We have 150 guests and no members online

تابلۆ حەسەن

لە ئاو خەمبار تری.. تابلۆ حەسەن

لە کوردستانەوە بەرەو کوردستان

 باڵدەگری و دەفری

 بە بەرچاوتەوە دەبینی

 هۆزەکان تێدەپەڕن

کاروانەکان تێدەپەڕن

باریان هەتیو و بێوەژنە

تۆش لە ژێر ئاسمانێکی دوور

هەست دەکەی،

تەنیایت و تەنیایت

تاقە دایکێک شک دەبەیت و

دەیان باوک

لەوێوە دەبینی:

 ئاوارەکانی وڵاتە بێنازەکەت

دوور لە بەرامەی کێڵگەکان و

هەناسەی کانیاوەکان

لە ژێر گەرمی لمی بیابان خنکاون

تۆش لە وڵاتی ئەڵمان

تەنیا، دوور لە نیشتمان

خنکاوی ژێر تەوژمی ئازارەکان

تۆ لە ئاو خەمبارتری تابلۆ

تۆ لەم غوربەتەتدا،

هیچ شتێک شکنابەیت

هیچ شتێک

جگە عەزمی پێشمەرگە و خوێنی شەهیدەکان

بەیاننامەکان بێزارت دەکەن

قسەی قۆڕی مەسئولە دۆڕاوەکان

قسەی بیرقوباقی،

لاپەرە زەردەکان

وێنەی سەر شاشەکان

تۆ تاکێکی؟

زەمەنت غەریب و

شوێنت غەریب

 

****************************

ئەوەندە بێکەسی تۆ

دیالۆگ لە گەڵ فرچەی ددانەکانت دەکەی

باسی تەنیایی خۆتی بۆ دەکەی

، بە شانەکەی دەستت

 لە سەر هەڵم شیعر دەنووسی

لە سەر ئاوێنەکەی بەردەمت

وەسیەتنامەکەت دەنووسی

 ئەرێ ئەوە چی دەکەی تۆ

دەموچاوت دەشۆی یان رۆحی کۆچەریت؟

 وا دەبینم بە پەنجە ماندووەکانت

لە سەر کەفی سابوونەکە

وێنەی گۆرەکەت دەکێشی!!

ئاوی بۆڕیەکەش هەردێت هەر دێت

 خۆتیش لە ئاوەکە خەمبارتر

****************************

ئەروانیتە چەپوڕاستی خۆت

هیچ نابینیت نا

نە سەدای دەنگێک نە دەموچاوێک،

نە تاریکی، نە ڕوناکی

بەڵام بە چاوی خەیاڵ

منداڵێکی پیر دەبینی

پیرێک دەبینی،

 هێشتا منداڵی لە سیمایدا بەرجەستەیە

ئازاری ناو زیندانەکان دەبینی،

کڕوکپی نێو گۆڕەکان دەبینی

تۆ لە دانگرتن پەستری و

لە ئاویش خەمبارتر، ، ، تابلۆ


 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

خانمەکەم ئەوەی تۆ دەیکەی ستەمە!!

ئەو هەمو گۆشتە دەرخواردی سەگەکەت دەدەیت و

میللەتانی دونیا ئێسکشیان دەستناکەوێت!!

هەمو رۆژێک سگەکەت بە شامپۆ دەشۆی و

میللەتی ئێمەش لە گۆمی خوێندا مەلە دەکا!!

سەگەکەی تۆ لە باوەشی نەرمتا ئۆقرەی گرتووە و

بۆنی سێوی باخەڵت دەکا،

جارجاریش ماچێکی نێو دەمت دەکا!!

کەچی میللەتی ئێمە،

بۆنی تەرمەکان کاسی کردوون !!

ئەرێ پێم ناڵێی کێن ئەمانە تابلۆ خان؟

بەڵێ میللەتەکەی من

ئەها میللەتەکەی تۆ !!

ئەوە کەی رەوایە تابلۆ :

چی تێدایە گەر من نازی سەگەکەم هەڵگرم. .

برۆ دادە برۆ،

لۆمەی من مەکە،

لۆمەی میللەکەی خۆت بکە

ئەوان ڕەشمەی خۆیان دەدەن بە مالکی و عەبادی.

گەر من ناز دەدەم بە سەگی خۆم،

ئەوان کورسی حوکم دەدەن بە سەگی بەغدادی.

 


 

 

 

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

روبە بە هەموو ڕووی ڕەشی و شۆفۆنیزمی خۆیەوە کۆبانی و زووربەی زۆری شار و شاروچکەو گوندەکانی ڕۆژهەلاتی سەربەرزی بە سیاسەتی پشتوێنەی سەوز( الحزام الاخضر) گریدا، ئەو سیاسەتەی بەعسیەکانی سوریا ئەنجامیاندا دیوی دووەمی دروای سیاسەتی تەعریبی عێراقە.

بەعسیەکانی عێراق ناوچە سنوری و ناوچە دەوڵەمەندەکانی کوردستانیان دەکردە ژێر چەقۆی تەعریب بەدەرکردنی کورد لە شار و شاروچکەی باپیرانیان و هاوردەکردنی عەرەبی پێپەتی لە شوێنە دوورەکانەوە و بە کۆمەڵێک ئیمتیازاتەوە نیشتەجێی شارەکانی وەکو کەرکوک و شنگال و خانەقین دەکرد

ئەما قەلەرەشەکانی سوریا بەشیوەیەکی دیکە هەمان کاریان ئەنجام دەدا، ئەوان هەموو شارو گوندێکی ڕۆژئاوای کوردستانیان بە چەندین گوندی عەرەبنشین دەتەنییەوە بۆ ئەوەی ئەو هەرێمە پارچەیەکی تەواوی کوردی نەبێت، بۆ ئەوەی کورد نەکارێ بێژێت ئەم هەرێمە پارچەیەکە لە کوردستان، یان شارو گوندە کوردییەکان نەتوانن بێن بە هانای یەکترییەوە وەکو ئەوەی ئیستا دەیبنین کاتێک گەلە گورگی عروبە لە ژیر چەتر و پەرچەمی ئیسلامەوە هێرشی دڕندانە دەکەنە سەر شارەکانمان بۆیە ئاستمە شارەکانی بێنە هانی کوبانیەوە ئێستا.         

یەکیک لەو وانانەی کە کورد دەبێت هەرگیز فێری بێت و لە بیری نەکاتەوە وانەی پشت بەستنە بەخۆوە کە چەندین جار ئێمە تاڵاوی ئەم وانەیەمان خواردۆتەوە، ئازیزان بروانن ئیمە چەند تەنییان لەو کوبانییە :

 

حکومەتی سوریا کە نزیکە لە یەپەکەو بە هاوپەیمانی خۆی دەزانێت تەنها وەکو سەیرکەرێکی فلیمەکە دەردەکەوێت لە کاتێکدا دەیتوانی بە هەمو شێوەیەک دەستی یارمەتی درێژ بکات وەکو ئەوەی لە ئاسمانەوە پەلاماری هێرشبەران بدات هەر ە ئاسمانیشەوە خواردەمەنی و تەقەمەنی بگەیەنێتە بەرگریکەرانی کوبانی .

تورکیا کە لەلایەکەوە خێری کوردی ڕژاوەتەوە سەر و لە لایەکی دیکەوە خۆی بە ئەندامی هاوپەیمانی نێو دەوڵەتی دژە تیرۆر دەزانی کەچی بوو بە فاکتەرێکی نەرێتی لەم مەسەلەیەدا، تەنانەت هەندێک جار موشەکێک یان دووی داعش دەکەوێتە نێو سنوری (تورکیا) وە بەڵام دیسان حکومەتی تورکیا وەڵامی ئەو کارە نادەنەوە نەوەك ئەو وەلامەیان بەرنامەی داعش دژ بە کۆبانی تێک بدات لە هەمان کاتدا ڕێگە نادات پیشمەرگەی باشوور خاکی تورکیا بەکار بێنێت بۆ ئەوەی بچێتە هانای برا گەریلەکانیانەوە، ووتارەکەی ئەردۆگان زۆر ڕوونە کاتێک داعش و پەکەکەی لەیەک خانەدا چەقاند: دوژمن هەر دوژمنە!!!!

ئەی فشوهوڕەکانی ئۆبامای سەرۆکی ئەمریکا کاتێک کە هەرەشە لە تیرۆر دەکات، کاتێک تاکێکی ئەمریکی سەردەبڕیت لە لایەن داعشەوە دارو بەردی ئەمریکا دێتە وەڵام و کەفوکۆڕی هەڕەشەیان دەگاتە ئاسمان بەڵام کاتێک سەدان هەزار کورد لە کۆبانی بەرگری لە ژیان دەکەن و لەبەرامبەریشدا داعش دەیەوێت بە چەقۆی تاوان بنبڕیان بکات ئەمریکاش دیسان وەکو تورکیای هاوپەیمانی تەنها سەیرکەرێکە، هەتا داعش لە دەورو بەری شاری کوبانی بوون فڕۆکەکانی هاوپەیمانەکان هیچ هێرشێکیان نەبردە سەریان بەڵام کاتێک کە دڕندەکانی عروبە و ئیسلام خزانە ناو کوبانی وشەر بوو بە شەڕی دەستەو یەخە ئەوجا لە میدییاکانەوە دەبیستین ئەو فڕۆکانە جارێک یان دوو جار هیرشیان بردۆتە سەر چۆڵایەکانی دوور و پشتی شار و دەڵێن گوایە هەمەڕێک یان چەند داعشێکیان کوشتوە (دەگ خوا بەرەکەت نەدات)، ئاخر ئا ئەمەیە نیفاقی سیاسەتی نێو دەوڵەتی .

ئەنجامی ئەم هێرشانەی دەعش هەرچیەک بێت خەڵکی خۆڕاگری کۆبانی سەرکەوتنی پێشوەختیان بەخوێنی جەستەو هێزی بازوو و ئارەقەی ناوچەوان تۆمار کرد بۆیە ئێمە ناڵین هەموومان کوبانین بەڵکو دەڵین دەبێت هەموومان کوبانی بین :

بژی کوبانی: بژی کورد.

 

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌. 

ئەی دایکانی خەمبار،

 ڕەنگە شەوگار گەلێک درێژ بێت،

پێشئەوەی لە گەشتی دووری بگەڕێتەوە،

 گۆرانیەکان لە لوتکە بەرزەکاندا ووشک دەبنەوە،

 سووردەکانیش لە گۆنای قەت پاڵەکاندا وون دەبن،

 وەرن دڵوپە فرمێسکێک بسڕنەوە،

کە لە چاوی منداڵێکی کورد دێتە خوارێ.

تف بکە ڕوو و عەمامەی پیاوە ڕەشەکان،

بۆ ئەوەی خەمی ووڵاتەکەمان بشۆینەوە،

 زۆر چاوەڕوان مەبن،

ڕەنگە ڕێگاکان پڕ تارمایی بن،

 ڕەنگە تاریکی گێڵگەکان بخواتەوە،

 دەڕەدێوێک وون دەبێ و

 لەسەر پشتمان دەرەدێوێکی دی دەردەکەوێت،

 تا شەهید لەگەڵ گزنگی بەیاندا دەردەکەوێت،

 کوردستان بەهەوری خەما تێدەپەڕێت،

 لە لوتکەی کێوەکاندا دەگەڕێت،

 بە دوای ڕوحی قارەمانەکان،

کاتێکیش شەهید سەرهەڵدەبڕێت،

 دیسان پەنجە درێژ دەکات،

 بۆ پەلەپیتکەی تفەنگ،

 کێوەبەرزەکان پر بە گەروو هاوار دەکەن،

 وا گەڕایەوە

 پێدەشت و هەردەکان،

 بەدەم گۆرانی ووتنەوە

دەڵێن

وا دیسان گەرایەوە . . .

زۆر چاوەروان مەبن

 ڕەنگە کاتێک هەتاو لە ناو چەقی ئاسماندا ئۆقرە دەگرێت،

 شەهید دیسان سواری ئەسپەشیکەی دەبێت و

 سەر لە نوی سەرقافڵەی خەبات دەگرێت و

 کاتێکیش لەسەنگەرەکانی پێشەوە،

 دیسان ڕوح دەبەخشیت بە کوردستانەکەی،

 لەو کاتەدا هەتاوە دیلەکەمان چاوی هەڵدەکڵۆفێت و

لە خەوی هەزار ساڵەی دەردەپەڕێت . . .

چاوەروان مەبن زۆر،

ئێمە نازانین لەم کاروانە درێژەماندا،

 چەن دیوار و تاشە بەردمان دەتەقێتەوە،

 مەراقی چەند پرسیار،

 لەنێو سەرماندا لەق دەبێت،

چەند دڵۆپە فرمێسکمان،

لە ئاسۆکاندا گەش دەبێتەوە .

تابلۆ حسن:ماستەر لە سایکۆلۆژی

 

 

 

ئەمانەی ئێستا لە ژێر ناوی داعش پەیدا بوون هیچ وێنەیەکیان بەدیناکرێت لە هیچ شوێنێکی دونیادا ، بۆ دۆزینەوەی وێنەیەکی ئەمانە ناچار مرۆف بخزێتە سەردەمە تاریکیەکان ڕەنگە هۆلاکو و تەیمور لەنگ وهاوشێوەی ئەمانە بن ، لاپەرەکانی مێژوو بۆمان دەگێرێتەوە دەڵێت کاتێک ئەمانە بەغدادیان داگیر کرد ئەو بەغدایەی کە لەو سەردەمەدا گرنگترین پایتەختی ئەم جیهانە بوو ئەوەندە کتێبیان فڕیدایە ناو ڕووباری دیجلەوە تا دیجلە ڕەنگی مەرەکەبی نوسینەکانی بە خۆوە گرت، زەمەن زەمەنی عەباسیەکان بوو ئەو خەلیفەی کە لەبەغداد دادەنیشت نمایندەیی پێغەمبەری ئیسلامی دەکردو لەهەمان کاتدا سێبەری خودا بوو لەسەر زەمیندا، حوکمداری هەموو ئیسلامی دەکرد لە جیهاندا ئا ئەو خەلیفەیە لە گرتنی بەغدادا وەکو دیلێک کەوتە بەردەستی هۆلاکۆ، هۆلاکۆ فەرمانی دا پاسەوانەکانی کە تاچەند ڕۆژێك هیچ جۆرە خواردن و خواردەمەنیەکی نەدەنێ بۆیە دوای چەند ڕۆژێک خەلیفە بەو عەزەمەتییەی خۆی دوای خواردنی لە پاسەوانەکان کرد، ئەو کات هۆلاکۆ فەرمانی دا کە خەلیفە بێننە خزمەتی کە هێنایان هۆلاکۆ ووتی برسیتە؟ ئەویش لە وڵامدا ووتی بەڵی ، چەند ڕۆژێکە خواردنم نەخواردوە هەر ئەو کات هۆلاکۆ فەرمانی دا کە سینیەک خواردن بڕازێننەوەو بۆی بهێنن پاسەوانەکان سینیەکیان بۆی هینا کە جۆرەهای دوڕو گەوهەروو زێڕ و ئەڵماسی تێدا بوو دایان نا لە پێش خەلیفە

هۆلاکۆ ووتی فەرموو بخۆ،

خەلیفە ووتی قوربان من جۆن ئەمانە بخۆم من پێویستم بە نانە من برسیمە

هۆلاکۆ پێی ووت،

دەی کە ناخورێت بۆچی ئەم هەمو جەوهەر وئەڵماسەت کۆکردۆتەوە، بۆچی ڕۆژیکت باشە!،

هەر هۆلاکۆ لە درێژای قسەکانیدا ووتی،

تۆ دەتوانی بەم هەموو ئەڵماس و مجەوهەراتە سوپاکەت بەهێز بکەیت، بۆ ئەوەی بەرگری لە بەغداد بکەن و تۆش بە دیلی نەکەویتە بەر چنگی من،

ئەمەی ووت و خەلیفەی لەناو زیندانەکە بەجێی هێشت تا بەدیار دڕو گەوهەرەکانی خۆیدا گیانی لەدەست دا.

ئایە دەکرێت ئێمە سود لەم پەندە وەربگرین ؟!

 

 

 

Go to top