We have 50 guests and no members online

حەمە غەفور

دوای عەسری ڕۆژی ٦ئازاری٩٩١ ماڵئاواییم لە ئەستێرە کردو بە سەفتەیەکی گەورەی بەیاننامەی ڕەوتی کۆمۆنیستەوە کە بۆ ڕاپەڕین نووسرابوو، بە ڕیمێکی کورتی هەوارەبەرزە بەرەو ناوبازاڕی سلێمانی بەڕیکەوتم. تەجروبەی خەباتی نهێنی‌و فەنتاسیای پووچەڵکردنەوەی دارودەستەی سەرکوتی ڕژێمی بەعس فێری کردبووم، کام ڕێ‌وشوێن بگرمەپێش لەکاتی جووڵەو گواستنەوەکانم بەنێو شارو دەرەوەی شاریشدا. بۆیە لە نزیک دەرگاکەوە جێگامگرت. ڕیمەکە جمەی ئەهات لە نەفەرو دەرگاکەی بە زەحمەت داخرابوو. شاری سلێمانی خۆی بۆ ڕاپەڕین‌و وەشاندنی گورز لە دەزگا جاسوسی‌و سەرکوتگەرەکانی ڕژێم ئامادەکردبوو. ئێمە وەکو ڕەوتی کۆمۆنیست بەئامادەگییەکی تەواوەوە خۆمان بۆ ڕووبەڕووبوونەوە تەیارکردبوو. لە فەرعی بەردەم شارەوانی کۆن لە بەری ڕۆژئاوای فولکەی سجنی گەورە بەئاراستەی جادەی قەنات، کە خوار بووینەوە، دەستبەجێ بینیمان مەفرەزەکانی تەواری‌و قواتخاسە سەیتەرەیان داناوە، هاوارمکرد کاکی سایەق ڕایگرە بێزەحمەت من فیرارم دەبێ دابەزم. هەم شۆفێرو هەم خەڵکەکە بە ئەوپەڕی بەتەنگەوەبوونەوە لە چەند چرکەیەکدا یەکیانگرت‌و هەموویان لەگەڵ سەرنجی هەموو چاوەکانیاندا ڕێگایان بۆ چۆڵکردم تا دابەزیم. ووتیان ئاگاداری خۆت بە کاکە! ووتم خەمتان نەبێت زۆریان نەماوە ئەم دڕندانە.

من بە ووریاییەکی باڵاوە بەنێو کۆڵانەکانی گەڕەکدا خۆم گەیاندە دیوی ئەودیوی خەستەخانەی جامعەکە، بینیم مەفرەزەکانی پۆلیس‌و تەواری کە مفوەز شەماڵ سەرپەرشتی ئەکردن گەڕەکەکانی پشتی مزگەوتی گەورەو تا بگاتەوە بە حامییەکە هەموویان کۆنتڕۆڵکردووەو خەریکی پشکنینی ماڵەکانن. بۆیە من ئەبوایە خۆم بگەیەنمە مامۆستایان‌و بەنێو گەڕەکی دورلئەمندا خۆم بگەیەنمە ڕزگاری‌و دوای زەحمەتێکی زۆر تاریک‌و لێڵی ئێوارە گەییشتمە ماڵی هاوڕێکەم لە شیخ‌محێدین. خۆی‌و هاوسەری چاوەڕێی منیان ئەکرد. پرسیان "شەماڵ" چۆن توانیت بگەیتە ئێرە!؟ ناوشار هەمووی کۆنتڕۆڵ کراوە! هەر خۆشیان وەڵامیان دایەوە. چونکە دەیان حاڵەتی ترسناکی لەوجۆرەمان تێپەڕاندبوو. ووتم؛ گرنگ ئەوەیە ئێستا گەییشتووم.

بەدەم نانخواردنەوە بەرنامەکاری شەومان تاووتوێ کرد. درەنگانێک لە ماڵی هاوڕێیەکی دیکەمان هەر لە شێخ‌محێدین کۆبووینەوە. نزیک بە ١٠ کەس لە سەرەک شانەو سەرۆک ڕێکخستنەکانی ڕەوتی کۆمۆنیست لە خوارووی سلێمانی ئامادەبوون. باس‌و گفتگۆی ووردمان کردو کارەکانمان دابەشکرد بەسەر چەند تیمێکی تایبەتدا کە هەر تیمە گەڕەکێک‌و ناوچەیەکمان بۆی دەستنیشانکردبوو. بۆ نووسینی دروشم‌و هەڵواسینی پۆستەرو بڵاوکردنەوەی بەیاننامەو نامیلکەکانی ڕەوتی کۆمۆنیست تایبەت بە ڕاپەڕینی جەماوەر لە دژی ڕژێم. ئەم چالاکییە کارێکی سووک‌و ئاسان نەبوو. لە هاوینی ساڵی ٩٨٩وە کە ڕژێم دەستی وەشاندبوو لە ڕێکخستنەکانی ڕەوتی کۆمۆنیست‌و ڕێکخراوە کۆمۆنیستییەکانی دیکەش، دەیان کەسی لێیان دەستگیرو زیندانی کردبوو، تاکتیکی ڕەوتی کۆمۆنیست بۆ شپرزەکردنی وورەی هێزە سەرکوتگەرەکانی ڕژێم، لەلایەک، وە لەولای تروە بۆ بەرزکردنەوەی وورەی شۆڕشگێڕانەی خەڵکی شارەکانی کوردستان بەرانبەر بە جموجووڵە سەربازی‌و سەرکوتگەرییەکانی ڕژێم، بریتی بوو لە داپۆشینی شارەکان لە سەعاتێکی دیاریکراودا بە نووسینی دروشمی دژی ڕژێم‌ بە زمانی کوردی‌و عەرەبی، هەڵواسینی پۆستەری شۆڕشگێڕانەو سەرنجڕاکێش، بڵاوکردنەوەی بەیاننامەو نامیلکەی سیاسی‌و تەبلیغیی ڕەوتی کۆمۆنیست. ناوە ناوە، مانگی جارێک یان دوو جار ئەم چالاکیانە دووبارە ئەکرانەوە. ئەم چالاکیانە شارەکانی سلێمانی، هەولێرو کەرکوک‌و هەندێ شارو شارۆچکەی دیکەشی ئەگرتەوە چەشنی کەلارو دوزخورماتوو. کاری پۆلیس‌و تەواری‌و هێزە تایبەتەکانی تر‌و شارەوانییەکان، ئەتوانرێ بووترێ بە تەواوی گۆڕابوو بۆ کوژاندنەوەی دروشمەکانی سەر دیوارەکان‌و لێکردنەوەی پۆسترو بەیاننامەکانی ئێمە. شەوی ٧ی ئازار ڕێکخستنەکانی خوارووی سلێمانی تەواوی شێخ‌محێدین‌و قالاواو ڕزگاری‌و چوارباخ‌و چەندین گەڕەکی دیکەشمان بە دەنگ‌و ڕەنگی شۆڕشگێرانەو دژە ڕژێم داپۆشی‌. لە زۆربەی گەڕەکەکانی دیکەی شاریش هەمان چالاکی ئەنجامدرابوو. دەمەو بەیانی خۆپیشاندان‌و دەنگی تەقە لە نزیک فولکەی دەستهاڕەکەوە بانگەوازی تەواوی خەڵکی سلێمانیان کرد بۆ ڕاپەڕین‌و هێرشبردن بۆ سەر دام‌و دەزگاکانی ڕژێم. تارماییەکی شۆڕشگێڕانە بەسەر ئاسمانی سلێمانیدا ئەهات‌و ئەچوو! ڕژێم‌و دارودەستەی تەواری‌و هێزە تایبەتەکانی تۆقیبوون‌و لەچاوی گەورەو بچوکی سلێمانیدا چارەنووسی ڕەشی خۆیانیان ئەخوێندەوە. ئینسان هەر چەند ڕۆژ پێش لە ٧ی ئازار هەستی بە تێکشکاویی‌و دامویی ڕژێم‌و پیاوانی ئەکرد.

لە ماوەی چەند سەعاتێکدا هەموو ناوەندەکانی دەسەڵاتی ڕژێم لەلایەن خەڵکی شارەوە گیران‌و تێکشکان. تەنیا ئەمنە سوورەکە مابوو بە دەستیانەوە، ویستیان لەوێوە بەرگرییەک سازمانبدەن. بەڵام کار لەکار ترازابوو. دوایین ساتەکانی لەزەویدانی ڕەشترین‌و هارترین ڕژێمی شۆڤێنی ناوچەکەو جیهانیش بوو لە شاری سلێمانی. ٨ی ئازار ئەمنە سوورەکەش گیراو ئاسەواری ڕژێمی بەعس بۆ هەمیشە بەسەر شان‌و ویژدانی خەڵکی سلێمانی‌و ناوچەکانی دەوروبەرییەوە پاککرایەوە. ئێمە وەکو ڕەوتی کۆمۆنیست لە ڕیکخستنەکانی خواروی سلێمانی، ئێوارەی ٨ی ئازارو تا درەنگانێکی شەوی ئەو ڕۆژە سەرقاڵی خۆئامادەکردن بووین بۆ پێکهێنانی شورای گەڕەکی شیخ‌‌محێدین. سبەی سەر لەبەیانی زوو چووینە بینایەی قوتابخانەی شێخ‌محیدینی سەرەتایی‌و بانگەوازی خەڵکمان کرد لەو قوتابخانەیە ئامادەبن بۆ پێکهێنانی شورای گەڕەکەکانی خواروی سلێمانی. لەماوەیەکی کەمدا قوتابخانەکە جمەی ئەهات لە خەڵک‌و من خۆم لەنێو ئاپۆڕەی ژن‌و پیاوی دانیشتوی ئەو گەڕەکانەدا بینییەوە. ئیتر چووین بەلای سەروکاری پێکهێنانی شورای گەڕەکەوەو بەکردەوە چەندین ژن‌و پیاو خۆیان پاڵاوت بۆ شورای گەڕەک‌و بە دەنگانی راستەخۆ هەڵبژێردران، دوای ئەوەی روونکردنەوەی خۆمان پێشکەشی خەڵکەکە کرد سەبارەت بە شوراو سوننەت‌و شێوەکاری شورایی‌و چۆنێتی ئەنجامدانی کۆبوونەوە گشتییەکان هەرکات کە زۆربەی هاوڵاتیان بیانویستایە بۆ لێپرسینەوە لە چۆنێتی چوونەپێشی کارەکانی شوراو ئەندامەکانی. وە چۆنێتی کارو پرۆگرامەکانی دواتریان.

لە زۆربەی گەڕەکەکانی تری شارەوە هەمان ئاکاری جەماوەری بەرپاکرابوو، شورای گەڕەکەکانی شارو ناوەندەکان پێکهاتبوون. بزووتنەوەی شورایی کوردستان، دواتر گوازرایەوە بۆ کەرکوک‌و هەولێرو شارۆچکەکانی تریش.

 

وەکو کۆمۆنیستێک‌و هەڵسووراوێکی شوراکانی سلێمانی، من بە ئەمانەتەوە دوای ٢٣ ساڵ ئەم ڕاستیانەی ٣ ڕۆژی یەکەمی ڕاپەڕینی خەڵکی شاری سلێمانی لە ساڵیادی شوراکانی کوردستاندا ئەنووسمەوە. جێگای شانازییە بۆ خۆم‌و تەواوی ئەو هاوڕێیانەی ڕۆڵیان بینی لە سەرخستنی کارو پڕۆژە سیاسییەکانی ئەوسای ڕەوتی کۆمۆنیستدا. ڕێکخراوە کۆمۆنیستییەکان‌، کە دواتر شوراکان‌و بزووتنەوەی شوورایی کوردستانیان بەرپاکردو سازمانیان دان، مێژوویەکی درەخشانیان تۆمارکرد لە هێنانەمەیدانی عەزمی شۆڕشگێرانەی جەماوەری لەدژی دەسەڵاتی ڕژێمی بەعس. تاقیکردنەوەیەکی پڕبایەخیان بەرجەستەکرد لە دیموکراسی شورایی‌و هاتنەمەیدانی ڕاستەوخۆی ئیرادەی جەماوەری فراوانی خەڵکی کوردستان بە ژن‌و پیاوەوە، لەپێناو بەشداری سیاسی‌و گێڕانی ڕۆڵ لە چۆنێتی دیاریکردنی ئاییندەو چارەنووسی خۆیان‌و کۆمەڵگاکەیاندا. لە ٢٣هەمین ساڵیادی ڕاپەڕین‌و شوراکاندا بژی شوراکان، سەربەرزی بۆ گیانبەختکردووانی ڕاپەڕین‌و هەڵسوراوانی شوراکان.

٦ئازار١٤

 

 

 

ئەم ڕستەیەی ئەیبینن"حاجی كاروان و مه‌لا سه‌ید ئه‌حمه‌د، باڵاپۆشی ئیسلامیان به‌ تاجێكی زێڕین وه‌سف كرد كه‌ ده‌بێ هه‌موو كچ و ژنێكی كورد له‌سه‌ری بنێن و جه‌سته‌ی خۆیانی پێ بشارنه‌وه‌.  "، گەوهەری ئەو سیاسەتە ئیسلامییەمان نیشانئەدات کە بۆ ئیسلامیزەکردنی کۆمەڵگای ئێمە بە نەخشەو لەسەرەخۆ کارئەکات.  سیاسەتێک کە لە ناواخنی "ڤیستیڤاڵی باڵاپۆشکردن"ی ساڵانەی یەکگرتووی ئیسلامی، پیادەئەکرێ‌و لە شاری سلێمانی سەرەتای ئەمساڵ بەڕێوەچووە!

بەرپاکردنی ئەم ڤیستیڤاڵە بە مەترسییەکی گەورە، وە بە پاشەوپاش گەڕانەوەیەکی کارەساتباری کۆمەڵگای مۆدێرنی کوردستان دائەنرێت.  خەڵکی کوردستان‌و شاری سلێمانی بە تایبەتی کچان‌و ژنانی خۆیان نەدۆزیوەتەوە، ئازادانە مامەڵەیان کردوون‌و وەکو ڕەگەزێکی گرنگ‌و سەرەکی‌و هاوچەشن‌و هاوبەشی ژیانی پیاو سەیری کچان‌و ژنانیان کردووە.  سەدان ساڵە ئەم خەڵکەو ئەم کۆمەڵگایە بەم ئیعتیبارە ژیاوەو ئێستا چی قەوماوە ئەبێت تەوقی ئاسنینی ئیسلامی بکرێتە سەر ژنان‌و کچانیان!

ئەو پارچە قوماشەی ناوی حجابەو بە کوردی باڵاپۆشیان بۆ داناوەو بە "تاجی زێڕین!" ناوزەدیان کردووە بە "تەوقی ئاسنین" لەپێناو بەکۆیلەکردنێكی ئیسلامییانەی ژنانی کوردستان‌و نەخشەیەکی مەترسیداری داماوکردن‌و بەژێرچەپۆک خستنی ژنان بۆ پیاوان ئەخەمڵێنرێت.  ئەم سیاسەتە ئیسلامییە بۆ بەکۆیلەکردنی زیاتر لەوەشی کە ژنان ئێستا تیایدا ئەژین، بەشێوازی ئیسلامییانەی، بە سەرچەشمەی ترسناکترین هەڕەشەو مەترسی بۆ سەر ئێستاو ئاییندەی کوردستان ئەژمارئەکرێت.  ئەگەر ئەم تەوقە ئاسنینە ئیسلامییە بچێتە سەری کچان‌و ژنانمان، ئینسانبوونمان چی بەهایەکی بۆ ئەمێنێتەوە! حجاب سەپاندن بەسەر ژناندا شۆڤێنیزمێکی تەواو عەیارە.  پێویستە قەدەغە بکرێت.  ئەم فاشیزمە ئیسلامییە پێویستە وەکو نازیزم مامەڵەی لەگەڵدا بکرێت.  چونکە سەرچاوەی درووستکردنی گەورەترین دوژمنایەتی کۆمەڵایەتییە لە نێوان ژنان‌و پیاوان خۆیاندا.  نەک لەناو هیچ گروپ‌و دەستەو تاقمێکی تر بەنێوی نەتەوەو ئەتنیک‌و کەمایەتی‌و زمانی جیاوازو. . تد.

تەوژمی ئیسلامی سەرەتا شۆڤێنیزمەکەی خۆی لە جیاکردنەوەو دابڕینی ژنان لە پیاوان دەستپێئەکات.  پاشان ئەیانکاتە دوو ڕکابەرو دژی یەکتر، ژن وەکو کۆیلەی پیاو، پاشان هەردووکیان کۆیلەی ئایدیۆلۆژیاو عەقڵییەتی ئیسلامی، وە پیاوانی تەسلیمبوو بەم عەقڵییەتە ئەکرێنە پاسەوانی پاراستنی "شەرەف‌و ناموسی" ژنان، کە لە واقعدا ئەبنە لۆمپنی بەردەوام بە شوێن ژنان‌و کچان‌‌و دایک‌و خوشکی خۆیانەوە.  لە ئاستی ماف‌و ئەرک‌و هەڵس‌و کەوتی ڕۆژانەیاندا وەکو دوو بونەوەری جیاواز وێنای خۆیانیان تێدا ئەچێنرێت، تا بگات بە بیرکردنەوەو خەیاڵ‌و ڕوانینیان بۆ ژیان‌و کۆمەڵگاو پێکهاتەکانی.  تەنانەت چاوەڕوانی‌و نیگایان بۆ ئاییندەش، لە گۆشەی قبوڵکردنی ژنانی کۆیلەو ملکەچی ژێر تەوقی ئاسنینی ئیسلامی‌یەوە بەرجەستەئەبێت.  ئیسلامیزەکردنی کوردستان نەخشەیەکی هێزە ئیسلامییەکانە، بە میانڕەو و توندڕەویانەوە، کە بە هەڵاواردنی ژنان‌و تەوقکردنی بیرو هۆشیانەوە بە لەسەرکردنی حجابی ئیسلامی دەستپێئەکات، بۆیە پێویستە هەموومان، وەکو کۆمەڵگای کوردستان بەرەنگاری ئەم مەترسییە ئیسلامییە ببینەوەو شکستی پێبهێنین! ڕێگانەدەین ڤیستیڤاڵی تەوقکردنی ژنانمان لەنێو ئایدیۆلۆژیاو عەقڵییەتی ئاسنینی ئیسلامیدا بەڕێوەبچێ‌و سەرکەوتن بەدەستبێنێت!

ئیسلامییەکانی کوردستان هەموو ڕێو شوێنێکیان بۆ واڵاکراوە، خۆشیان بە پشتبەستن بە "ئیستیتڵاعێکی مزوەری ڕای گشتی، کە ئەیڵێنەوەو ئەیڵێنەوە لە هەموو جێگایەک، ئەویش ئەمەیە؛ ٩٥دەرسەدی خەڵکی کوردستان موسڵمانن!"، تا بە شێوەی سیستماتیک دەستیان کردووە بە ئیشکردن لەسەر کرمێ کردنی دڵ‌و هەناوی کوردستان، واتە ویژدان‌و ووشیاری ژنان‌و کچانی ووڵات، تا لە ناخەوە ئالوودەیان کەن بە عەقڵییەت‌و نەریتێکی سەد دەر سەد دژی ژنان خۆیان، لەوێشەوە تۆوکردنی شۆڤێنیزمێکی کوێرانەو دواکەوتووانەی بەشەیتانکردنی پیاو لە زەین‌و ووشیاری ژنان‌و ئینجا کۆمەڵگاشدا! ئیسلامییەکان بەم شیوەیە ڕێگایان بۆ خۆیان تەختکردووەو بە نەخشەو بەرنامە سەرقاڵی داگیرکردنی ویژدانی هەناوی کۆمەڵگای کوردستان! دەسەڵاتیش هاوپەیمانییان ئەکات‌و پارلەمانیان پێ ئاوەدان ئەکاتەوەو پارەو بودجەیان بۆ هەڵئەڕێژێت!

ئاییندەیەک کە ئەم ڤیستیڤاڵی "حجاب سەپاندنە"ی یەکگرتوو بۆ ژنانی دیاریئەکات، سەد جار ناشیرینترو قێزەونترە لەوەی ئێمەو جیهان لە ئێران‌و عەرەبستانی سعودی‌و ئەفغانستان‌و لە بزووتنەوەی تاڵیبان‌و داعش‌و بەرەی نوسرەو ئەوانی تریان بینیومانە! ئەم ئاییندەیەش بە تەنیا ناتوانێت هەر بۆ ژنان بێت، ئەمە ئەو ڕۆژگارەیە کە هەموو هاوڵاتیانی کۆمەڵگاکەمان بە هەموو ڕەنگاکانییەوە تیایدا ئەبینە هەموو شتێک، جگە لە ئینسانی ئازادو شکۆمەندو خاوەن ماف‌و خاوەنی ڕاو خاوەنی چاوەڕوانیی نوێ بۆ هەموو شتێک! ئەم ئاییندەیە هەڕەشەمان لێئەکات.  بەڵام مەرج نییە بەئامانجەکانی بگات، بەو شەرتەی ئێمە نەمانەوێت، بەو مەرجەی ئێمە ڕێگای پێنەدەین!

١٠کانونی دوهەم١٤

 

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

تاوانێک کە بەرانبەر بەو کیژە نەوجەوانە ئەنجامدراوە هێندە قێزەون‌و شەرماوەرە، لەکەیەکی نەنگیی بێپاساو ‌و ئاماژەیەکی ترسناکی بێدەربەستیی کۆمەڵگای کوردی نیشان نیشانئەدات بەرانبەر بە ژنانمان! ئەو ئاستە لە بۆشایی ئەخلاقیی لە کۆمەڵگای ئێمەدا کە ڕێگای داوە بە دەستبردن بۆ ئەنجامدانی ئەم پەلامارە بێبەزەیی‌و دڕندانەیە، دەبێ پێش هەر شتێک جێگای ڕەخنەو تێڕامانمان بێت، نەک هیچ شتێکی تر.  ئەمە نەک هەر تاوانێکە بەرانبەر ئێمە هەموومان ئەنجامدراوە، بەڵکو هەڕەشەو مەترسییەکە بەسەر سەری کۆمەڵگاو نەوەکانمانەوە، کە پێویستە بەلاماندا تێنەپەڕێت!

شۆک‌و ڕاچڵەکینێک کە بەر ناخ‌و ویژدانی ئەو کیژۆڵە ١٦ساڵەیە کەوتووە، هیچ ئاستێک لە چارەسەرو چاودێری‌و دڵنەواییکردن ناتوانێت ساڕێژی بکات! ئەگەر هەر کەس لە ئێمە خۆی بخاتە جێگای ئەو کیژۆڵەیەو چاوێک بە ئێستاو ئاییندەی خۆیدا بگێڕێت، جگە لە ئینحتاتی ئەخلاق‌و ویژدان، جگە لە بێمانایی‌و بێبەهابوونی مرۆڤ‌و لەنێو ئەویشدا ژنان، لە چوارچێوەی مۆڕاڵی ژیانی شارستانیدا کام وێنای تری دێتە پێش چاو!؟ بۆیە کۆمەڵگای ئێمە پێویستە خۆی بۆ بەرگری لە خۆی‌و نەوەکانی ئامادە بکات.  ئەم بێدەربەستییە لەژێر هیچ بیانوویەکدا پەسەند نییە.  کۆمەڵگای ئێمە دەبێ هێندە گەشەو باڵابکات، کە هیچ بۆشایی‌و بوارێک بۆ بیرکردنەوە لە تاوانی لەو جۆرە نەمێنێتەوە! دەستوبردی دەزگای پۆلیسیش لەم دۆسییەدا جێگای دەستخۆشییە لە دەستگیرکردنی تاوانباراندا! هەرچەند هەنگاوێکی سەرەتاییە لەو ئاراستەیەی کە من ئاماژەیەکم پێیداوە لێرەدا!

٩کانونی دوهەم١٤

 

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

(لەبارەی نامەکەی بەڕێز ئازاد جندیانیەوە بۆ مەحمود سەنگاوی)

بەڕێز ئازاد جندیانی، هەر مەبەستێکی بێت لەڕووی حزبییەوە بۆ بەرگری کردن لە مەحمود سەنگاوی، کە مافی خۆیەتی، بەڵام بەڕای من،  گەوهەرو واتای نامەکەی هەڵبڕینی شەرعیەتی شۆڕشگێڕییە بەرانبەر بە یاساو دادگا.  فەزڵی شەرعییەتی خەباتی پێشمەرگانە ئەدات بەسەر دادگاو سەروەری یاسادا.  ئەمەش خۆی جۆرێک لە هەڕەشەو چاوسوورکردنەوە لە دادوەری گشتی‌و دادگاکانیش لە دۆسێی تیرۆری کاوە گەرمیانیدا.  شێوازێکی سیاسییە بۆ سەلماندنی بێتاوانیی مەحمود سەنگاوی.

بەڕێزیان ڕەخنە لە میدیاکاران ئەگرن کە پێش دادگاو یاسا کەوتوون، لە "تۆمەتبارکردنی مەحمود سەنگاوی"دا، لە کاتێکدا بنەماڵەی کاوە گەرمیانی ئەو تۆمەتانەیان هەیەو بۆیە بۆتە بابەتی میدیاکانیش.  بەڵام خۆی بە کردەوە بەرائەتی سەنگاوی سەلماندووەو داواش لە دادگا ئەکات گوێ لە نامەکەی بەڕێزیان بگرێ‌و وەکو جندیانی سەیری سەنگاوی بکات! لەکاتێکدا هەر ئێستا بنەماڵەی کاوە گەرمیانی ڕایانگەیاندووە کە گواستنەوەی مەحمود سەنگاوی بۆ سەنگاو جێگای گومانی ئەوانە!

نامەکەی جندیانی ئەچێتە پاڵ ووتاری چەند کەسی دیکەی یەکێتی نیشتمانی بۆ نرخاندنی مەحمود سەنگاوی.  لەکاتێکدا ئەگەر هەق بەلای سەنگاوییەوەیە لە دۆسێی کاوە گەرمیانیدا، یەکێتی ئەبوایە چاوەڕوانی پرۆسەی لێپێچینەوە لە تۆمەتەکانی سەر بەڕێز سەنگاوی بوونایە، نەک پێش دادگا تەپڵی بێتاوانیی ئەویان لێبدایە.  کە ڕەنگە لە بەرژەوەندی مەحمود سەنگاویش تەواو نەبێت!

دەرئەنجام، مەحمود سەنگاوی تۆمەتبارە لەم دۆسێیەدا، ئەتوانێت بە شیوەی یاسایی‌و دروست ڕەتیانکاتەوە، نەک بەم شیوازەی یەکێتی کەپەینی تەبلیغاتیی بۆ سازبدات!

٨کانونی دوهەم١٤

لە نامەکەی ئازاد جندیانییەوە:سڵاو كاكه‌ مه‌حمود

شۆڕش و تێكۆشانی‌ كوردایه‌تی‌، تۆی‌ وه‌ك قاره‌مان و له‌خۆ بوردوو ناساند، داستانه‌كانی‌ به‌رگری‌ و رۆژانی‌ سه‌ختی‌ پارتیزانی‌ ناسنامه‌ی‌ كوڕه‌ سه‌نگاوییه‌كه‌ بوو، تۆ هه‌میشه‌ بۆنی‌ گه‌رمیانت لێدێت و گه‌رمیانیش بۆنی‌ تۆ و هه‌ڤاڵه‌ شه‌هید و زیندووه‌كانتی‌ لێدێ‌.

 

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

Go to top