We have 148 guests and no members online

بەهرۆز جەعفەر

هه‌ڕه‌شه‌كردن له‌ڕۆژنامه‌نووسێكی كورد به‌م شێوه‌یه‌ " خۆت و خێزانه‌كه‌ت ئه‌كوژین". چیت بیرئه‌خاته‌وه‌؟. به‌عس یان له‌به‌عس و عروبه‌ ئه‌ولاتر؟.

ئێمه‌، له‌و لێدانه‌و ئێشی پشت ئه‌و لێدانه‌ش تێ ئه‌گه‌ین بۆچی وا له‌م ڕۆژنامه‌نووسه‌ كراوه‌؟. هیچ وه‌ڵامێكی تری نییه‌ جگه‌له‌وه‌ی به‌رده‌وام له‌به‌ره‌كانی پێشه‌وه‌ جه‌نگه‌و، وه‌ك هه‌ركه‌سێكی تر ئاگاداریی قاچاخچییه‌ كورده‌كانه‌ له‌گه‌ڵ داعش، ئاگاداریی خه‌ڵك ئه‌كاته‌وه‌ كه‌ به‌رپرسه‌كان به‌رژه‌وه‌ندییان له‌گه‌ڵ داعش هه‌یه‌، وه‌ ئه‌مه‌ له‌میدیای ناوچه‌یی و جیهانییدا مۆرێكی ڕه‌شه‌ به‌نێوچه‌وانی كورده‌وه‌، چ قاچاخچێتییه‌كه‌، كه‌ زه‌ربه‌ی له‌به‌رژه‌وه‌ندیی ئێران دا. وه‌ چ لێدان له‌ڕۆژنامه‌نووسه‌كه‌ كه‌ دڵنایی ئه‌ده‌ین، له‌میدیاو ناوه‌نده‌كانی ده‌ره‌وه‌، چۆن شانازیی به‌وه‌وه‌ ئه‌كه‌ن به‌نوێنه‌رایه‌تی جیهان شه‌ڕی تیرۆر ئه‌كه‌ن، ئاوها گه‌ردن و كه‌سێتیتان له‌كه‌دار ئه‌بێته‌وه‌ له‌ ڕفاندنی ئه‌و ڕۆژنامه‌نووسه‌. هه‌ڵبه‌ت جیاواز له‌م كه‌یسه‌، له‌وه‌ش ئه‌گه‌ین ماوه‌یه‌كه‌ حزبه‌كانی ده‌سته‌ڵات، گه‌مه‌و كوتله‌بازییه‌كانی خۆیان له‌ڕێگه‌ی ڕۆژنامه‌نووسانه‌وه‌ ئه‌كه‌ن و، تێوه‌یان ئه‌گڵینن.

دوێنی یه‌كێتی ئه‌وروپا، له‌بری قبوڵكردنی به‌ئه‌ندام، جارێكی تر توركیای شه‌رمه‌زاركرد، كه‌ نابێت به‌و حاڵه‌وه‌ باسی دیموكراسیی بكات و، به‌شه‌ق و زلله‌ له‌په‌یامنێره‌كانی (bbc) و (cnn) یش بدات. . !!

سه‌یركه‌ن، عه‌ساباتی كوردیی و مافیایی و بێ ئابڕوویی به‌رپرسه‌ مۆراڵ شكاوه‌كان، گه‌یشتۆته‌ ئاستێك ئاوها هه‌ڕه‌شه‌ له‌ڕۆژژنامه‌نووسێك، له‌كوردێكی كه‌ركوك بكه‌ن. . !!. ئه‌بێت كێ بێت زاتی ئه‌وه‌ بكات به‌سه‌ر (3) بازگه‌دا، كه‌ به‌پێی زانیارییه‌كان كامێرای چاودێریی و ڕێوشوێنی پشكنینی ته‌واو هه‌یه‌، ئه‌م ڕۆژنامه‌نووسه‌ به‌درێژایی (80) كم بفڕێنێت و، به‌رچه‌قۆی بده‌ن. ؟؟.

وای به‌حاڵی ئه‌و ده‌سته‌ڵات و خاوه‌ن به‌رژه‌وه‌ندییانه‌ی ڕۆژنامه‌نووسه‌ هه‌قیقی و گه‌نجه‌ خاوه‌ن فكره‌كان، لێیان یاخی ئه‌بن. ؟ وای له‌حاڵی ئه‌و ده‌سته‌ڵاته‌ی كه‌ ئاوها مامه‌ڵه‌ له‌گه‌ڵ ڕۆژنامه‌نووس بكات؟.

له‌كوردوستان، ئه‌ونه‌ هه‌زار جه‌ریده‌نووسی سه‌ر به‌ده‌زگاكانی ده‌سته‌ڵات كه‌ بۆ سووككردنی بواره‌كه‌ ئه‌وناوه‌یان له‌خۆ ناوه‌، ئه‌ونه‌ هه‌زار مامۆستای زانكۆ هه‌ن، كه‌ ته‌نها خه‌ریكی ورگ زلكردن و سه‌رشۆڕكردنن. سه‌رقاڵی كۆیله‌یه‌تین و به‌ده‌وری خۆیاندا دێن و ئه‌چن.

له‌كوردوستان، ئه‌و چالاكه‌ ئیسلامی و گۆڕانخوازانه‌ی دوێنی، بۆ ماستاوكردن ئه‌چوونه‌ لای به‌ڕێوه‌به‌ری نالیا، تا (2) چاوپێكه‌وتن زیاتر بكه‌ن و، به‌درۆ وه‌ك میرابۆ هاواریان ئه‌كردو، دونیایان جاڕس كردبو، ئێستا چونه‌ته‌ په‌رله‌مان و به‌ڕێوه‌به‌رایه‌تی و وه‌زاره‌ته‌كانه‌وه‌، سه‌ری خۆیان كز كردووه‌، ملی خۆیان خه‌واندووه‌، وا بزانن كه‌س نایانبینێت و، نازانێت دوێنی چییان وتووه‌. . ؟؟. ئاخر ئه‌وان هیچ باوه‌ڕیان به‌م سیسته‌م و په‌رله‌مانه‌ش نه‌بوو، ته‌نها به‌ بینایه‌كیان ئه‌زانی، هه‌روه‌ها ش ده‌رچوو. تا كورد بڕوای به‌وه‌ بێت له‌ڕێگه‌ی نه‌وشیروان و سێ و چوارێك له‌و هه‌لپه‌رستانه‌ی له‌شه‌قامدا هاتوهاوارئه‌كه‌ن، گۆڕان ئه‌كرێت. گۆڕان ڕوونادات.

له‌كوردوستان، یاسا نییه‌، كه‌ یاسا نه‌بوو، په‌رله‌مان نییه‌، كه‌ په‌له‌مان نه‌بوو، خه‌ڵك نوێنه‌ری نییه‌و كه‌س بۆی نییه‌ چاودێریی ئه‌ویتر بكات، كه‌وابێت حوكم حوكمی ئه‌ولاتر له‌ مافیایه‌.

ئه‌و چه‌قۆیه‌تان له‌كێ دا؟. كه‌ركوك ده‌مێكه‌ پارێزگاره‌كه‌ی ده‌ستی داوه‌ته‌، كاری مافیایی و دزی و ڕاو ڕووتی و پێگه‌ی خۆ-قایم كردن، ئه‌وان هیچ حیسابیان بۆ خه‌لك نه‌كردووه‌، به‌س خه‌ڵك حیسابیان بۆ ئه‌كات و وازیان لێ ناهێنێت. .

ئه‌و چه‌قۆیه‌، ئه‌و هه‌ڕه‌شه‌یه‌، پێش ئه‌وه‌ی بۆ ڕۆكان جاف بێت، بۆ خه‌ڵكه‌، هیچ بونه‌وه‌رێك له‌و خه‌ڵكانه‌ سوكتر نییه‌، كه‌ سوعبه‌تیان به‌كاری ڕۆژنامه‌نووسی دێت و، داكۆكی لێ ناكه‌ن.

خه‌ڵكی كه‌ركوك، وه‌ كۆی كوردوستان ئه‌بێت له‌وه‌ تێبگه‌ن، تاكه‌ شتێك مابێته‌وه‌، ئه‌و چه‌ند كه‌سه‌ن كه‌ئێستا به‌رگریی له‌ڕای ئازادو سه‌روه‌ت و سامانی نیشتمان ئه‌كه‌ن. ئه‌گه‌ر ئێوه‌ هه‌ڵوێست و خۆ-ڕێكخستنه‌وه‌تان بۆ شتێكی وا نییه‌، له‌ ڕاستیدا هه‌ڵوێستتان له‌به‌رانبه‌ر له‌ده‌ستدانی ئه‌خلاق و كه‌رامه‌تی ئینسانی بونی خۆتان نییه‌.

ئه‌گه‌ر ئه‌وانه‌ی پێیانوایه‌، سه‌ركزكردن و لێگه‌ڕان و، مل خه‌واندن چاره‌سه‌ره‌، له‌ڕاستیدا هیچ نین جگه‌له‌وه‌ی هه‌موو ڕابردووی فشۆڵی خۆیان نیشان ئه‌ده‌ن.

تا ئێستا داعش به‌ئاشكرا به‌كه‌ركوكییه‌كانی وتوه‌: خۆت و خێزانه‌كه‌شت ئه‌كوژم؟. تا ئێستا داعش گوتویه‌تی: خاكه‌كه‌ت و نه‌وته‌كه‌ت و خێزانه‌كه‌شت له‌ناو ئه‌به‌م؟. وتویه‌تی: كه‌ركوكی بۆی نییه‌ بچێته‌ هه‌ولێره‌وه‌؟. . .

ئه‌و چه‌قۆیه‌، كاریگه‌ریی ئه‌و جووڵه‌ كه‌ركوكییه‌ نوێیه‌، ده‌رئه‌خات كه‌ به‌هه‌موو هێزی خۆی ڕه‌گی له‌كوردبون و چاكه‌ی گشتی دا، داكوتاوه‌. . . له‌به‌رگرییه‌وه‌ بۆ هێرش. . هه‌موتان یه‌كبگرن و خۆتان ڕێكبخه‌نه‌وه‌ له‌ده‌ره‌وه‌ی هه‌موو حزبه‌ سواوه‌كانی ئه‌م سه‌رده‌مه‌ خزمه‌تی گه‌وره‌ پێشكه‌ش بكه‌ن. . . ده‌سته‌ڵات ترسنۆكه‌.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

دوێنی (17/12/2014) بۆ جاری سێهه‌م ئه‌كاونت و په‌یجه‌كه‌یان له‌فه‌یسبوك هاك كردم. . !!. له‌سه‌رێكه‌وه‌ جێی داخ بو، كه‌ بۆ ماوه‌یه‌كی كاتی له‌ هه‌زاران هاوڕێ داببڕێیت و، له‌په‌ناشیدا كه‌سانێكی هه‌لپه‌رست و داموده‌زگاگه‌لێك پێیانوابێت، ئیتر ئه‌وان ئیختراقی شتێكی زۆر سه‌یریان كردووه‌و، ئه‌وه‌ی ویستویانه‌ كردویانه‌و، له‌مه‌ولا ئه‌م تاكه‌ نابێته‌وه‌ به‌تاكه‌كه‌ی جاران و نانوسێت و كه‌س نایواتی و. . . ئه‌مانه‌.

جارێكیان گوێم له‌ كاكه‌ حه‌مه‌ بو، له‌ ساڵیادی ڕاگه‌یاندنی حزبی سۆشیالیستدا ئه‌یوت: ئێمه‌ مێژوومان له‌ڕێگه‌ی كاغه‌زو كتێب و ڕۆژنامه‌وه‌ خوێندۆته‌وه‌و بۆماوه‌ته‌وه‌، سایت و شت به‌كه‌ڵك نایه‌ت، چونكه‌ هاك ئه‌كرێت ". . .

كه‌سێك شه‌خسیه‌تی خۆی له‌سه‌ر فه‌یسبوك بینا بكات، قه‌ده‌رو شانسی خۆی له‌فه‌یسبوكا ببینێته‌وه‌، بیه‌وی شۆرشێكی قووڵ له‌فه‌یسبوكه‌وه‌ ده‌ست پێ بكات، بێگومان یان كه‌سێكی نه‌خۆشه‌، یان مودمین و بێ ئاگا بووه‌ به‌ده‌ست ته‌كنه‌لۆژیاوه‌. ئاخر چۆن ئه‌بێت مرۆڤ چاره‌نوسی خۆی بداته‌ ده‌ست ئامێره‌كان!؟. ئه‌وه‌ی به‌ڕێگه‌ی شتی هیچ و پووچ گه‌وره‌ بێت، كاتییه‌و به‌شتێكی هیچ و پوچیش بچوك ئه‌بێته‌وه‌.

ئاخر چۆن ئه‌بێت بونی خۆمان ببه‌ستین به‌ فه‌یسبوكه‌وه‌، ئه‌گه‌ر ڵایك و كۆمێنت زۆر بوو، تۆ هه‌یت، ئه‌گه‌ر فه‌یسبوكت نه‌بوو ماوه‌یه‌ك تۆ نه‌ بویت نه‌هه‌یت!!؟. .

له‌واقیعدا فه‌یسبوك جگه‌ له‌وه‌ی نیعمه‌تێكه‌ ئازادی قسه‌كردنی داوه‌ته‌ ده‌ست تاكه‌كان خۆیان و، هه‌ركات بیانه‌وی گوزارشت له‌ ڕای خۆیان ئه‌كه‌ن، به‌خێرایی ئه‌گه‌یته‌ خه‌ڵك. له‌هه‌مان كاتدا نه‌فره‌تییه‌كی گه‌وره‌یه‌.

داعش، هیچ نییه‌ جگه‌ له‌به‌رهه‌می سۆشیال میدیا. .

خۆكوشتن و پێكه‌وه‌ نانی گروپه‌ مافیا جیهانییه‌كان.

دروستكردنی دوودڵی و ناكۆكی و گرفتی ده‌روونی

بڵاوكردنه‌وه‌ی درۆ و ده‌له‌سه‌و تانه‌و ته‌شه‌رو جنێودان و شكاندنی شكۆی مرۆڤ

سفركردنه‌وه‌ی سه‌روه‌رییه‌كانی مێژوو.

هه‌موو ئه‌مانه‌ و زۆر شكستی ئه‌خلاقی و نه‌ته‌وه‌یی و ڕۆحی دیكه‌، له‌ڕێگه‌ی فه‌یسبوك و یوتیوب و پاشكۆكانی تره‌وه‌ تووشی وێرانه‌ بوون.

له‌وه‌ش سه‌یرتر، كه‌سێك ئه‌گه‌ر ده‌ستی به‌تاڵ نه‌بێت، ئه‌گه‌ر كۆیله‌یه‌كی گیرفان به‌تاڵ نه‌بێت، ئه‌گه‌ر دوژمنی گه‌ل و چاكسازیی نه‌بێت، بۆچی من هاك ئه‌كات؟. له‌سه‌روو ئه‌وه‌شه‌وه‌ به‌فه‌رمی داوا له‌فه‌یسبوك بكرێت ئێمه‌ مه‌نع بكه‌ن!!.

بۆچی ده‌یان په‌یجی داعش، ڕۆژ تا ئێواره‌ به‌چه‌ندین زمان جه‌نگی ئه‌لیكترۆنی و سیخوڕیی ئه‌لیكترۆنی ئه‌كه‌ن، ناچن هاك و ئیختراقی بكه‌ن؟. خۆ-ئه‌گه‌ر بابه‌ته‌كه‌ ڕێگه‌گرتن بێت له‌ووتن، زۆرجار ده‌یان سایت و په‌یج یه‌ك تاكه‌ نوسینی ئێمه‌ دائه‌گرن، ئه‌ددی به‌هه‌زاران وتارو توێژینه‌وه‌ی ئێمه‌ له‌ڕۆژنامه‌و گۆڤارو ته‌واوی سایته‌ كوردییه‌كاندا، ئه‌ددی چاوپێكه‌وتنه‌ نێوخۆیی و ده‌ره‌كییه‌كان، ئه‌دی ئه‌و كتێبانه‌ی چاپمان كردوون؟ئه‌مانه‌ش هاك ئه‌كرێت؟. ئه‌ددی په‌یوه‌ندییه‌ سیاسیی و كۆمه‌ڵایه‌تییه‌كان؟. . به‌ڕاشكاوی ئه‌وه‌ی چێژ له‌و هاكه‌ وه‌رئه‌گرێت، بابفه‌رموێت فه‌یسبوكێكی تازه‌م داناوه‌ته‌وه‌، خۆم ئیمه‌یڵ و پاسۆرده‌كه‌ی ڕاده‌ست بكه‌م.

ئه‌وه‌ نه‌بێت، پێویسته‌ كورد بگه‌ڕێته‌وه‌ بۆ لای كتێبه‌كان، بیرو ئاوه‌زی خۆی هه‌موو نه‌داته‌ ده‌ست فه‌یسبوك، كه‌ هه‌م كاتی ئه‌بات، هه‌م به‌رهه‌می نییه‌و مرۆڤی ناوبۆش دروسته‌كات. ئاخر وێنه‌یه‌ك له‌فه‌یسبوكا ئه‌توانێت هه‌موو كورد بۆ هه‌فته‌یه‌ك سه‌رقاڵ بكات؟. ئه‌مه‌ چییه‌؟!؟.

 

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

ئیتر له‌مه‌ولا:

*هیومان ڕایتس وۆچ، هیچ ڕاپۆڕتێك له‌سه‌ر ڕه‌وشی مافی مرۆڤ له‌كوردوستان بڵاوناكاته‌وه‌.

* به‌رپرسه‌كان، له‌به‌غدا به‌ ئۆتۆمبیلی درعه‌وه‌ ناگه‌ڕێن و، دایكه‌كان له‌كه‌ركوك جه‌رگیان ناسوتێت و پلانی ئه‌منی هاوبه‌ش و تۆكمه‌و ژووری هه‌واڵگریی نیشتمانیمان ئه‌بێت.

* بۆ له‌مه‌ولا، زانكۆكان توێژینه‌وه‌كان ناخه‌نه‌ ته‌نه‌كه‌ی زبڵه‌وه‌. ئه‌و خوێندكارانه‌ ئاماده‌یش (100%) یان هێناوه‌ به‌هه‌قی خۆیان شاد ئه‌بن.

* بكوژانی كاوه‌ گه‌رمیانی به‌ تۆبزی له‌به‌رده‌رگا ئه‌بینین.

*ده‌زگای زانیاری، پاراستن، دژه‌ تیرۆر، ، له‌بری تیرۆر، چاودێریی ئێمه‌و ته‌له‌فۆنه‌كانمان ناكه‌ن.

*له‌مه‌ولا مافیاكانی ده‌رمان و ده‌رزییه‌ به‌سه‌رچووه‌كانی شێرپه‌نجه‌ له‌سه‌رای ئازادیی له‌دارئه‌درێن، ئه‌وانه‌ی قاچاخچێتی نه‌وت و ئۆتۆمبیلیان له‌گه‌ڵ داعش و دوژمنان كردووه‌، ئه‌كرێن به‌په‌ند!.

* به‌كۆمپانیاكانی زه‌كه‌ریاو گوندی ئیتاڵی و ئه‌ڵمانی و به‌ڕێزو. . . تاد. ئه‌وترێت شووققه‌و ڤیه‌للا له‌سه‌ر زه‌وی به‌لاشی كوردوستان مه‌ده‌نه‌ 100 ده‌فته‌رو 40 ده‌فته‌ر. .

* له‌مه‌ولا سه‌له‌فییه‌كان دانامه‌زرێنن، بۆ سه‌رقاڵكردنی خه‌ڵك و، گه‌نجه‌ خاوه‌ن بڕوانامه‌و كاراكان كاریان بۆ ئه‌دۆزرێته‌وه‌، كۆمه‌ڵگه‌ ناخه‌وێت، ڕائه‌په‌ڕێت. . !.

* نوێنه‌ره‌كانی خه‌ڵك به‌سینگی ڕووته‌وه‌، ئه‌چنه‌ به‌رته‌نكه‌ره‌كانی نه‌وت " ئه‌مه‌ بۆ كوێی ئه‌به‌ن؟. ". .

* ئیتر پرۆژه‌ نه‌ته‌وه‌ییه‌كان، شارو ناوچه‌یه‌ك تێ ئه‌په‌ڕێنن و سه‌رانسه‌ری كوردوستان حوكمی یاسا و مافی مه‌ده‌نی ئه‌یگرێته‌وه‌.

ئه‌ونه‌ ساڵه‌، ده‌سته‌ڵات و سیسته‌می سیاسیی له‌كوردوستان، ڕابواردنیان به‌هاونیشتمانیان كردووه‌ به‌ "ستراتیژ". . دوای ساڵ و نیوێك ده‌نگدان حكومه‌تێك پێك ئه‌هێنن و، دوای ساڵێك ئه‌نجومه‌نی پارێزگایه‌ك پێكدێت، ئه‌یانه‌وی به‌ده‌ستكه‌وت به‌خه‌ڵكی بفرۆشن و، پیرۆزبایشیان لێبكرێتَ!!؟؟.

ئه‌و فیفتی به‌فیفتی یه‌ی مێشكی تاكی كوردییان پێ كاس كردبو، كراوه‌ به‌ سێڤنتی به‌ توێنتی. . ئه‌گه‌ر خۆیان له‌ده‌سته‌ڵات دا بوون، هیچ كێشه‌ نییه‌و، ئه‌گه‌ریش ئۆپۆزسیۆن بوون عاله‌می خوا خۆفرۆش و جاش و كۆیله‌و به‌كرێگیراوه‌، هه‌ر ئه‌وان عه‌بقه‌ری و خاوه‌ن پرۆژه‌و پرۆسه‌كه‌ن. . !!؟.

هه‌رچه‌نده‌ تاقه‌تی ئه‌وه‌م چووه‌، ئیتر بڵێم سه‌راپا ئه‌م هێزانه‌ یه‌ك پارچه‌ قووماشی ڕزیون، بۆ هه‌ڵپه‌كردن و به‌هه‌ده‌ردان و فریودان و چه‌له‌حانێی نێوخۆیی و موزایه‌ده‌ده‌ستی باڵایان هه‌یه‌. زۆربه‌ی كۆمه‌ڵگه‌ش ده‌ستی باشی له‌ها هوو چه‌پڵه‌لێدان هه‌یه‌ بۆیان. هی واهه‌یه‌ فلوسێك له‌گیرفانیا نییه‌، وه‌خته‌ چاومان ده‌ربێنێت كه‌ ئه‌م قسانه‌ به‌و حزبانه‌ ئه‌ڵێین. . !!. یاخووا من زه‌ره‌رم كردبێت و ئێوه‌ش قازانج. .

ساده‌و ساكار هاوارێكم بۆهه‌رچی ئازادیخوازو سه‌ربه‌خۆكارێك ئه‌وه‌یه‌: ئه‌بێت فریای ئه‌م نه‌وه‌یه‌ بكه‌وین كه‌ دێت، دۆڵی گورگه‌كان، دۆڵی ده‌زكان، به‌رینتر ئه‌بێت. درۆی وا ئه‌كه‌ن هه‌ر ئه‌ڵێی ڕاستییه‌كی ڕووتو قووته‌. وه‌ها خۆیان ئه‌دزنه‌وه‌ له‌ لووببی باسه‌ ستراتیژیی و چاكسازییه‌ ڕیشه‌ییه‌كان، هه‌روه‌ك بڵیی سه‌ره‌تای به‌هاره‌كه‌یان هه‌تا ئه‌ژنۆ هێناوه‌.

دیاره‌، ئه‌بێت ئێمه‌ حیسابی چیمان بۆ كرابێت به‌م شێوه‌یه‌ قسه‌و نمایش ئه‌كه‌ن!!. بڕۆ. . بابه‌. . بڕۆ خۆت بدۆزه‌ره‌وه‌.

باش نه‌بوو، ئه‌م به‌زمه‌ زۆر درێژه‌ی نه‌خایاند، قۆناغێك بۆ خه‌ڵك كه‌شف بو، ئه‌مانه‌ گۆڕان نازانن و ناكه‌ن، قۆناغێكیش دوای ماوه‌یه‌ك درۆ و ده‌له‌سه‌، بڕیاریاندا پێكه‌وه‌ بخۆن و بدزن و پیرۆزبایی له‌یه‌ك بكه‌ن له‌سه‌ره‌وه‌. . . ئه‌مان وازیان له‌خه‌ڵك هێناوه‌، به‌س خه‌ڵك وازیان لێ ناهێنێت. !!.

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

 

 

له‌دوای جه‌نگی دووه‌می جیهانی، سیاسه‌تی ئه‌مریكی له‌ ڕۆژهه‌ڵاتی ناوه‌ڕاست له‌سه‌ر (3) دینگه‌ی جێگیر وه‌ستابو، ئه‌ویش: ئابڵوقه‌دانی هه‌ژموونی سۆڤێتی، به‌هه‌موو جۆرێك هاوكاریكردنی ئیسرائیل، وه‌ په‌ره‌پێدانی به‌رژه‌وه‌ندییه‌كان له‌ناوچه‌كه‌دا...به‌ڵام له‌دوای جه‌نگی سارد و جه‌نگی كه‌نداوی دووه‌م، سیسته‌می جیهانی چووه‌ قۆناغێكی نوێوه‌، ئه‌كرێت ده‌ستپێكی هه‌موو ململانی و ڕووداوه‌كانی ئێستاو ئاینده‌ش، وه‌ك چوارچێوه‌یه‌كی مێژوویی بگه‌ڕێنینه‌وه‌ بۆ هه‌ره‌سی سۆڤییه‌ت، خۆرئاوا له‌ڕێگه‌ی (ناتۆ) ه‌وه‌ هه‌میشه‌ چاوی له‌سه‌ر ناوچه‌كانی خۆرهه‌ڵاتی ئه‌وروپایه‌، چونكه‌ سێبه‌ری ڕووسیای له‌سه‌ره‌..به‌بڕوای ستراتیجیسته‌كان ئه‌مریكا پاشه‌كشه‌ی له‌دیموكراسییه‌تدا كردووه‌، گوتاری سیاسیی هاوچه‌رخی ئه‌مریكا، به‌نزیكه‌یی پۆلێنێكه‌ له‌نێوان (بریجنسكی-Brzezinski) و (فۆكۆیاما- Francis Fukuyama) و (ساموێل هۆنتگتن-Samuel p.Huntington) دا، كه‌ له‌هه‌ره‌ دیده‌ دیاره‌كانن:

 

بریجنسكی (ڕاوێژكاری پێشوی ئاسایشی نیشتمانی ئه‌مریكا)، له‌ تێڕوانینی ستراتیژیی بۆ قه‌یرانی ئه‌مریكا له‌ ده‌سته‌ڵاتی جیهانیدا، پێی وایه‌ ئه‌مریكا له‌سه‌ر ئاستی نێوخۆیی ئه‌بێت نمونه‌یه‌كی شارستانی دیموكراتی پێشكه‌ش بكات، له‌ئاستی ده‌ره‌وه‌ش هێزی جیهانی و هه‌رێمایه‌تی خۆی پۆلێن بكات بۆ (3) به‌ش، له‌سه‌رئاستی جیهانی هه‌یمه‌نه‌ بكات به‌سه‌ر ئه‌وروپاو یابان دا، له‌سه‌ر ئاستی هه‌رێمایه‌تی و كیشوه‌ریی گه‌وره‌دا كێبركێی ڕووسیاو چین بكات، وه‌ له‌ئاستی ئیقلیمیه‌تێكی بچوكیشدا (بریجنسكی به‌ ئیقلیمی ته‌سك ناوی ئه‌بات) ده‌بێت ململانێی: ئیسلام له‌ڕۆژهه‌ڵاتی ناوه‌ڕاست و باكوری ئه‌فریكاو ئێران و هند بكات.

 

"فۆكۆیاما" و كتێبه‌ به‌ناوبانگه‌كه‌ی (كۆتایی مێژوو) ش، لایوایه‌، ئه‌مریكا به‌ دیموكراسییه‌ت ئه‌توانێت دوژمنایه‌تی به‌ر پێبگرێت، ئاشتی و سه‌قامگیریی له‌جیهاندا له‌ڕێگه‌ی دیموكراتیه‌ته‌وه‌ به‌رجه‌سته‌ ئه‌بێت.ئه‌مه‌ به‌چی و چۆن؟.ئه‌وهه‌ر ئه‌ڵێ جیهان دووبه‌شه‌: (كۆمه‌ڵگه‌ مێژووییه‌كان-دیكتاتۆریه‌ت) و (كۆمه‌ڵگه‌پۆست مێژووییه‌كان-دیموكراتیه‌كانن) ..دیموكراسییه‌تی ئه‌مریكا له‌وێوه‌ ده‌ستوه‌رئه‌داته‌ سیسته‌می جیهانی، كه‌ئه‌و كۆمه‌ڵه‌ دیكتاتۆریانه‌ به‌شدارپێبكات له‌دروستكردنی بڕیارو سه‌رله‌نوێ پیاچونه‌وه‌ی ڕۆڵی نه‌ته‌وه‌یه‌كگرتووه‌كان.چونكه‌ ئه‌گه‌ر دیموكراسیه‌ت نه‌چێته‌ ناو ژیانی (جیهانی مێژووییه‌وه‌-دیكتاتۆرییه‌وه‌) ئه‌وا ئه‌بنه‌ ترس له‌سه‌رئاسایشی جیهانی.هه‌رچه‌نده‌ (فۆكۆیاما) به‌ئاشكرا باسی له‌سنوره‌ جیۆ-سیاسییه‌كانی نیشتمانی عه‌ره‌بی نه‌كردووه‌، به‌ڵام به‌ناڕاسته‌وخۆ باسی گرنگی نه‌وت و ئیسرائیل و ده‌وڵه‌تانی دراوسێی ئه‌مانه‌ی كردووه‌.

 

"ساموێڵ هۆنتگتۆن" و كتێبه‌ زۆر به‌ناوبانگه‌كه‌ی (به‌یه‌كداكێشانی شارستانییه‌ته‌كان) له‌كورتیدا پێی وایه‌: عه‌ره‌ب سه‌رچاوه‌ی مه‌ترسی و هه‌ڕه‌شه‌ن بۆ سه‌رجیهان) بونه‌وه‌رێكن خاڵی له‌ڕۆحی سه‌رده‌م و ڕۆشنبیریی و غه‌ریزه‌و پڕن له‌ڕق و كینه‌و...تاد..بێگومان هۆنتگتۆن تێزه‌كانی زۆرن وه‌ك قوتابخانه‌ی ڕیالیستی (واقیعی: پشت به‌هێز ئه‌به‌ستێت، ئیتر هێزی نه‌رم Soft powerیان ڕه‌ق power ئه‌مه‌یان جۆزیف نای باسی ئه‌كات) ..

 

هه‌ر سێ بیرمه‌نده‌كه‌ (بریجنسكی) و (فۆكۆیاما) و (هۆنتگتۆن) هه‌روه‌ها (ئه‌نتۆنی لابك) و (رۆبه‌رت هیركابی) یش به‌ته‌واوی له‌وه‌دا كۆكن كه‌، ئه‌مریكا (2) په‌ڵه‌ هه‌وری له‌ ڕۆژهه‌ڵاتی ناوه‌ڕاستدا مه‌به‌سته‌ و ئه‌بیت زۆر گرنگ لێی بڕوانێت، ئه‌وانیش نه‌وت و ئیسرائیلن.ئیسرائیل بۆ ئه‌وه‌ی دیموكراتیه‌ت له‌نێوخۆیی ئه‌مریكادا مسۆگه‌ربێت و به‌پێش چاوی جیهانه‌وه‌ كه‌سێتی نه‌شكێت و ئاسایشی نێوخۆیی به‌رقه‌رار بێت (په‌یوه‌ست به‌لۆبی ئیسرائیل له‌ئه‌مریكا) نه‌وتیش بۆ دابینكردنی ووزه‌و دارایی، نه‌وت له‌كوێیه‌؟؟ له‌توركیا یه‌ (بێگومان نه‌خێر) ...ئایا هه‌ر شوێنێك نه‌وتی لێبو لای ئه‌مریكا جێی مه‌به‌سته‌؟.بێگومان نه‌خێر..ئه‌ی كوێ!!.كه‌نداوی عه‌ره‌بی تاكه‌ پێگه‌ی ستراتیژییه‌ كه‌ شاده‌ماریی به‌رژه‌وه‌ندیی ئه‌مریكای لێ بێت، قاسه‌و بانكه‌كه‌ له‌ (دوبه‌ی) و له‌ (قه‌ته‌ر) و ئیماراتن به‌گشتی بێجگه‌ له‌كه‌شتیه‌ گه‌وره‌كان و پێگه‌سه‌ربازییه‌كان...به‌بڕوای نوسه‌ری ناسراوی به‌ریتانی (باتریتیكس) كه‌پارساڵ وتارێكی له‌ (ئه‌نسات مه‌ركه‌زیی وه‌رگێڕابو) به‌ناونیشانی شه‌ڕێك هه‌ر ڕووئه‌دا (لابد ان یكون الحرب) تیایدا ته‌نها مه‌به‌ست له‌شه‌ڕ له‌ڕژهه‌ڵاتدا یان ئیسرائیله‌، یان ئه‌وه‌یه‌ هێزێكی تری وه‌ك ئێران ده‌ست له‌كه‌نداوی عه‌ره‌بی وه‌ربدات..لێره‌وه‌ ئه‌وه‌ش ڕوون ئه‌بێته‌وه‌ كورد بۆچی ده‌وڵه‌تی نییه‌، چونكه‌ عێراقیش یه‌كێكه‌ له‌ (6) ده‌وڵه‌ته‌كه‌ی كه‌نداو، ئه‌گه‌ر دابه‌شبونی عێراق مه‌ترسیی بێت بۆسه‌ر كه‌نداو، هه‌رگیز دابه‌ش نابێت..

 

 ئێستا ئایا خۆرئاوا توركیای له‌ده‌ستداوه‌؟؟

 

یانی چی توركیا ببێته‌ ئه‌ندام له‌یه‌كێتی ئه‌وروپا!؟.به‌مانای ئه‌وه‌ی توركیا ئه‌بێت دیموكراتیزه‌ بكرێت (ئه‌بێت ئاقڵ بكرێت) ..بۆئه‌وه‌ی توركیا دیموكراتیزه‌بكرێت، مه‌رجه‌كه‌ ئه‌وه‌ نییه‌ ئه‌وروپایی بكرێت (ئێستا ئه‌وروپایه‌كه‌ بۆخۆی، له‌ئه‌وروپا نێربازه‌كان "گه‌یی" خۆپیشاندان ئه‌كه‌ن په‌نجا پۆلیس ئه‌یانپارێزی، له‌ئیستانبوڵ یه‌ك پۆلیس به‌ده‌وریشیانه‌وه‌ نییه‌) به‌ڵكو ده‌بێت مۆدێرن بكرێت، ئینجا به‌فلته‌ری ئه‌وروپیزه‌كردندا خۆرئاوایی بكرێت، ئه‌وسا دیموكراتی ئه‌كرێت، واته‌ به‌مشێوه‌یه‌یه‌: (ئه‌وروپایی بون، یانی مۆدێرن بون، مۆدێرن بون یانی خۆرئاوایی بون، خۆرئاوایی بونیش یانی دیموكراتی بون)، وادیاره‌ ئه‌م پرۆسه‌یه‌ وه‌ك خۆی له‌ (1923) ه‌وه‌ به‌ڕێوه‌ناچێت، سه‌دانجار توركیا تاقیكراوه‌ته‌وه‌، ئاقڵ نه‌بووه‌، چۆن؟.

 

خۆی پرۆسه‌كه‌و ده‌رگاكه‌ له‌ توركوت ئۆزاڵ (Turgut ozal) ه‌وه‌ ده‌ستی پێكرد، له‌ (1987) ده‌رگایه‌كی كرده‌وه‌ له‌گه‌ڵ خۆرئاوا، ئۆزاڵ له‌پێناو سیاسه‌تكرن و ڕاگرتنی باڵانسی توركیا له‌نێوان شه‌رق و غه‌ربدا، پارادۆكسێكی سه‌یری هه‌بوو، كه‌سێكی تورك و به‌ناسنامه‌ ئیسلامی بو، به‌ڵام فكرێكی نیۆ-لیبراڵی هه‌بوو، هه‌رئه‌وه‌ش وایئه‌كرد سه‌رنجی ئه‌وروپاو به‌تایبه‌ت به‌ریتانیا ڕابكێشێت (ماگرێت تاتچه‌ر دایكی نیۆلیبراڵیزم ه‌ له‌به‌ریتانیا) ..سه‌یره‌ موسڵمان بیت و نیۆلیبراڵ بیت!.ویسكی ئه‌خوارده‌وه‌و ڕێگه‌ی بۆ خواردنه‌وه‌ كهولییه‌كان خۆش ئه‌كرد، ئاخر ئه‌و هه‌موو بزنسمان و سیاسیی و گه‌شتیارو پیاوه‌ غه‌ریبه‌ دێنه‌ توركیا پێویستیان به‌ خواردنه‌وه‌و دیسكۆ و كڵه‌پ و جه‌وێكی وایه‌، تا وه‌به‌رهێنان و كاری ئابوریی بكه‌ن.توركیا له‌نێوان دوو فه‌زای جیاوازدا، شوێنێكی جوگرافی سه‌یری بۆخۆی داگیركردووه‌، بۆیه‌ له‌دوای مردنی توركوت ئۆزاڵه‌وه‌ باڵانس و نرخی خۆی له‌ده‌ستداوه‌ لای خۆرئاوا، به‌تایبه‌ت دوای هاتنی پارتی دادوگه‌شه‌ (AKP) بۆ ده‌سته‌ڵات، ، ، چۆن؟.

 

سه‌ره‌تای قه‌یرانه‌كه‌، له‌نێوان ئاك پارتی و ئه‌مریكادا، له‌وێوه‌ ده‌ستی پێكرد، په‌رله‌مانی توركیا ڕێگه‌ی نه‌دا سه‌ربازیی ئه‌مریكی له‌خاكی توركیاوه‌ هێرش بكاته‌ سه‌ر عێراق له‌ساڵی (2003) ..بۆ؟.زۆر هۆكار هه‌بون، یه‌ك له‌وانه‌ كۆمه‌ڵگه‌ی توركی ئه‌وكات به‌ئاشكرا پێیان وابوو، ئه‌مریكا هێزێكی داگیركه‌رو ئیمپریالییه‌، ئاك پارتیه‌ك له‌ (2001) دامه‌زراوه‌، له‌ (2003) ڕێگه‌ له‌ بڕیاری كۆنگرێس بگرێت كو ده‌بیت!!..ئینجا قۆناغی دوای ئه‌مه‌ " ئه‌حمه‌دی نه‌ژاد" هاته‌ سه‌رحوكم له‌ ئێران، ئه‌وه‌ی نه‌ژادی پێ ناسرابوو له‌ماوه‌ی (8) ساڵی ده‌سته‌ڵاتیدا، قسه‌یه‌كی باوه‌ كه‌ (ئیسرائیل له‌سه‌ر نه‌خشه‌ ئه‌سڕینه‌وه‌) ..هه‌ركاتێك كه‌وای ئه‌گوت، توركیا له‌گه‌ڵ ئه‌وه‌ی دوژمنێكی مێژوویی و مه‌زهه‌بی ئێرانه‌، یه‌كسه‌ر كه‌یف ده‌یگرتن و پشتگیریی نه‌ژادی ئه‌كرد..(دوور نییه‌ نه‌ژاد به‌پیلانی ئه‌مریكا وای نه‌گوتبێت تا توركیا تاقی بكه‌نه‌وه‌) ...ئینجا له‌دوای ئه‌مه‌ (عومه‌ر به‌شیر) جینۆسایدی ئه‌نجامدابو له‌سودان، پۆلیسی ئنته‌رپول به‌دوایدا ئه‌گه‌ڕا، كه‌چی به‌فه‌رمی سه‌ردانی توركیای ئه‌كرد...!!.ئه‌م به‌ششار ئه‌سه‌ده‌ی ئیمڕۆكه‌ ئه‌ردۆغان هه‌موو ڕێگه‌یه‌ك بۆ ڕووخانی ئه‌گرێته‌به‌ر، پێش (4) ساڵ ئه‌وه‌نده‌ هاوڕێ بوون، خۆیان به‌جیاو ژنه‌كانیشیان به‌جیا له‌ئیستانبوڵ به‌ یانه‌كاندا ئه‌گه‌ڕان..ئه‌گه‌ر تۆی خوێنه‌ر ئه‌وروپاو ئه‌مریكا بیت توركیا وه‌رئه‌گریت له‌ خۆرئاواو له‌یه‌كێتی ئه‌وروپا؟.ئه‌م توركیایه‌ت بۆ چییه‌؟.

 

ئه‌مه‌ بێجگه‌ له‌وه‌ی ئه‌ردۆغان له‌ (داڤۆس) كۆبونه‌وه‌كه‌ی به‌سه‌رئیسرائیلدا جێهێشت، له‌ (2009) ئه‌یگوت: ئیسرائیل مناڵی فه‌له‌ستینی ئه‌كوژێت، خۆشی مناڵی كوردی له‌خه‌ودا به‌تۆپباران ئه‌كوشت..!!.ئێستاش هه‌موومان سیدییه‌كه‌مان بینی به‌ده‌ست "مێركڵ" ه‌وه‌، ئه‌یگوت: ئه‌گه‌ر قسه‌بكه‌ن نیشانی جیهانی ئه‌ده‌م، كه‌به‌ئاشكراو به‌نهێنی و به‌هه‌موو ئامرازێك یارمه‌تی داعش ئه‌دا، ئه‌و داعشه‌ی خه‌ڵك سه‌رئه‌بڕێت.ئه‌و داعشه‌ی له‌خاكی توركیاوه‌ كۆبانی بۆمباران ئه‌كات، ، هه‌رچی هاوڵاتی ئه‌روپایه‌ لێی تۆقیون.ئێستا تۆخۆت ئه‌وروپاو ئه‌مریكا بیت توركیات ئه‌وێت، ئه‌مه‌ت بۆ چییه‌؟.ئه‌ندازیاری هه‌موو ئه‌م سیاسه‌تانه‌ش (داودئۆغلۆیه‌) به‌گوێره‌ی ووته‌ی خوێندكاره‌كانی له‌زانكۆ مامۆستایان بووه‌، ستراتیژبی سه‌رۆكوه‌زیران (ئۆغلۆ) له‌م ماوه‌یه‌یدا ده‌بێته‌ ئه‌وه‌ی بگه‌ڕێته‌وه‌ بۆ ڕۆژهه‌ڵات، سنوره‌كان بسڕێته‌وه‌، جه‌وله‌یه‌كی تر له‌حه‌شیش و ده‌ستوه‌ردان و قاچاخچێتی نه‌وت و گاز بكه‌نه‌وه‌، ئه‌مه‌ش ڕۆژهه‌ڵاته‌ له‌كه‌ناراوه‌كانی ده‌ریای سپی ناوه‌ڕاستدا، یه‌ك بست زه‌وی نییه‌ ناحه‌زی توركیا نه‌بێت له‌ (ئیسرائیل، میسر، قوبرسی یۆنانی، یۆنان، سوریا) ئه‌وسا ئێران و په‌كه‌كه‌و دۆسیه‌ی كوردو...تاد..ئه‌ردۆغان واتێگه‌یشتووه‌ جیهان یاغنیشه‌، چونكه‌ له‌ (2008) له‌زانكۆی قاهیره‌ ئۆباما وتی: جیهانی ئیسلامی سه‌رچاوه‌ی زانست و مه‌عریفه‌ بون و ئیسلام به‌شێكه‌ له‌ئه‌مریكاو (1200) مزگه‌وت له‌ (USA) هه‌یه‌ (كه‌ قسه‌كانی ئۆباما ته‌نها سڕكردنێك بو، نیشاندانی نیازپاكییه‌ك بوو، هه‌تا چه‌ند ئایه‌ت و حه‌دیسێكیشی شه‌رحكرد له‌وتاره‌كه‌یدا)، ، ، ، ئیتر ئه‌ردۆغانیش ئه‌ولاتر ڕۆیشت: " پێش كۆڵه‌مبۆس ئیسلام ئه‌مریكای دۆویوه‌ته‌وه‌..ئه‌وروپا تاپۆی مه‌سیحیه‌ت نییه‌و...تاد..."..سه‌ربڕین كلتورێكه‌ له‌ ده‌وڵه‌تی عوسمانییه‌وه‌ بۆ داعش جێماوه‌.

 

ئێستا حاڵی حازر خه‌ڵك له‌شوێنێك كه‌وتووه‌ و سیسته‌میش له‌شوێنێك.به‌و ئامارانه‌دا ده‌رئه‌كه‌وێت، توركه‌كان چ كاتێك ئه‌روپایان ئه‌وێت، سه‌یركه‌ن له‌ (2004) دا (73%) ی توركیا ده‌نگی داوه‌ توركیا ببێته‌ ئه‌ندام له‌ (EU) ..له‌ (2012) دا (23%) ی توركیا ده‌نگی داوه‌، چونكه‌ له‌و ماوه‌یه‌دا توركیا گه‌سه‌ندنێكی ئابوریی پێش چاوی به‌خۆیه‌وه‌ بینی، ئێستا (2014) یه‌ (52%) ده‌نگی داوه‌ كه‌توركیا ببێته‌ ئه‌ندام له‌یه‌كێتی ئه‌وروپاو، ڕێژه‌كه‌ جارێكی تر به‌رزبۆته‌وه‌، چونكه‌ ئه‌زانن ئه‌ردۆغان به‌ره‌و ده‌سه‌ڵاتگه‌رایی و شێوازێك له‌ دیكتاتۆریه‌ت ئه‌ڕوا.

 

 توركیا سێ ڕێگه‌ی له‌به‌رده‌مدایه‌

 

هه‌ڵكه‌وته‌ی واقیعی جیۆ-سیاسیی توركیا زۆر تایبه‌تمه‌نده‌ له‌جیهاندا، له‌لایه‌ك قوڕگی ده‌ریای سپی ناوه‌ڕاستی گرتووه‌، كێشه‌ له‌توركیا كێشه‌یه‌ له‌هه‌موو ئه‌و وڵاتانه‌ی ئه‌كه‌ونه‌ سه‌ر ئه‌م ده‌ریایه‌ك كه‌ (2، 5) دوو ملیۆن و نیو كیلۆمه‌تر چوارگۆشه‌ له‌سه‌ر زه‌وی ئه‌گرێته‌وه‌، له‌ باكوری ئه‌نادۆڵ و ئه‌وروپاوه‌ تا ئه‌كاته‌ باكوری ئه‌فریقاو وڵاتانی عه‌ره‌بی وه‌ك لوبنان و سعودیه‌و سوریاو میسر...تاد.له‌لایه‌كی تریش توركیا له‌نێوان ئاسیاو ئه‌وروپادایه‌، بگره‌ به‌شێك له‌جه‌سته‌و خاكه‌كه‌ی ئه‌وروپییه‌.ڕێگه‌یه‌كه‌ بۆ ئه‌وروپا.

 

توركیا هه‌موو شتێكی پارادۆكس و دوو ڕووه‌، بۆیه‌ هه‌میشه‌ ڕای سكۆڵه‌ر شیپ و چاودێرانی ڕۆژئاوایی له‌سه‌ر توركیا دوو به‌شه‌،

 

به‌شێكیان: پێیانوایه‌ ئه‌گه‌ر توركیا ببێته‌ ئه‌ندام له‌ EU ئه‌وا ئه‌وروپا ڕووبه‌رێكی زۆر گه‌وره‌ قازانج ئه‌كات و، به‌رفراوانتر ئه‌بێت.ئینجا تاكس و باج و سنور نامێنێت (بۆ ئه‌وروپا قازانج و بۆ توركیا زیانه‌ ئه‌مه‌یان) .ته‌نانه‌ت توركیا وه‌ك هێڵی پێشه‌وه‌ی ئه‌وروپا ئه‌بیننن، ئه‌گه‌ر توركیا نه‌بوایه‌ ئه‌بوو ئه‌وروپا دراوسێی ئێران و سوریاو عێراق بوایه‌..

 

به‌شه‌كه‌ی تریش، نه‌خێر توركیا سه‌ر ئێشه‌یه‌كی گه‌وره‌یه‌و، پێویست ناكات خۆرئاوا نزیك بێته‌وه‌ له‌ شێرپه‌نجه‌و هاتوهاواریی خۆرهه‌ڵاتییه‌كان، به‌تایبه‌ت توركیایه‌ك كه‌ به‌رده‌وام هه‌ردوو ده‌ستی له‌كوشتن و بڕین و ئاژاوه‌دایه‌، ئێمه‌ له‌بری خۆمان له‌سێبه‌ری ئه‌مریكا ڕزگاربكه‌ین، چۆن ئه‌بێت توركیاش زیاد بكه‌ین، توركیا له‌به‌رده‌م (3) ئۆبشندایه‌، له‌هه‌ر حاڵه‌تێكیشدا پێویستی به‌ هاوسه‌نگییه‌كی نێوچه‌یی و جیهانی هه‌یه‌:

 

یه‌كه‌م: گه‌ڕانه‌وه‌ بۆ ڕۆژهه‌ڵات، جارێكی تر داود ئۆغلۆ سنوره‌كان له‌نێوان وڵاتانی عه‌ره‌بی و شه‌رقیدا نه‌هێلێت و، جه‌وله‌یه‌ك له‌قاچاخچێتی نه‌وت و غازو حه‌شیش وده‌ست تێكه‌ڵكردن له‌گه‌ڵ تیرۆر و....تاد ده‌ست پێ بكه‌ن.ئه‌مانه‌ش وه‌ك كارتێك به‌كاربهێنن.بۆنمونه‌: ئازه‌رباینجان گازێكی بێشوماری هه‌یه‌ بۆ توركیا.هه‌رێمی كوردستان گه‌وره‌ترین گرێبه‌ستی بۆساڵی (2017) له‌گه‌ڵ توركیا كردووه‌.

 

دووه‌م: سوربون و دانشتن به‌دیار ئه‌وه‌ی ببنه‌ ئه‌ندام له‌ EU

 

سێهه‌م: سیاسه‌تێكی سه‌ربه‌خۆ و بێ ده‌ستوه‌ردان (كه‌ ڕوونه‌ جیهانی دوای جه‌نگی سارد و خێراتربونی گڵۆباڵیزه‌یشن كه‌س به‌ته‌نها ناتوانێت بژی) .

 

 

 

 


 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

 

 

 ساڵی (2008) باراك ئۆباما له‌ زانكۆی قاهیره‌، وتارێكی پێشكه‌شكرد، تیایدا چه‌ند ئایه‌ت و فه‌رموده‌یه‌كیشی به‌كارهێناو بۆی شه‌رحكردن. به‌گشتی ئۆباما وتی: ئه‌مریكا دوژمنی ئیسلام نییه‌، وه‌كو ئه‌و دڵه‌ڕاوكێیه‌ی كه‌دروستكراوه‌".

له‌وماوه‌یه‌دا (3) جار گوێم له‌م خیتابه‌ گرتۆته‌وه‌، چونكه‌ گه‌لێك ماناو ده‌لاله‌تی تیادایه‌ بۆجیهانی ئیسلامی و مرۆڤایه‌تی به‌گشتی و، به‌هه‌مان شێوه‌ بۆ ساڵانی دوای ئه‌م وتانه‌شی:

  • ئۆباما: ئیسلام به‌شێكه‌ له‌ئه‌مریكاو ئێستا 1200 مزگه‌وت له‌ناو (USA) دا بونی هه‌یه‌.
  • ئۆباما: جیهانی ئیسلامی سه‌رچاوه‌ی زانست و مه‌عریفه‌ بون. .

 (لێره‌ دا سه‌رۆكی (USA) به‌ زه‌مه‌نی ڕابردوو قسه‌ئه‌كات (بون) . . ببینه‌ حه‌سه‌ن به‌ننا وتویه‌تی: سه‌ركردایه‌تی دونیا به‌ده‌ست ڕۆژهه‌ڵاته‌وه‌ بووه‌، كه‌وتۆته‌ ده‌ست خۆرئاواییه‌كان، كاتی ئه‌وه‌ هاتووه‌ خه‌بات بكه‌ین جارێكی تر قیاده‌ی جیهان بكه‌وێته‌وه‌ ده‌ست خۆرهه‌ڵات ". . . !!.

  • ئۆباما: ئاینی ئیسلام، به‌شێكه‌ له‌مێژووی به‌شه‌ریه‌ت و ڕۆڵی گه‌وره‌ی بینیوه‌.

ئۆباما له‌ساڵی (2008) بۆچی سه‌ردانی میسر ئه‌كات؟. بۆچی له‌وكاته‌دا؟ بۆچی میسر؟. هه‌موو ئه‌زانین میسر له‌سه‌ده‌ی بیسته‌مدا دایكی نه‌ته‌وه‌یی عه‌ره‌ب بون، له‌گه‌ڵ سوریادا دوو پێگه‌ی گرنگ بوون به‌لای دونیاوه‌. میسر هه‌رخاوه‌نی نیل و كه‌ناڵی سوێس نییه‌، هه‌ر فه‌راعینه‌و شارستانییه‌ت نییه‌، هه‌ر گه‌وره‌ترین ڕوبه‌ری جوگرافی نییه‌، به‌ڵكو میسر هه‌ڵكه‌وته‌كه‌ی ئه‌فرۆ-ئاسیاوییه‌، له‌نێوان ئه‌فریكاو ئاسیادا، له‌ولاشه‌وه‌ هه‌موو ڕۆژێك ئیسرائیل شه‌كوا ئه‌كات كه‌ نه‌سیحه‌تی میسر بكه‌ن و ده‌خاله‌ت له‌غه‌ززه‌و فه‌له‌ستین نه‌كات. . سروشتی هه‌ڵسوكه‌وتی تاكی میسری زۆرجیاوازتره‌ له‌هی عه‌ره‌به‌كانی تر. . به‌جۆرێك هه‌میشه‌ له‌پشت ده‌سته‌ڵاته‌وه‌ وه‌ستاون بۆ هه‌ر كرده‌یه‌كی ده‌ره‌كی.

ئۆباما، مه‌به‌ستی سه‌ره‌كی ئه‌وه‌بو، نیازپاكی نیشان بدات به‌رانبه‌ر جیهانی عه‌ره‌بی وئیسلامی. په‌یامه‌كه‌ش له‌میسره‌وه‌ ئاڕاسته‌ی هه‌موو وڵاتانی ده‌وروبه‌ری ده‌ریای سپی ناوه‌ڕاست بكات.

به‌شێكی گرنگی تر له‌م وتاره‌، تێزی ئه‌و بوو به‌رانبه‌ر چۆنیه‌تی ڕێكردن له‌به‌رداشی دیاناته‌كان و مۆدێرنیتی و گه‌شه‌سه‌ندنه‌ یه‌كله‌دوای یه‌كه‌كاندا. لێره‌دا به‌بڕوای من فیڵێكی گه‌وره‌ی كرد له‌جیهانی ئیسلامی. . به‌وه‌ تێپه‌ڕی كه‌ ئێوه‌ ئه‌توانن هه‌رسێ كرده‌كه‌، ئه‌نجام بده‌ن وه‌كو ئاین و مۆدێرنیتی و گه‌شه‌سه‌ندن، نمونه‌ی وڵاتی " دوبه‌ی" شی هێنایه‌وه‌. . له‌گه‌ڵ چه‌ند شوێنێكی كریستیان. .

وه‌لێ، هه‌موو ئه‌م شتانه‌ی له‌م جیهانه‌دان، ناكۆكییه‌ له‌نێوان مادده‌ (ماتریال) و ئایدیال (خه‌یاڵ) دا. ئه‌وه‌ی له‌ناكومه‌ڵگه‌دایه‌ بریتی یه‌ له‌مادده‌، كه‌ ئیلهامه‌كه‌ی له‌خه‌یاڵ یان میسالیه‌تێكه‌وه‌ وه‌رگرتووه‌، خۆرئاوا ئێستا نوزه‌ی له‌خه‌یاڵ و میسالیه‌ت بڕیوه‌، كه‌پێشدا بۆخۆی زیانه‌. هه‌موو ژیانی كردووه‌ به‌مادده‌یه‌كی ڕووت.

له‌ژێر ڕۆشنایی ووته‌كانی ئۆبامادا، پرسیاره‌ سیاسیه‌كانی من (وه‌ك توێژه‌رێك كه‌له‌كاتی نوسیندا نه‌شه‌رقیم و نه‌غه‌ربیم و نه‌دین و حزب و لایه‌ن ده‌ستم تێوه‌رئه‌دات) . . بۆ ساڵانی دوای (خیتابه‌كه‌ی) ئۆباما له‌ (2008) :

یه‌كه‌م: به‌هاری عه‌ره‌بی چی بو؟. كێ ناوی نا؟. جیهانی عه‌ره‌بی به‌ره‌و كوێ؟.

دووه‌م: ئایا له‌سه‌ره‌تای سه‌ره‌تاوه‌، دروستكردنی داعش بۆ میسر نه‌بوو؟؟. هه‌روه‌كو ئێستا توركیاو میسر له‌ناكۆكی گه‌رمدان، داعش به‌ره‌و به‌رزاییه‌كانی سینا ئه‌ڕوات و شه‌ڕی له‌گه‌ڵ میسر دروستكردووه‌!!.

  • ده‌قی وتاره‌كه‌ی ئۆباما له‌م لینكه‌دایه‌ له‌میسر (Cairo University) :

https://www.  youtube.  com/watch?v=B_889oBKkNU

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.

 

Go to top