ تورکیا هاوکاری لۆجستی داعش ده‌کات!!

                  م. عه‌ونی خۆشناو

                  هۆڵه‌ندا / لاهای

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

 

 

 

 

 

 

له‌ ساته‌وه‌ختی داگیرکردنی کوردستان و ده‌ستپێکی ململانێیه‌کان، کوردستان بۆته‌ وێستگه‌و گۆره‌پانی شه‌ڕو پێکدادانه‌کان، له‌ پێناوی به‌رژه‌وه‌ندخوازی داگیرکه‌ران و زڵهێزه‌کان، ئه‌مه‌ش بووه‌ به‌ هۆکارێک بۆ داگیرکاری و کاولکاری کوردستان، وێرای خه‌بات و تێکۆشانی بێ وچانی کوردان، له‌ پێناوی ده‌ستبه‌رکردنی مافه‌ ڕه‌واکان، به‌ڵام به‌ هۆکاری لاوازی دیبلۆماسی کوردان و جیۆپۆلیتیک و گۆڕینی نه‌خشه‌ی جیهان، هێشتا نه‌بووین به‌ خاوه‌ن ووڵات و کیانی سه‌ربه‌خۆی خۆمان!!

به‌ گوێره‌ی ڕوپێوی ڕووداوه‌ مێژووییه‌کان، چه‌ند جارێک هه‌ڵ ڕه‌خساوه‌ بۆ کوردان، تاکو وه‌ک گه‌لان بگه‌ین به‌ ئاوات و ئامانجه‌ نه‌ته‌وه‌ییه‌کان، به‌ڵام له‌به‌ر بێ به‌رنامه‌یی و یه‌ک ئیڕاده‌یی و گوتارێکی هاوبه‌ش بۆ پێشهاته‌کان، سه‌رکه‌وتوو سوودمه‌ند نه‌بووین له‌ ئاست خواسته‌ نه‌ته‌وه‌ییه‌کان، هه‌ر له ‌سه‌رده‌می پێکه‌وه‌ لکاندنی هه‌رسێ ویلایه‌تی به‌سره‌و به‌غداو موسل له‌ پێناوی دامه‌زراندنی ده‌وڵه‌تی عێراق، حکومه‌ته‌ یه‌ک له‌ دوای یه‌که‌کانی عێراق له‌سه‌رده‌می پاشایه‌تییه‌وه‌ تاکو ڕووخانی ڕژێمی به‌عس به‌ دڵ و به‌ گیان نه‌خشه‌ی چه‌په‌ڵ و گلاویان، له‌ناو بردن و کاوڵکاری و ڕاگواستن و به‌ عه‌ره‌بکردن و ته‌بعیسکردنی کوردستان بووه‌، دیمۆگرافی هه‌ندێک ناوچه‌ی کوردستانیان شێواندووه‌و پاکتاوی نه‌ژادیان ئه‌نجامداوه‌‌.

دوای پرۆسه‌ی ئازادی عێراق کێشه‌ی کورد، وێرای ئه‌وه‌ی که‌وته‌ چوارچێوه‌ی ده‌ستورو بنه‌ما یاساییه‌کان، به‌ڵام بێ مۆڕاڵی سه‌رکرده‌ سیاسییه‌کانی عێراق، عه‌قلیه‌تی حوکمڕانی به‌ ده‌وری بازنه‌ی شۆڤینی و عروبی ده‌خولایه‌وه‌‌، هه‌رچه‌نده‌ سه‌رکردایه‌تی سیاسی کورد کاراکته‌ری سه‌ره‌کی پێکهێنانی عێراقی نوێ بوون، به‌ڵام تاکو ئێستا خواست و ئامانجه‌ نه‌ته‌وه‌ییه‌کان له‌ بازنه‌یه‌کی خاڵی ده‌خوڵێته‌وه‌!

ئێستا کاروانی خه‌بات له‌ وێستگه‌یه‌کی گرنگی کوردایه‌تی گوزه‌ر ده‌کات، بۆیه‌ ئه‌رکی سه‌رشانی کۆمه‌ڵانی خه‌ڵکی کوردستانه‌ له‌خه‌می ئه‌و ئه‌زموونه‌ی کوردستاندا بن، نه‌که‌ونه‌ ژێر ڕکێفی هیچ ته‌وژمێک که‌ زیان به‌ پرۆسه‌ی سیاسی و دیموکراسی کوردستان بگه‌یێنێ، ده‌بێ ته‌واوی ووزه‌و تواناکانمان بۆ سه‌رخستنی ئه‌و ئه‌زموونه‌ بخه‌ینه‌کار، له‌ پێناوی ڕزگاری ته‌واوی خاکی کوردستان.

هزرو ئه‌ندێشه‌ی هه‌موو لایه‌کمان خولیای ئه‌وه‌یه‌ که‌ کوردستان ببێته‌ سه‌کۆیه‌کی ئازادو ووڵاتێکی سه‌ربه‌خۆ، به‌ڵام به‌ر له‌ هه‌موو شتێک بۆ جۆشدانه‌وه‌ی خه‌بات و بووژانه‌وه‌ی هه‌ستی نه‌ته‌وه‌یی و هه‌بوونی ووڵات، پێویست به‌ گوتارێکی هاوبه‌شی کوردانه‌ ده‌کات.دوور له‌ هه‌موو دیدو بۆچوونێکی ته‌سکی حزبیانه‌ و ده‌مارگیری نه‌ته‌وه‌ییانه‌، ئه‌و دیدو تێروانین و گوتاره‌ هاوبه‌شه‌ ببێته‌ چه‌تری کۆکردنه‌وه‌ی سه‌رجه‌م ئایدیۆلۆژیه‌کان و کۆکردنه‌وه‌ی ته‌واوی پێکهاته‌کانی کوردستان، تاکو له‌و ڕه‌هه‌نده‌وه‌ ئه‌و ده‌رفه‌ته‌ زێرینه‌ له‌ده‌ست نه‌ده‌ین، وه‌رچه‌رخانیکی مێژوویی پڕشنگدار بۆ گه‌ل و نیشتمان تۆمار بکه‌ین، به‌ بیروباوه‌ڕو ئیڕاده‌یه‌کی پۆڵایینه‌وه‌ ئه‌و بڕیاره‌ چاره‌نووسسازه‌ بده‌ین، جاڕی سه‌ربه‌خۆیی یه‌کجاره‌کی بده‌ین، به‌م هه‌نگاوه‌ مه‌زن و پیرۆزه‌، سه‌رکردایه‌تی سیاسی و هێزی پێشمه‌رگه‌ی کوردستان تاجی سه‌روه‌ری و شکۆمه‌ندی له‌سه‌ر ده‌نێن و کوردستان ئازاد و گه‌لیش سه‌رفراز ده‌بێت.

با ئه‌و ده‌رفه‌ته‌ی له‌ کاتی پرۆسه‌ی ئازادی عێراق له ‌ده‌ستمان چوو، ئێستا قه‌ره‌بووی ئه‌و ڕۆژانه‌ بکه‌ینه‌وه‌، هه‌رچه‌نده‌ هه‌موو هه‌وڵ و کۆششێک دراو ڕێکاره‌ یاسایی و دیبلۆماسییه‌کان تاقی کرانه‌وه‌، به‌ڵام ده‌ستور پێشێلکراو به‌ڵێنه‌کان په‌راوێزو فه‌رامۆش کران،ئه‌وه‌ی به‌ سیاسی و وتوێژو لێکتێگه‌یشتن نه‌هاته‌ ئاراوه‌، ئه‌مرۆ به‌ هێز و ئیراده‌و‌ ووره‌ به‌رزی پێشمه‌رگه‌ ئه‌و پرسه‌ نه‌ته‌وه‌ییه‌و مافه‌ زه‌وتکراوه‌ بگه‌ڕێته‌وه‌ بۆ خاوه‌ن ماف! ئێستا کاتی هه‌نگاونانه‌ به‌ره‌و گه‌ڕانه‌وه‌ی ناوچه‌ به‌زۆر دابڕێنراوه‌کان،کۆنترۆڵکردنی خاڵه‌ سنووریه‌کان و داکۆکیکردن له‌ ئازادییه‌کان و به‌رگریکردن و پارێزگاریکردن له ‌سه‌رو ماڵی هاووڵاتیان، به‌و لۆژیکه‌ کارێکی شه‌ڕه‌فماندانه‌و پیرۆزه‌ له‌ دیرۆکی به‌رگری و به‌رخودان به‌ ئه‌نجام ده‌گات، به‌و میتۆده‌ ده‌توانین به‌ره‌و سه‌ربه‌خۆیی هه‌نگاوبنێین و وه‌رچه‌رخانی مێژوویی له‌ دیرۆکی به‌رخودانی کوردان تۆمار ده‌که‌ین، له‌و ڕه‌هه‌نده‌وه‌ چه‌مکێکی نوێی خه‌بات له‌ ڕۆژه‌ڤی سیاسی کورد دێته‌ ئاراوه‌، چونکه‌ سه‌رجه‌م ڕژیمه‌ یه‌ک له‌ دوای یه‌که‌کانی عێراق له‌ هه‌موو کات و ساته‌کان و به‌ کاربه‌ده‌ستانی ئه‌مڕۆی عێراقی نوێ، جگه‌ له‌ چه‌وسانه‌وه‌و سته‌م و داگیرکاری و بیرکردنه‌وه‌یه‌کی شۆڤینیانه‌ له‌مه‌ڕ کێشه‌ی ڕه‌وای گه‌له‌که‌مان، هیچیان په‌یامی ئاشتی و ئاوه‌دانی و خۆشگوزه‌رانی و برایه‌تی و ته‌بایی و پێکه‌وه ‌ژیان نه‌کرده‌ ئامانج و چه‌مکێکی نوێی کار و خه‌بات، ئه‌و سیناریۆیه‌ی ئه‌م دواییه‌ی به‌ ناوی چه‌ته‌کانی داعش، جگه‌ له‌ تیرۆرو ئاژاوه‌گێری و تێکدانی ئارامی و ئاسایشی کوردستان، هیج په‌یامێکی تریان پێ نیه‌! بۆیه‌ پێویسته‌ کوردستانیان به‌ لۆژیکێکی ژیرانه‌ و ئیڕاده‌یه‌کی به‌تین و پۆلایین به‌ره‌نگاریان ببنه‌وه‌، به‌ گوێره‌ی قۆناغه‌کانی سه‌رده‌م سیاسه‌ت و ڕۆژه‌ڤی حکومڕانی له‌ کوردستان گۆڕانکاری تێدا بکرێت و له‌ نوێبوونه‌وه‌ی به‌رده‌وام دابێت، له‌ ئاست و به‌هاو خواست و ئامانجه‌ نه‌ته‌وه‌ییه‌کان بێت، با ئه‌و هه‌له‌ زێڕینه‌ بکه‌ینه‌ هه‌وێنی سه‌ربه‌خۆیی یه‌کجاره‌کی له‌ باشووری کوردستان، دروشمی برایه‌تی و ته‌بایی و پێکه‌وه‌ژیان، ببێته‌ دانه‌ری به‌ردی بناغه‌ی ووڵاتی کوردان، له‌ دیدگای یه‌ک هه‌ڵوێستی و یه‌ک تیمی و یه‌ک گوتاری‌ ده‌بین به‌ قه‌ڵغانێکی پته‌و بۆ داکۆکی و به‌رگری و پارێزگاری، له‌ تیرۆرو جه‌ورو سته‌م و کاوڵکاری، به‌و شێوازه‌ کوردستان ده‌بێته‌ ووڵاتێکی نوێ و له‌سه‌ر نه‌خشه‌ی جیهان، به‌ هه‌وڵ و کۆششی پێشمه‌رگه‌ و سه‌رجه‌م چین و توێژه‌کان کوردستان ده‌گاته‌ که‌ناری ئارامی و ئۆقره‌یی و ووڵاتێکی ئاوه‌دان و خۆشگوزه‌رانیش بۆ هه‌مووان، شکۆمه‌ندی بۆ سه‌روه‌رانی گه‌ل و نیشتمان..

م.عه‌ونی خۆشناو

هۆڵه‌ندا / لاهای

 

 

 

 

 

 

  هۆکاری نه‌بوونی به‌رنامه‌و پلانێکی تۆکمه‌ی ئابووری و په‌یڕه‌ونه‌کردنی شه‌فافیه‌ت له‌ چۆنیه‌تی دابه‌شکردنی داهاتی هه‌رێم، ده‌رفه‌تێک ڕه‌خساوه‌ بۆ گه‌نده‌ڵیه‌کی بێ سنوور، بۆته‌ ته‌خشان و په‌خشانکردنی بودجه‌ی هه‌رێم که‌ سامانێکی نه‌ته‌وه‌یی و نیشتمانیه‌، ئه‌م بی به‌رنامه‌یی و بێ سه‌روبه‌رییه‌ی ئابووری کوردستان، ته‌نگژه‌ وقه‌یرانی ئابووری و هه‌ڵاوسانی بازاڕی په‌یداکردووه‌، گوزه‌رانی چینی هه‌ژاری به‌ره‌و خراپی و ئاستێکی زۆر نزم بردووه‌، چینێکیش به‌ره‌و که‌شکه‌لانی فه‌له‌ک!!

  له‌ ماوه‌ی دوو ده‌یه‌ی حوکمڕانی هه‌رێم که‌رته‌کانی کشتوکال و پیشه‌سازی و    گه‌شت و گوزار پشتگوێ و په‌ڕاوێز خراون، باج و ده‌رامه‌ت ڕێکنه‌خراون، داهاتی گومرگه‌کان ژێر زه‌مین خراون، ته‌نهاو ته‌نها گرنگی به‌ که‌رتی نه‌وت و سامانه‌ سروشتیه‌کان دراون، ئه‌ویش گربه‌سته‌کان له‌ ژووره‌ تاریکه‌کان واژۆکراون، پێنج ملیار دۆلاری گرێبه‌ستی شیرینی دیارنه‌ماون!! ئه‌و سامانه‌ نه‌ته‌وه‌ییه‌ له‌ جیاتی خۆشگوزه‌رانی، بۆته‌ هۆکارێک بۆ برسیکردنی خه‌ڵک و گلدانه‌وه‌ی بودجه‌ی هه‌رێم له‌لایه‌ن حکومه‌تی ناوه‌ندییه‌وه‌.

  ده‌ستپێکی قووڵبوونه‌وه‌ی کێشه‌کانی نێوان هه‌رێمی کوردستان و به‌غدا، له‌وه‌وه‌ سه‌رچاوه‌ی گرت، کاتێک ئه‌نجوومه‌نی وه‌زیرانی حکومه‌تی عێراقی فیدراڵ پرۆژه‌ یاسای بودجه‌ی به‌بێ ڕه‌زامه‌ندی کورد په‌سندکرد و ڕه‌وانه‌ی ئه‌نجوومه‌نی نوێنه‌رانی کرد، پڕۆژه‌ یاساکه‌ بڕگه‌یه‌ک له‌ خۆ ده‌گرێت، که‌ هه‌رێمی کوردستان ناچار ده‌کات ڕۆژانه‌ 400 چوار سه‌د هه‌زار به‌رمیل نه‌وت له‌ ڕێگه‌ی کۆمپانیای نیشتمانی به‌ بازاڕه‌کانی نه‌وتی عێراق   ( سۆمۆ ) هه‌نارده‌ بکات و داهاته‌که‌ی بچێته‌ خه‌زێنه‌ی حکومه‌تی به‌غدا، ئه‌گه‌ر ئه‌وه‌ نه‌چووه‌ بواری جیبه‌جێ کردن، ئه‌وا حکومه‌تی به‌غدا بڕی داهاتی نه‌وتی هه‌نارده‌که‌ی هه‌رێم له‌ پشکی 17% ی هه‌رێمی کوردستان له‌ بودجه‌ی فیدراڵی ده‌بڕێت، ئه‌و ڕێکه‌وتنه‌ هه‌ردوو به‌ڕێزان ( د. ڕۆژ نوری شاوێس ) جێگری سه‌رۆک وه‌زیران و ( هوشیار زێباری ) وه‌زیری ده‌ره‌وه‌ی حکومه‌تی فیدراڵی عێراق واژۆیان کردووه‌، که‌ هه‌ردووکیان له‌سه‌ر پشکی پارتی دانراون و ئه‌ندامی مه‌کته‌بی سیاسی پارتی دیموکراتی کوردستانن. دواجار هه‌رێمی کوردستان نه‌چووه‌ ژێرباری ئه‌و مه‌رجه‌ی به‌غدا، له‌ به‌رامبه‌ردا مالیکی و شه‌هرستانی و به‌ هاوکاری و پشتیوانی زۆرینه‌ی ڕه‌های شه‌قامی عه‌ره‌بی مووچه‌ی فه‌رمانبه‌رانی هه‌رێمی کوردستانی بڕی!! ئایا ئه‌و هه‌ڤاڵانه‌ی که‌ له‌سه‌ره‌وه‌ ناویان هاتووه ئایا‌ هه‌ڤاڵی یه‌کێتین؟! یاخود هه‌ڤاڵانی یه‌کێتی له‌ پای کام ده‌ستکه‌وت ئه‌و پێشنیاره‌یان بۆ مالیکی کردووه‌؟ ئه‌گه‌ر ئه‌و به‌ڵگه‌یه‌ له‌به‌رده‌سته‌ بۆچی سکاڵا له‌سه‌ر ئه‌و دوو سه‌رکرده‌ی یه‌کێتی تۆمار ناکرێت؟ دیاره‌ هه‌وڵ و کۆششی یه‌کێتی له‌ پێناوی ڕه‌خساندنی ژینگه‌یه‌کی له‌ باره‌ بۆ سیسته‌می ئابووریه‌کی هاوچه‌رخ، به‌جۆرێک که‌ به‌ یاسا ڕێکبخرێت، نه‌وه‌ک کۆسپ و ته‌نگژه‌ دروست بکات، بۆ په‌کخستنی ئابووری کوردستان له‌ ڕێگه‌ی نه‌یارانی کورده‌وه‌!!

  فشاره‌کانی مالیکی بۆ سه‌ر هه‌رێمی کوردستان، له‌و ڕه‌هه‌نده‌وه‌ سه‌رچاوه‌ی گرتووه‌، که‌ حکومه‌تی هه‌رێمی کوردستان پابه‌ند نه‌بووه‌ به‌ بڕیاره‌کانی ئه‌نجوومه‌نی     وه‌زیرانی حکومه‌تی عێراقی فیدڕاڵ، وه‌ له‌ هه‌مانکاتدا شه‌قامی عه‌ره‌بی و ناسیۆنالیستی عه‌ره‌بی له‌گه‌ل ئه‌وه‌ نین کوردستان خاوه‌نی ئابووری سه‌ربه‌خۆی خۆی بێت، چاوه‌ڕێی ئه‌وه‌ نین که‌ سه‌رکرده‌کانی یه‌کێتی پێشنیاریان بۆ بکه‌ن، به‌ چ شێوازێک په‌یوه‌ندی و      هه‌‌ڵس و که‌وت له‌گه‌ل حکومه‌تی هه‌رێمی کوردستان بکه‌ن، هه‌ر له‌ کات و ساتی بڕینی مووچه‌ی فه‌رمانبه‌رانی هه‌رێم ئه‌نجوومه‌نی نوێنه‌ران لیژنه‌یه‌کی پێکهێنا، له‌ پێناو چاره‌سه‌رکردنی قه‌یرانه‌کان نێوان هه‌رێم و به‌غدا، دوای نه‌گه‌یشتن به‌ هیج ئه‌نجامێک به‌ڕێز ( حه‌یده‌ر عبادی ) که‌ ئه‌و کات په‌رله‌مانتار بوو ڕایگه‌یاند ناکۆکیمان له‌گه‌ل لیستی هاوپه‌یمانی کوردستان له‌وه ‌دایه‌، که‌ ئه‌وان ئاماده‌نین داهاتی نه‌وتی هه‌رێمی کوردستان بێته‌ خه‌زینه‌ی به‌غدا و به‌سه‌ر پارێزگاکاندا دابه‌ش بکرێت، ئه‌وه‌ خێره‌ دوای ده‌ستبه‌کاربوونی وه‌ک سه‌رۆکی ئه‌نجوومه‌نی وه‌زیران، به‌ گوێره‌ی ئه‌و سه‌رچاوه‌ نادیاره‌ی باس نیوزی سه‌ربه‌ده‌زگای پاراستنی پارتی، عه‌بادی ئه‌و نهێنییه‌ له‌ کۆبوونه‌وه‌یه‌کی له‌ گردی زه‌رگه‌ته‌ مه‌کۆی سه‌ره‌کی بزووتنه‌وه‌ی گۆران له‌ سلێمانی لای کاک نه‌وشیروان ده‌درکێنی!! بۆچی ئه‌و بابه‌ته‌ی له‌ کۆبوونه‌وه‌ی له‌گه‌ل مه‌کته‌بی سیاسی نه‌درکاندووه‌، که‌ داوای گه‌ڕانه‌وه‌ی مووچه‌ی بڕاوی فه‌رمانبه‌رانی هه‌رێمیان کردووه‌؟! بۆچی ته‌نها لای کاک نه‌وشیروان باسی کردووه‌؟! ئه‌و ماسته‌ گوریسێکی تێدایه‌، نه‌وه‌ک تاڵه‌ موویه‌ک! هه‌ر کاتێک خه‌ڵکانی ئاسایی قسه‌یه‌ک یاخو شرۆڤه‌یه‌ک بۆ هه‌ر کێشه‌و گرفت و بابه‌تێک بکه‌ن، خوێندنه‌وه‌ی بۆ ناکرێت، به‌ڵام که‌سانیک که‌ له‌ نێوه‌ندی بریاری سیاسی بن، ده‌بێت بزانیت چۆن و به‌ چ شێوه‌یه‌ک ئاخافتن ده‌کات و چی ده‌ڵی، چونکه‌ هه‌موو گفت و بریار و ڕفتاره‌کانیان لێکدانه‌وه‌ی وردی بۆ ده‌کرێت . . یه‌کێتییه‌ک که‌ له‌ پێناوی ڕزگاری کوردستان و فراوانکردنی پا‌نتایی ئازادی و ژینگه‌یه‌کی دیموکراسی و ئاشتی و ئاوه‌دانی و خۆشگوزه‌رانی هاووڵاتیان تیکۆشابێ و ده‌ریایه‌ک خوێنی له‌و پێناوه‌دا به‌خشیبێ، چۆن پێشنیارێک ده‌کات، که‌ هاونیشتمانیانی تێدا زه‌ره‌رمه‌ند بن؟!

  ئایدیا و تێڕوانینی یه‌کێتی بۆ کۆمه‌لانی خه‌ڵکی کوردستان له‌وه‌ سه‌رچاوه‌ی گرتووه‌، که‌ کۆمه‌لانی خه‌لکی کوردستان ئه‌و چه‌پکه‌ گوڵه‌ن و یه‌کێتی ئه‌و ده‌سته‌یه‌ که‌ پارێزگارییان لێ ده‌کات، که‌ سه‌ر‌جه‌م دانیشتووانی کوردستان شاهیدی ئه‌و ڕاستیه‌ن، که‌ چۆن به‌ خوێنی گه‌شی پێشمه‌رگه‌ و فه‌رمانده‌کانی تاجی سه‌رکه‌وتنیان له‌سه‌رنا و پارێزگارییان له‌ گه‌ل و نیشتمان کرد، ئه‌گه‌ر هێزێک ئه‌وه‌ ڕێبازه‌که‌ی بێت، چۆن هه‌وڵی برسیکردن و زه‌لیلی هاونیشتمانیانی ده‌دات به‌ده‌ستی نه‌یارانی کورد؟!

  هه‌رکه‌سێک له‌هه‌ر پله‌و پایه‌ک دابێت، ئه‌و کاره‌ چه‌په‌ڵه‌ی ئه‌نجام دابێ، ده‌بێ لێپێچینه‌وه‌ی له‌گه‌لدا بکرێت و به‌ تۆمه‌تی خیانه‌تی نیشتمانی ده‌بێ به‌ توندترین شێوه‌ سزا بدرێت.

  هه‌رکه‌سێک هۆکار بێت بۆ قیرانی ئابووری هه‌رێمی کوردستان لێپێچینه‌وه‌ی له‌گه‌ل بکرێت و دوور بخرێته‌وه‌ له‌ ده‌سته‌ڵاتداری و فه‌رمانڕه‌وایی!!

  هه‌رکه‌س و لایه‌نێک هه‌وڵی له‌که‌دارکردنی مێژووی یه‌کێتی بدات و تۆمه‌تی بێ بنه‌ماو بێ به‌ڵگه‌ ببه‌خشێته‌وه‌، ئه‌مه‌ش خیانه‌ته‌ له‌ خوێنی شه‌هیدان، خیانه‌ته‌ له‌ پێشمه‌رگه‌کانی که‌م ئه‌ندامانی سه‌نگه‌ر که‌ به‌شێک له‌ جه‌سته‌ی خۆیان به‌خشیوه‌، خیانه‌ته‌ له‌ پێشمه‌رگه‌ دێرینه‌کان که‌ ته‌مه‌نی لاویه‌تی خۆیان به‌ کوردستان به‌خشی، خیانه‌ته‌ له ئه‌شکه‌نجه‌دان و ئێش و ئازاری‌ زیندانییه‌ سیاسییه‌کان، که‌ بێباکانه‌ ده‌چوونه‌ به‌رده‌م په‌تی سێداره‌، خیانه‌ته‌ له‌ شه‌ونخونی ڕێکخستنه‌ دێرینه‌کان که‌ هه‌میشه‌ له‌ژێر هه‌ڕه‌شه‌ی مه‌رگ بوون!!.

  بۆیه‌ تاکو زووه‌ پاڕێزه‌رانی یه‌کێتی ڕێکاره‌ یاساییه‌کان بگرنه‌ به‌رو بۆ ڕاستی و دروستی هه‌وڵه‌که‌ یاخود تۆ‌مه‌تبارکردنی یه‌کێتی، به‌ هۆکاری ناوزڕاندنی یه‌کێتی سکاڵا له‌سه‌ر به‌ڕێزان نه‌وشیروان مسته‌فا ڕێکخه‌ری گشتی بزووتنه‌وه‌ی گۆڕان و حه‌یده‌ر عبادی سه‌رۆک وه‌زیرانی حکومه‌تی عێراق و نێچیروان بارزانی سه‌رۆک وه‌زیرانی حکومه‌تی هه‌رێم و ڕاگه‌یاندکارانی باسنیوزی سه‌ر به‌ده‌زگای پاراستنی پارتی که‌ ئه‌و هه‌واڵه‌یان بڵاوکردۆته‌وه‌، تۆمار بکه‌ن، هه‌ر به‌ڵگه‌یه‌کی فه‌رمی له‌سه‌ر هه‌ر سه‌رکرده‌یه‌کی یه‌کێتی ده‌ستکه‌وت، ئه‌وه‌ به‌توندترین شێوه‌ سزا بدرێت و له‌ ریزه‌کانی یه‌کێتی ده‌ربکرێت، چونکه‌ یه‌کێتیبوون له‌ هه‌مووان گه‌وره‌تر و پیرۆزتره‌ و شانازیبوونه‌ به‌و خه‌رمانه‌ خه‌باته‌ ده‌وڵه‌مه‌نده‌، وه‌ به‌ پێچه‌وانه‌وه‌ ئه‌گه‌ر تۆمه‌ت به‌خشین بن بۆ یه‌کێتی ده‌بێ ئه‌و به‌ڕێزانه‌ به‌ فه‌رمی داوای لێبوردن له‌ خانه‌واده‌ی شه‌هیدان و که‌م ئه‌ندامانی سه‌نگه‌ر و پێشمه‌رگه‌ دێرینه‌کان و دۆست و هه‌وادارنی یه‌کێتی بکه‌ن، چونکه‌ هه‌رکاتێک کێرڤی جه‌ماوه‌ری یه‌کێتی به‌ره‌و هه‌ڵکشان بچێت، هه‌وڵی هۆنینه‌وه‌ی تۆمه‌تێک بۆ یه‌کێتی ده‌ده‌ن، بۆیه‌ له‌ جیاتی به‌یاننامه‌و ڕاگه‌یاندکاری تاکو زووه‌ ڕێکاره‌ یاساییه‌کان بگرنه‌ به‌ر، چاوه‌ڕێی هه‌وڵ و کۆششتانین. .

 

م. عه‌ونی خۆشناو

هۆڵه‌ندا / لاهای

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

 

 

 

چه‌مکی ئازادی له‌ بنه‌ڕه‌تدا چه‌مکێکی فه‌لسه‌فیه‌، به‌ میتۆدی ئه‌وه‌ی هیچ شتێک ڕێگر نه‌بێت، له‌به‌رده‌م ئیراده‌ی تاکدا بۆ گه‌یشتن به‌ ئامانجه‌کان، به‌ مه‌رجێک له‌گه‌ڵ ئازادی گشتی به‌ریه‌ک نه‌که‌ون، له‌و ڕه‌هه‌نده‌وه‌ به‌ واتای ئازادبوونی ڕه‌ها نایه‌ت، له‌به‌رئه‌وه‌ی ئازادی و مافی ئازادی ڕاده‌ڕبڕین مافێکی سه‌ره‌تایی تاکه‌، ناکرێ له‌لایه‌ن هیچ که‌س و گروپ و هێزێک ئه‌و مافه‌ پێشێل و زه‌وت بکرێت، چونکه‌ نرخ و گرنگی و به‌هاو زیندوویه‌تی ئه‌و مافه‌ کاریگه‌ره‌، به‌سه‌ر گه‌شه‌پێدان و پێگه‌یاندنی کۆمه‌ڵگایه‌کی مرۆڤدۆست و یه‌کسان و دیموکراسی، هه‌ربۆیه‌ ململانێی حزبایه‌تی نابێت ببێته‌ ڕێگر بۆ پانتاییه‌ ئازادییه‌کان.

ئه‌گه‌ر کوردستان سیسته‌مێکی دیموکراسیه‌، که‌ زۆرێک له‌ به‌رپرسانی کوردستان شانازی به‌ ئازادی و ئازادی ڕاده‌ربڕین و کاری ڕۆژنامه‌گه‌ری ده‌که‌ن، ده‌بێت سازان و پێکه‌وه‌ هه‌ڵکردن و پێکه‌وه‌ژیان و ده‌رفه‌تی وه‌ک یه‌ک و یه‌کسان بۆ هاوڵاتی و هاونیشتمانیان بڕه‌خسێت، نابێ هێزێکی سیاسی له‌ پێناوی به‌رژه‌وه‌ندی و ده‌ستکه‌وته‌ حزبیه‌کان دروشمه‌کانی ئاشتی و ئازادی و دیموکراسی بێت و له ‌لایه‌کی تر ترس و تۆقاندن و ده‌نگه‌ ئازاده‌کان کپ و خامۆش بکات، باره‌گای میدیایی و ڕێکخراوه‌یی ڕێگا پێدراو قه‌ده‌غه‌ و یاساغ بکات!! هێرش و په‌لا‌ماری هێزه‌کانی پارتی بۆ سه‌ر باره‌گاکانی پارتی چاره‌سه‌ر، که‌ پێکهاتوون له‌ ده‌زگای مێدیایی و ڕێکخراوی مه‌ده‌نی و بیرۆی کۆنگره‌ی نه‌ته‌وه‌یی کورد داخست و چالاکوانه‌کانیانی ده‌ستبه‌سه‌رکرد، گرتن و ترس و تۆقاندن بۆ ئه‌ندام و دۆست و هه‌وادارانی پارتی چاره‌سه‌ر به‌رده‌وامه‌!!

به‌و ڕه‌هه‌نده‌ ڕفتارکردن له‌گه‌ل هێزه‌ نیشتمانیه‌کان و هاونیشتمانیان کارێکی قێزه‌ونه‌، هیچ ماناو به‌هایه‌ک بۆ ئازادی ناهێڵێته‌وه‌، بۆیه‌ پێویسته‌ هه‌موو ئازادیخوازان ئیدانه‌ی ئه‌و پێشێلکاریه‌ ئاشکرایه‌ی هێزه‌کانی پارتی بکه‌ن، ئه‌رکی په‌رله‌مانی کوردستانه‌ سنورێک بۆ ئه‌و پێشێلکاریانه‌ دابنێت و یاسایه‌ک ده‌ربکات، بۆ هیچ هێزو لایه‌نێکی سیاسی نه‌بێت، به‌ ویست و ئیراده‌ی خۆی مافی ئازادی ڕاده‌ربڕین له‌ تاک و مێدیا و ڕێکخراوه‌کان قه‌ده‌غه‌ بکات، چونکه‌ هه‌ر بڕیارێک بۆ سنوردارکردنی ئازادییه‌کان، ئه‌م ئه‌زموونه‌ی هه‌رێمی کوردستان، که‌ به‌ خوێنی سه‌دان هه‌زار شه‌هید هاتۆته‌ کایه‌وه‌، ده‌که‌وێته‌ ژێر پرسیار، که‌ ئاشتی و دیموکراسی و پێکه‌وه‌ژیانی کردۆته‌ دروشم، چونکه‌ ئازادی و ئازادی ڕاده‌ڕبڕین خێرو سه‌ده‌قه‌و دیاری نیه‌، که‌ هێزێک به‌ ئاره‌زووی خۆی به‌ هێزێکی تر ببه‌خشێت..

پرسیارێک بۆ هه‌ڤاڵانی پارتی ئایا ڕای جیاواز و ئایدیای جیاواز، به‌ پێشێلکاری به‌رامبه‌ر ده‌کرێت و بنه‌و باره‌گاکانیان داده‌خرێن و چالاکوانه‌کانیان ده‌ستبه‌سه‌ر ده‌کرێن؟؟ یاخود به‌هۆی لۆژیکی دیالۆک و لێکتێگه‌یشتن جیاوازیه‌کان که‌م ده‌که‌نه‌وه‌، هه‌وڵی چاره‌سه‌رکردنی کێشه‌و ناکۆکیه‌کان ده‌ده‌ن؟! چونکه‌ فره‌حزبی و ڕای جۆراوجۆر و ئایدیای جیاواز نه‌بێت، کێشه‌کان چاره‌سه‌ر نابن و کۆمه‌ڵگاش پێش ناکه‌وێت....!

ئه‌وه‌ی جێگای هه‌ڵوێسته‌ له‌سه‌رکردنه‌، له‌ ئه‌نجامی ڕێکه‌وتنی ژووره‌ تاریکه‌کانی هه‌ندێک له‌ لایه‌نه‌ سیاسیه‌کان و تامه‌زرۆی دابه‌شکردنی کێکی ده‌سته‌ڵات،چاویان داخراوه‌ و گوێچکه‌یان که‌ڕ و زمانیان لاڵ بووه‌، چالاکوان و ڕێکخراوه‌کانی کۆمه‌ڵگای مه‌ده‌نی و مێدیاکاران و ڕۆژنامه‌نوسانی به‌ ناو سه‌ربه‌خۆ نوزه‌یان لێوه‌ نایه‌ت....!! نازانم بۆچی بۆ پشتیوانی و هاوکاری هاوپیشه‌کانیان ئیدانه‌ی ئه‌و هێرشه‌ ناڕه‌وایه‌ ناکه‌ن؟! یاخود کارو چالاکی ئه‌وانیش بانێکه‌ و دوو هه‌وا!!

دوا په‌یام بۆ گشت هێز لایه‌نه‌ سیاسیه‌کانی کوردستان، تاکه‌ ڕێگا چاره‌ له‌ پێناوی گه‌یشتن به‌ ئامانجه‌کان و چاره‌سه‌رکردنی کێشه‌کان، دانیشتن و دیالۆگ و لێکتێگه‌یشتنه‌، نه‌وه‌ک ناوزڕاندن و لێدوانی نابه‌رپرسانه ‌و هێرش و تۆمه‌تبارکردنی یه‌کتر به‌ پیلانی داگیرکه‌ران!! با به‌هه‌موومان کوردستان بکه‌ینه‌ سه‌کۆیه‌کی ئازاد و وڵات به‌ره‌و که‌ناری ئارامی و ئۆقره‌یی  ئاوه‌دانی و خۆشگوزه‌رانی به‌رین..

                                                   م.عه‌ونی خۆشناو

                                                     هۆڵه‌ندا/ لاهای

 

Go to top