We have 160 guests and no members online

عبدالمجید هەریری

1_بودجه‌ی ٢٠١٣ی كاولستان ١٧ تريليۆن دينار بوو ، به‌وه‌ی تريلۆن ١٢ سفری له‌پێشه‌ ، به‌ حاسيبه‌كه‌تان لێكی بده‌نه‌وه‌ ، ١٠٠ دۆلار به‌ ١٢٣٠٠٠ ديناره‌ ده‌ی يه‌ك ده‌فته‌ر دۆلار ده‌كاته‌ ١٢٣٠٠٠٠٠ دوازده‌ مليۆن و سێ سه‌د هه‌زار دينار ، كه‌واته‌ ١٧ تريليۆن دابه‌ش ١٢٣٠٠٠٠٠ دوازده‌ مليۆن و سێ سه‌د هه‌زار دينار بكه‌ن ده‌كاته‌ ١٣٨٢١١٣ يه‌ك مليۆن و سێسه‌دو هه‌شتاو دوو هه‌زارو سه‌دو يازده‌ ده‌فته‌ر دۆلار !!!، باقيه‌كه‌ی ئاخری هه‌مووی لابه‌ره‌ چی ده‌مێنێته‌وه‌؟، ١٣٠٠٠٠٠ يه‌ك مليۆن و سێ سه‌د هه‌زار ده‌فته‌ر دۆلار !!، ئاخر توخودا سێ پارێزگا ئه‌وه‌نده‌ی بودجه‌ بێت به‌ چ مافێك هه‌ژارو كرێچی له‌م كاولستانه‌دا هه‌بێت ؟!.

2_ توبڵێی ئه‌م هه‌موو بودجه‌يه‌ بۆ چيه‌و كێ ده‌بيات ؟!، باشه‌ ئه‌م ياسايه‌تان پێ چۆنه‌ كه‌ له‌كاتی هه‌ڵبژاردنه‌كان دا هه‌ر ده‌نگێك له‌سه‌ر حوكومه‌ت به‌ 1.346.000 يه‌ك مليۆن و سێ سه‌دو چل و شه‌ش هه‌زار دينار ڕابوه‌ستێت ؟!، ئاخر توخوا ئه‌مه‌ ياسايه‌ يان به‌هه‌ده‌ردانی پاره‌ی ئه‌م وڵاته‌يه‌ ؟!.

له‌ لڤينی ژماره‌ ٢٤٨ ی ٢٠_ ١٠_٢٠١٣ دا نوسراوه‌ :

ئه‌و حزبانه‌ی نه‌گه‌يشتنه‌ په‌رله‌مان واتا كورسيان نه‌هێنا ، ساڵانه‌ ٢٨ مليار و ٥٥٦ مليۆن دينار وه‌رده‌گرن !! ، ئه‌مه‌ش واتا هه‌ر ده‌نگێكی ئه‌م به‌ڕێزانه‌ له‌سه‌ر حوكومه‌ت به‌ 1.346.000 دينار ڕاوه‌ستاوه‌ ، ئاخر ته‌وخوا ئه‌وه‌ ڕاسته‌ !، ێ باشه‌ كاكه‌ ئێوه‌ نه‌گه‌يشتنه‌ په‌رله‌مان بۆ حوكومه‌ت ئه‌م هه‌موو پاره‌تان بداتێ له‌پێناو چی ، له‌وه‌ش سه‌يرتر نووسيتيان "ئه‌م گوژمه‌يه‌ ده‌كاته‌ دوو ئه‌وه‌نده‌ی بودجه‌ی هه‌رسێ لايه‌نی ئۆپۆزسيۆن"؟!.

سه‌يری ژماره‌ی ده‌نگه‌كانيان بكه‌ن :

حزبی شيوعی به‌ ١٢٣٩٢ ده‌نگ ٥٨٠ مليۆن دينار ده‌بات .

سۆشيال ديموكرات به‌ ١٢٥٠١ ده‌نگ ٣٥٠ مليۆن دينار .

زه‌حمه‌تكێشان به‌‌ هاوپه‌يمانی چه‌ند حزبێك ئه‌وجا ٨٦٨١ ده‌نگيان هێنا و ٤٠٠ مليۆن دينار ده‌به‌ن .

له‌وانه‌ هه‌مووی سه‌يرتر ئه‌وه‌يه‌ كه‌ پارتی پارێزگارانی كوردستان به‌ ٨٣٦ ده‌نگ ٤٥ مليۆن دينار ده‌بات ، ێ باشه‌ كاكه‌ وه‌ڵا منيش به‌ئه‌ندازه‌ی حزبێك براده‌رم پێ كۆده‌بێنه‌وه‌و به‌ژداريش ده‌كه‌م به‌خودای زياتريش له‌و حزبه‌ ده‌هێنم ئه‌و جا به‌چ مافێك ئه‌و پاره‌يه‌ وه‌ربگرم ، توبڵێی هه‌ردوو حزبه‌كه‌ی ده‌سته‌ڵات چه‌ند ببه‌ن؟!، كاكه‌ ئه‌ی هاواااار ڕه‌حمێكتان به‌ سامانی ئه‌م گه‌له‌ قوڕبه‌سه‌ره‌ بێته‌وه‌ ، براده‌رێكم له‌ ئه‌وروپا ده‌ژيا ده‌يگوت له‌وێ ئه‌وه‌ نيه‌ حزبێكی گه‌وره‌ به‌هه‌موو ئه‌ندامه‌كانی له‌سه‌ر حوكومه‌ت بژيێت ، به‌ڵكو‌ هی وا هه‌يه‌ گه‌وره‌ترين حزبه‌و كه‌چی ٣٠٠٠ ئه‌ندامی نيه‌ ، واتا جه‌ماوه‌رين نه‌وه‌ك ڕيكخستنی .

3_ له‌هه‌مان ژماره‌ی لڤين دا هاتوه‌ رشيد تاهيری بريكاری وه‌زاره‌تی دارايی سێ پارێزگاكه‌ به‌ ٥ نوسراوی ڕه‌سمی جيا له‌ ٢٩_٦_٢٠٠٨ دا ١٦٤٧ مه‌تر زه‌وی وه‌رده‌گرێت ، ئه‌گه‌ر ئه‌م زه‌ويه‌ ١٦ شوقه‌ی سێ قاتی له‌سه‌ر ڕووبه‌ری ١٠٠ مه‌تری تێدا دروست بكرێت جێگای ٢٠٠٠ گه‌نجی بێ ماڵ و حاڵی تێدا ده‌بێته‌وه‌ !، توخودا كامه‌يان باشتره‌ ؟!، تو سه‌يری ئه‌م به‌زمه‌ !، گه‌نجي واشمان هه‌يه‌ هيوايه‌تی ئه‌وه‌ ئه‌خوازێ سه‌ری مانگ دانه‌يه‌ت نه‌وه‌ك خاوه‌نی خانوه‌كه‌ی بێت و داوای كرێی خانوه‌كه‌ی بكات ، ئه‌وه‌ی سه‌ير بێت له‌كاتی نوسينی ئه‌م خاڵه‌دا له‌ NRT خۆپشياندانێكی پيشان ده‌دا بۆ دابه‌ش كردنی زه‌وی له‌ كه‌لار و مامۆستايه‌ك ده‌يوت ٢٠ ساڵم خوێند حه‌قی خۆمه‌ زه‌وی وه‌ربگرم ، نه‌ك نامانده‌نێ به‌ڵكو ئه‌وه‌ دوو ڕۆژه‌ هه‌رچی به‌رپرسی شار هه‌يه‌ ته‌نانه‌ت ئاماده‌ی ئه‌وه‌ش نين له‌ ژووره‌كانيان بێنه‌ ده‌ره‌وه‌ !.

4_ له‌م كاولستانه‌ی ئێمه‌دا زۆر سه‌يره‌ كاتێ يه‌كێك ده‌بێته‌ به‌ڕێوه‌به‌ر يان به‌رپرس ئيدی ئه‌وه‌ سه‌ره‌تا خۆی و ده‌وروو به‌ری تێريش نابن ئه‌وجا ئه‌گه‌ر تۆزێك خزمه‌تی خه‌ڵك بكه‌ن ، له‌وه‌ش سه‌ير تر ئه‌وه‌يه‌ كاتێ ده‌گه‌نه‌ كورسی ئيدی چۆن بنێشتيان پێوه‌ نوسابێت ته‌واو له‌ كورسيه‌كه‌ نابنه‌وه‌ ، وه‌ڵاهی بێ موباله‌غه‌ يه‌كێك ده‌ناسم له‌ دوای ڕاپه‌رينه‌وه‌ به‌ڕيوه‌به‌ره‌ !، ئه‌رێ كاكه‌ كه‌سی تر شايه‌نی ئه‌و كورسيه‌ی به‌ڕيزيان نيه‌ ؟!.

5_ له‌وه‌ی سه‌ره‌وه‌ سه‌يرتر ئه‌وه‌يه‌ قه‌ت نه‌مانبينی تاقه‌ كه‌سێك له‌م كاولستانه‌ له‌سه‌ر گه‌نده‌ڵی دادگايی بكرێت !، ئه‌مه‌ دوو گريمانه‌ی بۆ هه‌يه‌ ، يه‌كه‌ميان: ئه‌وانه‌ مرۆڤ نين به‌ڵكو فريشته‌ن خوداوه‌ندی مه‌زن به‌ ڕه‌حمه‌ته‌وه‌ بۆمانی ناردوون و هه‌ڵه‌ و دزی ناكه‌ن كه‌ ئه‌مه‌ش ئه‌سته‌م و مه‌حاڵه‌ ، دووه‌ميش ئه‌وانه‌ گه‌نده‌ڵی و دزی ده‌كه‌ن به‌ڵام بۆ نه‌تۆرانی دڵه‌ ڕه‌شه‌كانيان دادگايی ناكرێن نه‌وه‌ك جه‌نابيان بتۆرێن و بچنه‌ ڕيزی حزبه‌كه‌ی ئه‌و به‌ر، كاكه‌ وه‌ڵاهی به‌وه‌ش شوكرين هه‌ر به‌رزتر نه‌كرێن ، به‌خوا من بينيومه‌ له‌سه‌ر گه‌نده‌ڵی لايان دا به‌ڵام له‌جياتی دادگايی به‌رزتر كرا !!!، وه‌ڵا بابه‌ خۆش حوكومه‌ت و خۆش ياسا !.

6_ يه‌كێك له‌ به‌رپرسه‌ قسه‌ گه‌وره‌كانی وه‌زاره‌تی پێشمه‌رگه‌ سه‌ردانی كۆمه‌ڵێك پێشمه‌رگه‌ی كردبوو ، داوای كردبوو كه‌ دان به‌خۆيان دابگرن و پشتيوانی له‌ كوردستان بكه‌ن ، پێشمه‌رگه‌يه‌ك وتبووی موچه‌مان وه‌رنه‌گرتوه‌ ئه‌ويش وتبووی به‌خوای منيش وه‌رمنه‌گرتوه‌ ، به‌ڵام پێشمه‌رگه‌كه‌ وه‌ڵامێكی پێدابوو سوێند به‌خوای ئه‌گه‌ر من له‌ شوێنی ئه‌و به‌رپرسه‌ بوام ده‌بووم به‌ قه‌تره‌ ئاوێك و به‌ زه‌وی دا ده‌چومه‌ خواره‌وه‌ ، پێشمه‌رگه‌كه‌ وتبووی "ئاخر جه‌ناب ئه‌و پێلاوه‌ی تۆ به‌ موچه‌ی دوو مانگی من ناكڕدرێت "، ئااااااای حه‌يا بۆكوێ چوويت ، زانايه‌كی عه‌ره‌بی وتبووی "ضمير ته‌نها له‌ ڕێزمانی عه‌ره‌بی دا ماوه‌ "ئه‌ها كاتێك ڕسته‌يه‌ك ئيعراب ده‌كه‌ی ده‌ڵێی "ضمير متصل مبنى في محل رفع فاعل "مه‌به‌ستی له‌وه‌يه‌ ، له‌ ده‌نگ و باسه‌كانيش بيستم كه‌ پێشمه‌رگه‌يه‌ك ئه‌لقه‌ی ده‌ستی خۆی فرۆشتبوو له‌به‌ر پێويستی !، توبڵێی به‌رپرسه‌ دزه‌كان ويژدانی خۆيان كه‌ی فرۆشتبێ ؟!.

7_ ده‌ڵێن له‌كاتی بانگه‌شه‌ی هه‌ڵبژاردن دا كه‌ ماوه‌ی درۆكردن و هه‌ڵخه‌ڵه‌تاندنی گه‌ل بوو ، به‌رپرسێك كه‌ خۆی كانديد كردبوو، چوو بوو بۆ ماڵی كۆنه‌ براده‌رێكی مناڵی خۆی كه‌ ماوه‌يه‌كی زۆريش له‌گه‌ڕه‌ك دا درواسێ بوون ، سه‌ردانيان ده‌كات چونكه‌ نه‌وه‌و كوڕی زۆر هه‌بوون و ده‌نگيان زۆر بوو ، دوای ئه‌وه‌ی جه‌نابيان داده‌نيشێت كوڕه‌كانی به‌خێرهاتنی ده‌كه‌ن و ئه‌ويش ده‌ست‌ ده‌كات به‌ قسه‌ كردن و دواتر ده‌پرسێت "ئه‌وه‌ جه‌نابی باوكتان ديارنيه‌ وه‌ڵا زۆر غه‌ريبيم كردوه‌ ئه‌وه‌ 3 مانگه‌ نه‌مبينيوه‌ "؟!، كوڕه‌كانی ده‌ڵێن وه‌ڵا جه‌ناب ئه‌وه‌ 2 ساڵه‌ بابمان چۆته‌ به‌ر ڕه‌حمه‌تی خوا !!!!، ئه‌وه‌جا به‌ يه‌ك كيلۆ ئاره‌قه‌وه‌ ده‌چێته‌ ده‌ره‌وه‌ ، وه‌ڵا بابه‌ خۆش كانديد .

8_ يه‌كيك له‌برياره‌ باشه‌كانى سه‌رۆكى حكومه‌ت : به‌ئيمزاى خۆى به‌نوسراوى ره‌سمى برياريدا موجه‌ى وه‌زير و هه‌موو ئه‌و كه‌سانه‌ى به‌ده‌ره‌جه‌ى وه‌زير موجه‌ وه‌رده‌گرن ته‌نها 50%ى موجه‌كانيان بۆ خه‌رج بكرێت، ئه‌مه‌ زۆر زۆر باشه‌ ، به‌ڵام ئه‌وان له‌ ميزانه‌يی وه‌زاره‌ته‌كان قه‌ره‌بووی ده‌كه‌نه‌وه‌و ده‌ست و بازووی لێ هه‌ڵده‌كه‌ن كه‌ زۆر جاری وا هه‌يه‌ له‌شتی زۆر سه‌ير سه‌رف ده‌كرێت ، بۆيه‌ حه‌ق وايه‌ چاودێری ئه‌وه‌ مه‌سه‌له‌يه‌ بكه‌ن و چاودێريه‌كی ته‌واو و پاك له‌سه‌ر كاره‌كان و سامانيه‌كانيان دابنێن ، باشه‌ من له‌وه‌ سه‌ر ده‌رناكه‌م بۆ ئه‌وان كاتێ ده‌بنه‌ وه‌زير يان كه‌سانی تر كاتێ ده‌بنه‌ به‌رپرس و به‌ڕێوه‌به‌ر ئيدی به‌ ماوه‌يه‌كی كه‌م گێچی گوزه‌ران و زه‌نگين بوونيان له‌ شێوه‌ی ڕێبه‌ركويكه‌وه‌ ده‌بێته‌ فاست لينك ؟!.

9_ ڕۆژێك به‌ڕێزێك نوسيبووی كاتێك له‌ په‌رله‌مانی به‌غدا ده‌نگو باسی ئه‌وه‌ هه‌بوو گوايه‌ به‌نيازن خانه‌نشينی په‌رله‌منتاران نه‌مێنێت و موچه‌يان كه‌م ببێته‌وه‌ كه‌سێك كه‌ حزبه‌كه‌ی به‌نياز بوه‌ كاندنی بكات ته‌له‌فۆنی بۆ په‌رله‌مانتارێكی حزبه‌كه‌ی كردبوو وتبووی "ئه‌رێ ئه‌وه‌ ئه‌و ده‌نگۆيه‌ ڕاسته‌ ؟، كاكه‌ ان شاء الله وانيه‌ تا منيش ده‌بم به‌ په‌رله‌مانتار"وه‌ی به‌بانانه‌وه‌ ته‌واومان كرد ، كوڕ هێشتا نه‌بۆته‌ نوێنه‌ری گه‌ل خه‌می موچه‌ی خۆيه‌تی .

10_ فه‌رهاد پيربال ئه‌م سه‌يرو سه‌مه‌ره‌ی زۆر جوان له‌ شيعرێك دا به‌رجه‌سته‌ كردوه‌ ، سه‌يری ياسای بێ مانا و نا دادپه‌روه‌ری هه‌ندێك له‌ مرۆڤه‌كان بكه‌ن :

پيربال وای شيعراندبوو "په‌رله‌مانتار له‌ مانگێك دا 10 جار ده‌ستی خۆی به‌رز ده‌كاته‌وه‌ كه‌چی 7 مليۆن وه‌رده‌گرێت ، پۆليسی هاتوچۆ له‌ مانگێك 500 جار ده‌ست هه‌ڵده‌بڕێت به‌ڵام 700 يان 800 هه‌زار وه‌رده‌گرێت "، ئه‌مه‌ سه‌ڕه‌رای ئه‌وه‌ی ئه‌وان ژووره‌كانيان هه‌موو سپليت ڕيژ كراوه‌و كاكی پۆليسی ماندوو نه‌ناسيش هاوينان له‌به‌ر گه‌رماو زستانانيش له‌به‌ر سه‌رماو سۆڵه‌ .

لاحول ولا قوة الا بالله العلي العظيم

خوايه‌ گيان ئيدی ئه‌م سته‌مانه‌ قه‌بوڵ مه‌فه‌رموو .

ئه‌م كاولستانه‌ی ئيَمه‌ زۆر جێگای غه‌م و خه‌فه‌ته‌ :

1_ هه‌موو جيهان چاوی پيسيان بڕيوه‌ته‌ خێرو بێره‌ خێرلێنه‌ديوه‌كه‌مان ، هه‌ر شوێنێكی ئه‌م وڵاته‌ هه‌ڵبكۆڵی نه‌وت يان شتێكی لێ ده‌بينيه‌وه‌ كه‌ ببێته‌ ده‌ستمايه‌كی باش ، لێره‌ نه‌وت بۆ توركياو له‌ عێراق به‌گشتی بۆ جيهان ده‌ڕوات ، نه‌وتی عێراق بۆ ئه‌مريكا ده‌ڕوات ، سه‌يركه‌ن له‌وێ به‌رميلی نه‌وت به‌ 80 دۆلاره‌ به‌ڵام لێره‌ به‌ 250 دۆلاره‌ !!، ئاخر توخوا ئه‌وه‌ كه‌ی ڕاسته‌ !؟، بۆيه‌ ڕيش سپيێكی دڵ پڕ له‌ ئاهو كه‌سه‌ر زۆر به‌غه‌مباريه‌وه‌ ده‌يوت "ئه‌تو وه‌ره‌ له‌سه‌ر نه‌وت بخه‌وی و به‌رميليشی به‌ 250 دۆلار بيت هه‌ی ........ی له‌و حوكومه‌ته‌ "، كه‌ وتم خاڵۆ سه‌برت هه‌بێت وتی سه‌بر تڕێنيان كردين .

2_ سه‌يری ئه‌م هه‌موو رێژه‌ی هه‌ژارييه‌ بكه‌ن له‌م كاولستانه‌ !، به‌ڵام سه‌يركه‌ن ڕۆژ به‌ڕۆژ هه‌ژار هه‌ژارترو زه‌نگين زه‌نگينتر ده‌بێ ، كه‌ ئه‌مه‌ زه‌نگێكێی زۆر مه‌ترسيی داری دونيای مادديه‌ت و لێك هه‌ڵوه‌شانه‌وه‌ی كۆمه‌ڵگايه‌، ئاخر ئه‌دی ئه‌وه‌ سه‌ير نيه‌ به م سه‌رمايه‌ ماڵ هه‌بێت نه‌وتی بۆ سۆپا شڕۆله‌كه‌ی نه‌بێت و زه‌نگينی واش هه‌بێت چێشتخانه‌كه‌شی ماڵه‌وه‌ی سپڵيتی لێبێت‌ ؟!.

3_ چه‌نده‌ سه‌يره‌ له‌م كاولستانه‌ ئێمه‌دا ئه‌وه‌ی هه‌ڕه‌شی بايكۆت كردنی ده‌وام بكات ڕيزبه‌ندی وه‌زاره‌ته‌كانی بۆ تێك ده‌درێت و موچه‌ی ده‌درێتێ ، ئه‌وانه‌ی خۆشيان بێ ده‌نگ بكه‌ن ئه‌وا ده‌بنه‌ به‌ردی بن گۆم ، ياسای دارستان "القوي يأكل الضعيف"، وه‌ك ئه‌وه‌ وايه‌ لێره‌ به‌هه‌مان شێوه‌ی وڵاتی "فه‌نته‌ڵۆس "پێوه‌ره‌كان پێچه‌وانه‌ بكه‌ينه‌وه‌و بڵيين "ئاو بێنه‌و ته‌يمموو‌م بكه".

4_ به‌يه‌ك مانگ نه‌ناردنی پاره‌ له‌ به‌غداوه‌ توشی ئه‌م به‌زمه‌ساته‌ بووين ، ئه‌ی باشه‌ بۆچی داوای سه‌ربه‌خۆيی ده‌كه‌ين ؟!، به‌چی داوای ده‌كه‌ین !، ئه‌وجا ئه‌وه‌ی سه‌يربێت به‌رپرسانی به‌غدا ده‌يانوت ئێمه‌ پاره‌ی مانگی يه‌كمان هه‌موو ناردوه‌ ، ئێره‌ش ده‌يانوت نه‌هاتوه‌ ، مه‌لا مه‌شهور وته‌نی "ئه‌ی كێ شه‌كری شكاندوه‌"؟!، تو بڵێی له‌ ڕێگا بزر نه‌بوبێ ؟!، ئه‌دی باشه‌ تو بڵێی موچه‌ی ئه‌وانيش دوا كه‌وتبێ ؟!، يان ئه‌وان ئه‌وه‌نده‌يان پاشه‌كه‌وت كردوه‌ ئه‌گه‌ر موچه‌ له‌ زاكيره‌ی مرۆڤايه‌تی بسڕينه‌وه‌ ئه‌وان نه‌ك هه‌ر پێويستيان پێی نيه‌ به‌ڵكو هه‌ر بيريشيان ناكه‌وێته‌وه‌ ؟!.

5_ من له‌وه‌ سه‌ر ده‌رناكه‌م ئه‌م پشوه‌ی يه‌كشه‌مه‌ بۆچيه‌ ؟!، مادام يه‌ك مانگ و زياتريش بۆ وه‌رگرتنه‌وه‌ی كارته‌كان هه‌يه‌ پشووی بۆ چيه‌ ؟!، ئه‌وجا ئه‌وه‌ سه‌يره‌ "KNN"ده‌يوت ئه‌م كارتانه‌ش ده‌نگی مردووانی تێدايه‌ ؟!، ئه‌و جا بۆچی ئه‌م كاته‌ خراپه‌ بۆ پشوو ؟!، ئه‌مه‌ دوای ئه‌وه‌ی TV يه‌كان سه‌ريان له‌م خه‌ڵكه‌ شێواند ، هه‌ندێك وتيان پشوه‌ دوای هه‌ونه‌بوو ، دواتر وتيان هه‌وه‌، سعات 12 ی شه‌و يه‌كێكی تر وتی هه‌ونيه‌ ، جا باشه‌ كاكه‌ له‌مه‌ودا ئه‌گه‌ر"يوم الشك "داهات تا پارشێوان داده‌نيشين بزانين مانگ ده‌بينرێت يان نا ؟!.

6_ به‌حيساب به‌ڕيوه‌به‌رو به‌رپرسه‌كان خزمه‌تكاری خه‌ڵكن !، ئه‌رێ ئه‌ی هاواااااااااار قه‌ت بوه‌ خزمه‌تكار مافی گه‌وره‌ی خۆی بخوات و دزی و خيانه‌تی لێبكات ، غه‌می هه‌ره‌ گه‌وره‌ش له‌ چ ياسايه‌ك داهاتوه‌ خزمه‌تكار موچه‌كه‌ی سه‌د ئه‌وه‌نده‌ی گه‌وره‌ی خۆی بێت ؟!.

7_ له‌م كاولستانه‌ی من شه‌رم زۆر كه‌م ماوه‌ ، سياسه‌ت به‌ته‌واوی ئه‌م مه‌فهومه‌ی وه‌رگرتوه‌ كه‌ ده‌ڵێن واتا "درۆ"، تۆ سه‌ير بكه‌ هێشتا حوكومه‌ت پێك نه‌هاتوه‌ ، ێ باشه‌ كاكه‌ ئێوه‌ بانگه‌شه‌ی ديموكراسی ده‌كه‌ن ، هه‌ی مليۆنان جار حه‌ياو عه‌مری ئه‌م ديمۆكراسيه‌ نه‌مێتێت كه‌ تۆ قه‌بوڵی ئه‌وه‌ نه‌كه‌ی له‌ دووه‌مه‌وه‌ ببی به‌سێيه‌م و باوه‌ڕت به‌ گۆڕانكاری پله‌ی هێزه‌كان نه‌بێت ؟!، ئه‌وه‌ی يه‌كجار جێگای غه‌م بێت ئه‌وه‌يه‌ به‌رپرسێك ده‌يگوت "چی بۆ حزبه‌كه‌ی ئێمه‌ باش بێت ئێمه‌ ئه‌وه‌مان قه‌بوڵه‌ "، واتا ئه‌وه‌ی بۆ خه‌ڵك باشه‌ نا ئه‌وه‌ی بۆ حزبه‌كه‌تان !، "خه‌ڵكيشتان به‌ هه‌رامه‌ی "، ئێ باشه‌ كاكه‌ ئه‌گه‌ر ئه‌م جاره‌ ئه‌وه‌تان قابيل نه‌بوو ؟، يان بڵێن "تمنی منقطع "بوو ؟!، ئه‌بێ جارێكی تر دوعا بكه‌ين بڵێن ياخوايه‌ ئه‌مجاره‌ له‌ هه‌ڵبژاردنه‌كان كه‌س له‌ حه‌جمی خۆی كه‌متر نه‌هێنێ نه‌وه‌ك تووشی ئه‌م به‌زم و ڕه‌زمه‌ ببينه‌وه‌ .

8_ يابان ده‌يه‌مين وڵاته‌ له‌ ڕووی زۆری دانيشتوانه‌وه‌ كه‌ ده‌گاته‌ 127.700.000 سه‌دو بيست و حه‌وت مليۆن و حه‌وت سه‌د هه‌زار كه‌س ، واتا زياتر له‌ 25 جار ئه‌وه‌نده‌ی ئێمه‌ن ، كه‌چی له‌ دوو هه‌فته‌ دا هه‌ڵبژاردن ته‌واو بوو حوكومه‌تيش پێك هات ، لای ئێمه‌ش به‌رژوه‌ندی وڵات و وڵاتيان زه‌ڕبی سفر كراوه‌، خاڵۆ گرنگ ئه‌وه‌يه‌ من نه‌بمه‌ سێيه‌می وڵات و شكۆو پله‌م نه‌شكێت ئيدی چی ده‌قه‌ومێ پێك دێ ياخود پێك نايێ ئه‌وه‌ كێشه‌ی من نيه‌ ؟!، ئه‌وه‌ ديمۆكراسيه‌ يان ديمۆكتاتۆريه ؟!.

9_ باشه‌ ئه‌م هه‌موو خه‌ڵكه‌ له‌سه‌ر خه‌رجی خۆيان ڕوويان له‌ وڵاتانی ده‌ره‌وه‌ كردوه‌ بۆ خوێندنی باڵا ، ئه‌گه‌ر به‌هه‌مووی 3000 كه‌س ڕۆيشتبن تا ته‌واو بونيان هه‌ر يه‌كێك 10.000 ده‌ هه‌زار دۆلار خه‌رجی بێت واتا يه‌ك ده‌فته‌ر ئه‌وا ده‌كاته‌ 30.000.000 سی مليۆن دۆلار واتا 3000 سێ هه‌زار ده‌فته‌ر دۆلار ، باشه‌ هۆۆۆۆۆ وه‌زيری خوێندنی باڵا توخودا تاوان نيه‌ ئه‌م هه‌موو پاره‌يه‌ بچێته‌ ده‌ره‌وه‌ ؟!، باشه‌ كاكه‌ بۆ لێره‌ خوێندنی باڵا به‌پاره‌ ناكه‌نه‌وه‌ ؟!، ئه‌م پاره‌يه‌ بۆ كاولستان بێت باشتر نيه‌ ؟!.

10_ هه‌روه‌ك له‌ خاڵی 7 دا باس كراوه‌ لێره‌ شه‌رم نه‌ماوه‌ ، وه‌ڵاهی من له‌ شوێنی وه‌زيری دارايی بوامه‌ زۆر له‌مێژ بوو ده‌ستم له‌كار كێشابوه‌وه‌ ، ئه‌گه‌ر وه‌زيری كاره‌با ده‌بووم ، له‌ژيانم سه‌يری ده‌رگای وه‌زاره‌تی كاره‌باشم نه‌ده‌كرد ، ئه‌وه‌جا ئه‌وه‌ی جێگای به‌زم و پێكه‌نين و له‌هه‌مان كاتيش گريان و غه‌م بێت ئه‌وه‌يه‌ كه‌ له‌ 2006 به‌رپرسێك وتبووی وه‌ڵاهی ئه‌گه‌ر تا 2010 كاره‌با چاك نه‌بوو ئه‌وه‌ حه‌ق وايه‌ ئه‌م حوكومه‌ته‌ به‌رد باران بكرێت ،هههههههه تۆ بڵێی ئێستا ئه‌م به‌رپرسه‌ چی بڵێت ؟، يان به‌خۆی كاره‌بای هه‌يه‌و وای زانيوه‌ كه‌ به‌ڵێ ئيدی شتێك له‌ كاولستان دا نيه‌ به‌ناوی كێشه‌ی كاره‌با ؟!، له‌ شوێنی وه‌زيری كاروكاروباری كۆمه‌ڵايه‌تی بوامه‌ مادام بێ كاری بنی نه‌هاتوه‌ هه‌ر زوو وازم ده‌هێنا ، ئه‌گه‌ر وه‌زيری پلان دانان بومايه‌ قناعه‌تم به‌ سه‌رۆكی حوكوت ده‌هێنا كه‌ وا بكات ته‌نها نيوه‌ی ميزانيه‌ی وه‌زاره‌ته‌كان ته‌رخان بكرابايه‌ بۆ دروستكردنی خانوو، ئه‌وا هه‌رچی كرێچی هه‌بوو ده‌مكرده‌ خاوه‌نی شوقه‌ی سه‌كه‌نی ، به‌ڵام كه‌ گه‌نجێك له‌به‌ر نه‌بوونی شوێنی نيشته‌جێبوونی ژن نه‌هێنێ شه‌رمه‌ كه‌ من وه‌زيری پلان دانان و نيشته‌جێ و ئه‌م دێيه‌ وێران و ناوه‌ گه‌ورانه‌ بم ، ئه‌و كه‌سه‌ی كه‌ زۆر له‌جياتی ئه‌و شه‌رم دايگرتم وه‌زيری ته‌ندروستی بوو ، وه‌ڵاهی له‌ ژێر ده‌سته‌ڵاتی وه‌زاره‌تی من ئه‌م هه‌موو كه‌سه‌ ڕووناكی چاويان له‌ده‌ست بدابايه‌ نه‌ك وه‌زاره‌ت به‌ڵكو كوردستانيشم به‌ جێده‌هێشت !.

11_ گه‌وره‌ترين سته‌م و نيشانه‌ی نا دادپه‌روه‌ری و كاولستانی ئه‌م كاولستانه‌ ئه‌وه‌يه‌ كه‌ به‌رپرسه‌ خزمه‌تكاره‌كانی ئێمه‌ هه‌ر يه‌كێك 5 تا 6 ڤێللايان له‌سه‌ر گرد و ته‌پۆلكه‌كان دروست كردوه‌و لا‌وه‌كانی ئێمه‌ش له‌ترسی كرێی خانوو ژن نا‌هێنن !، ئه‌وجا ئه‌وه‌ش غه‌می گه‌وره‌يه‌ زۆر به‌ گه‌وره‌يی له‌سه‌ری ده‌نوسن "هذا من فضل ربي "تكايه‌ بيكه‌ن به‌ "هذا من دم شعبي ".

12_ مه‌زنترين شه‌رمه‌زاری بۆ ئه‌وان ئه‌وه‌يه‌ كوڕه‌كانيان كاتێ ده‌چنه‌ ناو كه‌ژاوه‌ی زێڕين ئه‌وا له‌ خۆشترين وڵاتانی دونيا مانگی هه‌نگوينی به‌سه‌ر ده‌به‌ن ، به‌ڵام لاوه‌ هه‌ژاره‌كانی ئێمه‌ كاتێ ده‌چنه‌ ناو "كه‌ژاوه‌ی ته‌نه‌كه‌ "ئه‌وا مانگی خه‌م و خه‌فه‌تيان به‌ فرۆشتنی زێرو گه‌وهه‌ری بوكه‌خان بۆ دانه‌وه‌ی قه‌رزه‌كانی ژنهێنانيان به‌سه‌ر ده‌به‌ن .

 خوايه‌ گيان ئه‌م سته‌مانه‌ ئيدی قه‌بوڵ مه‌فه‌رموو .

لاحول ولا قوة الا بالله العلي العظيم .

تا به‌شی سێيه‌م خواتان له‌گه‌ڵ 

ئه‌م وڵاته‌ی ئێمه‌ زۆر سه‌يره‌ :

1_ به 2 پارێزگا 190 مليۆن دينار بۆ ياری ئاگرينی سه‌ری ساڵ ته‌رخان كرا كه‌ ده‌كاته 16 ده‌فته‌ر دۆلار !، كه‌چی ڕيش سپی وا هه‌ية هه‌زاران نانی به‌ پێشمه‌رگه‌ داوه‌و ئێستاش له‌بانيه‌وه‌ تا ئێواره‌ له‌ديار گوله‌به‌ڕۆژه‌كانی ڕه‌نگه‌ بايی 4 هه‌زار بفرۆشێت !.

2_ ئه‌م هه‌موو پاره‌و سامانه‌ی په‌رپرسان و فه‌خفه‌خه‌لێدانيان ،ڕه‌نگه‌ ته‌نها نه‌سريه‌ی هه‌ندێكيان موچه‌ی هه‌زاران فه‌رمانبه‌ری بۆ دابين بكرێت ئه‌دی باشه‌ بۆ پاره‌ بۆ موچه‌ نيه‌ ؟!.

3_ گوايه‌ به‌رپرسه‌كان خزمه‌تكاری خه‌ڵكن ،به‌ڵام موچه‌كانيان هه‌زاران جار هێنده‌ی فه‌رمانبه‌رێكه‌ كه‌ له‌به‌يانيه‌وه‌ تا ئێواره‌ شه‌قامه‌كانمان بۆ پاك ده‌كاته‌وه‌ !!.

4_ هه‌وێنی پاراستنی هه‌موو وڵاتێك و سه‌روه‌ری هه‌موو وڵاتێك به‌نده‌ به‌ هێزو سوپای ئه‌م وڵاته‌وه‌ ، كه‌چی له‌ كاولستانه‌كه‌ی من خراپترينی گوزه‌ران پێشمه‌رگه‌كانن !، له‌سه‌ر حيسابی فه‌رمانبه‌رانی تر موچه‌يان ده‌درێتێ !، ئه‌وه‌ی سه‌ير بێت زۆر جاريش مانگی 40 ڕۆژ ته‌واو ده‌كات !.

5_ ژێر زه‌مينه‌كان پڕ پاره‌ن بانكه‌كان به‌تاڵن !، ئه‌مه‌ واتا به‌رپرسه‌ گيرفان پيسه‌كان متمانه‌يان به‌بانكه‌كان نيه‌ !، واتا دزی هه‌يه‌ !.

6_ په‌رله‌مانتارێك ده‌يوت 85 هه‌زار كه‌س له‌م سێ پارێزگايه‌ به‌پله‌ی باڵای سه‌ربازی خانه‌نشين كراون _كه‌ زۆربه‌ی خه‌ڵك ده‌زانێ هی وا هه‌يه‌ به‌ژيانی خۆی ئه‌گه‌ر گولـله‌ی به‌ پێشمه‌رگه‌ وه‌نه‌نابێ ئه‌وه‌ بۆشی نه‌ته‌قاندوه‌ _ .

7_ سێ پارێزگايه‌ به‌ڵام هه‌وڵ ده‌درێت 3 جێگری سه‌رۆك وه‌زيران هه‌بن هههههه واتا هه‌ر پارێزگايه‌ك جێگێرێكی سه‌رۆك وه‌زيری به‌به‌ر ده‌كه‌وێ!، ئه‌مه‌ش به‌هه‌ده‌ر دانی پاره‌ی خه‌ڵكه‌و ڕازی كردنی لايه‌نێكه‌و هيچی تر نيه‌ ، كابينه‌كه‌ی پێشوتريش ئه‌م مه‌هه‌زه‌له‌يه‌ بوو 40 وه‌زيری هه‌بوو ، ڕه‌نگه‌ چينيش به‌ زياتر له‌ 1 مليار كه‌سه‌وه‌ هه‌ر ئه‌وه‌نده‌ وه‌زيره‌ی هه‌بێت _كه‌ خۆشبه‌ختانه‌ كه‌م كرانه‌وه‌ _ .

8_ له‌گه‌ڵ هه‌ر باران بارينێكی به‌رده‌وام ئۆتۆمبێله‌كان سه‌ر ئاو ده‌كه‌ون و گه‌ڕه‌كی هه‌ژارانيش ژێر ئاو ، ماڵی ئه‌وانيش سه‌ر هه‌موو گرد و ته‌پۆڵكه‌كانيان داگير كردوه‌ مه‌گه‌ر تۆفانه‌كه‌ی نوح له‌كۆڵ ئێمه‌يان بكاته‌وه‌ .

9_ كوڕی به‌رپرسه‌كان بۆ هه‌ر جارێكی تراشی سه‌رو ڕيشيان به‌كه‌يفی خۆيان گه‌شتێك ده‌كه‌ن بۆ ئه‌وروپا ، سه‌دان كوڕه‌ هه‌ژاريش هه‌يه‌ پاره‌ی مامه‌ڵه‌ی ده‌رهێنانی پاسپۆرتی نيه‌ چ جای گه‌شته‌كه‌ _خوايه‌ گيان تۆ أحكم الحاكمين ی ئه‌م سته‌مه‌ قه‌بوڵ مه‌كه‌ _ .

10_ ئه‌وه‌ی زۆر جێگای تێڕامان و سه‌رو سه‌مه‌ره‌ بێت ئه‌وه‌يه‌ هاوڵاتی ده‌ڵێ گه‌نده‌ڵی هه‌يه‌ ، ڕۆژنامه‌سيش له‌سه‌ر ئه‌وه‌ چه‌ندين به‌ڵگه‌ی هه‌يه‌ ، به‌رپرسه‌كانيش له‌جياتی چاره‌سه‌رو نه‌هێشتتنی ده‌ڵێن وايه‌ گه‌نده‌ڵی هه‌يه‌ ؟!، ێ ده‌باشه‌ ئه‌دی كێ نه‌يهێڵێ ؟!.

 لاحول ولا قوة الا بالله العلي العظيم .

Go to top