We have 41 guests and no members online

شێنێ بەکر

 

 

 

ڕووداوەکانی کوشتنی ژنان لە کۆمەڵگای ئێمەدا نامۆ نین.مریەم، ساکار، گوڵان، کوردستان، جووتە خوشکەکەی چەمچەماڵ، خوشکەکانی سەید سادق و دەیان ژن و کچی تر بوونەتە قوربانی بە بیانووی نامووسپارێزی.بەڵام هیچکام لەو رووداوانە هێندەی ئەوی "دوعا" و ئه‌و‌ی هەفتەی ڕابردووی "دنیا" کاریان لە شەقام و هەستی تاکی هەستیاری کورد نەکردوو و گۆمی بێدەنگیی لایەنە پەیوەندیدارەکانیان نەشڵەقاند.لەگەڵ ئەوەیشدا پیناێ هێشتا لە پەیام و زەنگی ئەو دوو تاوانە گەورەیە گەیشتبین.

ڕۆژانی رابردوو، کاتێ تاوانی وەحشیانەی کوشتنی ژنێکی 15 ساڵان دوای تاوانی دوو جار بە شوودانی هەموومانی ڕاچڵەکاند، چالاکانی مافەکانی ژن و مرۆڤی کورد لە سەرتاسەری کوردستان و وا لە هەندێ دەوڵەتانی ئەوروپایشدا لە دژی ئەم زنجیرە تاوانە هاتوونە دەنگ.خاڵە سەرەکییەکانی ئەم خۆپیشاندان و کەمپین و چالاکیانە داوای دۆزینەوەی بکوژەکەی "دنیا" و ئەو کەسەی کە مارەی کردوەو کارکردن بۆ بنبڕکردنی دیاردەی ژنکوژییە و هەندێکیشیان چەند میکانیزمێکییان پیشنیارکردوە.

هەڵبەت لە دوای تاوانی وەحشییانەی کوشتنی دوعا، گەلێک هەنگاو نراون، بەڵام دەبێ دان بەو راستییەدا بنێین کە هەنگاوەکان لە ئاست تاوان و دیاردەکەدا نەبوون، چونکە نکوڵی ناکرێ کە لە دوای دوعا دەیان ژن و کچ ی تر کوژراون، یان خۆیان سووتاندوە.حکومەت و ڕێکخراوەکانی کۆمەڵگای مەدەنی و ڕێکخراوەکانی ژنان و ئافرەتان کە حزبەکانیان خاوەنی چەندان رادیۆو کەناڵی تەلەفزیۆنن، شکستیان هێناوە لە دانانی بەرنامەیەکی درێژخایەن و تۆکمەی هۆشیاری بۆ تەحریمکردنی توندوتیژیی خێزانی و کوشتنی ژنان لە ڕێگای کەناڵەکانیانەوە کە دەگەنە هەموو مالێکی کوردستان.ئەوقاف و زانایانی ئاینی ئیسلام شکستیان هێناوە لەوەی بە بە رەسمی و بە دەرکردنی فەتوایەک لە خەڵک بگەیەنن کە تاوانەکانی ژنکوژی بەپشتیوانیی ئاینی ئیسلام شەرعی نین، باوک و براو هاوسەرو کەسوکار مافیان نییە بە ناوو پاساوی جێبەجێکردنی حەددی شەرعی، ژن بکوژن.تائێستا زانایانی ئاینی ئیسلام ئامادەیی جەستەیی کچ دەکەنە پیوەر بۆ مارەکردن و لە ڕچاوکردنی ئامادەیی عەقڵی و دەروونیدا بۆ هەڵگرتنی بەرپرسیارێتیی خێزان شکستیان هێناوە.پەروەردەو خوێندنی باڵا شکستیان هێناوە لەوەی لەناوەندەکانی خوێندندا منداڵان و گەنجان لەم تاوانانە هۆشیاربکەنەوە.دادگاکان و سیستمی داد شکستیان هێناوە لەوەی تاوانکارانی ژنکوژ سزایەکی وەها بدرێن تا ببنە وانە بۆ ئەوانەی کە لە ئایندەدا زات نەکەن بیر لە کارێکی وەها بکەنەوە و لێبوردن نەیانگرێتەوە.

هەر شکستی ئەم ناوەندو ڕیکخراووو دەزگایەنەیە، وای کردوە رۆژی 29 ی مایس 2014 کەسوکاری بکوژی راستەوخۆی "دنیا"ی 15 ساڵ جورئەت بکەن و ماف بە خۆیان بدەن، بێنە سەر شەقام و داکۆکی لە کوشتنەکە بکەن.ئەوان لەسەر شەقام و بەردەم زوومی کامێراکاندا هێندە بی ترس و بێ باک دەردەکەوتن وا هەستت نەدەکرد ئەوەی بەهای مێینە بێ لەناو ئەو خێل و کۆمەڵگایەدا هەبێ.ئەوان داوایان دەکرد "شۆلەکە گەورە نەکرێ [چونکە] لەسەر نامووس بووە".یان دەیانووت "ئەمە قبوڵ ناکرێ و ئێمەیش بووینایە هەر وەهامان دەکرد".لە لایەکی تریشەوە هێندەی لە خەمی ناوبانگی ئەو وێرانەیە "کەلەکچی"دابوون، هێندە لە خەمی بەهاو ژیانی مێینەدا نەبوون.ئەمانە لە وتەی ڕیش سپی و بەناو ڕوولەخواو ژیر و خاوەن هۆش و عەقڵەکانیان بوون.

ئەم دەرکەوتن و داکۆکیییەی کەسوکاری بکوژەکەی "دنیا" بە ئاشکرا هەمان ئەو پەیام و زەنگە مەترسیدارەی "دوعا" دایەوە بە گوێماندا کە کاتی خۆی نەمانبیست: "گەلەکۆمە بۆ کوشتنی مێینە بە بیانووی نامووسپارێزی".

جا کارەساتی گەورەتر لە کوشتنی هەر مرۆڤێک، لێرەوە دەست پێدەکات.بەربڵاویی ئەم عەقڵیەتە دواکەوتو و وەحشیگەرە زەنگێکی مەترسیدارەو پەیامیکی سانا نییە نادیدە بگیرێ.ئەو دڕندانەی بۆ داکۆکی لە کوشتنی دنیا هاتوونەتە سەر شەقام و بەیاننامە دەخوێننەوە، پێمان دەڵێن ئامادەیان تێدایە "دنیا"کانی تریش بەهەمان دەرد ببەن.ئەوان بە ئاشکرا دەڵێن هیچ مێینەیەک لە ناویاندا سەلامەت نییەو هەمان چارەنووس چاوەروانی دەکا.بۆیە پێناچێ تەنها هاوسەرە 45 ساڵەکە لە تاوانی قیزەونی کوشتنی "دنیا"ی 15 سالەوە گلابێ.زۆر ڕێی تێدەچێ ئەو هەموو دڕندە مێشک داڕزیوانەیش هاندەری تاوانەکە بووبن.جا بۆ پاراستنی ژیانی میینەکانی تری کۆمەڵگای کەلەچی و دەستەبەرکردنی دادپەروەریی تەواو پێوستە سنوور و سەقفی لیکۆڵینەوەو لێپیچینەوەکان فراوانبکرێن و هەر یەک لەو کەسانە بگرنەوە کە لەو داکۆکییەدا دەرکەوتوون.سەرجەم لایەنە پەیوەندیدارەکان بەجددی کار و لێکۆڵینەوەی ورد لەسەر ئەم پرسە بکەن و داکۆکی کردن لە تاوان دەبێ شەرمەزار بکرێ.

This email address is being protected from spambots. You need JavaScript enabled to view it.

 

 

 

 

لەماوەی تەنها 48 سەعاتدا ژنێک لە دهۆک بە 15 گوولە دەکوژرێ و تەرمی فڕێدراوی دوو خوشکی پاکیزەی بێسەروشوێنکراو لە سلێمانی دەدۆزرێنەوە. بەداخەوە لەم کۆمەڵگا نێرسالارەی ئێمەدا هەفتەیەک تێناپەڕێ ژنێکی تێدا نەکرێتە قوربانیی بیری بۆگەنی نامووسپارێزی. هەفتەیەک تێ ناپەڕێ ئەهریمەنەکان باڵی فریشتەیەکی تێدا نەبڕن و جەستەی ئەنجن ئەنجن نەکەن.

کۆمەڵگایەک لە لایەکەوە خۆی بە خاوەنی زیاتر لە 5000 مزگەوت، 30 زانکۆ و پەیمانگا، سەدان دەزگای ڕاگەیاندن و چاپخانەو خانەی چاپ و بڵاوکردنەوە، لەشکرێک لە مامۆستاو خوێندکاری زانکۆکان، لێشاوێک لە میدیاکارو رۆژنامەنووس و نووسەر، هێردێک لە خۆ بە ڕوناکبیرزان و مافخوازو هەلسوڕاوی کۆمەڵی مەدەنی و سیاسی دادەنێ و شانازییان پێوە داکات، کەچی لەلایەکی ترەوە تاوانگەلێکی دژ بە ژنی بەو ڕێژەو بەو دڕندەییەی تێدا ڕوودەدەن. ژنان وەکو ورچ و گورگ و بەراز دەکوژرێن و لاشەکانیان فڕێ دەدرێن.

ئاخر پێمان ناڵێن کارو پەیامی مزگەوت و زانکۆو ڕێکخراوو راگەیاندنەکانتان چین؟! پێمان ناڵێن دەستکەوتەکانتان لە بنەبڕکردنی ستەم دژی ژندا کامانەن؟! کۆمەڵگایەک لە هەناوەوە هێندە داڕزابێ، مەلاو پرۆفیسۆر و رۆژنامەنووس و چالاکانی ماف و کۆمەلگای مەدەنیی تێیدا چ ئەرزشێکیان هەیە؟! نمایش و خۆ نواندن ڕووپۆشکردن ئیتر بەس نییە؟! کاتی نەهاتووە دان بە شکستەکانتاندا بنێن، یان بچنەوە ماڵەکانی خۆتان و دەست لە یەخەی کۆمەڵگەیش بەردەن، یان بە کردەوە ئیتر دەست بە ساڕێژکردنی برینەکان بکەن؟!

شەرمەزارییە لەچاوی کامێراکانەوە پروپاگەندەی پێشکەوتن و مافەکانی مرۆڤ دەکەن، کەچی لەولاوە ژنکوژەکانی وەکو سالە مزەلی و دەیانی ژنکوژی تر لەسەر بنەمای سوڵحی عەشایەری ئازاد دەکەن! ئەم سوڵحە عەشایەریەی کە کردووتانەتە مەرج بۆ لێبوردنی تاوانکاران، ڕۆژ بە ڕۆژ ژیانی ژنانی بێ تاوان دەدوورێتەوەو شکۆی دادو دادوەریتان وردوخاش دەکات. یاساو دادوەری چ بایەخێکیان دەمێنی کە نووچ بۆ سوڵحی عەشایەری، واتا حەزی وەحشییانەی تاوانکردنی ئازادانە و بێ لیپرسینەوەی پیاو، بدەن!

گرفتی ژن لە کۆمەڵگای ئێمەدا پێوستی بە هەنگاوی کردەیی هەیە. با ڕیکخراوو ناوەندە پەیوەندیدارەکان دەست لە دەرکردنی بەیاننامەی شەرمنانەو ناڕەزایی دەمامکدارانە هەڵگرن. با حکومەت دەست لە بەهەدەردانی بودجە بۆ هەفتەو وەرزێکی دیاریکراوی بەرەنگاربوونەوەی توندوتیژی هەڵگرێ. ژیانی ژن بە دەرکردنی بەیاننامەو خۆ نیشاندان و قسەی زلی سەرپشت مایکرۆفۆن و تەلەفزیۆن و سیمیناری هۆڵە داخراوەکان ناپارێزرێ. ئەم قەسابخانەیە پێوسیتی بە هاتنە مەیدان هەیە. پێویستی بە هاتنە دەنگی لیژنەکانی فتواو داواکاری گشتی و حکومەت هەیە. پێویستی بە قسەلەسەرکردنی بەردەوامی مامۆستایانی ئاینی و مامۆستایانی زانکۆو رۆژنامەنووس و سەرجەم تاکەکانی کۆمەڵگا هەیە. لەجیاتی ساڵی هەفتەیەک، دەبێ دەزگای هۆشیاری دژی توندوتیژی دابمەزرێ. دبێ ئەم دەزگایە ڕێنمایی هۆشیارکردنەوە ئامادە بکات. ڕۆژانە کەناڵەکانی ڕاگەیاندن ڕێنمایی و پەیامی هۆشیارکردنەوە بە گوێی گوێگرو چاوی بینەرو خوێنەراندا بدەن. دەبێ سوڵحی عەشایەری وەکو مەرجی لێبوردن هەڵبوەشیتەوە. دەبێ ئەنجامی حوکمی تاوانکارانی ئەم تاوانانە بۆ خەڵک ئاشکرا بکرێن. دەبێ ئەم تاوانانە لە تاوانی کەسییەوە بکرێتە تاوانی گشتی و دژی کۆمەڵگاو داواکاری گشتی دۆسیەکانی بجولێنێ. دەبێ هەر کەسێک بەنیازی تاوانێکی لەوجۆرە بێ، دڵنیابێ سزای توند دەدرێ و لێخۆشبوونی نییە.

 

This email address is being protected from spambots. You need JavaScript enabled to view it.

 

Go to top