We have 25 guests and no members online

بەختیار شەمەیی

 

 

 

سه‌ره‌تايه‌کی شۆڕشگێڕانه‌ هه‌يه‌، ده‌ڵێت: هه‌ر که‌سێک کار بکات، هه‌ڵه‌ش ده‌کات، ئه‌و که‌سه‌ی که‌ هه‌ڵه‌ ناکات، هه‌ر ئه‌و که‌سه‌يه‌ که‌ هيچ ناکات.

با لێره‌دا راستييه‌کی سه‌يروسه‌مه‌ره‌ باس بکه‌يه‌ن: له‌ هه‌موو مێژووی بزووتنه‌وه‌ی رزگاريخوازی کوردستاندا، هه‌ته ئێستانه‌بيستراوه‌ و نه‌بينراوه‌، هيچ سه‌رکرده‌ و سياسه‌تپيشه‌يه‌کی کورد، هيچ پارت و رێکخستنێکی سياسيی کوردستان، بۆ ته‌نها جارێکيش ره‌خنه‌يه‌کيان له هه‌ڵه‌ و تاوانێکی رابووردووی خۆيان گرتبێت. ئه‌مه‌ له‌کاتێکدا که‌ له‌ رابووردوودا، به‌ هه‌زاران هه‌ڵه‌ و تاوانی گه‌وره‌ و بچووکيان ئه‌نجام داوه‌. چه‌ندين پێوه‌نديی گومانلێکراوانه‌يان له‌گه‌ڵ دوژمنانی کورد و داگيرکه‌رانی کوردستان دروست کردووه‌. راپۆرتی سيخوڕييانه‌يان‌ له‌سه‌ر يه‌ک داوه‌ به‌ ده‌وڵه‌ته‌ داگيرکه‌ره‌کانی کوردستان، سوپای پاسدارانی ئێرانی و سوپای به‌عسی عێراقيان په‌لکێشی کوردستان کردووه‌ بۆ لووتشکاندن و ده‌رپه‌ڕاندن و له‌ناوبردنی يه‌کتری. چه‌ندين جار شه‌ری يه‌کتر کووشتنيان هه‌ڵگيرساندووه‌ که‌ له‌ سه‌ره‌نجامدا به‌ هه‌زاران کورديان به‌ ده‌ستی يه‌کتر به‌کوشتداوه‌، ماڵی يه‌کتريان تاڵان و وێران کردووه‌. خاووخێزانی يه‌کتريان ئاواره‌ و سه‌رگه‌ردان کردووه‌. به‌رده‌وام تێرۆری سياسييان له‌ يه‌کتری کردووه‌. له‌ پێناوی به‌رژه‌وه‌ندييه‌ کاکه‌که‌سی و بنه‌ماڵه‌يی و حيزبييه ناڕه‌واکانياندا، به‌ سه‌دان کاره‌ساتی گه‌وره‌ و بچووکيان به‌سه‌ر کورد و کوردستاندا هێناوه‌. ده‌ريايه‌ک فرمێسک و خوێنی ميلله‌تيان رشتووه‌. سه‌رباری هه‌موو ئه‌مانه‌ش، دوای راپه‌ڕين، به‌بێ پرسوڕا و ره‌زامه‌نديی ميلله‌ت و که‌سوکاری گاينبه‌خشيوه‌کان، له‌ پێناوی ململانێ حيزبييه‌کان و کۆکردنه‌وه‌ی زۆرترين ژماره‌ی له‌شکری ره‌ش، لێبووردن و لێخۆشبوونی گشتييان بۆ هه‌موو جاش و سه‌رجاشه‌کان و موسته‌شار و به‌عسی و ئه‌نفالچييه‌کانو به‌کورتييه‌که‌ی بۆ هه‌موو ناپاک و خۆرۆشتووه‌کانی ناو کوردستان ده‌رکرد و هيچ ره‌چاوی هه‌ست و هۆش و دڵ و ده‌روونی هه‌زاران هه‌زارن که‌سوکاری ئه‌نفالکراوه‌کان و کيميابارانکراواکان و گيانبه‌خشيوه‌کانی کوردستانيان نه‌کرد و له‌مه‌ش خراپتر و تاوانی گه‌وره‌تر، داڵده‌ی ئه‌و هه‌موو کورده نه‌ته‌وه‌فرۆش و نيشتمانفرۆشه‌يان له‌نێو رێزه‌کانی خۆياندا دا و زۆربه‌شيان کردن به‌ به‌رپرس و سه‌له‌شکری حيزبه‌کانيان و ئێستا هه‌موويان، خۆيان و نه‌وه‌کانيان له‌سه‌ر بوودجه‌ی ميلله‌ت، مووچه‌ی خانه‌نشينييان بۆ بڕيونه‌ته‌وه‌ و له‌ خۆشترين بارودۆخدا ژيان ده‌گوزه‌رێنن و وه‌کو نه‌ بيان ديبێت و نه‌ باران!؟

هه‌تا ئێستا هيچ ميلله‌تێک له‌ ناپاکه‌کانی خۆی خۆش نه‌بووه‌. ئێمه‌ی کورد تاکه‌ ميلله‌تێکين که‌ له‌ ناپاکه‌ نه‌ته‌وه‌يی و نيشتمانييه‌کانمان خۆش بووين!؟

هه‌موومان به‌ چاوی خۆمان بينيومانه‌ و و ده‌يبينين که‌ له‌ماوه‌ی ئه‌م 23 ساڵه‌ی ده‌سه‌ڵات و خۆفه‌رمانڕه‌وايی ده‌سه‌ڵاتی سياسيی سه‌رانی پارته‌ سياسييه‌کانی باشووردا، هه‌تا ئه‌مڕۆش، به‌ ناوی ميلله‌ته‌وه‌ چه‌ندين ميليارد دينار و دۆلار گومرگ و باج و بوودجه‌ وه‌رگيراوه‌ و وه‌رده‌گيرێت، به‌رده‌وام سامانی سه‌رزه‌وی و ژێرزه‌وی به‌تاڵان براوه‌ و ده‌برێت، ئه‌مڕۆ له‌ باشووردا چه‌ندين هه‌زار ميلۆنه‌ر و ميلياردێرى بێ رابووردوو و تازه‌پياکه‌وتوو، سه‌ريان هه‌ڵداوه‌ و پاوانی گشت مامه‌ڵه‌يه‌کی بازرگانيی ناوخۆ و ئابووريی نارده‌ و هاورده‌ی کوردستانيان له‌ژێر ده‌ستدايه‌. زۆربه‌يه‌تيی ميلله‌تيش له‌ ناخۆشترين بارودۆخی کرێچێتی و بێکاری و هه‌ژاری و نادڵنياييدا، ناچارکراون، ژيانی مه‌مره‌ و بژی بگوزه‌رێنن!؟

ئه‌مه‌ نه‌ک هه‌ر سه‌يروسه‌مه‌ره‌يه‌، به‌ڵکو جێگه‌ی داخ و شه‌رمه‌زاريشه‌، که‌ هه‌تا ئێستا نه‌بيستراوه‌ و نه‌بينراوه‌ بۆ ته‌نها جارێکيش دان به‌ هه‌ڵه‌ و تاوانه‌کانی خۆياندا بهێنن و داوای لێبووردن و به‌خشين له‌ مييلله‌ت بکه‌ن. هيچ که‌س و لايه‌نێک ئه‌و گيانی ئازايه‌تی و ويژدانه‌يان نه‌بووه‌ و نييه‌ که‌ به‌رپرسيارێتيی هه‌ڵه‌ و تاوانه‌کانيان بگرنه‌ ئه‌ستۆی خۆيان، هه‌ميشه هه‌‌ر يان بێگانه‌، يان ميلله‌تی خۆمانيان تۆمه‌تبار و تاوانباکردووه‌!؟ هۆکاره‌که‌ش ئه‌مه‌يه‌ ئه‌گه‌ر بڕوايان به داوای لێبووردن و به‌خشين له‌ ميلله‌ت، هه‌بێت، ده‌بێت به‌رده‌وام رۆژانه‌ له‌سه‌ر هه‌ڵه‌ و تاوانه‌کانيان، چه‌ندين جار داوای لێبووردبن له‌ ميلله‌ت بکه‌ن!؟

ئه‌مڕۆ پرسياری هه‌موو ميلله‌ت ئه‌مه‌يه: ئايا ئه‌م بێ ويژدانی و نادادپه‌روه‌ری و بارودۆخه‌ ئابووری و سياسی و کۆمه‌ڵايه‌تييه‌‌ی ئێستا، هه‌تا سه‌ر هه‌ر به‌رده‌وام ده‌بێت!؟

به‌ختياری شه‌مه‌يی

11.  11.  2014

 

 

 

 

ميلله‌تێك خاوه‌نی سه‌رکردايه‌تييه‌کی دڵسۆز و له‌خۆبووردوو و ژيرمه‌ند و دووربين نه‌بێت، هه‌ر وه‌ک ئه‌مڕۆی باشووری کوردستانی به‌سه‌ر دێت!؟                           

ئه‌مڕۆ ميلله‌ت به‌ گشتی بێ مووچه‌ و بێ پاره‌يه‌، تووڕه‌یه‌، بێزاره‌، دڵشکاوه‌،  هه‌ژاره‌، کرێچييه‌، بێکاره‌، تاوانلێکراوه‌، هه‌ڵخه‌ڵه‌تێنراوه‌، نادڵنيايه‌ له‌ ژيانی ئێستا و داهاتووی خۆی، هه‌موو کۆمه‌ڵگه به‌ گشتی له‌ ته‌نگژه‌يه‌کی ئابووری و سياسی و کۆمه‌ڵايه‌تيدا ده‌ژين.            

ئه‌مڕۆ ميلله‌تی کورد له‌ باشووری کوردستان به‌شێوه‌يه‌کی گشتی زۆر تووڕه‌ و بێزار و دڵشاکاون له‌ ده‌سه‌ڵاتداران و سياسه‌تمه‌داران و هه‌موو به‌رپرسه‌ سياسی و سه‌ربازييه‌کانی لايه‌نه‌ سياسييه‌کان و به‌رپرسانی ده‌سه‌ڵاتی کوردی، هه‌ربۆيه‌، ئيترکاتی ئه‌وه‌ هاتووه‌ که‌ سه‌رکردايه‌تیی هێزه‌ سياسييه‌کان و ده‌سه‌ڵاتداره‌کانی باشووری کوردستان، به‌هۆی هه‌ڵه‌کانی رابووردوويانه‌، به‌ ئاشکرا و بێ ترس داوای لێبووردن له‌ هه‌موو ميلله‌تی کورد بکه‌ن و هه‌وڵ بده‌ن له‌مه‌و‌دوا هه‌ڵه‌کانی رابووردوويان دووباره‌ نه‌كه‌نه‌وه‌‌ و بيرکردنه‌وه‌ و گفتار و ره‌فتاری خۆيان بگۆڕن و چاکيان بکه‌ن و لاپه‌ڕه‌يه‌کی نوێ له‌گه‌ڵ ميلله‌تدا هه‌ڵبده‌نه‌وه‌‌، ئه‌گه‌ر ئه‌مه‌ نه‌كه‌ن، ده‌بێت چاوه‌ڕوانی راپه‌ڕينێکی گه‌وره‌ی جه‌ماوه‌ريی گشگیر بکه‌ن که‌ سه‌ره‌نجام کۆتايی به‌ خۆيان و هه‌موو شتێکيان ده‌هێنرێت.                                    

‌باشووری کوردستان، به‌ره‌و چاره‌که‌ سه‌ده‌یه‌ک ده‌چێت که‌ ئازاده‌ و له‌ زۆر رووه‌وه‌ سه‌ربه‌خۆيانه‌ خۆمان به‌ڕێوه‌‌بردووه‌‌. بێگومان ئه‌گه‌ر ئه‌م به‌شه‌ی نيشتمان خاوه‌نی سه‌رکردايه‌تييه‌کی دڵسۆز و له‌خۆبووردوو و ژير و دووربين بووايه‌، ده‌بووايه‌ به‌ر له‌ هه‌ر شتێک بيرمان له‌ سوود وه‌رگرتن‌ له‌م ده‌رفه‌ته‌ مێژووييه‌ زێڕينه‌ بکردايه‌ته‌وه و هێڵی به‌رگری و خۆپاراستنمان به‌‌هێزترو پته‌وتر بکردايه‌. ده‌بوويان له‌شکرێکی نيشتمانيی يه‌کگرتوو و سه‌ربه‌خۆ و رێکوپێک و راهێنراو و به‌بيروباوه‌ڕمان پێکبهێنايه‌ بۆ به‌رگری کردن و پاراستنی ئه‌م بارودۆخه‌ سيسييه‌ی که بۆمان هاتۆته‌ پێشه‌وه‌ و رۆژ به‌ رۆژ به‌ره‌و خۆبه‌‌هێزتر کردن و به‌ره‌و پێشه‌وه‌ چوون هه‌نگاومان بنايه‌. به‌ڵام به‌داخه‌وه‌، سه‌رکردايه‌تيی سياسيی باشووری کوردستان له‌بری ئه‌م کارو کرده‌وه‌ هه‌ره‌ گرنگ و پێويستانه‌، به‌ر له‌ هه‌ر شتێك، بڕياری لێخۆشبوونی گشتييان بۆ جاش و سه‌رجاش و موسته‌شار و به‌عسی و ئه‌نفالچييه‌ تاوانباره‌کانی ناوخۆ ده‌رکرد، ئه‌مه‌ هه‌ڵه‌ و تاوانێکی زۆر گه‌وره‌ بوو که‌ هه‌رگيز نه‌ده‌بووايه‌ بمانکردايه‌. له‌ڕاستيدا‌ ئه‌مه ئه‌نجامی ئه‌و ناکۆکی و دووبه‌ره‌کييه‌ ميێژووييه‌ بوو که‌ له‌نێوان پاشماوه‌کانی مه‌لایی و جه‌لاليدا هه‌بوون و له‌پێناوی خۆبه‌ خاوه‌نکردنی زۆرترين جه‌ماوه‌ردا، له‌و که‌سه‌ نه‌ته‌وه‌فرۆش و نيشتمانفرۆشانه‌ خۆش بوون و هه‌موويانيان کرد به‌ فه‌رمانده‌ و به‌رپرس و ئه‌ندام و کاربه‌ده‌ستی نێو رێکخستنه‌کانيان و له‌ريزی هه‌ره‌ پێشه‌وه‌ی ريزه‌کانی خۆيان به‌ڕيزه‌وه‌ جێگه‌يان بۆ کردنه‌وه‌. ئێستاش هه‌ر هه‌موويان، خۆيان و نه‌وه‌کانيشيان، مووچه‌ی موفتی خانه‌نشينييان له‌سه‌ر بوودجه‌ی ميلله‌ت بۆ بڕاوه‌ته‌و و زۆرتيرين رێژه‌ی خانه‌نشينی له‌ناو ئه‌و کۆنه‌ جاش و سه‌رجاش و به‌عسی و ئه‌نفالچييانه‌دايه‌. ئه‌مه‌يه‌ يه‌کێک بوو له‌ هه‌ڵه‌ هه‌ره‌ خراپ و مێژووييه‌کانی سه‌رکردايه‌تيی هێزه‌ ده‌سه‌ڵاتداره‌کانی باشووری کوردستان که‌ پاش راپه‌ڕينه‌ مه‌زنه‌که‌ی جه‌ماوه‌ری باشوور تێيکه‌وتن و به‌سه‌ر خۆياندا هێنا. هه‌ر ئه‌و کۆنه‌ جاش و کۆنه‌ به‌عسی و ئه‌نفالچييانه‌ی ناو پارته‌ سياسييه‌کان بوون که‌ بوونه‌ هۆی هه‌ڵگيرسانه‌وه‌ی شه‌ڕی براکوژی و يه‌کتر کوشتنی کورد و کورد. به‌‌و لێخۆشبوونه‌، سه‌رکردايه‌تيی پارته‌کانی باشوور، ، سه‌لمانديان که‌ کورد تاکه‌ ميلله‌ته‌ له‌ مێژوودا که‌ له‌ خۆفرۆشتووان و ناپاکان و نه‌طه‌يه‌فرۆشان و نيشتمانفرۆشان و خۆش بووه‌ و کرده‌وه‌ی ناپاکی و خۆفرۆشی و نه‌ته‌وه‌فرۆشی و نيشتمانفرۆشييان کرد به‌ ديارده‌يه‌کی ئاسايی و بێ لێپرسينه‌وه‌ و بێ سزا، ئه‌مه‌ مه‌ترسييه‌کی گه‌وره و ترسناکه‌ بۆسه‌ر ئاساييشی نه‌ته‌وه‌يی و نيشتمانيی هه‌ر ميلله‌تێك، که‌ زۆر به‌داخه‌وه‌ سه‌رکردايه‌تيی باشوور ئه‌م نه‌ريته‌ خراپه‌يان کرده‌ باو و به‌بێ لێپرسينه‌وه‌ و سزادان، له‌ رابووردووی پڕ له‌ تاوانی ئه‌و ناپاکانه‌ خوش بوون و له‌ هه‌موو ئه‌مانه‌ش خراپتر ئه‌و ناپاکانه‌يان له‌ناو ريزه‌کانی خۆياندا به‌و په‌ڕی رێز و پشکداری و شکۆمه‌ندييه‌وه‌ جێگه‌يانکردنه‌وه‌ و پله‌وپايه‌ و به‌رپرسيارێتييان پێشکه‌ش کردن. کورد تاکه‌ ميلله‌تێکه که‌ له‌ ناپاکه‌کانی خۆی خوش ده‌بێت و هيچ ميلله‌تێکيتر ئه‌مه‌ی نه‌کردووه‌ و له‌ مێژوودا جگه‌ له‌ کورد، هيچ نه‌ته‌وه‌یه‌کيتر نييه‌ که‌ له ناپاکه‌ نه‌ته‌وه‌يی و نيشتمانييه‌كانی خۆی خۆش بوو بێت و بێ لێپرسينه‌وه‌ و بێ سزا، هه‌ڵسوکه‌وتيان له‌گه‌ڵدا بکات. ئه‌و هه‌ڵه‌ و تاوانی لێخۆش بوونه‌، بوو به‌ يه‌کێ له‌ سه‌رچاوه‌کانی هه‌موو کێشه‌ و کاره‌ساته‌کان که‌ له‌ ساڵانی رابووردوودا به‌سه‌ر باشووری کوردستاندا هاتوون. ده‌بێت ئه‌م هه‌ڵه مێژووييه‌ راست بکرێته‌وه‌ و چاره‌سه‌رێک بۆ ئه‌م کێشه‌ گه‌و‌ره‌يه‌ بدۆزرێته‌وه‌. ده‌بێت به‌ گشتی ريزه‌کانی بزووتنه‌وه‌ی کوردايه‌تی له‌ هه‌موو پاشماوه‌کانی کۆنه‌ جاش و سه‌رجاش و به‌عسی و ئه‌نفالچی و نه‌ته‌وه‌‌فرۆش و نيشتمانفرۆشه‌ ناپاکه‌کان پاک بکرێنه‌وه‌. سه‌رباری ئه‌مه‌ش، ده‌بێت تاوانبارانی شه‌ڕی براکوژيی ناوخۆ، دادگايی بکرێن و تاوانباران به‌ سزای ره‌وای خۆيان بگه‌يه‌ندرێن. ده‌بێت هه‌موو گه‌نده‌ڵه‌کان و دز و تاڵانچييه‌کانيش به‌ر‌ لێپرسينه‌وه‌ بکه‌ن و به‌ سزای ره‌وای خۆيان بگه‌يه‌ندرێن.                                                     

ئه‌وه‌ بۆ چاره‌که‌ سه‌ده‌یه‌ک ده‌چێت، ئه‌م سه‌رکردايه‌تييه‌ رۆژ به‌ رۆژ ته‌نها هه‌ر به‌ر پێی خۆی بينيوه‌ و هه‌ر بيريان له‌ ژيانی تايبه‌تيی خۆيان و پارته‌کانيان کردووه‌ته‌ و هه‌ر خه‌ريکی بازرگانی کردن و به‌تاڵانفرۆشتنی سامانی سه‌رزه‌وی و ژێرزه‌ويی باشووری کوردستان بوون به‌م دوژمن و به‌و داگيرکه‌ر.                                                    

ئێمه‌ی کورد نه‌ته‌وه‌يه‌کی ژێرده‌سته‌ و نيشتمان داگيرکراو و دابه‌شکراوين. به‌رده‌وام له‌لايه‌ن چه‌ندين دوژمن و داگيرکه‌ری زيره‌ک و فێڵباز و به‌هێز و په‌لامارده‌ر و زۆردار و دڕنده‌‌وه‌، هه‌ڕه‌شه‌لێکراو و گه‌مارۆدراوين. هه‌ربۆيه‌، ده‌بووايه‌ پێش هه‌ر شتێك بيرمان له‌ پێکهێنانی سووپايه‌کی نيشتمانيی يه‌کگرتووی سه‌ربه‌خۆ و رێکوپێک و ئاماده‌کراو بکردايه‌ته‌ و گه‌وره‌ترين بوودجه‌ و تواناکانمان بۆ ئه‌م مه‌ىه‌سته‌ هه‌ر گرنگ و پێويسته‌ ته‌رخان بکردايه‌. به‌ڵام به‌پێچه‌وانه‌وه‌، ئه‌و سه‌رکردايه‌تييه‌ نادڵسۆز و خۆپه‌رست و کورتبينه‌، هه‌ر خه‌ريکی بازرگانی و خۆسه‌رمايه‌دارتر کردن و رابوواردن و خۆشگوزه‌رانيی تايبه‌تيی خۆيان بوون. هه‌ر خه‌ريکی دروستکردنی سوپه‌رمارکێت و مۆڵی گه‌وره‌ گه‌وره‌ و هۆتێلی پێنج ئه‌ستێره‌يی و هۆڵی ئاهه‌نگ گێڕان و دروستکردنی باخ و ڤێللای گه‌وره‌ و گرانبه‌های تايبه‌ت به‌ خۆيان بوون و هه‌رگيز بيريان له‌ رۆژانی ته‌نگانه‌ نه‌کرده‌وه‌ و بيريان له‌وه‌ نه‌کرده‌وه‌ که‌ ئێمه‌ی کورد به‌ دوژمنان و داگيرکه‌رانێکی به‌هێز و زۆردار و دڕنده‌ ده‌ور دراوين و هه‌روا به‌ ئاسانی وازمان لێناهێنن که‌ به‌ ئاشتی و ئارامی و ئازادی و خۆشگوزه‌رانی بژين. ئێستا به‌ خراپترين شێوه‌ که‌وتووينه‌ بارودۆخێکی ترسناک و هه‌ڕه‌شه‌ئامێزه‌‌وه‌ و دووچاری شه‌ڕێکی گه‌وره‌ و مه‌ترسيدار کراوين له‌گه‌ڵ دواکه‌وتووترين و پڕجه‌کترين و دڕنده‌ترين له‌شکری فاشيزمی ئيسلاميدا به‌ناوی داعشه‌وه‌. دوژمنان و داگيرکه‌رانمان له‌ رێگه‌ی له‌شکری ره‌سی داعشه‌ تێرۆريسته‌کانه‌وه‌ شه‌رمان پێده‌فرۆشن و هه‌وڵی تێکدانه‌وه‌ی هه‌موو ئه‌و شتانه‌مان ده‌ده‌ن که‌له‌ماوه‌ی ئه‌م 23 ساڵه‌ی رابووردوودا بنياتمان ناون. به‌ڵام خۆشبه‌ختانه‌، ئه‌گه‌ر پشتيوانيی ئه‌مه‌ريکيه‌کان و ئه‌وروپييه‌کان نه‌بوونايه‌، ئێستا به‌ دڵنياييه‌وه‌، هه‌موو باشووری کوردستان که‌وتبووه ژێرده‌ستی له‌شکری داعشی دڕنده‌وه‌‌. ئاشکرا بووهه که‌ داعش باڵی سه‌ربازيی تورکيا و ره‌گه‌زپه‌رسته‌کانی تورک و عه‌ره‌به و له‌لايه‌ن ئه‌مانه‌وه‌ پڕ چه‌ککراون و هه‌موو کۆمه‌ک و پشتيوانييه‌کی سه‌ربازی و مرۆيی و لۆجيکستييان ده‌کرێت و ئه‌وه‌ی به‌ خۆيان ناکرێت و بۆيان نالوێت، دژی کورد و کوردستان به‌ له‌شکری ره‌شی داعشی ده‌كه‌ن.                                       

ئه‌مڕۆ ڕووبه‌ڕووی له‌شکری داعشی دڕنده‌ بووينه‌‌ته‌وه‌ و دووچاری شه‌ڕێکی گه‌وره‌ و ترسناک کراوينه‌ته‌وه‌. هه‌ربۆيه ‌پێويسته و ده‌بێت هه‌موو کورد و کوردستانييه‌ک، هه‌موو کۆڕ و کۆمه‌ڵ و که‌سايه‌تی و لايه‌نێکی کوردی و کوردستانی به‌وپه‌ڕی ئازايه‌تی و دڵسۆزی و يه‌کگرتوويیه‌وه رووبه‌ڕووی هه‌ڕه‌شه‌ و مه‌تسييه‌كانی داعش ببينه‌وه‌ و به‌ ته‌بايی و يه‌کڕيزی و يه‌کگرتوويی و يه‌ک هه‌ڵوێستی رووبه‌ڕووی هه‌موو پيلانه‌کانی دوژمنان و داگيرکه‌رانمان بوه‌ستينه‌وه‌ و له‌م کێشه‌ و ته‌نگژه‌ گه‌وره‌ و مه‌ترسيداره‌ خۆمان رزگار بکه‌ين. ده‌بێت ئه‌مه‌ په‌ند و وانه‌يه‌کی مێژوويی بێت بۆ هه‌موومان که له‌مه‌ودا وه‌کو کورد، وه‌ک نه‌ته‌وه‌یه‌کی ژێرده‌سته‌ و نيشتمان داگيرکراو و گه‌مارۆدراو و هه‌ڕه‌شه‌لێکراو، پێويسته‌ و ده‌بێت له‌ڕووی نه‌ته‌وه‌په‌روه‌ری و نيشتمانپه‌روه‌رييه‌وه‌، هۆشيارتر ببينه‌وه‌ و هێز و تواناکانمان له‌ له‌شکرێکی نيشتمانيی يه‌کگرتوو و سه‌ربه‌خۆدا رێکبخه‌ين و ئيتر کاتی ئه‌وه‌ هاتووه‌ که‌ ده‌بێت هه‌مووان له‌مه‌ به‌دواوه‌، بزانين چی ده‌بێت بکه‌ين و چی ده‌بێ نه‌كه‌ين!                                       

به‌ختياری شه‌مه‌يی

4.  10.  2014

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

لاوان به‌شێکی گرنگ و چالاکی پێکهاته‌ی کۆمه‌ڵگه‌ن.لاوان هێزی بزوێنه‌ر و سازێنه‌ری زۆربه‌ی دیارده‌کانی ناو کۆمه‌ڵگه‌ن.ئه‌م به‌شه‌ی کۆمه‌ڵگه‌ پێکهاته‌یه‌کی تێکه‌ڵ و جۆراوجۆرن له‌ هه‌موو چین و توێژه‌کانی کۆمه‌ڵ.لاوان پێکهاته‌یه‌کی کۆمه‌ڵایه‌تین له‌ خوێندکاران، کرێکاران، بێکاران و زۆربه‌ی پیشه‌ جیاوازه‌کانی دیکه‌‌ی ناو کۆمه‌ڵگه‌.به‌ڵام لاوان چین و توێژێکی کۆمه‌ڵایه‌تیی تایبه‌ت نین، زۆرجار به‌ هه‌ڵه‌ لاوان وه‌کو چین و توێژێکی کۆمه‌ڵایه‌تی پێناسه‌ ده‌کرێن، ئه‌م پێناسه‌یه‌ له‌گه‌ڵ مانای زانستییانه‌ی چیندا یه‌کناگرێته‌وه‌ و دژ و ناته‌بان.

 ئه‌مڕۆ له‌ هه‌موو جیهاندا، له‌لایه‌ن ده‌وڵه‌‌ت و داموده‌زگه‌ نێوده‌وڵه‌تییه‌کانه‌وه‌ گرنگی و بایه‌خی زۆر به لاوان ده‌درێت و بوودجه‌ی تۆکمه‌ و ر‌ه‌چاوکراو، ته‌رخانکراوه‌ بۆ دابینکردنی پێداویستییه‌ په‌روه‌رده‌ییه‌کانی لاوان، له‌ خوێندن و وه‌رزش کردن و نیشته‌جێگه‌‌ی ژیان و گه‌شتوگوزار و شوێنی تایبه‌تیی لاوان بۆ خۆشگوزه‌راندن و به‌سه‌ربردنی سوودمه‌ندانه‌ی کاته‌کانی پشوودانانیان.به‌ ده‌یان و سه‌دان سه‌نته‌ر و بنکه و مه‌ڵبه‌ندیان بۆ داده‌مه‌زرێنرێت و به‌ هه‌زاران مامۆستا و ئامۆژگار، له‌ که‌سانی کۆمه‌ڵناس و ده‌روونناس و په‌روه‌رده‌کاری گشت بواره‌ جۆراوجۆره‌کانی په‌روه‌رده‌ و را‌هێنان و بارهێنانیان، وه‌کو ئه‌رک و فه‌رمان و پیشه‌، خه‌ریکی په‌روه‌رده‌ کردن و ئاماده‌کردنی لاوانن.سه‌ربای هه‌موو ئه‌مانه‌، لاوان خاوه‌نی تایبه‌تمه‌ندی و کێشه‌ و گیروگرفتی تایبه‌ت به خۆیانن.له‌ناو خێزانه‌کاندا، زۆربه‌ی کاته‌کان، لاوان سه‌رچاوه‌ی کێشه‌ و گیروگرفتی جۆراوجۆرن.له‌ ده‌ره‌‌وه‌ی خێزانیشدا، به‌شێکی زۆری کێشه‌کان هه‌ر له لاوانه‌وه‌ په‌یدا ده‌بن.له‌ خۆپیشاندان و راپه‌ڕین و شۆڕشه‌کانیشدا، لاوان هه‌میشه‌ پشکی سه‌ره‌کی و به‌رچاویان بۆ خۆیان پاوان کردووه‌.ئه‌م پێکهاته‌ کۆمه‌ڵایه‌تییه‌، هێزێکی گه‌وره‌ و چالاک و زیندوو و بزوێنه‌ری کۆمه‌ڵگه‌ن.هه‌ر بۆیه‌ له‌لایه‌ن کۆڕ و کۆمه‌ڵ و رێکخستنه‌ رامیارییه‌کانه‌وه‌ هه‌وڵی زۆر له‌گه‌ڵ لاواندا ده‌درێت و پاره‌ و کات و وزه‌یه‌کی زۆریان تێدا به‌خه‌رج ده‌درێت بۆ راکێشانی سه‌رنجیان به‌لای خۆیاندا و بۆ به‌ ئه‌ندام کردنیان و سوود وه‌رگرتن له هێز و توانا و کات و وزه‌‌یان.سیاسه‌تمه‌داره‌کانیش لاوانیان مه‌به‌سته‌ و هه‌رده‌م به‌شێکی زۆری هه‌وڵدان و وتاردانه‌کانیان ئاڕاسته‌ی جه‌ماوه‌ری لاوان ده‌که‌ن.ئه‌مه‌ش له‌وه‌وه سه‌رچاوه‌ ده‌گرێت که‌ هه‌ر کۆڕ و کۆمه‌ڵ و دامه‌زراوه‌ و رێکخستنێکی رامیاری بتوانێت جه‌ماوه‌رێکی زۆری لاوان به‌لای خۆیدا رابکێشێت و تێکه‌ڵێ کار و چالاکی و بیروباوه‌ڕه‌کانی خۆیانیان بکه‌ن، له‌نێو کۆمه‌ڵگه‌دا کارا و کاریگه‌ر ده‌بن و داهاتوویه‌کی باش و مسۆگه‌ر بۆ خۆیان ده‌سته‌به‌ر ده‌که‌ن.

ململانێ له‌سه‌ر لاوان، ته‌وه‌رێکی گرنگ و پڕ کێشه‌ی هه‌موو دامه‌زراوه‌ رامیاری و ئابووری و کۆمه‌ڵا‌یه‌تی و فه‌رهه‌نگی و پیشه‌ییه‌کانی کۆمه‌ڵگه‌یه‌.زۆربه‌ی جاریش لاوان وه‌کو هێزێکی کۆمه‌ڵایه‌تی بۆ کاری ئاژاوه‌گێڕی و تێکدان و ته‌نانه‌ت تێرۆر و کوشتوکوشتاریش به‌کار ده‌هێنرێن.هه‌ربۆیه پێویست و گرنگه‌ له‌ هه‌موو سه‌رده‌مێکدا له‌لایه‌ن ده‌وڵه‌ت و لایه‌نه‌ پێوه‌ندیداره‌کانه‌وه‌، گرنگی و بایه‌خی پێویست به‌ په‌روه‌رده‌کردنی پۆزه‌تیڤانه - ئه‌رێتییانه‌ی لاوان بدرێت و بوودجه‌ و کات و وزه‌یه‌کی ته‌رخانکراویان تێدا به‌خه‌رج بدرێت.ئه‌مه‌ش هۆکارێکه‌ بۆ ده‌سته‌به‌ر کردنی ئاشتی و ئاساییش و ژیانی دێمۆکرسییانه‌ و پێشکه‌وتنی کۆمه‌ڵگه‌.پێویسته لاوان به‌ راهێنانی دروست و به‌ ده‌ستاوێژی پێشکه‌وتووانه‌ی سه‌رده‌مییانه‌، به‌ بیروباوه‌ڕی نه‌ته‌وه‌په‌روه‌رانه و نیشتمانپه‌روه‌رانه‌‌ی مرڤدۆستانه‌، به‌ هه‌ست و هۆش و گیانی ژینگه‌پارێزانه و ئاژه‌ڵدۆستانه‌، گۆش و په‌روه‌رده‌ بکرێن و دوور بخرێنه‌وه‌ له‌ هه‌موو کار و کرده‌وه‌ و بیرکردنه‌وه‌یه‌کی توندوتیژانه‌ و زیینبه‌خشانه‌.بێگومان پێش هه‌موو لایه‌نێک ئه‌مه‌ ئه‌رک و فه‌رمانی ده‌وڵه‌ته‌ و بۆ ئه‌م ئامانج و مه‌ىه‌سته‌ش، دامه‌زراوه‌ و لایه‌نه‌ پێوه‌ندیداره‌کانیش ده‌بێت هاوکار و پشتیوانی ده‌وڵه‌تبن بۆ باشتر په‌روه‌رده‌کردنی لاوان.

ئه‌مڕۆ کێشه‌کانی لاوان له هه‌موو کۆمه‌ڵگه‌یه‌کدا، گرنگ و هه‌ستیارن.چونکه‌ لاوان به‌گشتی که‌سانی ساده‌ و که‌مئه‌زموونن و زوو ده‌که‌ونه‌ ژێر کاریگه‌ریی دیارده‌ و ئایدۆلۆژیا و بیروباو‌‌ڕه‌ جۆراوجۆره‌کانه‌وه‌، ده‌توانرێت به‌ ئاسانی لاوان به‌ هه‌موو ئاڕاسته‌کاندا ببرێن و به‌کار بهێنرێن بۆ هه‌موو مه‌به‌ستێکی باش و خراپ.

کۆمه‌ڵگه‌ی پێشکه‌وتوو و ته‌ندروست و خۆشگوزه‌ران، ئه‌و کۆمه‌ڵگه‌یه‌یه‌ که‌ خاوه‌نی سیسته‌م و شێوازێکی پێشکه‌وتووانه‌ و مرۆڤدۆستانه‌ و سه‌رده‌مییانه‌ بێت بۆ ئاراسته‌کردن و راهێنان و په‌روه‌رده‌کردنی لاوان به باشترین شێوه‌ و سێوازی زانستیانه، تاوه‌کو جه‌ماوه‌ری لاوان، پێکهاته‌یه‌کی پێشکه‌وتوو و کارا و خۆشگوزه‌ران و سوودمه‌ندبن بۆ خۆیان و بۆ ئه‌مڕۆ و داهاتووی هه‌موو کۆمه‌ڵگه‌.

ئه‌مسته‌ردام

٢٣/١/٢٠١٤

 

 

 

 

·         بۆئه‌وه‌ی دووچاری کاره‌سات و هه‌رسێکيتر نه‌بينه‌وه‌، واز له‌حيزبايه‌تی بهێنن و کوردايه‌تی ‌بکه‌ن.

  • ·         کۆتايی به‌ مليشيای سياسی بهێنن و (له‌شکری نيشتمانيی کوردستان) دروست بکه‌ن.
  • ·     خوێندنگه‌ و فێرگه و ئامۆژگه‌ی سه‌ربازی بۆ پێگه‌ياندنی سه‌رباز و ئه‌فسه‌ر و کۆماندۆ و تێکۆشه‌ر و جه‌نگاوه‌ری ئاماده‌ و راهێنراو بۆ له‌شکری نيشتمانيی کوردستان دابمه‌زرێنن.
  • ·         هێزی پێشمه‌رگه‌ی کوردستان به‌ نه‌ته‌وه‌يی و نيشتمانی بکه‌ن و کۆتايی به‌ حيزبايه‌تی و ميليشياگه‌ری بهێنن.
  • ·     پێشمه‌رگه‌، به‌ڵگه‌ی زيندووی هه‌بوونی کورد و کورسستانه.پێويسته و ده‌بێت تۆکمه‌ترين به‌شه‌ بوودجه‌ی کوردستان‌ بۆ هێزه‌کانی پێشمه‌رگه‌ی و له‌شکری نيشتمانيی کوردستان ته‌رخان بکرێت.
  • ·     ته‌نها به‌ پێکهێنانی له‌شکرێکی راهێنراو و ئاماده‌کراو و پڕچه‌ککراوی نه‌ته‌وه‌يی و نيشتمانی، ده‌توانين له‌ ژيان و چاره‌نووسی خۆمان دڵنیا بين و نه‌‌ته‌وه‌ و نيشتمانه‌كه‌مان له‌ هه‌ڕه‌شه‌ و مه‌ترسييه‌کانی دوژمنان و داگيرکه‌ران بپارێزين.

ئه‌مڕۆ سه‌رده‌می ره‌خنه‌له‌خۆگرتن و به‌خۆداچوونه‌وه‌يه‌:

  • ·     ئه‌ی گه‌وره‌هێزه‌ سياسييه‌کان، ئه‌ی به‌رپرسانی حيزبه‌کان، ئه‌ی سه‌رانی ده‌سه‌ڵاتی کوردی له‌ باشووری کورستان، ئه‌مڕۆ هه‌موو ميلله‌ت به‌گشتی لێتان بێتزار و تووڕه‌ن، شه‌ڕی ناوخۆتان هه‌ڵگيرساند، هه‌زاران کوردتان به‌ ده‌ستی کورد به‌کوشتدا، زۆرترين ناکۆکی و دوژمنايه‌تيتان له‌ناو کوردسستاندا دروستکرد، گه‌وره‌ترين کاره‌سات و نائومێدبوونتان به‌سه‌ر کۆمه‌ڵگه‌ی کورده‌واريدا هێناوه‌!؟

ئيتر ئه‌مڕۆ کاتی ئه‌وه‌ هاتووه به‌ خۆتان و به‌ بيرکردنه‌وه‌كاىتان و به‌ هه‌ڵوێسته‌کانتاندا بچنه‌وه‌ به‌رامبه‌ر به‌ پڕژماره‌ترين له‌شکری هه‌ژاران و بێکاران و کرێچييه‌کان و ئاواره‌ و سه‌رگه‌ردانه‌کانی ژێر سايه‌ی ده‌سه‌ڵاتی ئێوه‌!؟

ئه‌وه‌ بۆ چاره‌که‌ سه‌ده‌يه‌که‌، گه‌وره‌‌هێزه‌ سياسييه‌کان و ده‌سه‌ڵاتی کوردی له‌ باشووری کوردستاندا، توانيان يه‌ک له‌شکر کۆمپانيای ساخته‌چی و بێويژدانی تورکی و ئێرانی و عه‌ره‌بی بهێننه‌ کوردستانه‌وه‌، توانيان يه‌ک له‌شکر کرێکار و کابان و خزمه‌تکاری ميله‌ته‌نانی هه‌ژاری بێگانه‌ بهێننه کوردستانه‌وه‌، توانيتان به‌ ميليۆنان تۆن خوارد و خواردنه‌وه‌ی ماوه‌به‌سه‌رچووی ده‌ره‌وه‌ هاورده‌ بکه‌ن و‌ له بازاڕه‌کانی کوردستاندا ساخيان بکه‌نه‌وه‌ و ده‌رخواردی ميلله‌تی بده‌ن، ئێستا زۆرترين رێژه‌ی نه‌خۆش و نه‌خۆشييه‌ ترسناکه‌کان له‌ناو باشووری کوردستاندا بوونييان هه‌یه‌.

له‌ژێێر سايه‌ی ده‌سه‌ڵاتی ئێوه‌دا ، يه‌ک له‌شکری ڕه‌ش و تابووری پێنجه‌م له باند و گروپی ئيسلاميی سياسی و هه‌زاران هه‌زار‌ مه‌لا و مامۆستای ئايينی و بانگخواز و مجێور و فه‌قێ و خوێندکاری ئايينیی سه‌ر به‌مان، دروستبوون و رۆژ به‌ رۆژيش له به‌هێزبوون و په‌ره‌سه‌ندنان، له‌ژێر سايه‌ی ده‌سه‌ڵاتی کورديدا 5200 مزگه‌وتی عه‌ره‌بی ئيسلامی له‌ باشووری کوردستاندا دروستکراون که گه‌وره‌ترين خه‌رجيی بوودجه‌ی کوردستانيان بۆ ته‌رخانکراوه و بێجگه‌ له‌ بڵاوکردنه‌وه‌ و په‌ره‌پێدانی ئيسلامچێتی و ئيخوانچێتی و ته‌عريبچێتی و عروبه‌ و توندوتيژيی دژ به‌ کچان و ژنان و ئاژاوه‌ی کۆمه‌ڵايه‌تی و خورافيات و ترسنۆکی زياتر هيچ سوود و به‌رهه‌مێکيان بۆ کۆمه‌ڵگه‌ی کورده‌واری نه‌بووه‌ و ناشيان بێت.ئه‌وه‌ بۆ چاره‌که‌ سه‌ده‌يه‌ک له‌شکرێک له‌ به‌رپرسانی سياسی و سه‌رمايه‌داری‌ دز و تاڵانچی و به‌رتيلخۆر و گه‌نده‌ڵ و بێويژدان دروستبوون که‌ سامانی ژێر زه‌وی و سه‌رزه‌ويی باشووری کوردستان به‌ تاڵان ده‌به‌ن و به‌ناوی خۆيانه‌وه‌ بانکه‌کانی هه‌نده‌رانیان پڕ له‌ دۆلار و يۆرۆ و پاوه‌ند کردووه‌ و هه‌ر به‌رده‌واميشن و تێرناخۆن! به‌ڵام له‌ ماوه‌ی ئه‌م هه‌موو ساڵانه‌دا نه‌تانتوانی پێويسترين و گرنگترين له‌شکر بۆ پاراستنی کورد و کوردستان دروست بکه‌ن که (له‌شکری نيشتمانيی کوردستان)ه‌.

17.08.2014

  • ·     به‌و هيوايه‌ی هه‌ر يه‌که‌و لای خۆيه‌وه‌ فشار بخاته‌ سه‌ر به‌رپرسانی گه‌وره‌ هێزه‌کان و به‌رپرسانی ده‌سه‌ڵاتی کوردی که‌ ته‌واو به‌خۆيان و بيرکردنه‌وه‌ و هه‌ڵسوکه‌وت هه‌ڵوێسته‌کانياندا بچنه‌وه‌ و له‌مه‌دوا به‌ڕاستی ببنه خزمه‌تکاری نه‌ته‌وه‌ و نيشتمان.
  • ·         تکايه‌ ئه‌گه‌ر پشتيوانيی ئه‌م پێشنيازانه‌ ده‌که‌يت، بۆ هاوڕێکانتی بنێره‌، له‌گه‌ڵ رێز و سوپاسی زۆردا بۆ هه‌مووتان.

 

 

 

مامۆستا عومەر شەمەيی، لەناو پۆلی خوێندنگەيەکی شۆڕشدا بە زللەيەک سزای کورێکی سەرۆک بارزانیی دابوو!.

رەوانشاد، عومەر شەمەيی کە ساڵی 1973 خوێندنی زانکۆی لەسلێمانی تەواوکرد، وەک ئەرکێکی نەتەوەيی و نيشتمانيی چووە ناو شۆڕشەوە و لە گەڵاڵە بوو بەمامۆستای شۆڕش.ئەوە نەريتێکی هاوبيرانی "کاژيک)* بوو، زۆربەی کاژيکەکان نەدەچوونە خزمەتی سەربازی و بڕوايان بەوە نەبوو کە لەسوپای داگيرکەرانی کوردستاندا خزمەتی سەربازی بکەن.

عومەر شەمەيی ئەو کاتە‌ی که‌ لەگەڵاڵه مامۆستای شۆڕش بوو، بە مامۆستا عومەر شەمەيی ناسراو بوو.يەکێ له خوێندکارەکانی، نيهاد بارزانى، کوڕی سەرۆک بارزانيی نەمر بوو.رۆژێک لەسەر ئامادەنەکردن و فەرامۆشکردنی وانەکانی، لەکاتی تووڕەبووندا، له پۆلەکەدا و لەبەرچاوی هەموو خوێندکارەکانی ديکەدا، زللەيەکی توند و گەرموگوڕ لە نيهادی خوێندکارى دەسرەوێنێت و نيهاد بەدڵی شکاو و گريانەوە دەگەڕێتەوە بۆ ماڵەوە.پاشان سەرۆک بارزانی لە رووداوەکە ئاگادار دەکەن و داوا دەکات کە ئەو مامۆستایه‌ی بۆ بانگ بکەن با خۆی بيبينێت و لە راستیی رووداوەکە ئاگادار بێت.کاکە عومەرم بۆی گێڕامەوە، وتی "پاشان هەستمکرد و تێگەيشتم کە ئەو توڕەبوون و زللەيە زۆر لەسەرم دەکەوێت و رەنگە ببێتە هۆکاری لەناوچوون يان زيندانيکردن و ئەشکەنجەدانم".هەرچۆن بێت، سەرۆک بارزانی بۆ لێکۆڵينەوە لەو رووداوە، مامۆستا عومەر بانگهێشی لای خۆيان دەکات و لە کۆبوونەوە و دانيشتنێکی تايبەتيدا کە بۆ لێکۆڵينەوە لەو رووداوە ئامادەکرابوو، مامۆستا عومەر راستيی رووداوەکە و هۆکاری توڕەبوونەکەی بۆ بارزانی دەگێڕێتەوە و بە بارزانی دەڵێت "ئەزبەنی: من لە نێو پۆلدا، جیاوازیی کوڕی ئێوە و کوڕی سه‌رۆککۆمار و منداڵی هیچ هاونیشتمانییەکی ئاسایی ناکەم ".سه‌رۆک بارزانی کە گوێی لە وته‌کانی عومەر شه‌مه‌یی دەبێت، بە ئازایەتی و راشکاوییەکەی سەرسام دەبێت.کاکە عومەرم خۆی دەيگێڕايەوە، دەيگوت "پێشتر چەند جارێک دوور بەدوور بارزانيی نەمرم بينی بوو، سەرۆک بارزانی زۆر بەشانوشکۆ بوو و ترس و سامێکی زۆر سەيری هەبوو.بەڵام ئەوەيە کەمجار بوو رووبەڕوو سەرۆک بارزانی ببينم و بۆ نەگبەتی بۆ لێکۆڵينەوە لە رووداوێکی لەو بابەتەش!" وتی " پاشان خۆم زۆرم پێناخۆش بوو و زۆر لەو زللەيە پەشيمان بوومەوە، نەک لەبەر ئەوەی کە نيهاد، کوڕی سەرۆک بارزانی بوو، بەڵکو بەهۆی تووڕەييەوە ئەو کارە ناخۆش و نەشياوەم بەرامبەر ئەو خوێندکارەی خۆم کردبوو!".دەيگوت، "نايشارمەوه، زۆر ترسام و خەمم بوو، لەبەر دوو شت: يەکەم، ئەوە بوو کە هەموو دەيانزانی من بەنهێنی ئەندام و کادرێکی رێکخراوی نەتەتەوەيی و نهێنيی "کاژيک)م و دەزگای پاراستنيش بەردەوام چاولەدووی کاژيکەکان بوو و کاژيکيش وەک رێکخستنێکی نهێنيی ناو شۆڕش، لەناو شۆڕشی کوردستاند ياساخ و نەخوازراو بوو!.دووهەم، ئەوە يەکه‌م جار بوو کەسێک بەو ئاشکراييە و لەناو خوێندنگەی شۆڕش و لە گەڵاڵەدا، زللەيەک لەکورێکی سەرۆکێکی بەدەسەڵات و بەناوبانگی شۆڕشی کوردستان بدات.ئەم دوو هۆکارە بەس بوون بۆ ئەوەی چارەنووسێکی ناديار چاوەڕووانم بکات.ئەگەر بارزانی سەرۆکێکی نادادپەروەر بووايە، هەر ئەو کاتە دەيتوانی لە تۆڵەی ئەو رووداوەدا، هەموو جۆره سزايەکی بدامایه‌ و کەسيش نەيدەتوانی پێشيان پێبگرێت".شايانی باسە، سەرۆک بەرزانیی نەمر، له‌گه‌ڵ ئه‌وه‌شدا که‌ سەرۆکێکی بەدەسەڵات و بەسام بوو، بەڵام مرۆڤێکی بەخشندە و لێبووردە بوو، هەموو ئەو کەسانەی کە نێزيکی بارزانی بوون و سەروکاريان لەگەڵياندا هەبووە، گەواهی بۆ ئەو تايبەتمەندييانەی بارزانی دەدەن.بەڵام خۆشبەختانه پاش ئەوەی کە سەرۆک بارزانی لەراستیی رووداوەکە تێگەيشتبوون، ئەو بڕيارە دادپەروەرانەيەی دابوو و خۆيشيان سزای نيهادی کوڕيان دابوو.هه‌روه‌ها بەپێچەوانەی پێشهاتی چاوەڕوانکراوه‌وه‌، سەرۆک بارزنی لەپاداشتی ئەو تووڕەبوون و زللەيەدا، سه‌رباری سوپاس و دەستخۆشانە‌، ئوتۆمبیلێکی جێبی خەڵاتی مامۆستا عومەر شەمەيی کردبوو، ئەویش جێبه‌کە‌ی پێشکەشی هێزی خەبات کردبوو.هێزی خه‌بات، ئه‌و هێزه‌ ئازا و شۆڕشگێر و ناسراوه‌ی شۆڕشی مه‌زنی ئه‌یلوول بوو که‌ فه‌رمانده‌که‌ی شۆڕشگێڕی گیانبه‌خشیووی کوردایه‌تی، کاک فه‌تاح محه‌مه‌د ئه‌مین بوو.هێزی خه‌بات‌ به‌ هێزی کاژیک و نه‌ته‌وه‌ییه‌کانی نێو شۆڕشی کوردستان ناسراو بوو.

 بەختياری شەمەيی

18.12.2013

ئەمستەردام

This email address is being protected from spambots. You need JavaScript enabled to view it.

تێبینی: وه‌کو ئه‌زموون کردنی دێمۆکراسێتی، ئه‌م نووسراوه‌م ناردن بۆ میدیا و راگه‌یاندنه‌کانی "پارتی دێمۆکراتی کوردستان)، چونکه‌ راسته‌وخۆ پێوه‌ندیداره‌ به‌وانه‌وه‌، ئه‌مه‌ یه‌که‌مجاره‌ که‌ نووسراوێک بۆ راگه‌یاندنه‌کانی ده‌سه‌ڵات و پارتی بنێرم، به‌ڵام له‌ وه‌ڵامێکی ده‌ماو ده‌مه‌وه‌ ئاگاداریان کردمه‌وه‌،‌‌ مادام رێگه‌یان پێنه‌دراوه‌ که‌ ده‌ستکاریی ئه‌م نووسراوه‌ بکه‌ن.ئه‌وان ناتوانن و نایانه‌وێت بڵاوی بکه‌نه‌وه.

خۆشبه‌ختانه‌ ئێستا به‌هۆی پێشکه‌وتن و زۆری و ئاسانیی ئامڕازه‌کانی گه‌یاندن و راگه‌یاندنه‌وه‌، ئاسانترین کار، بڵاوکردنه‌وه‌ی په‌یام و نووسراوه‌ له‌ تۆڕه‌ جیهانییه‌کاندا و گه‌یاندنیه‌تی به‌ زۆرترین خوێنه‌ر.

*وشه‌ی "کاژیک)، کورتکراوه‌ی ناوی یه‌که‌م پیته‌کانی "کۆمه‌ڵه‌ی ئازادی و ژیانه‌وه‌ و یه‌کێتیی کورد)ه.رێکخستنێکی‌ نه‌ته‌وه‌یی و‌ نهێنیی ئه‌و سه‌رده‌مه‌ بوو، که له‌‌ ١٤.٠٤.١٩٥٩دا له‌ لایه‌ن چه‌ند مامۆستا و دادوه‌ر و نووسه‌ر و رۆشنبیرێکه‌وه‌ له‌ شاری سلێمانی پێکهێنرابوو.دروشم و ئامانجی کاژیک، ئازادی و یه‌کسانیی کورد و یه‌کگرتنه‌وه‌ و سه‌ربه‌خۆیی کوردستان بوو.

--------------------------------------------------------------------------------------------------------

کورتەيەک لەژيانی رەوانشاد عومەر شەمەيی

عومەر محەمەد ساڵح - عومەر شەمەیی

لە بەهاری 1948 لەشاری سلێمانی لەدایکبووە.ساڵی 1973 بەشی کیمیای کۆلیژی زانستەکانی زانکۆی سلێمانیی تەواوکردووە.لەکۆتایی شەستەکاندا بووەتە ئەندامی کاژیک و یەکێک بووە لە کادرە هەرە پێشکەوتووەکانی و بەناوی "ئەزمەڕ)ەوە ناسراو بووە.سەرەتای هەفتاکان بووەتە سەرۆکی یەکێتیی قوتابیانی زانکۆی سلێمانی.لە دامەزراندنی پاسۆکدا پرسی پێکراوە بەڵام بەشداریی نەکردووە.لەشۆڕشی ئەیلوولدا بەشداری کردووە و لەهێزی خەباتدا بووە.پاشان لە گەڵاڵە بووەتە مامۆستای شۆڕش.ساڵی 1974 لە رۆژهەڵات لەلایەن دەزگای ساواکەوە بەتاوانی ئەندامێتیی کاژیک لێپێچینەوەی لەگەڵدا کراوە و پاشان ئازاد کراوە.بەشداریی کۆنفڕانسی خۆتواندنەوەی کاژیکی کردووە لە شاری نەغەدە لەساڵی 1975.ماوەیەکی زۆر فەرمانبەر بووە لە کارگەی جگەرەی سلێمانی.پاشان لە هەمان کارگە بووەتە بەڕێوەبەری بەشی پاککردنەوەی تووتن.

رۆژی 14-09-2008 بەنەخۆشیی شێرپەنجەی جگەر لەشاری سلێمانی کۆچی دوایی کردووە و لەگردی ناوەڕاستی شاری سلێمانی نێژراوە.

لەماڵپەڕی کورديپێدياوه.

http://www.kurdipedia.org/?lng=1&q=20081126135008528

کوردیپێدیا - عومەر محەمەد ساڵح - عومەر شەمەیی

www.kurdipedia.org

‏کوردیپێدیا پڕزانیاریترین و فرەزمانترین سەرچاوەی کوردییە!‏

Go to top