We have 99 guests and no members online

گەرمیانی حەمەی پور

 

 

 

ساڵانێكی زۆره‌ قه‌ندیل نه‌بێت، ئه‌وه‌ی هه‌ستی نه‌ته‌وه‌ییه‌ لای تاكی كورد و كۆمه‌ڵگه‌ی كوردی بوونی نه‌بووه‌. 

له‌ ڕۆژهه‌ڵات، كامپنشینی هێزه‌ سیاسییه‌كان و به‌رنامه‌ڕێژیی كۆماری ئیسلامی بۆ خووگرتنی گه‌نجان به‌ ماده‌ی هۆشبه‌ر، له‌ باشوور شه‌ڕی ناوخۆو دواتر مژینی خوێنی گه‌ل له‌لایه‌ن دوو حزبی ده‌سه‌ڵاتداره‌وه‌ بۆ ماوه‌یه‌كی درێژ، له‌ باكور و رۆژئاواش به‌ هۆكاری جیا هه‌ستی نه‌ته‌وایه‌تی مردبوون.
به‌هاری عه‌ره‌بی ته‌كانێكی به‌ ڕاپه‌ڕین و بزووتنه‌وه‌ی ڕزگاری له‌ ڕۆژئاوادا، به‌ڵام قوت بوونه‌وه‌ی داعش وه‌ك دوژمنێكی ده‌ره‌كی ڕاچه‌نینی له‌ هه‌ستی نه‌ته‌وایه‌تیدا دروست كرد و خرۆشانی ئه‌م هه‌سته‌ی گه‌یانده‌ لوتكه‌.
ئه‌و ده‌مه‌ی شه‌نگال له‌لایه‌ن هێزێكی كوردییه‌وه‌ ڕاده‌ستكراو كوردانی ئێزیدی به‌و ده‌رده‌ بران، كچان و كوڕانی ڕۆژئاوا سه‌رباری ئه‌ركی خۆیان، پاراستنی هاوزمانیان به‌ ئه‌ركێكی تر ده‌زانی و گه‌شتنه‌ باشوور، گه‌ریلا له‌ قه‌ندیله‌وه‌ هاتنه‌ خواره‌وه‌و مه‌خموریان ڕزگار ده‌كرده‌وه‌، نیگار حسیه‌نی له‌ ڕۆژهه‌ڵاته‌وه‌ ده‌چێته‌ به‌ره‌كانی جه‌نگ و ده‌بێته‌ یه‌كه‌م شه‌هیدی ڕۆژهه‌ڵات له‌ كاتی به‌رگری له‌ باشووری نیشتمانه‌كه‌ی!
قووڵ بوونه‌وه‌ی مه‌ترسییه‌ ده‌ره‌كییه‌كان به‌ جۆرێك هه‌ستی نه‌ته‌وایه‌تی لای كورد گه‌یانده‌ لوتكه‌ كه‌ سنووره‌ ده‌ستكرده‌كانیان سڕییه‌وه‌.
كۆبانێ هه‌موومانی كۆ كرده‌وه‌، ئه‌وه‌تا كاتێك مه‌ترسی داگیر كردنی ئه‌و شاره‌ زیاتر ده‌بێت، به‌ جارێك له‌ ڕۆژهه‌ڵات شه‌قامه‌كان ده‌بنه‌ جێی هاواری كورد و هاوار بۆ به‌ هاناوه‌ چوونی ئه‌و شاره‌ كوردییه‌ ده‌كه‌ن، له‌ باشوور لاوان ته‌نانه‌ت ژنان و منداڵان به‌ ڕۆژ و شه‌و له‌سه‌ر شه‌قام ده‌بن و ده‌یان خۆپیشاندان و ڕێپێوان بۆ وورووژانی ڕای گشتی جیهان ڕێك ده‌خه‌ن، له‌ باكووری وڵات گه‌نجان ڕاپه‌ڕین به‌رپا ده‌كه‌ن و وڵاتێكی داگیركه‌ر ناچار ده‌كه‌ن له‌ پشتیوانی تیرۆریزم و كاری تیرۆریستی ده‌ست هه‌ڵگرێت.
له‌ ڕۆژئاوا دایكان منداڵان جێ ده‌هێڵن و به‌رگری له‌ خاك ده‌كه‌ن، باشوور جه‌نگاوه‌ر بۆ پشتویانی هاوزمانیان ده‌نێرن و پێشوزایش له‌ پێشمه‌رگه‌و جه‌نگاوه‌رانی باشوور له‌ باكوور و ڕۆژئاوا فرمێسكی شادیی له‌ چاوی بێ هه‌ستترین مرۆڤیش خسته‌ سه‌ر گۆنا!
ئه‌م ڕاچه‌نینه‌ هه‌موو دنیای سه‌رسام كردووه‌، ئه‌وه‌تا زۆر گه‌ل و نه‌ته‌وه‌ خۆیان به‌ كه‌م ده‌زانن له‌ چاو ئه‌و بوێری و خه‌باته‌ نه‌ته‌وه‌ییه‌ی كورد بۆ پشتیوانی له‌ یه‌ك ده‌یكات.
من له‌وه‌ ده‌گه‌ڕێم كه‌ جیهان ڕۆڵی له‌م هه‌موو گۆڕانه‌ سیاسییه‌ و سه‌ربازییه‌ چییه‌و كه‌ی و چۆن گۆڕانكاری له‌ نه‌خشه‌ی سیاسی جیهان ڕوو ده‌دات و جوگرافیای ڕۆژهه‌ڵاتی ناوین چی لێ دێ و داهاتووی كورد چی ده‌بێت و ڕۆژ ئاواو ئامریكا به‌ تایبه‌ت په‌یوه‌ندی له‌گه‌ڵ كورد و مامه‌ڵه‌ی له‌گه‌ڵ دۆخه‌كه‌ چی ده‌بێت؟
ئه‌وه‌ی بۆ ئێمه‌ گرنگه‌ ڕاچه‌نینێكی نه‌ته‌وه‌ییه‌، ڕاچه‌نینێك كه‌ هه‌ر لایه‌نێكی كوردی ئه‌گه‌ر نه‌یویستبێت له‌م قه‌تاره‌دا سه‌ركه‌وێت، به‌ خائین و نه‌ته‌وه‌ فرۆش دانراوه‌و ناچار كراوه‌ ببێته‌ سه‌رنشینێكی گوێڕایه‌ڵ.

گه‌رمیانی حه‌مه‌ی پوور

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

 

 

 

 

ساڵی 1928 شاری ڕۆزارییرۆی ئه‌رجه‌نتین منداڵێكی به‌ دنیا به‌خشی، ئه‌و ماڵه‌ی (چێ)ی تێدا گه‌وره‌بوو 3000 كتێبی تێدابوو، ئه‌و بوو به‌ خوێنه‌رێكی باش، دواتر له‌ شاری بۆینس ئایرسی پایه‌ختی ئارجه‌نیتن چێ گیڤارا خوێندنی پزیشكی ته‌واو كرد، به‌ڵام ئه‌و بۆ ئامانجێكی تر خولقابوو، خه‌باتگێڕی دژ به‌ ئیمپریالیست و ڕزگار كردنی ژێرده‌سته‌كان. 

شۆڕشی چێ و هاوڕێكه‌ی فیدڵ كاسترۆ دژ به‌ (باتێستا) ی دیكتاتۆری كوبا و ڕزگاركردنی ئه‌و وڵاته‌و دواتر ڕه‌تكردنه‌وه‌ی پله‌و پۆست (وه‌زیری پیشه‌سازی) و به‌رده‌وامیدان به‌ شۆڕش تا ساته‌وه‌ختی شه‌هید بوونی له‌و كاته‌ی له‌ ساڵی 1967 و له‌ ته‌مه‌نی 39 ساڵیدا له‌سه‌ر چیاكانی ئاند له‌ پۆلیڤیا كه‌ وه‌ك خۆی وتوویه‌تی ئه‌بێت گه‌لێكی تریش له‌ ژێرده‌سته‌یی ڕزگار بكات، ئه‌وی كرد به‌ هێمای شۆڕشگێڕی له‌ جیهاندا، به‌جۆرێك هه‌رچی شۆڕشگێڕی مه‌زنه‌ له‌ نێو گه‌له‌كه‌ی خۆیدا به‌وی ده‌چوێنن.
ئێستا (میسا عه‌بدۆ)ی دایك و (نالین عه‌فرینی)ی شه‌ڕڤانی كورد، بووه‌ته‌ سه‌ردێڕی زۆر رۆژنامه‌ی پڕ خوێنه‌ری جیهان و میدیای پڕ بینه‌ری ئه‌م زه‌مینه‌.
نالین به‌ چل ساڵی ته‌مه‌نه‌وه‌ سه‌رپه‌رشتی جه‌نگێكی ئه‌فسانه‌یی دژ به‌ نوێنه‌رانی جه‌هاله‌ت ده‌كات هه‌زاران كوڕ و كچی لاو له‌ ژێر سه‌رپه‌رشتی پلانه‌ سه‌ربازییه‌كانی ئه‌ودا نوێنه‌رایه‌تی هه‌موو جیهان ده‌كه‌ن دژ به‌ گه‌وره‌ترین به‌ره‌ی تیرۆر و جه‌هاله‌ت.
خه‌باتی نالین و هاوڕێكانی خه‌باتێكی ئه‌فسانه‌ییه‌، ته‌نها له‌ چیرۆك و فیلمه‌كاندا نمونه‌كانی بینراون و بیستراون، ته‌نانه‌ت له‌م ماوه‌یا له‌ زۆر نووسه‌رم بینیوه‌ نووسیویانه‌ وشه‌یان نییه‌ و نه‌بووه‌ بۆ پێناسه‌ی ئه‌فسانه‌ی نالین، هه‌ر ئه‌وه‌نده‌ نه‌بێت كه‌ زۆرێك له‌ كورد له‌ دڵسۆزییان به‌ چێ گیڤارایان چوواندووه‌.
چێ هێمایه‌ك بوو و هه‌یه‌.
به‌ڵام نالینه‌كه‌ی ئێمه‌ به‌و به‌راورد ناكرێت به‌هیچ كه‌سێك به‌راورد ناكرێت!
ئه‌و ئه‌فسانه‌یه‌كی سه‌ربه‌خۆیه‌، نه‌ خه‌باتی وێنه‌ی هه‌یه‌و نه‌ توانای كه‌س وه‌ك هی ئه‌ون، خه‌باتی كه‌س له‌ هی ئه‌و ناچێت.
ئه‌و، چێ گیڤارا نییه‌، نالینی كورده‌، نالینی ژنه‌ له‌و ڕۆژهه‌ڵاته‌ی كه‌ پێیان وایه‌ ژن ته‌نها بۆ خزمه‌ت و خاڵی كردنه‌وه‌ی حه‌زه‌ سێكسییه‌كان پیاو ئافرێنراوه‌، ئه‌و زاده‌ی كۆمه‌ڵگایه‌كه‌ كه‌ ته‌نها به‌ ڕووتی له‌ جه‌سته‌ی ژن ده‌ڕوانن!
ئه‌و ئه‌فسانه‌یه‌!
ئاخر كێ ئه‌فسانه‌ی نالینی ئێمه‌ ده‌نووسێته‌وه‌؟

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

 

 

 

خانه‌قین، به‌ پێی ماده‌ی 140 له‌ ده‌ستووری عێراق، شارێكه‌ له‌ ناوچه‌ كێشه‌ له‌سه‌ره‌كان، سه‌ربه‌ پارێزگای دیاله‌یه‌و هاوسنووره‌ له‌گه‌ڵ ئیداره‌ی گه‌رمیان.

گرفتی ئه‌م شاره‌ ئه‌وه‌یه‌ دوای 11 ساڵ له‌ تیپه‌ڕینی ڕووخانی حكومه‌تی پێشووی عێراق و كردنه‌وه‌ی دام و ده‌زگای زانستی و ئه‌كادیمی و فه‌رمانگه‌ی حكومیی سه‌ربه‌ هه‌رێم و كردنه‌وه‌ی به‌شی خوێندنی كوردی له‌ شاره‌كه‌، كه‌چی تا دێت زیاتر كلتووری عه‌ره‌بی تییاندا تۆخ ده‌بێته‌وه‌و له‌ تێكه‌ڵ بوون له‌گه‌ڵ كه‌لتووری كوردی هه‌ڵدێن.
به‌ ئه‌زمونی دوو ساڵ كاری ڕاگه‌یاندن له‌ خانه‌قین و چوار ساڵیش ته‌واو كردنی زانكۆ له‌و شاره‌، به‌ره‌و پێشچوونم نه‌بینی تیایدا به‌ڵكو زیاتر گه‌ڕانه‌وه‌ بۆ واقعی پێشوو، واته‌ گه‌ڕانه‌وه‌ بۆ كلتووری عه‌ره‌ب به‌ره‌و پێش ده‌چوو، كه‌ ئه‌مه‌یان تا دێت زیاتر هه‌ستی پێ ده‌كرێت.
له‌ ماوه‌ی چوار ساڵی زانكۆدا، خانه‌قینییه‌كان زۆر به‌ ده‌گمه‌ن هاوڕێ ئه‌بوون له‌گه‌ڵ (كورده‌كان) ئه‌وان زیاتر به‌عه‌ره‌بی قسه‌یان ئه‌كرد و ئه‌وه‌یان زۆر لا جوانتر بوو له‌وه‌ی به‌ كوردی قسه‌ بكه‌ن!
ته‌نانه‌ت بۆ زۆر وشه‌ و وته‌ی نه‌شیاو ئه‌یان وت (كورده‌كه‌ ئویشت) واته‌ كورده‌ ئێژێت!
به‌ڵام بۆ هه‌ر توانجدانێكی كورد له‌ عه‌ره‌ب و زمانی عه‌ره‌بی وه‌ده‌نگ ئه‌هاتن! هه‌میشه‌ له‌ نێوان خۆیاندا به‌ عه‌ره‌بی ئه‌دوان، هه‌ڵسوكه‌وتیان له‌ زانكۆدا هه‌مان هه‌ڵسوكه‌وته‌كانی خوێندكاره‌ عه‌ره‌به‌كان بوو، له‌گه‌ڵ ئه‌وانیشدا تێكه‌ڵ ده‌بوون نه‌ك ئێمه‌، له‌گه‌ڵ كه‌لتووری ئه‌وان ڕاهاتبوون، ته‌نانه‌ت به‌ كه‌لتووری خۆیانیان ئه‌زانی، به‌ڵام ئه‌وه‌ی ئێمه‌یان به‌ هیچ شێوه‌یه‌ك پێ قه‌بووڵ نه‌بوو!
له‌ خانه‌قیندا هه‌ر له‌ دوای نه‌مانی حكومه‌تی به‌عسه‌وه‌ ئیداره‌ی هه‌رێم به‌شی خوێندنی كوردی كرده‌وه‌، به‌ڵام پێش خه‌ڵكه‌ ئاساییه‌كه‌ هه‌موو به‌رپرسانی شاره‌كه‌ منداڵه‌كانیان له‌ خوێندنی كوردی ده‌ركردو گه‌ڕاندنیانه‌وه‌ بۆ به‌شی عه‌ره‌بی!
هه‌روه‌ك له‌ سه‌ره‌تاوه‌ هه‌ندێ خه‌ڵكی دڵگه‌رم تابلۆی سه‌ر دوكان و فرۆشكاگانیان به‌ زمانی كوردی گۆڕی، به‌ڵام ئه‌و ماوه‌یه‌ زۆری نه‌خایاندو دووباره‌ زۆرینه‌ی تابلۆكان بوونه‌وه‌ به‌ عه‌ره‌بی!
ئێستاش سه‌یری چالاكییه‌كانی هه‌ر كه‌سێكی دانیشتووی ئه‌م شاره‌ ئه‌كه‌ی له‌ تۆڕه‌كانی فه‌یس بووك و تویته‌ر هه‌مووی به‌ زمانی عه‌ره‌بین، ته‌نانه‌ت زۆرینه‌ی هه‌ره‌ زۆری ئه‌و هه‌واڵانه‌ی له‌سه‌ر ته‌قینه‌وه‌كه‌ی ئه‌م دواییه‌ی شاره‌كه‌ بڵاو ده‌كرانه‌وه‌ هه‌مووی به‌ زمانی عه‌ره‌بی بوو.
من دوو لایه‌ن به‌به‌رپرسیاری ئه‌م دۆخه‌ ئه‌زانم
یه‌كه‌م: ئه‌و خه‌ڵكه‌ ڕۆشنبیر و نووسه‌ر و ڕۆژنامه‌نووسانی له‌ شاره‌كه‌دان، نه‌یانتوانی له‌ ڕێگه‌ی نووسین و كه‌ناڵی جیاجیای بینراوو بیستراوو خوێنراوه‌وه‌ كه‌لتووری كوردی و به‌ تایبه‌ت كوردی لوڕی كه‌ زاراوه‌ی دانیشتوانی شاره‌كه‌شه‌، بگه‌ڕێننه‌وه‌ بۆ خه‌ڵكه‌كه‌ی.
دووه‌م: حكومه‌تی هه‌رێمیش به‌تایبه‌ت هه‌ردوو حزبی یه‌كێتی و پارتی و به‌دیاری كراویش چه‌ند به‌رپرسێكی یه‌كێتی، ئه‌وه‌نده‌ی هه‌وڵیانداوه‌ بۆ قایمتركردنی پێگه‌ی شه‌خسی و حزبیی خۆیان كاربكه‌ن، ئه‌وه‌نده‌ لایان گرنگ نه‌بووه‌ چۆن خانه‌قین له‌ هه‌موو ڕوویه‌كه‌وه‌ بكه‌نه‌وه‌ به‌ شاری كوردی!
یه‌كێتی له‌ خانه‌قین ته‌له‌فزیۆنێكی ناوخۆی و ڕادیۆیه‌كی هه‌یه‌، ئه‌مه‌ كارێكی باشه‌ كه‌ بابه‌ت و به‌رنامه‌كانیان به‌ زمانی كوردی و عه‌ره‌بی په‌خش ده‌كه‌ن، به‌ڵام كاركردن بۆ سڕینه‌وه‌ی كه‌لتووری عه‌ره‌ب و گه‌ڕانه‌وه‌ی كه‌لتووری كوردی لایان نه‌بووه‌ به‌رنامه‌و پلان.

 

شرۆڤه‌كارانی سیاسی شیكردنه‌وه‌و لێكدانه‌وه‌ی جیاوازیان بۆ ئه‌م هێزه‌ ئیسلامییه‌ توندڕه‌وه‌ هه‌بوو، به‌ڵام كرده‌وه‌كانی داعش زۆربه‌ی بۆچوون و شیكردنه‌وه‌و لێكدانه‌وه‌كانیان هه‌ڵده‌گێڕایه‌وه‌، له‌گه‌ڵ ئه‌وه‌شدا به‌ تێڕوانین له‌ كرده‌و پلانه‌كانیان ئه‌كرێت بۆچوونێكی جێگیر هه‌بێت بۆ ئه‌م گرووپه‌.

داعش له‌ جه‌وهه‌ردا دژ به‌ ڕژێمی ئه‌سه‌د له‌ سوریا دامه‌زرا، به‌ڵام به‌ شه‌ڕكردنی له‌گه‌ڵ لایه‌نه‌كانی ئۆپۆزسیۆنی سوریا زوو ده‌ركه‌وت كه‌ ئه‌وه‌نده‌ی كۆڵه‌كه‌یه‌كه‌ بۆ مانه‌وه‌ی ئه‌سه‌د و ڕاگرتنی ده‌سه‌ڵاته‌كه‌ی، هێزێك نییه‌ كورسییه‌كه‌ی دیكتاتۆر له‌ق بكات.

ئه‌گه‌ر ئه‌مه‌ وای كردبێت بۆچوونی ئه‌وانه‌ی داعشیان به‌ دروستكراوی ئێران داناوه‌، ئه‌وه‌ به‌ ده‌ستبه‌سه‌راگرتنی موسڵ و شكاندنی شكۆی حكومه‌ته‌كه‌ی مالیكی دانراوی ئێران وه‌ك سه‌رۆك وه‌زیرانی عێراق، ئه‌م بۆچوونه‌ی هه‌ڵگێڕایه‌وه‌، به‌ڵام ڕاگرتنی پێشڕه‌وییه‌كانی ئه‌م گروپه‌ توندڕه‌وه‌ بۆ سه‌ر ناوچه‌ شیعه‌ نشینه‌كانی عێراق و گۆڕینی ئاراسته‌ی شمشێره‌كانیان بۆ سه‌ر هه‌رێمی كوردستان، دیسان ده‌مانخاته‌وه‌ سه‌ر هه‌مان بۆچوون كه‌ ئێران شمشێره‌كه‌ی داعش ئاراسته ده‌كات، با به‌ چه‌كی قورس و ڕۆكێتیش به‌ ناوی هاوكاریی پێشمه‌رگه‌وه‌ له‌ داعش بدات.

زه‌مه‌ن پیشانیداین داعش هێزێكه‌ بۆ لێدانی كورد، تاوانی كۆمه‌ڵكوژی و جینۆسایدی كوردانی ئێزیدی و هه‌وڵی دووباره‌كردنه‌وه‌ی هه‌مان تاوان له‌ كۆبانێ و ئه‌و په‌یوه‌ندی و هاوكارییه‌ ڕاسته‌وخۆو ناڕاسته‌وخۆیانه‌ی توركیاش بۆ داعش، ڕاستییه‌ك ڕوون ده‌كاته‌وه‌ ئه‌ویش ئه‌وه‌یه‌:

داعش هێزێكی دروستكراوێكی هه‌رێمییه‌، چه‌ند وڵاتێكی ناوچه‌كه‌و جیهانیش ویستیان به‌ به‌رژه‌وه‌ندی خۆیان ئاراسته‌ی بكه‌ن، به‌ڵام خواسته‌كانی داعش به‌ تایبه‌ت دوای ڕاگه‌یاندنی خه‌لافه‌ت و به‌رفراوان بوونی سنووره‌كه‌ی، سه‌ركێشی له‌ خواستی به‌شێك له‌و وڵاتانه‌ كرد، هاوكات تا ئێستاش خزمه‌ت به‌ خواستنی هه‌ندێكیان ده‌كات له‌وانه‌ توركیا، سیناریۆی بردنه‌وه‌ی دیبلۆماتكاره‌نیشی ئه‌وه‌ ده‌گه‌یه‌نێت په‌یوه‌ندی توركیاو داعش بۆ سه‌ره‌تاكانی دروست بوونی داعش ده‌گه‌ڕێته‌وه‌.

داعش وه‌ك مه‌قاشی ده‌وڵه‌تانی دراوسێ به‌كارهێنرا بۆ گه‌یاندنی په‌یامه‌كانیان به‌ كورد به‌ تایبه‌ت باشووری كوردستان به‌وه‌ی ئه‌و هه‌وڵانه‌ی هه‌یان بوو بۆ سه‌ربه‌خۆیی له‌ بیری بكه‌ن، چونكه‌ توانی به‌رگه‌گرتنی گروپێكی توندڕه‌ویان نییه‌ ئه‌گه‌ر هاوكاری نێوده‌وڵه‌تی نه‌بێت، بۆ ڕۆژئاواش هه‌مان په‌یام بوو له‌گه‌ڵیشیدا هه‌وڵێكی جدی بوو بۆ له‌ناوبردنی ئه‌و ده‌سه‌ڵاته‌ خۆجێیه‌ی به‌خوێنی كوڕان و ئه‌و پارچه‌یه‌ به‌رهه‌م هاتووه‌.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

له‌گه‌ڵ كوشتنی محه‌مه‌د بدێوی ڕۆژنامه‌نووس و مامۆستای زانكۆدا، هه‌ڵایه‌كی وا دروست بوو كه‌ ڕووداوه‌كه‌ زۆر زیاتر له‌ قه‌باره‌ی خۆی گه‌وره‌ كراو، سیاسییه‌كان وه‌ك باشترین ده‌رفه‌ت بۆ خۆنمایشكردن له‌م سه‌روبه‌نده‌ی نزیكایه‌تی هه‌ڵبژاردنه‌دا قۆستیانه‌وه‌، میدیاكانیش ته‌نها بۆ بازاڕ گه‌رمیی خۆیان به‌جۆرێك ڕووماڵی ڕووداوه‌كه‌یان كرد كه‌ زۆرینه‌یان گێلانه‌و بێ ئاگایانه‌ كه‌وتنه‌ خزمه‌تگه‌یاندن به‌ به‌رژه‌وه‌ندی هه‌ندێك له‌ سیاسییه‌كان.

من له‌ دوێنێوه‌ به‌ ده‌یان سه‌رچاوه‌دا گه‌ڕاوم تا ڕاستیی ڕووداوه‌كه‌ بزانم، ئاخر به‌ بێ زانینی چۆنیه‌تی ڕووداوه‌كه‌ هه‌رچۆنی ڕووماڵ بكه‌یت ئه‌وه‌ جگه‌له‌وه‌ی خۆت كه‌وتوویته‌ هه‌ڵه‌وه‌، بینه‌ر و بیسه‌ر و خوێنه‌ریش به‌ مل هه‌ڵه‌دا ده‌به‌یت.

ئه‌و ڕووداوه‌ی كه‌ بووه‌ته‌ بابه‌تی ڕۆژو باسی یه‌كه‌می هه‌موو میدیاكان، ڕاستییه‌كه‌ی ئه‌وه‌یه‌ كه‌ كه‌سێكی بێزاركه‌رو خۆ به‌ گه‌وره‌زان كه‌وتووه‌ته‌ ئیدانه‌كردنی هێزێك كه‌ پاراستنی ئاسایشی ناوچه‌یه‌كی گرنگیان له‌سه‌ره‌ وهه‌ڕه‌شه‌ی لێكردوون و جوێنی به‌ كورد داوه‌، سه‌ره‌نجام به‌هۆی ده‌مه‌قاڵه‌ی له‌گه‌ل به‌رپرسی ئه‌و هێزه‌دا كوژراوه‌، كوشتنه‌كه‌شی وه‌ك باس ده‌كرێـت به‌ ئه‌نقه‌س نه‌بووه‌، به‌ڵكو له‌كاتی هه‌وڵدان بۆ دوور خستنه‌وه‌ی فیشه‌ له‌ ده‌ستی ئه‌فسه‌رێك ده‌رچووه‌و به‌ر قوڕگی كه‌وتووه‌.

كوشتنی هه‌ر كه‌سێك هه‌ر پیشه‌و پله‌وپایه‌و پۆست و پێگه‌یه‌كی سیاسیی و كۆمه‌ڵایه‌تی هه‌بێت، هه‌ر كوشتنی مرۆڤه‌و كوشتنی هه‌ر مرۆڤێكیش نابێت به‌ بێ سزا تێپه‌ڕێت، به‌ڵام له‌ هه‌موو ڕووداوێكیشدا ده‌بێت دۆخ و كات و شوێن و شێوازی ڕووداوه‌كه‌ له‌ به‌رچاو بگیرێت.

محه‌مه‌د بدێوی وه‌ك ڕۆژنامه‌نووسێك له‌سه‌ر كاری ڕۆژنامه‌وانی نه‌كوژراوه‌ تا ئه‌و هه‌ڵایه‌ی له‌سه‌ر بنرێته‌وه‌. به‌ڵكو وه‌كو هاوڵاتییه‌ك كوژراوه‌، جگه‌له‌وه‌ش، ئه‌و هاوڵاتییه‌ له‌ دۆخێكی نائارام و بێ ئاسایشی وه‌ك به‌غدادا ئاماده‌ نه‌بووه‌ له‌ خاڵێكی پشكنیندا بووه‌ستێت و بپشكنرێت سه‌رباری ئه‌وه‌ش بووه‌ته‌ هۆی بێزاركردن و هه‌ڕه‌شه‌كردنیش له‌ هێزێكی ئه‌منی، له‌ به‌غدادێكی پڕ له‌ گروپی تیرۆریستیدا، باشه‌ ده‌ی ئه‌گه‌ر ئه‌وه‌ له‌ بری ڕۆژنامه‌نووس تیرۆریستێك بوایه‌و ئه‌و بازگه‌ی تێپه‌ڕاندایه‌و كارێكی تیرۆریستی ئه‌نجام بدایه‌ ئه‌و كات ئه‌و ڕووداووه‌ چۆن ڕووماڵ ده‌كراو سیاسییه‌كان چییان ده‌وت؟

ئه‌م بۆچوونه‌ نه‌ بیرێكی توندڕه‌وی ناسیۆنالیستییه‌و نه‌بیانووشه‌ بۆ كوشتنی كه‌سێك به‌ڵكو قسه‌كردنه‌ له‌سه‌ر قوربانیی ڕاسته‌قینه‌.

بكوژی محه‌مه‌د بدێوی ته‌نها كوشتنی هاوڵاتییه‌كه‌و بكوژه‌كه‌شی كه‌ قوربانیی ڕاسته‌قینه‌یه‌ بووه‌ته‌ قوربانیی به‌رژه‌وه‌ندیی سیاسییه‌كان و تا ڕاده‌یه‌كی زۆریش ئه‌و ململانێ ناشه‌ریفانه‌ سیاسیه‌ی له‌ نێوانه‌ هه‌رێم و به‌غدادایه‌و كورد بوونی بكوژیش ئه‌وه‌نده‌ی تر بۆ ئه‌وان گه‌مه‌كه‌ی خۆشتر كردووه‌, كار به‌وه‌ گه‌شتووه‌ كه‌ هه‌ندێ ناسیۆنالیستی عه‌ره‌ب و كه‌سانی شۆفێنی داوای ده‌ركردن پێشمه‌رگه‌ ده‌كه‌ن له‌ به‌غداو، هاوپه‌یمانیی كوردستانیش كه‌وتووه‌ته‌ پاڕانه‌وه‌ كه‌ به‌و ڕووداوه‌ برایه‌تی كورد و عه‌ره‌ب تێك نه‌درێت!

ئه‌گه‌ر وانه‌بێت مالیكی كه‌ به‌ هیچ شێوه‌یه‌ك مافی ده‌ستوه‌ردانی له‌ ئیشی دادگا نییه‌ به‌ چ مافێك ڕه‌وایی به‌خۆی ده‌دات كه‌ له‌ شوێنی ڕووداوه‌كه‌ بێته‌ جواب و به‌كارهێنانی "خوێن به‌ خوێن" بكاته‌ كه‌ره‌سته‌ی پڕو پاگه‌نده‌ كردنی هه‌ڵبژاردن؟

ئاخر ئه‌م قسه‌یه‌ ته‌نها قسه‌ی ئه‌و سه‌رۆك خێڵانه‌یه‌ كه‌ له‌ كێشه‌ی عه‌شایه‌ریدا یان له‌سه‌ر زه‌وی و زار ئه‌ویش نه‌ك ئه‌م زه‌مه‌نه‌ به‌ڵكو له‌ زه‌مه‌نێكی پێشووتر له‌ یه‌كتریان ده‌كوشت و پێیان وابوو ده‌بێت تۆڵه‌ی كوشتنی كه‌سێك كوشتنه‌وه‌ی بكوژ یان كه‌سێكی تری سه‌ر به‌ هه‌مان تیره‌و هۆز و عه‌شیره‌ت بێت!

له‌ هه‌مووی سه‌خیفانه‌ ترهه‌ڵوێستی به‌رپرسانی یه‌كێتیه‌ كه‌ ئه‌و ئه‌فسه‌ره‌ی بكوژی بدێوییه‌ له‌ هێزێكی لیوای گاردی كۆمارییه‌ كه‌ لیوایه‌كی یه‌كێتین و، به‌و شێوه‌یه‌ ته‌سلیمی هێزێكی عێراقیان كردو له‌وه‌ش ناشه‌ریفانه‌ تر ئه‌و هه‌موو ملكه‌چییه‌یه‌ كه‌ له‌ به‌یاننامه‌كه‌یاندا ده‌ریان خستووه‌ به‌ ده‌ربڕینی پاكانه‌و ئاماده‌ییان بۆ پێشوازیی كردن له‌ هه‌ر سزایه‌ك به‌سه‌ر ئه‌فسه‌ره‌كه‌یاندا بسه‌پێنرێت بێ ئه‌وه‌ی به‌رگری له‌و دۆخه‌ بكه‌ن كه‌ كه‌سێكی تێدا كوشتووه‌!

له‌ به‌غدا ئه‌وان به‌و جۆره‌ ملكه‌چن كه‌چی له‌ كوردستان ته‌نانه‌ت ئه‌و چه‌كه‌ش ڕاده‌ست ناكه‌ن كه‌ ڕۆژنامه‌نووسێكی له‌سه‌ر باسكردنی گه‌نده‌ڵی به‌رپرسانیان پێ ده‌كوژن، له‌ به‌رده‌م دایكی و له‌ ماڵه‌كه‌ی خۆیشدا بێ ئه‌وه‌ی له‌ بازگه‌یه‌كی دابێت و سه‌رباری حسیاب نه‌كردن بۆكارمه‌ندانی بازگه‌ ئه‌منییه‌كه‌، تێر جوێنیشیان بكات!

ئێستا دۆسیه‌ی كوشتنی بدوێ كێشه‌یه‌كی یاسایی نییه‌، ئه‌وه‌نده‌ی كه‌ كێشه‌یه‌كی ته‌واو سیاسییه‌و له‌م نێوه‌نده‌ش به‌ پله‌ی یه‌كه‌م ئه‌ركی یه‌كێتی و دواتر ئه‌ركی ته‌واوی به‌رپرسان و نوێنه‌رانی كورده‌ له‌ به‌غداد ڕێگه‌ نه‌ده‌ن هیچ لایه‌نێك ده‌ستوه‌ربداته‌ ئه‌و كێشه‌و ته‌نها به‌وه‌ ڕازی بن كه‌ ئه‌و ئه‌فسه‌ره‌ كورده‌ له‌ دادگایه‌كی عادیلانه‌دا به‌له‌به‌رچاو گرتنی ئه‌و دۆخ و شێوازه‌ی محه‌مه‌د بدێوی تێدا كوژراوه‌ وه‌ك هاوڵاتییه‌ك نه‌ك وه‌ك ڕۆژنامه‌نووس و مامۆستای زانكۆ، سزا بدرێت.

Go to top