We have 20 guests and no members online

ئەوەى لە (عێراق) روودەدات سەرکردایەتى (کورد) لێى بەرپرسیارە، دەبێت ئەو بەرپرسیاریەتەش هەڵبگرن و بەتەنیا پەرۆشیان بۆ ئەم دۆخە بەس نیە، بەڵکو دەبێت بە شێوەیەکى کردەیی هەڵوێست بنوێنن. ئەو هەڵە زەقەى لە ٢٠٠٣ کردیان، دەبێت باجەکەى بدەن و داواى لێبوردنیش لە هاوڵاتیان بکەن. ئەو دەمەى سەرکردە (کورد)ەکان لە (مەجلیسى حوکم)بوون هێندەى (عێراق)چییەتیان دەکرد، نێو ئەوەندە لە خەمى هاوڵاتیانى خۆشى نەدیووى (کوردستان)بوونایە، ئەوا بەم دۆخەى ئێستا نەدەگەیشتین. ئەوەى حکومەتى (عێراق) لەبارەى داهاتى نەوت و گرێبەستە نەوتیەکان دەیڵێت راستدەکەن و بیانوویەکى بەجێیان هەیە، جگە لە چەند کەسێک کە بەدەورى یەک بازنە دەخولێنەوە کەسى تر لەبارەى داهاتى نەوت نازانێت. ئەگەر بە دیوێکى تر سەیرى ئەم رووداوانە بکەین ئەوە ئاماژەیەکى روونە کە (مالیکى) چى مەرامە لەو فشارانەى دەیخاتە سەر (کوردستان)، بە جۆرێک خەریکە دەست لە هەوکى هاوڵاتیانى (کورد) دەنێت و لە دواین لێدوانیشى ئەوەى نەشاردەوە ووتویەتى:رەنگە پەسند نەکردنى بودجە ببێتە هۆى نەدانى موچەى خانەنشیانان و بیمەى کۆمەڵایەتى و هەتا دەرماڵەى خوێندکارانیش کە ئەمە ئاماژەیەکى روونە کە ئەو نیازى هەیە پەستانى ئەو کارتە زیاتر بکات، بۆ ئەوەى چۆک بە سەرکردایەتى (کورد) دابنێت و خواستەکانى بۆ جێبەجێبکەن. من رووى نووسینەکەم دەکەمە بریاربەدەستانى هەرێم باشە ئەگەر وایە (مالیکى) دوژمنى (کورد)ەو ئەى وەزیرو پەرلەکانتارە (کورد)ەکان چى دەکەن لە بەغدا، خۆ ئەوێ ماڵى ئێمە نیە، بۆچى ناگەرێنەوە هەولێرو بیر لە چارەسەرى گونجاوى ئەو هەڵانە بکەنەوە کە لەم چەند ساڵەى رابردوو کردوویانە. گرتنەوەى ئاو بەسەر دەوڵەتى (عێراق)ى فرە جەمسەر، نەک کارێکى نا مرۆڤانە نیە، بەڵکو یەکێکە لەو رێگایانەى کە دەبێت بێ یەک دوو بیگرنەبەر. لەسەر ئۆپەراسیۆنى (دیجلە) کە هەموومان دەزانین سیناریۆیەکى سیاسى بوو بۆ تێپەراندنى دۆخێکى سیاسى، چى پێشمەرگەى (کوردستان) هەبوو بردیانە سنورەکانى (حەمرین)! ئەى باشە من ئەپرسم برینى قوتى خەڵک کاریگەرترە یان دروستبوونى ئۆپەراسیۆنێک کە سەر لەبەرى سیناریۆبوو؟ لە گەورەترین هەڵە گەورەکانى سەرکردایەتى کورد لە ماوەى رابردوو ئەمانەن:
١- لە ٢٠٠٣ ئەو دەمەى (عێراق) داگیرکرا لە لایەن هێزە هاوپەیمانیەکان، (کورد) بەجێى ئەوەى ناوچە دابرێندراوەکان بگێرێتەوە سەر دۆخى بنەرەتى خۆى، هەڵسا بە دروستکردنەوە (عێراق)ێکى خاپورو پارە کۆکردنەوەو پۆست ببوە پیشەى سەرەکیان.
٢- لە پاش دوواین هەڵبژاردنەکانى (عێراق)، (عەرەب)ەکان خەریک بوون یەکتریان دەخوارد و پێک نەدەهاتن; (کورد) بانگى کردنەوە ماڵى خۆیی و حکومەتو هەموو شتێکى بۆ سازوئامادەکردن، بە بێ ئەوەى هیچ لە خواستەکانى خۆى بەجێبێنێت و ناچار بە چەند رێکەوتنێکیان بکات.
٣- کورد لە (بەغدا) هێندەى خەریکى پارەو مەسەلەى نەوت بووە، نیو ئەوەندە خەریکى قەزیە نەتەوەیی و چارەسەرى کێشە هەڵپەسێردراوەکانى نێوان (کوردستان) و (عێراق) نەبووە.
ئەمانەو چەندان هەڵەى ستراتیژى تر، کە ناکرێت چاوپۆشى لەو هەڵانەبکڕت. ئەم قەیرانەى ئێستاش دەکرێت بکرێتە دەرفەتێک بۆ ئەوەى سوود لە هەڵەکانى رابردوومان وەربگرین و ئیتر بزانین ئێمە ئاراستەى هەنگاوەکانمان بەرەو کوێیەو سنورى (مالیکی)ش تا کوێ درێژ دەبێتەوە.\

Go to top